A Nger Er Aike El Ker Er A Biblia
Ngar er ngii a omelatk el kirir a rulekoad?
A kodall a di ua cheliuaiu e le rulekoad a diak a ngera el lodengei e diak el sebechir el meruul a ngii di el ngerang. Engdi ngike el Uchul a klengar a sebechel el olluut er a rulekoad el okiu a okiis. Me a lolecholt er tiang, e a Dios a milsa Jesus a klisichel el mo olekiis er a rebebil er a rechad er a kodall.—Monguiu er a Olisechakl 9:5; Johanes 11:11, 43, 44.
Ngoeak a ngera el rolel e a kodall a di ua cheliuaiu?
A Dios a tilbir el kmo a rulekoad el ngar er a omeltkel a mo mekiis el mo kiei er a chelsel a melemalt el beches el beluulechad. Tirke el mo mekiis a di melemolem el ulekoad el dimerekmo bo lomekngar er tir a Dios. A Dios el Olab a Bek el Klisiich a kmal soal el ousbech er a klisichel el mo omekngar er a rulekoad.—Monguiu er a Job 14:14, 15.
Ngmo ua ngera teletelel a okiis?
A Dios sel bo lolekiis er a rechad, e ngmo sebechir el di tir el dongcheterir, e dongcheterir a resechelirir me a telungalek er tir. Me alta bedengel a chad a mo mechut el mo diak, engdi a Dios a sebechel el okisii ngika el osisiu el chad e msang a beches el bedengel.—Monguiu er a 1 Korinth 15:35, 38.
Te di mekesai el chad a mo nguu a klengar er a eanged. (Ocholt 20:6) E a ruumesingd er tirke el mo mekiis a mo kiei er a mlukbeches el paradis el ngar tia el chutem. Tirkang a mo omuchel er a beches el klengar er tir el oba omelatk el mo kiei el mo cherechar.—Monguiu er a Psalm 37:29; Rellir 24:15.