Reference el kirel a Subeled er a Miting er a Klengar me a Omesiunged
© 2023 Watch Tower Bible and Tract Society of Pennsylvania
MARCH 4-10
MEKREOS EL TEKOI EL NGAR ER A BIBLIA | PSALM 16-17
“Jehovah, Ngike el Luchul a Rokui el Ungil Tekoi el Ngar Ngii er Ngak”
Kemiu el Ngeasek a Sebechel Kmal Mo Ungil a Klengar er Kemiu
MOMAK A MERA EL KLAUSECHELEI
11 Monguiu er a Psalm 16:3. A David a mle meduch el osiik er a rungil sechelil. Ngmillilt el mo sechelirir tirke el betik a rengrir er a Jehovah, e tia mlo uchul a ‘ngarbab el deuil a rengul.’ Ngmilsaod er tirka el sechelil el kmo te “blak a rengrir el chedal a RUBAK” me a lechub e te chedaol e le te millasem el oltirakl a melemalt el llechul a Jehovah el kirel a ungil me a mekngit. A kuk ta er a milluches er a psalm a mle uaisei a uldesuel el kirel a lolilt er a resechelil e milluches el kmo: “Ngak a teloi er tirkei el rokui el meluu er kau, tirkel rokui el oltaut a llechum.” (Psalm 119:63) Me ngdi ua dulsaod er sel mlo merek el suobel, kau me ngdirrek el sebechem el metik er a rebetok el ungil el sechelim er a delongelir tirke el betik a rengrir e olengesenges er a Jehovah. E dirrek a resechelim a diak el di el tirke el ua meklungem.
w14 2/15 29 par. 4
‘Bo Le Mechas a Rengum er a Klungiolel a [Jehovah]’
A David a milengitakl el kmo: “Ng di kau el tang e RUBAK a ngar ngii er ngak, ng kau omeskak a rokui el kuusbech; ma klengar er ngak a ngar a chimam. Ng meral klebokel a sengk er kau el mer ngak.” (Psa. 16:5, 6) David ulebang omereng er saul el kirel a “blingelel,” el ngii a deleuill er ngii me a Jehovah me a ileakl el techellel el mesiou er ngii. Ngua David, kede locha chelebangel a betok el ringel, engdi ngkmal betok a ngat er a reng! Mada dolemolem el dmeu a rengud er a mera el omengull e deblechoel el “oba omereng el saul” el kirel a templo er a Jehovah er a klereng.
w08 2/1 7 par. 2-3
Bo Blechoel el Melatk er a Jehovah
2 Kid el rokui a sebeched el mesuub a betok er a blekerdelir tirke el mirrael a chisir el chad el ngar er a Biblia—el ua Abraham ma Sara ma Moses ma Ruth ma David ma Esther ma apostol el Paulus ma lmuut el bebil. Ngdirrek el sebeched el ngmai a klungioled er a blekerdelir a rebebil el tir a kuk di ua ikid el chad. Ma bo dungil el melebedebek aike el cheldecheduch er a Biblia e ngmo ngosukid el oltirakl a tekingel a milluches er a psalm el kmo: “Ak di blechoel el medengei el kmo a RUBAK a obengkek; ng di kmeed, me ng diak a ngeral simesmengak.” (Psalm 16:8) Ngera belkul aika el tekoi?
3 A soldau a blechoel el ousbech er a kadekmel el orreked er a saider, me ngmo uchul e ngdikea el sebechel sel omekreakl el ngar er a katrul el omekerreu er ngii. Engdi ngmo sebechel a kldemel el sobecheklii a lsekum e ngmo okoad er a bita er a klisichel. Ma lsekum e kede blechoel el melatk er a Jehovah e meruul a soal, e ngmo omekerreu er kid. Ka me bo desa el kmo ngmekerang e sebechel el melisiich er a klaumerang er kid sel dolatk aike el cheldecheduch er a Biblia me bo el sebeched el ‘blechoel el melatk er a Jehovah.’
Morriter er a Tekingel a Dios
Jehovah Kmal Betik a Rengul er Kau
6 Monguiu er a Sekaria 2:8. A Jehovah omekesiu er kid el mora chelsul a medal. A chelsul a medad a kmal sensitive e mekreos el part er a bedenged. Me a Jehovah a ua lolekoi el kmo, ‘A ngii di el chad el melemall er kau, el chedak, a melemall er a tekoi el kmal mekreos er a renguk.’ Ngii el betik a rengul er kid a uchul me ngkmal sensitive el kirel a feelings er kid e kmal soal protect er kid. Ngmo mekngit a rengul sel lemekngit a rengud. Me ngsebechel mo ulterekokl a rengud el meluluuch el kmo: “Momekerreu er ngak el ua omomekerreu er a chelsul a medam.”—Psa. 17:8, NW.
MARCH 11-17
MEKREOS EL TEKOI EL NGAR ER A BIBLIA | PSALM 18
“Jehovah . . . Ngike el Olsobel er Ngak”
w09 5/1 14 par. 4-5
Ke Medengei a Belkul a Okesiu er a Biblia?
A Biblia dirrek el lomekesiu er a Jehovah el mora klalo. Ngmesaod er ngii el kmo “Ng Bad er a Israel,” “risois,” e ‘cheuatel.’ (2 Samuel 23:3, NW; Psalm 18:2; Duteronomi 32:4) Ngera belkul aika el okesiu? Ngdi ua klou el bad el diak el sebechel mengukl, a Jehovah sebechel mo mesisiich el osebechakl el kirem.
5 A babier er a Psalm a mui er okesiu el mesaod a kakerous el blekerdelel a Jehovah. El ua tiang, a Psalm 84:11 (NW) a mesaod er a Jehovah el kmo ng “sils e omekreakl” le ngii el uchul a llomes, klengar, klisiich, me a osebechakl. E a Psalm 121:5 (NW) a kuk kmo “Jehovah a chungem el ngar er a kadekmel a chimam.” Ngdi ua mechuu el basio el kokerengau er a ringelel a dichel a sils, a Jehovah sebechel lomekerreu er tirke el mesiou er ngii sel bo lomelechesiu er a ringelel a telemall. Ngomesterir a osebechakl el ua chuu er cheungel a ‘chimal’ me a lechub e ngcheungel a ‘osebekel.’—Isaia 51:16, NW; Psalm 17:8; 36:7.
Rolel e a Jehovah Olengeseu er KidLoutekangel Loba Deurreng
5 Ngsebeched el ngmai omelisiich er aika el tekoi: “Sel lerenges a lengelem lolengit a ngeso, e ngmo onger er kau e le ngchubechubechad.” (Isa. 30:19, NW) Isaia olterekokl er a rengud el kmo a Jehovah kerekikl lorrenges er kid sel doluluuch el mo er ngii e kmal di mereched el mo onger a nglunguched. Ngmelemolem el melekoi el kmo: “Sel rechedel rongesii e ngmo onger er kau.” Aika omeklatk er kid el kmo a Demad a kmal soal, e kltmokl el mo olengeseu er kid sel dolengit a ngeso er ngii. Sel bo dodengelii tiang e ngmo ngosukid loutekangel loba deurreng.
Mongreos er a Techellem el Sebechem el Meluluuch
NGIKE EL milebii a eanged me a chutem a mla meskid a kmal mekreos el sengk. Ngsebeched el meluluuch el mo er ngii. Molatk er tiang: Ngkmal sebeched louchais er a Jehovah aike el rokui el ngar er a rengud er a ngii di el taem el ngar er a ngii di el omelekoi, e diak dousbech a appointment. Ngsebeched el meluluuch el mo er ngii er a bet er osbitar me a lechub e ngblil a kelebus, e ulterekokl a rengud el kmo ngika el betik a rengul el Demad a rongesid. Kede kmal oba omereng el saul el kirel tia el sengk.
Rolel e Ke Outekangel a Sebekreng
2. Molatk. Sel molebedebek er a klengar er kau, e ngsebechem el lmatk aike el taem el mlo sebechem loutekangel er a blekeradel el ngelsuil a Jehovah uchul? Sel dolatk er a rolel e a Jehovah olengeseu er kid me a dirrek el remesiungel er a ngar er a mong e ngmeskid a budech e smisichii a klaumerang er kid. (Psa. 18:17-19) A Joshua el ta er a remechuodel a melekoi el kmo: “Ngngar ngii a list er ngak er aike el nglunguchek el lulenger a Jehovah. Tia ngosukak el mo melatk aike el taem el kullengit a ileakl el tekoi er ngii e ngmilskak sel kmal kuluusbech er ngii.” Chochoi, sel dolatk aike el bla leruul a Jehovah el kired e ngmeskid a klisiich el dousbech er ngii el mo outekangel a sebekreng.
Morriter er a Tekingel a Dios
it-1 432 par. 2
Kerubim
Aika dimlak el kdekudel el bleob el meklou a osebekel el ua teletelel aike el bleob el longull aike el renged el dimlak losiou er a Jehovah. A doltirakl a siukang er a Rechijudea er a irechar (a Biblia diak omesodel el kirel) e aika el kerubim a mle ua teletelir a rechad. Aika mle kot el klebokel el bleob lomtechei a anghel loltirakl aike el ‘ble lechedereder’ a Jehovah el mora Moses. (Exo. 25:9) A apostol Paulus a mesaod el kirir el kmo te “kerubim ra klebkall el mengucheb ra blil a tngakireng.” (Heb. 9:5, BT) Te blechoel el ngar er bita er a Jehovah: “Isei a bo de kebetech er ngii. Ak mor bebul a dengebel a Blil a Telbiil er a delongelel a kerubim.” (Exo 25:22; Ule 7:89) Sei a uchul me ngmelekoi el kirel a Jehovah el kmo ng “dengchokl er a kingellel el ngar bebul [me a lechub e ngdelongelel] a kerubim.” (1Sa 4:4; 2Sa 6:2; 2Ki 19:15; 1Kr 13:6; Psa 80:1; 99:1; Isa 37:16) Ngar okesiu, e a rekerubim a “ulemtechei er a kuruma” el lemla er ngii a Jehovah (1Kr 28:18), e a osebekel a kerubim ulemekerreu er ngii e dirrek el uchul me ngmle sbiido a lorael. Me a David a milsaod er a rechedel a Jehovah el mo olengeseu er ngii el ngar er a chelitakl, el ua chad el mlei el “ngar bebul a kerubim e suebek” el “bekerurt el mei el ngar a osebekel a eolt.”—2Sa 22:11; Psa 18:10.
MARCH 18-24
MEKREOS EL TEKOI EL NGAR ER A BIBLIA | PSALM 19-21
“Ngkmal Bleketakl a Eanged el Olecholt er a Klebkellel a Dios”
w04 1/1 14 par. 1-2
A Rokui Bo Longebkall er a Jehovah
A DAVID, el ngelekel a Jesse, a mlukeroul el mengkerengel a sib el ngar er a beluu er a Bethlehem. Me sera lekekerei e longkar a chermel a demal el sib el ngar er a ked e nglocha mle blechoel el omes er a klungel a eanged ma ildisel a btuch sel leklebesei me lechelellakl a beluu. Me ngulterekokl, choua ika el ues a kmal mle bleketakl er a uldesuel me sera lemukreng er a chedaol reng er a Dios, e ngmelluches e milengitakl a meringel chad el cheldecheduch er a Psalm 19 el kmo: “Ngkmal bleketakl a eanged el olecholt ra klebkellel a Dios! Ngkmal bleketakl el olecholt a bla lruul! Ngdi klmechir a tuobed el mora belulechad el rokir, ma klmechir a mo turkii ra ikel ullebengelel a belulechad.”—Psalm 19:1, 4.
2 Ngdiak lecheldecheduch ma tekoi a lousbech, ma diak a ngera el morenges, e sel mengasireng el blebelel a Jehovah el eanged a olecholt a klebkellel, er a bek el sils, ma bek el klebesei. A bleob a diak el meterob el olecholt a klebkellel a Dios, me tia rullid el mo melechesuar el kmo kede kmal kora kekerei sel dolatk aika el diak lemorenges el ocholt el ngar er a “beluulechad el rokir” el omes a rebek el chad el kiei er a chutem. Engdi, aika el diak lemorenges el ocholt el bleob a ngesonges. A reblak a rengrir el chad a longelechel er tir el mo teloi el obengterir el dmak el mengedecheduch el ousioning. A diak lemedung a ngklel el psalmist a mlengedecheduch er a reblak a rengrir el mesiou er aika el mlukreng el tekoi el kmo: “Modengesii a klebkellel ma klisichel! Modengesii a kebkall el ngklel a Rubak.” (Psalm 96:7, 8) Tirke el ngar er ngii a kmes el deleongel er tir ma Jehovah a dmeu a rengrir el mo onger er tia el tekoi. Nguaisei, engdi, ngerang a uldimukl er a odengesed el kirel a klebkellel a Dios?
w04 9/1 19 par. 8-10
A Bleob a Ouchais er a Klebkellel a Dios!
8 Ma ongingil e a David a mesaod er a kuk ta er a mengasireng el blebelel a Jehovah el kmo: “A Dios a rirellii a blil a sils ra eanged; ngme duum el ua chad el mlo bechiil el me duum ra blil el ungil a rengul, el ua chad ra klekool el semeriar el mora klaidesachel ra rurt. Ngomuchel el ngara bital ullebengelel a milidiul, e mo meliuekl el mor sel kuk bitang. Ngdiak a ngera el sebechel el obart ra kleldelel.”—Psalm 19:4-6.
9 Sel domekesiu er ngii er a kuk bebil er a btuch, e a sils a di ungil a klungel. Engdi, ngkmal ileakl el btuch, ma klungel a remuul aike el planet el meliuekl er ngii el kora kmal mo mekekerei. A chimo el babier a melekoi el kmo a berredel a sils a “2 el billiol er a billiol er a billiol el ton”—tiang a 99.9 el basent er a berredel tia el cheldellel a planet er kid el rokir! A klisichel a gravity er a sils a rullii tia el beluulechad el mo meliuekl er a sils el ngar er a 93 el milliol el mail a cheridel e diak lorael el mo cheroid ma ka lorael el mo kmeed er a sils. Ngdi telkib er a klisichel a sils a me er tia el beluulechad, el ngii a kmal ungil el omekerreu a klengar.
10 Ngike el milluches er a psalm a ousbech a okesiu e melekoi el kirel a sils, el omekesiu er ngii er a “mesisiich el chad” el remurt el ngar er a bita el uchul a eanged el mo er sel kuk bita el uchul a eanged a lemellomes, e a leklebesei e ngmo bad er a chelsel a “blil.” Sel bo lengelt a sils, e kid el ngar er a chutem el omes er ngii, e ngua bo lesiseb er a “blil,” el mo olengull. E a bocha letutau, e ngua lobuu a llomes, el kmal el medidiich “el ua chad el mlo bechiil el me duum ra blil el ungil a rengul.” E le ngii a mle klekerengel a sib, e a David a mle medengelii a klou el kerrasem a leklebesei. (Genesis 31:40) Ngmillatk er a didichel a sils el mle mereched el mengeald er a bedengel ma basio el lemlar er ngii. Ngbleketakl el kmo, ngdimlak lebo lemesaul a sils er sera ‘lorael’ el ngar er a ongos el mo er a ngebard ngbai mle ua “mesisiich el chad,” el kltmokl el mo melemolem er a omerollel.
g95 11/8 7 par. 3
Ngike el Kot el Ngar er a Kemikr el Artist
Sel luut el mo dmolech omereng el saul er kid er a klebekelel a beluulechad e ngngosukid el mo ungil medengelii a Ulemeob, el urerel a iliuekl er kid. A ta el taem e a Jesus a dilu er a redisaiplo er ngii me bo el kerekikl lomes a bung er a ked er a Galilea. Ngdilu el kmo: “Ka momes a bung a le dubech, ng diak loureor ma ka lorasm a bilir. Mak subedemiu el kmo a King Salomon a kmal mle merau e ngdi dimlak le klebokel el ua ikal bung.” (Mateus 6:28, 29) A klebekelel a bung er a ked omeklatk er kid el kmo a Dios a ungil medengei aike el lousbech a rechad.
Morriter er a Tekingel a Dios
A Moktek er a Jehovah a Mo Tmaut!
5 A Jehovah a kmal mle kerekikl el oterekokl a telkelel a rokui el blebelel. Ngriruul a llechul a rokui el tekoi el lulemeob, e dirrek el riruul a llach el kirir a rechad. Ngkiltmokl aika el rokui el llach, me bo lsebechel a rokui el tekoi el ngar er a melidiul me a chutem el ungil el dmak loureor. (Psalm 19:7-9) Me a rokui el tekoi el ngar er a melidiul a ngar er ngii a ulterekokl el basio er ngii, e ulterekokl a rolel a loureor. El ua tiang, a llechul a gravity, a rullii a eltel a beluulechad me ngdi kmeed er tia el chutem, e dirrek el omtebechel a daob me a dolech. Me a lsekum ngdiak a gravity, e ngkmal diak lsebechel el mo er ngii a klengar er tia el chutem. Me a telkelel a tekoi el bla loterekokl a Jehovah el kirel a klengar, a kmal cherrungel e ungil chelderoder el oltirakl a tekoi el bla leketmokl er tia el melidiul. Me tiang a ochotii el kmo, ngkmal ngar er ngii a moktek er ngii el kirel tia el chutem me a dirrek el klechad. Me sel doldingel a obliil, e ngsebeched el ngosuterir a rebebil el mo medengelii ngika el Ulemeob er tia el mengasireng el chutem me a melidiul.—Ocholt 4:11.
MARCH 25-31
MEKREOS EL TEKOI EL NGAR ER A BIBLIA | PSALM 22
Biblia Ulemlaoch a Komakai el Omesodel a Kodellel a Jesus
Te Miltik er a Messias!
16 A Messias a ua lemlechoit er a Dios. (Monguiu er a Psalm 22:1.) A doltirakl er a ulaoch, e ngngar er a bekord el “chedel klok [er a ieta sils] e a Jesus a uleldiu el klou a ngerel el kmo, ‘Eli, Eli, lama sabachthani?’ el blkul a kmo, ‘Dios er ngak, Dios er ngak, ngera me ke chilitak?’” (Markus 15:34) A Jesus a dimlak loridii a klaumerang er ngii er a Demal el ngar er a eanged. Ngmle medengei el kmo a Dios a diak bo lomekerreu er ngii er a recherrouel er a taem er a kodellel. E tiang a milsa techellel el olecholt el kmo ngmo blechoel el blak a rengul el mo er a Dios. Me a Jesus er sera loldiu el klou a ngerel, e nguleltaut er a Psalm 22:1.
Te Miltik er a Messias!
13 A David a ulemlaoch el kmo a rechad a mo oucharm er a Messias. (Monguiu er a Psalm 22:7, 8.) A Jesus a luluucharm er ngii er a lekltekotel er a teluo el kerrekar, e le Mateus a melekoi el kmo: “Mar mlo engelakl a uleltuub er ngii, e omides a bderrir e kmo, ‘Kau ingii el ongkengkii a templo e toketekii ra chelsel chedel sils, di le kau losobelau! A lsekum ke Ngelekel a Dios, e be metengel ra [kerrekar].’” A rengarbab el prist me a rechellimosk er a llach me a remechuodel a dirrek el millenguul er ngii e melekoi el kmo: “Ngulsobelterir ar chad, e diak el sebechel losobelii. Ngika King ra Israel; ka be le metengel ra [kerrekar] er chelechang, me doumera er ngii. Ngulsirs ra Dios; ma le cheleoch er ngii e losobelii er chelechang; e ngmellekoi el kmo, ‘Ngak a Ngelekel a Dios.’” (Mateus 27:39-43) Nguaisei engdi a Jesus a di mle chelellakl e dimlak lolekoi a mekngit el mo er tir. Ngkmal ungil el kerebai el kired!
Te Miltik er a Messias!
14 Te mlo kengmors er a bilel a Messias. A milluches er a Psalm a kmo: “Tomii a bilek er a delongelir, e kengmors er a ikrel a bilek.” (Psalm 22:18) Tia el tekoi a dilubech e le “[resoldau er a Rom a dilelii a Jesus], e mo kengmors e remous a bilel.”—Mateus 27:35; monguiu er a Johanes 19:23, 24.
Morriter er a Tekingel a Dios
w07 2/1 11 par. 7
Dochotii a Omengull el Kirel a Chedaol el Kldibel er Kid
7 Ngar er ngii a rolel el sebeched el olecholt a omengull el kirel a kldibel er kid. A ta er aikang a sel bo dongitakl a chelitakl er a Renged. Betok er aikang a melluches el ua lenglunguuch me ngkired el mo ungil el mengitakl er ngii. A apostol el Paulus, el oeak a Psalm 22, a melluches el kirel a Jesus el kmo: “Ngsoak el subedeterir ar udam er ngak ra ngklem, e oldanges er kau ra chelsel a kldibel.” (Hebru 2:12) Me seikid, e ngkired el mo dengchokl er a kingelled er a uchei er a bo losaod el kirel a chelitakl a odam e mo kerekikl el omtab aike el tekoi er a chelitakl. Ma chelitekled bo lolecholt er a uldesuel a chad el meluches er a psalm, el kmo: “Ak mo oba renguk el rokir el mereng a sulel a RUBAK el ngar ongdibel er a re chedal.” (Psalm 111:1) Ochoi, ngkmal ngar er ngii a ungil el uchul e ngkired el mereched el mei er a miting e ngar er ngii el mo lmuut er a ulebongel me bo lsebeched el mo ungil el mengitakl a odanges el mo er a Jehovah.
Moldanges er a Jehovah “el Ngar Ongdibel”
4 Me chelechang, el di uai a ngar er a mong, e a techall a meketmokl el kirir a rokui el oumerang el mo olecholt a klaumerang er tir “el ngar ongdibel.” A ta er aika el techall a sel dedak el onger el ngar er aike el miting er a ongdibel. Ngkmal diak el kired el omdasu el kmo tia el omeruul a diak a ngerang el rellii. El ua tiang, aike el nger el olecholt er a rolel e ngsebeched el olechib er kid er a mondai a melisiich er sel blakerreng er a rudam el mo oltirakl er a omellach er a Biblia. Ma donger el mesaod aike el llechukl el Bades ma lechub e kede olecholt a uldasu el mlengai er a omesubed a sebechel el melisiich er a rebebil el omekeroul a ungil el blekerdelir el kirel a omesuub.
APRIL 1-7
MEKREOS EL TEKOI EL NGAR ER A BIBLIA | PSALM 23-25
“A Jehovah a Mengkerengek”
w06 4/1 23-24 par. 9-10
A Jehovah a Mengkerenged
9 A kot, e a Jehovah a omekrael er a rechedal. A David a meluches el kmo: “Ng mechikak mak ulengull er a mellekulek el chudel, e choitikikak el mor a chelellakl ralm. Ng meskak a beches el klisiich. Ng choitikikak er a melemalt el rael el ua le tilbir.” (Psalm 23:2, 3) A delebechel a olengull er a bebul a mellekulek el chudel,—e ngar er tiang e a David a ulechotii a blekeradel er a budech ma ulengull ma ulekerreu. A tekoi er a Hebru el mloiuid el kmo “mellekulek el chudel” a sebechel el belkul a kmo “ungil el basio.” Me nguaisei, e a sib a diak el sebechel el di ngii el mo metik er a ungil el basio el bo lolengull er ngii. Ma mengkerengir a kirel el mo omekrael er tir el mo er a choua isel “ungil el basio.”
10 Ngmekera Jehovah a lomekrael er kid er a chelechang? A ta er a rolel a oeak a kerebai. A Tekingel a mengelechel er kid el kmo “el oltirakl ra Dios.” (Efesus 5:1) Ma tekoi el uldimukl er aikang a klechubechub ma klausubes ma bltikerreng. (Efesus 4:32; 5:2) Chochoi, a Jehovah a mecherei a kot el ungil el kerebai er a olechotel aika el ungil el blekeradel. A Jehovah ngua lorrimel er kid el mo oukerebai er ngii? Ngdiak. Sel mlukreng el uleklatk a bai ochotii el kmo ngii a oumerang er kid. El mekerang? Kid a ulebeob el okesiul a Dios, el belkul a kmo kede olab a blekeradel er a kldung e sebeched el mo medengei a tekoi er a klereng. (Genesis 1:26) Misei a uchul, ma Jehovah medengei el kmo alta e ngdiak demecherrungel, engdi kid a sebeched el omekeroul a osisiu el blekeradel el ngii a olecholt. Ka di molatk er tiang, ngika el betik a rengul el Dios er kid a oumerang el kmo kid a sebeched el mo ua ingii. Ma lsekum e kede mo oltirakl er ngii, e ngmo omekrael er kid, el mo er a ‘ungil el basio.’ Me ngar er a chelsel tia el kdekudel el beluulechad, e kid a kiei “el ngar a budech,” el medengelii a budech el mo er tirke el chad el oba kengei er a Dios.—Psalm 4:8; 29:11.
w06 4/1 24-25 par. 13-15
A Jehovah a Mengkerenged
13 A David a meskid a ongeru el uchul a klaumera er ngii: e le Jehovah a omekerreu er a chermel el sib. Kede menguiu el kmo: “Ng mo lmuut ma lsekum sel rael a mo oeak a kmal milkolk, e ng diak bo kmedakt e RUBAK, ele kau a obengkek! A skersem ma chelebedem a mesebechakl er ngak.” (Psalm 23:4) A David a melekoi er a Jehovah el ousbech er a tekoi el kmo “kau.” Tia diak lemechas a rengud er ngii e le David a melekoi el kirel a Dios el ngilsuir el outekangel a ringel. A David a mlo chemau a betok el milkolk el blekeradel, el taem el ngii a mlo ocherur a kodall. Engdi ngdimlak lebecherei a dakt me bo longedereder er ngii e le ngmle medengei el kmo a Dios a obengkel el oba “skersel” ma “chelebedel.” A ulekerreuil a Dios a uchul ma David a mlo mechelaod e mlengal mlo kmeed er a Jehovah.
14 Ngmekera a Jehovah a lomekerreu er a chermel el sib er a chelecha el sils? A Biblia a oterekeklii a rengud el kmo ngdiak a ruumtok el mekngit el reng ma lechub a chad el sebechel el mo okngemedii a sib er ngii el ngar er a chutem. A Jehovah a kmal diak el sebechel el mecherei tia el tekoi me lduubech. (Isaia 54:17; 2 Petrus 2:9) Engdi tia diak lebelkul a kmo a Mengkerenged a mo omekerreu er kid er a rokui el ringel. Kede mo chelebangel a ongarm el mo er a rebek el chad, e dirrek el mo chemau a ultok el mo er a rokui el mera el Kristiano. (2 Timoteus 3:12; Jakobus 1:2) A lebebil er a taem e ngsebeched el melekoi el kmo ak merael el “oeak a kmal milkolk.” El di ua tiang, a odechelakl ma lechub a secher a sebechel el rullid el mo ocherur a kodall. Ma lechub a kmeed el chedad a mo smecher ma lechub e ngmad. Ngar er a chelsel a choua ikaikid el kmal milkolk el taem, e a Mengkerenged a obengked e mo omekerreu er kid. El mekerang?
15 A Jehovah a diak lolib a mengasireng el tekoi el olengeseu er a rechedal. Ngdi ngulterekokl a rengud er tia el tekoi el kmo: A Jehovah a mo ngosukid el outekangel a ngii dil ringel el bo dechelebangel er ngii. E meskid a llomeserreng el mo outekangel “a bek el bedengel chomengarm.” (Jakobus 1:2-5) A mengkerengel a sib a ousbech er a skersel ma lechub a chelebedel el orriik a tebelik el charm e dirrek el lorrael er a sib el mo er a melemalt el rael. A Jehovah a sebechel el omekrael er kid el okiu a rekldemed er a klaumerang el mo oltaut a uleklatk er a Biblia el sebechel el ngosukid er a blekeradel el dengar er ngii. Ma dirrek, a Jehovah a sebechel el meskid a klisiich el mo outekangel. (Filipi 4:13) Me ngoeak a chedaol el reng er ngii, e ngsebechel el meskid “sel diak le metuk el klisiich.” (2 Korinth 4:7) A reng er a Dios a sebechel el ngosukid el outekangel a ngii di el ongarm el lomeskid a Satan. (1 Korinth 10:13) Tiang diak lsal mengelaod er kid sel dodengei el kmo a Jehovah a kltmokl el mo olengeseu er kid?
w06 4/1 26 par. 17-18
A Jehovah a Mengkerenged
17 A David a mesaod er a ongedei el uchul a klaumerang er ngii el mo er a Mengkerengel: A Jehovah a omeka er a chermel el sib, e meruul el uaisei el olsibes. A David a meluches el kmo: “Ke kudmeklii a ungil blengur el kirek, er sel di sebechir a rokui el cherrouek el mesekak; kouetkeu er ngak el ua kngarbab el chad, e mekekii a kebengek el mer a tkul.” (Psalm 23:5) A David el ngar er tia el bades a mesaod er a Mengkerengel el ua lebekerurau el chad el omsang a kall ma ilumel el olsibes. Aika el eru el okesiu, el omekerreu el mengkar a sib ma bekerurau el chad a diak leketouch el tekoi. E le ungil el mengkerengel a sib a kirel el medengelii a ngar er ngii a mellekulek el chudel er ngii ma betok el ralm ma delebechel er ngii a ‘diak a lengesonges er ngii.’—Psalm 23:1, 2.
18 A Mengkerenged ngbekerurau el chad? Ngdiak a rraurreng el kirel tiang! Ka di momdasu er a klebkellel ma ildisel ma betok el bedengel a kall er a klereng el doldeu a rengud er ngii. El oeak a blak a rengul e mellomes a rengul el mesiou, e a Jehovah a meskid a ungil el babier ma osisechakl el ngar er a miting ma assembly ma convention e ngii el rokui a meskid aike el dousbech el kirel a klereng. (Matteus 24:45-47) Ngkmal diak lolengesonges a okelel a reng. A “blak a rengul e mellomes a rengul mesiou” a mla remuul a betok el milliol el Biblia ma babier er a omesubel a Biblia el ngar er a 413 el kakerous el omelekoi. A Jehovah a mla kutmokl a bek el bedengel a okelel a reng, el “milk” el ngii a uchetemel a osisechakl er a Biblia, ma “medecherecher el kall” el ngii a dmolech el suobel er a klereng. (Hebru 5:11-14) Me sel bo dechebangel a mondai ma omelilt e ngsebeched el metik aike el dousbech. Kid kede mo er ker e a lsekum e ngdiak a choua ika el okelel a reng er kid? A Mengkerenged a mera el bekerurau el chad!—Isaia 25:6; 65:13.
Morriter er a Tekingel a Dios
Bo Lebetik a Rengum er a Llemalt er a Rengum el Rokir
NGOKIU a Tekingel me a oureor el klisichel, e a Jehovah a omekrael er a rechedal el mo merael er a “melemalt el rael.” (Psalm 23:3) Kid a diak demecherrungel a uchul, me kede blechoel el mo merael er a cheleuid el rael. Kede kmal ousbech er a ducherreng me a telekangel me bo el sebeched el melemolem el merael er a melemalt el rael. Me ngngerang a sebechel el ngosukid el mo mesisiich? El ua omerellel a Jesus, ngkmal kired el mo betik a rengud el soad el meruul a llemalt.—Monguiu er a Psalm 45:7.
2 Ngerang a “melemalt el rael”? A melemalt el rael a kekerei el rael me a lechub e ngobutek el rael. Aikaikid el “rael” a oltirakl er sel llechul a Jehovah el kirel a llemalt. Ngar er a tekoi er a Hebru me a Grik, e ngmesaod er a belkul a “llemalt” el kirel a mesisiich el otireklel a llechul a tekoi er a kldung. Me a Jehovah el Dios el ngii a uchelel a rokui el llemalt a uchul, me tirke el rokui el mengull er ngii a kmal dmeu a rengrir el osiik er ngii, e dirrek el blak a rengrir el merael er sel melemalt el rael el kirir el merael er ngii.—Jeremia 50:7.
3 Me sel debo er a tkurrebab el sebeched el blak a rengud el oltirakl er a melemalt el rolel a Dios, e ngmo sebeched el mera el oldeu er a rengul. (Duteronomi 32:4) E tiang a omuchel el oeak sel dosuub el kirel a Jehovah el Dios el okiu a Tekingel el Biblia. Sel bo deblechoel el mesuub el kirel, e dolekeed er kid er ngii er a bek el sils, e kede mekurulii a bltkil a rengud el bedul Ngii me sel blekerdelel el kirel a llemalt. (Jakobus 4:8) Ngdirrek el kmal kired el kongei el oltirakl a ulekrael er a Tekingel a Dios el ileakl el sel taem el kid a mo chelebangel a omelilt el kirel a meklou el tekoi er a klengar er kid.
APRIL 8-14
MEKREOS EL TEKOI EL NGAR ER A BIBLIA | PSALM 26-28
Rolel e a David a Silsichii a Rengul el Mo Meruul a Llemalt
w05 4/1 22 par. 8-9
Morael er a Rolel a Blakerreng
8 A David a milluluuch el kmo: “Mtirterak e RUBAK, e mesemak; mesa kidney er ngak ma renguk.” (Psalm 26:2, NW) A kidney a ngar er sel kmal chelsel a bedenged. A domekesiu er ngii, e a kidney a omtechei er aike el dmolech el tekoi er a uldesuel ma ngar er a rengul a chad. Me sel okesiu el reng a ngike el cherrungel el chelsel el chad—a urungelel, ma uldesuel, ma llomeserreng er ngii. A David er sera lolengit er a Jehovah el mo merritel er ngii, e ngmilluluuch el mo er a Jehovah el mo merritel er aike el dmolech el tekoi el ngar er a uldesuel ma rengul.
9 A David a ullengit me bo lsebechel el mengikiid er a kidney er ngii ma rengul. A Jehovah ngmekerang e mengikiid er ngike el chelsed el chad? A David a milengitakl el kmo: “Ak uldanges er a RUBAK ele ng mengetikaik er ngak, ma le klebesei e a ukltkel a renguk [el kidney] omeklatk er ngak.” (Psalm 16:7) Tiang ngera belkul? Ngbelkul a kmo a uleklatk el mla er a Dios a mlo er sel kmal dmolech el chelsel a bedengel a David e mlo medechel er isei, e omeklemalt er aike el dmolech el tekoi er a rengul. Ngdirrek el sebechel el mo uaisei el kired a lsekum e kede melatk er aike el uleklatk el dengai el oeak a Tekingel a Dios, ma ruumtechei er ngii, ma cheldebechelel e mechei me ngmedechel er a chelsed. A deblechoel el meluluuch el mo er a Jehovah me bo lsebechel el mengikiid er kid el uaisei a mo ngosukid el merael el ngar er a blakerreng.
w05 4/1 23 par. 12-13
Morael er a Rolel a Blakerreng
12 Ma lolutk el mo er a kuk ta er a tekoi el millisiich er a blakerreng er ngii, e a David a millekoi el kmo: “Ng diak kdengchokl el teloi er a re mengesuul el ka kubengterir a re cheblad. Ak uuketui er a cheldebechel er a remeruul a mekngit, e diak bo kdengchokl el obengterir a re dengerenger.” (Psalm 26:4, 5) A David a kmal dimlak lsoal el mo dengchokl el obengterir a remekngit. Nguluuketui er a mekngit el klausechelei.
13 Kid kede kuk ua ngerang? Kid ngdiak dekengei el mo dengchokl el obengterir tirke el mengesuul el oeak a prokuram er a TV, ma lechub a video, ma lechub a katsudo, ma lechub a Internet, ma kuk bebil er a tekoi? Kid kede mengeroid er kid er tirke el cheblad e omart er a mera el blekerdelir? Ngar er a skuul ma lechub el ngar er a basio er a urered e a rebebil a sebechir el mengeblad el ousechelei er kid el kirel a mekngit el uldasu. Kid ngsoad el omekeroul er a kmes el deleongel er kid me tirke el chad el tir a diak lorael el ngar er a klemerang er a Dios? Altang e te melekoi a kora melemalt el tekoi, engdi a rumtok er a osisechakl a dirrek el omart er a uldesuir el sorir el mengeroid er kid er a omesiou er a Jehovah. E kuk mekerang a lsekum e te ngar er ngii a rebebil el ngar er a chelsel a ongdibel er a Rekristiano el tir a kiei el oltirakl a eru el bedengel a klengar er tir? Tir me te dirrek el mengeblad e omart er a mera el blekerdelir. A Jayson, el mesiou el ua ministerial servant er a chelecha el taem, a mla er ngii a reuaise el sechelil er sera ledirk lengeasek. Me ngmelekoi el kirir, el kmo: “A ta er a klebesei e a ta er tir a dilu er ngak el kmo: ‘Ngdiak a belkul aike el tekoi el doruul er a chelechang e le sel lemei a beches el blekeradel er a beluulechad, e kede di mo mad e merekong. Ngdiak a bo desong er ngii.’ Choua isel tekoi a ulekerengii a uldesuek. Ngdiak el soak el mo mad sel lemei a beches el blekeradel er a beluulechad.” Ma Jayson a mle mellomes a rengul e tirrebengii a klausechelei er ngii el obengterir tirke el uaisei el chad. Ma apostol el Paulus a ulemeklatk el kmo: “Lako mecheuid: ‘A mekngit el klausechelei a tomii a ungil blekeradel.’” (1 Korinth 15:33) Ngkmal klou a ultutelel a dongeroid er kid er a mekngit el klausechelei!
w05 4/1 24 par. 17-18
Morael er a Rolel a Blakerreng
17 Sel tento el templo, el obengkel sel olengetongel el kirel a omerellel a tenget, a mle olsechelel a omengull el mo er a Jehovah el ngar er a Israel. Ma louchais er a deuil a rengul el kirel sel basio, e a David a milluluuch el kmo: “RUBAK [el Jehovah], ng soak a blil a delengcheklem, e soak sel le ngar ngii a klebkellem.”—Psalm 26:8.
18 Kid ngkmal soad el mo kldibel el ngar er aike el basio el sebeched el mesuub el kirel a Jehovah? A bek el Kingdom Hall el ngar er ngii a prokuram er a osisechakl er a klereng a ua lecholsechelel a mera el omengull er a chelsel a beluu. Ma dirrek, e ngngar er ngii a convention er a bek el rak, ma circuit assembly, me sel sils er a ileakl el assembly. Aike el “uleklatk” er a Jehovah a losaod er ngii el ngar er aike el miting. A lsekum e ng “kmal imis el soak,” e kede mo blak a rengud el mo er aike el miting e mo kerekikl el orrenges. (Psalm 119:167) Ngkol ua ngera el uchul a ongelaod sel dobengterir a rekldemed er a klaumerang el tir a kerekikl er kid e sebechir el ngosukid el melemolem el merael er a rolel a blakerreng!—Hebru 10:24, 25.
Morriter er a Tekingel a Dios
w06 10/1 20 par. 15
A Jehovah a Olsobel er Ngike el Chormang
15 A milluches er a psalm el David a milengitakl el kmo: “A demak ma delak a bo le chitak, e a RUBAK a mo omekerreu er ngak.” (Psalm 27:10) Ngkol ua ngera el uchul a ongelaod sel dodengei el kmo a bltkil a rengul a Jehovah a chengelakl er a ngii di el bltikerreng el olecholt er ngii a rechedam ma rechedil el di chad! Malta e ngkmal meringel sel bo dolechesuar a mekngit el omeruul ma ultngakl ma lechub e kede mlechoit er a rechad er a blid, engdi a ngii di el ta er aikang a diak bo leterebengii sel ulekerreuil a Jehovah el bedulkau. (Rom 8:38, 39) Molatk el kmo a Jehovah a mengurs er tirke el betik er a rengul. (Johanes 3:16; 6:44) Malta e ke mlechoit er a redi chad, engdi a Demam el ngar er a eanged a kmal betik a rengul er kau!
APRIL 15-21
MEKREOS EL TEKOI EL NGAR ER A BIBLIA | PSALM 29-31
Omesmechokl Olechotel a Bltikerreng er a Dios
it-1 802 par. 3
Mad
‘Mertii a mad’ a kakerous a belkul, ngdi mo oltirakl er a blekeradel. A Jehovah el Dios sel lebertii a medal e ngblechoel el belkul a kmo ngmla mo diak loba kengei er ngii a chad me a lechub e loba chedaol reng er ngii. Tia locha uaisei e lechad me a lechub e ngcheldebechel er a rechad a mlo diak lolengesenges er ngii el ua renged er a Israel. (Job 34:29; Psa 30:5-8; Isa 54:8; 59:2) Ngar er a bebil el blekeradel e tia belkul a kmo a Jehovah diak lolecholt er ngii e le ngmengiil er a melemalt el temel. (Psa 13:1-3) Me a David er a lolengit el kmo, “Butek a medam el kirel a kngtik,” e ngullengit er ngii me lousubes me a lechub e lesuld a kngtil.—Psa 51:9; momekesiu er a Psa 10:11.
Becherei a Jehovah Me Longelaod er Kau
18 Mkengei a omellach el mngai. Sel taem el Jehovah a ulderchii a profet Nathan el mo mengedecheduch er a David el kirel a kngtil, e a David a dimlak lolasem el mesaod el kmo ngdiak lsal mekngit a tekoi el leriruul. Ngdi mle mereched el kongei el kmo ngmla mora klengit lomtok er a bechil a Bathseba, e ileakl el mla rullii a klengit lomtok er a Jehovah. A David a kilengei a omellach el lengilai er a Jehovah, me a Jehovah a uluusubes er ngii. (2 Sa. 12:10-14) Me a lsekum kede rullii a oberaod el klengit, e ngkired el mo mengedecheduch er a rudam el Jehovah a mla tutketerir el mo omekrael er kid. (Jak. 5:14, 15) Ngkmal kired el kerekikl me lak di dosaod er kid. Sel kot el rechedel el dekengei e doltaut a omellach el dengilai, a mo uchul e ngmereched el mo budech a uldesued e mo dmeu a rengud.
Ngera Mera el Bulterreng?
18 A chad el seluld a ngklel a bo lochotii el kmo ngmera el mla obult, e ngkirel el mei er a bek el miting e mo oltirakl a ulekrael er a remechuodel el kirel mla kutmokl a temel el meluluuch e mesuub er a Biblia. Ngdirrek el kirel mengeroid er ngii er aike el blekeradel el rirellii me ngmlo ruebet er a klengit. A lsekum e ngmo meringel loureor el mesumech er a deleuill er ngii me a Jehovah e ngsebechel mo ulterekokl a rengul el kmo, a Jehovah mo ousubes er ngii me a remechuodel a mo ngosuir el lmuut el mei er a ongdibel. Me nguaisei engdi a remechuodel a medengei el kmo ngkakerous a derta el blekeradel me te kerekikl el merriter a derta er aika el blekeradel.
Morriter er a Tekingel a Dios
Nglunguuch—“Moterekokl a Ikel Rokui el Tekoi el Suebek a [Rengum] er Ngii”
Sel doluluuch el mora Jehovah e ngsmisichii a klaumerang er kid el kmo ngomekerreu er kid. Ngsebeched el mo ua ta er a milluches er a Psalm el milluluuch el kmo: “Ke milsekak er a chelebulek, e dimlak mchitak er a kerior el kmlar a chelsel.” (Psalm 31:7) Sel dodengei el kmo a Jehovah mes a tekoi el dechelebangel e ngsebechel ngosukid el melemolem er a chelsel a meringel el blekeradel. E ngika diak di el ues a ringeled. Ngika ungil medengei a tekoi el dechelebangel el ngaruchei er a ngii di el chad, e ngosukid el metik ongelaod me a omelisiich er a Biblia
APRIL 22-28
MEKREOS EL TEKOI EL NGAR ER A BIBLIA | PSALM 32-33
Ngera Uchul Me Ngungil Omouchais el Kmo Ke Rirellii Oberaod el Klengit?
w93 9/1 20-21 par. 7
A Klechubechub er a Jehovah a Olsobel er Kid er a Klengiterreng
7 A de ruebet er a oberaod el klengit e kede kora omdasu el kmo ngkmal meringel a dolecholt a kngtid er a Jehovah. Ngsebechel el mo duubech a ngerang er a chouaisel blekeradel? A David a ulecholt er a Psalm 32 el kmo: “Sera lak kucholt a kngtik, e ng mlo diak a klisichek er a lengelek el chelliloil sils. Ng llomes ma klebesei el mulemals er ngak e RUBAK me ngdi mlo diak a klisichek el ua delkimes el di mo medirt er a blsechel a kleald.” (3 me a 4 el kekerei el bades) A bo lomart a kngtil e mengellakl er a meringel el ukltkel a milengitechut er a David. A sebek el reng a mlengai a klisichel a uchul e ng mle uai a kerrekar er a taem er a blsechel a kleald el diak a ralm er ngii. Ng dirrek el mla er ngii a rellii er a uldesuel ma bedengel. Ng urridii a deurreng er ngii. A lsekum a ngii di le tar kid a ngar er a osisiu el blekeradel e ngkired el meruul a ngerang?
Becherei a Jehovah Me Longelaod er Kau
17 Moluluuch lolengit a klausubes. A uriul e a David a mlo meluluuch el mora Jehovah. Nguluuchel er a rengul e silbedii a Jehovah er a rokui el tekoi el leriruul. (Monguiu er a Psalm 51:1-4.) Tiang a rirellii el liluut el mo dmeu a rengul! (Psa. 32:1, 2, 4, 5) Me a lsekum ke rullii a oberaod el klengit, e lak molasem lomart a kngtim. Bai moluluuch el mora Jehovah louchais a rokui el tekoi el bla mruul. Seikid e ngmo chelellakl a rengum e dirrek el mo diak lemekngit a ukltkem. E a lsekum ngsoam a lluut el mesumech a deleuill er kau me a Jehovah, e ngar ngii a lmuut el bebil tekoi el kirem el meruul el diak di el nglunguuch e le merekong.
w01 6/1 30 par. 1
Sel Douchais a Kngtid e Kede Mo Kebekakl
Uriul er a louchais a kngtil a David, e ngdimlak bo lomdasu el kmo ngdiak a ultutelel. A tekingel el debetik er a Psalm a ochotii el kmo sera louchais a kngtil e ngmlo melechesuar er a budech, e silsichii a rengul el mo melemolem el mesiou er a Dios el loba blakerreng. Ka momes er a 32 el bliongel er a Psalm. A 1 (NW) el kekerei el bades a kmo: “Ngdmeu a rengul ngike el chad el mla musubes a kngtil, el telucheklel a mla mesuld.” Alta chad a rullii a kmal oberaod el klengit, ngsebechel lmuut el mo melechesuar er a deurreng a lsekum e ngmera el ngar er a rengul el lobult. A ta er a rolel e ngochotii el kmo ngmera el mla obult, a sel lekengei el mukngerachel er a kngtil a omerellel el ua lurruul er ngii a David. (2 Samuel 12:13) Ngika dimlak lolasem el mesaod er ngii er medal a Jehovah me a lechub e loltelechakl er a rebebil. A 5 el kekerei el bades a kmo: “Isei e ak ullecholt a kngtik er kau; ng dimlak kumart a mekngit el omerellek. Ak tilbir er a renguk el ocholt er kau, me kuluusubes a rokui el kngtik.” A chad el louchais a kngtil a mo melechesuar er a budech, me a ukltkel a mo diak el loldechelakl er ngii el kirel a kngtil er a ngar er a mong.
Morriter er a Tekingel a Dios
Ngngera Belkul er Kau a Diak Lemengodech el Bltikerreng er a Jehovah?
14 A diak lemengodech el bltikerreng er a Dios a meskid osebechakl er a tekoi er a klereng. A David a milluluuch el mora Jehovah el kmo: “Kau omertelek; ke mo osebelak er a chelebuul. Ng mo klou a ngerek el mengitakl el kirel olsobel er kau, ele ke mesebechakl er ngak. . . . Tirkel oumeral ulsirs er a RUBAK a selebechakl er a diak le mengodech el bltikerreng er ngii.” (Psa. 32:7, 10) Ngdi ua cheotelel a beluu el lulemekerreu er a rechad el mle kiei er a chelsel, a diak lemengodech el bltikerreng er a Jehovah mesebechakl er kid er a ngii di el tekoi el mo choitechetur a deleuill er kid me ngii. Me a dirrek el diak lemengodech el bltikerreng er ngii odbechii a Jehovah el mo olekeed er ngii er kid.—Jer. 31:3.
APRIL 29–MAY 5
MEKREOS EL TEKOI EL NGAR ER A BIBLIA | PSALM 34-35
“Mblechoel el Oldanges er a Jehovah”
w07 6/1 14 par. 11
Me Dedak el Oldanges er a Ngklel a Jehovah
11 “Ak mo blechoel el oldanges er a RUBAK; ng diak bo kmekimd el oldanges er ngii.” (Psalm 34:1) Ngulterekokl el mle betok a metacherbesul er a tekoi er a klechad er a David er sel taem er a lekiei el cheroid er a rechad, el ua ike el mocholt er a tekingel, engdi ngdimlak lebecherei a ngii di el ngerang me bo lorrob er ngii me lak longebkall er a Jehovah. Ngkol ua ngera el kerebai el kmal kired el oltirakl er ngii sel bo dechelebangel a ongarm! Ma dengar er a skuul, ma dobengterir a rekldemed el Kristiano, ma doruul er a omesiunged, e sel kot el soad el meruul er ngii a mo oldanges er a Jehovah. Ka di molatk aike el betok el tekoi el uchul me ngkired el meruul el uaisei! El di ua itiang, ngsebeched el melemolem el mesuub e oldeu er a rengud er aike el klebokel el blebelel a Jehovah el diak lemekimd. E ka di momtab er aike el bla leketmokl el okiu a cheldebechelel el ngar er tia el beluulechad! Malta e te diak lemecherrungel, engdi a Jehovah a kmal ousbech er a reblak a rengrir el chad er a chelecha el taem. Ngua ngerang a urerel a Dios a domekesiu er ngii er a urerir a remerael a chisir el chad er a beluulechad? Kau ngdiak mkengei er a tekingel a David, el milluches el kmo: “Ng diak a tal chelid el ua ikau e Rubak, el diak a remuul a ikel moruul”?—Psalm 86:8.
w07 6/1 14-15 par. 13
Me Dedak el Oldanges er a Ngklel a Jehovah
13 “Ak mo oldanges er ngii el kirel a ikel bla leruul; tirkel rokui el chuarm bo le sebechir el orrenges e bo lungil a rengrir!” (Psalm 34:2) Ma David a dimlak el di lengii el mengedidai er ngii el kirel aike el lurruul. El ua itiang, ngdimlak lolekoi el kirel sel taem er a longeblad er a king er a Gath. Ngmle medengei el kmo a Jehovah a ulemekerreu er ngii er a lengar er a Gath e mle sebechel el chemiis el di okiu a ngelsuil a Jehovah. (Osisechakl 21:1) Me nguaisei, a David a dimlak el di lengii el oldanges er ngii, e ngbai uleldanges er a Jehovah. Tiakid a uchul, ma remedemedemek a rengrir el chad a mle sorir el mo kmeed er a Jehovah. A Jesus me ngdirrek el milengebkall er a ngklel a Jehovah, e tia mlo uchul e a rengar er a eou a rengrir el chad a mlo er Ngii. Me chelecha el sils, e a remedemedemek a rengrir er a bek el renged a sorir el mo kmeed er a ongdibel er a rengellitel el Kristiano el ngar er a beluulechad el rokir, el Jesus a Bdelul. (Kolose 1:18) Ngkmal mo ungil a rengrir tirke el uaisei el medemedemek a rengrir el chad sel lerengesii a ngklel a Dios el longebkall er ngii a rengar er a eou a rengrir el mesiungel e lerengesii a klumech er a Biblia, el chedaol el reng er a Dios a rulleterir el mo ungil el medengelii.—Johanes 6:44; Rellir 16:14.
w07 6/1 15-16 par. 15
Me Dedak el Oldanges er a Ngklel a Jehovah
15 “Ak milluluuch el mor a RUBAK e ngii a ulenger er ngak; ng ngilbetak er a rokui el dektek.” (Psalm 34:4) Tia el tekoi el dilubech a mle klou a ultutelel el kirel a David. Misei, e ngmillemolem el kmo: “A ruusbech a ngesou a omekedong er ngii, e ngii onger; ng osebelterir er a rokui el chelebulir.” (Psalm 34:6) Sel dobengterir a rekldemed er a klaumerang, e ngngar er ngii a techelled el ouchais a ungil el experience el olecholt er a rolel e a Jehovah a ngilsukid el mo outekangel a meringel el blekeradel. Tiang a mo melisiich er a klaumerang er a rekldemed er a klaumerang, el di ua ike el tekingel a David el millisiich er a klaumerang er a rulebengkel. A rulebengkel a David a mle ua tiakid a uldesuir el kmo: “Ma re chuarm omes el mor ngii [a Jehovah] e ungil a rengrir; ng kmal diak bo le metirm a rengrir.” (Psalm 34:5) Malta e te chiliis er a King el Saul, engdi ngdimlak lemerur. Ngmle ulterekokl a rengrir el kmo a Dios a ullengeseu er a David, me ngmle ungil a rengrir. Me ngar er seikid el rolel, e a resemeriar el chad me tirke el meketeketa el Kristiano a dirrek el omes el bedul a Jehovah el kirel a ngeso. E le tir el mla melechesuar a ulengesuil a Jehovah er a klengar er tir a uchul, me ngungil a rengrir el olecholt el kmo te melemolem el blak a rengrir.
Morriter er a Tekingel a Dios
Te Miltik er a Messias!
9 A reklsuul el ocholt a mo omtok er a Messias. A ta er a Psalm er a David a kmo: “A re mekngit el chad a melekoi a mekngit el kirek; toltutakl er ngak er a diak kudengei el tellemall.” (Psalm 35:11) Ngtilaut a ulaoch el dilu el kmo “ar bderrir ar priist ma cheldecheduch el rokir a ulsiik a klsuul locholt el kirel a Jesus, el uchul me lokodir.” (Mateus 26:59) Nguaisei, “ele te betok el di olab a klsuul locholt el kirel a Jesus, e chocholt er tir a diak bo ldak.” (Markus 14:56) Me a recherrouel a Jesus a dimlak lomekerreu el kmo aika el ocholt ngklemerang me a lechub e ngklsuul. Ngdi mle sorir a lemad a Jesus.