A Tekingel a Dios Ngar er Ngii a Lerellii er a Chelsel a Klengar er Kau?

A omengiuel a Biblia er a bek el sils a sebechel ngosukid el mo “ulak” e mo “mesisiich el oumerang.” (Kol. 2:6, 7) Engdi a bo el sebechel a Tekingel a Jehovah el ngar er ngii a lerellii er a chelsel a klengar er kid, e ngkired el mo omtab e oltaut a omellach er ngii. (Heb. 4:12; Jak. 1:22-25) A Josua 1:8 a olecholt er a kmal ungil rolel a donguiu er a Biblia er kid: (1) Monguiu er a Tekingel a Dios er a “llomes ma klebesei.” (2) ‘Mosuub er ngii’ el belkul a kmo ke menguiu er ngii me bo el sebechem el melebedebek e dirrek el melatk er a basio me a tekoi el monguiu el kirel. (3) Bo leblak a rengum el oltaut “a bek el tekoi el llechukl er a chelsel.” E a bo dekerekikl el oltaut aika el ulekrael e ngmo rullid el ‘di mo ungilbesul a ikel rokui el doruul’ er a bek el sils.