Di Mklekar—E le Satan a Soal el Mo Mesisiich er Kau!
“Di mklekar! A cherrouiu, el Diabelong, a omibais el mol mei el ua ongumk el laion el osiik er a bo lomerkakl er ngii.”—1 PE. 5:8.
NGMILEKERANG A SATAN E OCHOTII EL KMO NGKMAL . . .
mesisiich?
rasechebeab?
cheblad?
1. Ngmilekerang a anghel e mlo Satan?
NGIKA el anghel a mle ungil a deleuill er ngii me a Jehovah er a kot el uchul. Engdi a uriul e ngmlo soal a rechad a bo longull er ngii. Ngikang a dimlak leterebengii tia el mekngit el uldesuel, me a cherengel a taem e ngmlo er a klengit. (Jak. 1:14, 15) Ngdiak dodengelii sel mera el ngklel, engdi chelechang e kede omekedong er ngii el kmo ng Satan. A Satan a “dimlak lolemolem el ngar er a klemerang,” e ulemtok er a Jehovah me ngmlo “demal a bek el blulak.”—Jn. 8:44, NW.
2, 3. Ngera kede suubii el kirel ngike el kot el mekngit el cherrouel a Jehovah el oeak a tekoi el “Satan,” me a “Diabelong,” me a “bersoech,” me a “drakon”?
2 Sera bo lomtok a Satan e ngmlo ngike el kot el mekngit el cherrouel a Jehovah me a klechad. Me a Biblia a ngosukid el mo ungil el medengelii a blekerdelel. A tekoi el Satan a belkul a kmo “Ngike el Omtok,” el ochotii el kmo ngika el mekngit el anghel a kmal chetil a omengederederel a Dios e mesisiich el oltngakl er ngii. Ngkmal oureng el soal a bo lak a klisichel a Jehovah el mengedereder.
3 A Ocholt 12:9 a mesaod er a Satan el kmo, ng Diabelong el belkul a kmo “Ngike el Oltuub.” Me a Satan a ultubii a Dios er a ledu el kmo ngbulak. A tekoi el “ngikel bersoech er a rechuodel” a mekltkid er sel taem el luluusbech er a bersoech el mengeblad er a Eva. Me a tekoi el “ngikal kmal klou el drakon” a dirrek el meketeklii a blekerdelel a Satan, e le ngmekngit a blekerdelel e kmal kdekudel. Ngkmal soal el merrob er a Jehovah me lak loltaut a moktek er ngii, e dirrek el soal el okngemedeterir a rechedal a Dios.
4. Ngera kede mo mesaod er tia el suobel?
4 Me ngbleketakl el kmo, a Satan a soal el tomellii a blakerreng er kid el mo er a Dios. Tiaikid a uchul me a Biblia a mengelechel er kid el kmo: “Bo lultebechel a rengmiu e di mklekar! A cherrouiu, el Diabelong, a omibais el mol mei el ua ongumk el laion el osiik er a bo lomerkakl er ngii.” (1 Pe. 5:8) Me ngar tia el suobel e kede mo mesaod a edei el blekerdelel a Satan el uchul me ngkired el omekerreu er kid er ngika el cherroued kid me a Jehovah.
A SATAN A KMAL MESISIICH
5, 6. (a) Mosaod a tekoi el dilubech el ochotii el kmo a rechanghel a kmal ‘klou a klisichir.’ (b) Ngmekerang a Satan e “oba klisiich er a kodall”?
5 A rechanghel a kmal ‘klou a klisichir.’ (Psa. 103:20) Te kuk mesisiich e dirrek el kuk mellomes a rengrir er a rechad. Me nguaisei, engdi a rungil el anghel a ousbech a klisichir el ngar er a melemalt el rolel. El ua tiang, a ta el anghel a milekodeterir a 185,000 el soldau er a Asiria el mle cherrouir a rechedal a Jehovah. Ngkmal diak el sebechel a ngii di el chad el rullii tiang, me a urrurt er a resoldau me ngdirrek el mo meringel er tir el rullii. (2 Ki. 19:35) A ta er a taem e a anghel a uluusbech er a klisichel me a duch er ngii el otebedeterir a rechapostol er a Jesus er a kelebus. Me a remengkar a dimlak lolechesuar a anghel er a lenguu a chesimer, e lotebedeterir a rechapostol, e lluut el chosechesii a chesimer!—Rel. 5:18-23.
6 A rungil el anghel a ousbech a klisichir el ngar er a melemalt el rolel, engdi a Satan a ousbech er a klisichel el meruul a mekngit e mengetikaik er a rechad! Me a Biblia a mesaod er a Satan el kmo, ng “merreder er tial beluulchad” e dirrek el ngike el “mekngit el chelid er tial beluulchad.” (Jn. 12:31; 2 Ko. 4:4) A Satan a dirrek el “oba klisiich er a kodall.” (Heb. 2:14) Engdi tiang a diak lebelkul a kmo ngdi ngii el omekoad er a rokui el chad. Me ngera belkul? A kot, tia el beluulechad a di ua blekerdelel a Satan e le ngmui er a kltui me a klakoad. Me a ongerung, a rokui el chad a mo er a klengit e mad, e le Eva el uluumerang er a blulekngel a Satan e a Adam a mlo obengkel el omtok er a Dios. (Rom 5:12) Me a Satan a “omekoad er a re chad,” el di ua ledilung a Jesus. (Jn. 8:44) Ngkmal mesisiich el cherroued!
7. Te milekerang a remekngit el anghel e ochotii el kmo te kmal mesisiich?
7 Sel bo domtok er a Satan, e kede dirrek el omtok er a rechedal el tir a obengkel el oltngakl er a omengederederel a Dios. Tirkang a uldimukl er tir a rebetok el mekngit el anghel. (Och. 12:3, 4) Tirka el anghel a mla mo betok el taem el ochotii el kmo te lmuut el mesisiich er a rechad e sorir el omekcharm er tir. (Mt. 8:28-32; Mk. 5:1-5) Me lak mobes el kmo, tirka el mekngit el anghel me a merredelir el Satan a kmal mesisiich. (Mt. 9:34) Me kede ousbech er a ngelsuil a Jehovah me bo el sebeched el mo mesisiich er a Satan.
A SATAN A KMAL RASECHEBEAB
8. (a) Ngsoal el mekerang a Satan? (Momes er a siasing er a uchelel a suobel.) (b) Ngera el tekoi a bla mesang el ochotii el kmo tia el beluulechad a di ua Satan el diak el chubechubechad?
8 A apostol el Petrus a omekesiu er a Satan el ua “ongumk el laion.” Me a doltirakl er a ta el babier, e a tekoi er a Grik el moiuid el “ongumk” a mesaod el kirel a “tebelik el charm el lmangel e le ngkmal songerenger.” Me a Satan me nguaisei el kmal diak el chubechubechad! Alta e a beluulechad el rokir a ngar cheungel, engdi ngdirkak bo lungil a rengul. Me ngsoal el oldechelakl er a relmuut el bebil er a rechad el ua laion el dirk songerenger. (1 Jn. 5:19) Ngkmal soal el mo mesisiich er tirke el ngellitel el Kristiano el dirk ngar er a chutem me a rekldemir el ‘kuk bebil el sib.’ (Jn. 10:16; Och. 12:17) A Satan a soal el okngemedeterir a rechedal a Jehovah, me ngdirkak lemeterob el oldechelakl er a Rekristiano el ulemuchel er a taem er a Jesus el me lmuut er chelechang. Tiang a ochotii el kmo ngkmal diak el chubechubechad!
9, 10. (a) Ngmilekerang a Satan er a loldechelakl er a rechad er a Israel? (Mosaod a tekoi el dilubech.) (b) Ngera uchul me ngkmal mle soal el oldechelakl er tir? (c) Omomdasu, ngmo ua ngera uldesuel a Satan er chelechang sel lesa mesiungel a Jehovah el ruebet er a oberaod el klengit?
9 Ka di molatk. A songerenger el laion a diak lechebur a charm el bo loldechelakl er ngii, e dirrek el diak louuchel er a rengul er a uriul er a lokodir. Me ngdi osisiu, a Satan a diak bo lemekngit a rengul sel lesterir a rechad el loldechelakl er tir el kmal chormang. Me a omomdasu, ngmle ua ngera uldesuel a Satan er a bek el taem el lesterir a rechad er a Israel el ruebet er a deleboes el omeruul me a rechorecherreng? E ka di molatk er a deuil a rengul a Satan er sera lesa telemellel a ngelbesel a rengul a Simri me a Gehasi.—Ule. 25:6-8, 14, 15; 2 Ki. 5:20-27.
10 Sera irechar, e a Satan a mle blechoel el oldechelakl er a rechad er a Israel, e le ngmle medengei el kmo a Mesias a mei el okiu tir. E ngikang a mo okngemedii a Satan e meketeklii a llemeltel a Jehovah el mengedereder. (Gen. 3:15) Me a Satan a mle soal a rechad er a Israel a loridii a kengei er a Jehovah, me ngmirruul aike el rokui el sebechel el mengetikaik er tir. Lak momdasu el kmo a Satan a mle mekngit a rengul el omes er a David el chuarm er sel taem er a lerebet er a laokreng. E lak momdasu el kmo ngmlo chubur a Moses er a bo lak el sebechel el soiseb er a Beluu er a Nglat. Ngbai kmal mo dmeu a rengul sel ta el lerebet er a oberaod el klengit a mesiungel a Dios, me ngousbech aika el tekoi el melenguul er a Jehovah.—Osi. 27:11.
11. Ngera uchul me a Satan a milengesuseu er a Sara?
11 A Satan a kmal uluuketui er sel uchelel a klengelakel er a Mesias. Ka di molatk er a tekoi el dilubech el mo er a Abraham er a uriul er a ledu er ngii a Dios el kmo, ngmo msang a ‘betok el uldidellel a rsechel el belurir a mo merael chisel.’ (Gen. 12:1-3) Sera lengar er a Ekipten a Abraham me a Sara, e a Farao a ngiluu a Sara el mo er a blil e le ngmle soal a bo lebechil. Me nguaisei, engdi a Jehovah a ulsebelii a Sara me ngdimlak lemekesakl. (Monguiu er a Genesis 12:14-20.) A osisiu el tekoi a dirrek el dilubech er a lengar er a beluu er a Kerar er a uchei er a lemechell a Isak. (Gen. 20:1-7) Me a Satan nguchul aika el omelsemai? A uchei e a Sara a tilobed er a merau el beluu er a Ur el mo kiei er a tento. Me a Satan nguluusbech a meklou e klebokel el blil a Farao me a Abimelek el mengesuseu er ngii? Ngikang, ngulemdasu el kmo, a Sara a mo choitii a bechil me a Jehovah e mo bechil a ta er tirka el king? Ngdiak a omesodel a Biblia el kirel, engdi a lsekum a Sara a urridii a techellel el mo ta er a ruchelel a Mesias e a Diabelong a kmal mo dmeu a rengul. Ngkmal diak bo lemekngit a rengul a lsekum ngika el redil a metemall a chebechiielel me a chisel me a dirrek el deleuill er ngii me a Jehovah. Ngkmal rasechebeab a Satan!
12, 13. (a) Ngmilekerang e obeketakl a blekerdelel a Satan er a uriul er a lemechell a Jesus? (b) Omomdasu, ngua ngera uldesuel a Satan el kirir a rengeasek el betik a rengrir er a Jehovah e sorir el mesiou er ngii er chelechang?
12 A Jesus a milechell el betok el dart el rak er a uriul er a lemad a Abraham. Engdi lak momdasu el kmo a Satan a kmal mle semeriar er ngika el tolechoi. E le ngmle medengei el kmo sel bo leklou e ngikang a mo Mesias. A Jesus a ngike el kot el klou a ultutelel el chad er a otutel a telbiil el kirel a uldidellel a rsechel a Abraham, e a uriul e ngmo “melemall a urerel a Diabelong.” (1 Jn. 3:8) Me a Satan, ngulemai er a rengul el mo omekoad er ngika el tolechoi? Ngdimlak. Ngkmal diak a ta el lomdasu el kmo ngera ungil me a ngera mekngit. Me ngdi mle mereched el melasem el omekoad er a Jesus er a dirk letolechoi. Me ngmilekerang?
13 Sel taem el rechad el milsuub a btuch a dilu er a King el Herodes el kmo ngmla mechell ngike el “mo king er a re chad er a Judea,” e a King a kmal mlo kesib a rengul e mlo soal el mekodir ngika el tolechoi. (Mt. 2:1-3, 13) Me “ng ultebedii a tekingel el mo omekoad er a re bek el ngalek el sechal er a Bethlehem ma ikel beluu el kmeed er ngii, el ngar eru rekrir el mor iou.” (Monguiu er a Mateus 2:13-18.) Me alta e a Jesus a silobel, engdi tia el tekoi ngerang ochotii el kirel a cherroued el Satan? Ngbleketakl el kmo, ngkmal diak lomekerreu a klengar er a rechad, el uldimukl er a rengalek. A Satan a mera el ua blekerdelel a “ongumk el laion.” Me lak mobes el kmo ngkmal mekngit a blekerdelel!
A SATAN A KMAL CHEBLAD
14, 15. Ngmekerang a Satan e “chodeng a rengrir” a rediak loumera er a Dios?
14 A Jehovah a betik a rengul el Dios, me a Satan a kirel el mengeblad er a rechad me ngmo chetirir el mesiou er Ngii. (1 Jn. 4:8) Ngmengeuid er tir me ngmo diak lodengei el kmo, te “chebuul a lak lousbech er a Dios.” (Mt. 5:3) E mla “chodeng a rengrir,” me ngdiak el lodengelii a klemerang el kirel a Jehovah.—2 Ko. 4:4.
15 A Satan a blechoel el mengeblad er a rechad el ousbech a klsuul el klechelid. Me ngkmal dmeu a rengul el omes er a rechad el mengull er a rebladek me a charm me a lmuut el bebil er a tekoi. Ngsoal a bo longull a ngii di el ngerang, engdi ngdiak el soal a bo longull er a Jehovah el ngii a “bechecherirs el Dios.” (Exo. 20:5) Me ngklengiterreng, e le te betok a oumerang el kmo te odeuir a rengul a Dios, engdi a klaumerang er tir a cheleuid me a rolel a omengull er tir a diak a belkul. Me te di ua rechad er a Israel er a taem er a Isaia. A Jehovah a mle soal el ngosuterir me ngulekiu a Isaia e ngdilu el kmo: “Ngera uchul me ke mengoit a udoud el kirel a diak le kall? Ngera uchul me ke mengoit a ududem er a ureor, e dirk songerenger? Morrenges er ngak e mruul a ikel kdung, e ng mo ungil a rengum er a kot el ungil er a bek el kall.”—Isa. 55:2.
16, 17. (a) Ngera uchul me a Jesus a dilu er a Petrus el kmo: “Mcheridau er ngak e Satan”? (b) Ngmekerang a Satan e melasem el rullid el mo diak deklekar?
16 A Satan a dirrek el sebechel el mengeblad er a reblak a rengrir el mesiungel a Jehovah. Ka di molatk er a tekoi el dilubech er sel taem el Jesus a dilu er a redisaiplo er ngii el kmo ngkirel el mo mad. A Petrus a mle betik a rengul er a Jesus me ngdilu el kmo: “Rubak, a Dios bo lochebir tia er kau. Tia diak le kirel el ekor kau!” Engdi a Jesus a dilu er a Petrus el kmo: “Mcheridau er ngak e Satan!” (Mt. 16:22, 23) Ngera uchul me ngulemekedong er ngii el “Satan”? E le Jesus a mle medengei aike el tekoi el mochu er ngii. Ngdi kmedu el mo tongetengii a klengar er ngii e meketeklii el kmo a Diabelong a bulak. Me ngar tia el klou a ultutelel el taem er a reksi er a klechad, e a Jesus a mle soal el di klekar e melemolem el blak a rengul. Engdi a Satan a mle soal el mengitechut er a blakerreng er ngii.
17 Kede dirrek el kiei er a klou a ultutelel el taem er a reksi e le ngdi kmedu el mei a ulebongel er tia el beluulechad er a Satan. Engdi a Satan a soal a di dolemolem a rengud e bo demechesang el osiik a udoud me a chetengakl, el uchul me ngmo diak deklekar. Me lako mecheblad, e bai “di mongkar”! (Mt. 24:42) Lak moumerang er a blulekngel a Satan el kmo ngdirk cheroid a ulebongel me a lechub e ngdiak lemei.
18, 19. (a) Ngmekerang a Satan e melasem el rullid el mo omdasu el kmo ngdiak derredemelel a bltikerreng er a Jehovah? (b) Ngmekerang a Jehovah e ngosukid el melemolem el mengkar?
18 A Satan a dirrek el soal el mengeuid er kid el rullid el mo omdasu el kmo ngdiak derredemelel a nguu a bltikerreng er a Dios me a kngtid a diak el sebechel el musubes. Engdi aika el tekoi a blulak. Me ka di molatk, ngtecha ngike el diak lerredemelel a bltikerreng er a Jehovah? Ng Satan. Me a Dios ngkmal diak bo lousubes a kngtil techang? Ng Satan. A Biblia a bai melisiich er kid el kmo: “A Dios a diak le chebirukel me di lobes a ureriu ma bltkil a rengmiu er ngii.” (Heb. 6:10) A Jehovah a omes aike el rokui el tekoi el doruul el mo odeuir a rengul, me a urered el mesiou er ngii a diak bo lak a ultutelel. (Monguiu er a 1 Korinth 15:58.) Me lako mecheblad er a blulekngel a Satan.
19 Me ngbleketakl el kmo, a Satan a kmal mesisiich e rasechebeab e dirrek el cheblad. Me kede mekerang e mo mesisiich er ngii? A Jehovah a mo ngosukid. Ngmla meskid a Tekingel el ouchais er kid el kirel a bedeklel a Satan, me “ng diak lak dodenge uldesuel.” (2 Ko. 2:11) Sel bo dungil el medengei a kakerous el bedeklel a Satan, e ngmo sebeched el di klekar. Engdi ngdiak el sebeched el di medengei a bedeklel e lemerekong. A Biblia a kmo: “Momtok er a Diabelong, me bo lechiis er kemiu.” (Jak. 4:7) Me a ongingil el suobel a mo mesaod a edei el bedeklel a Satan me a rolel e kede mo mesisiich er ngii.