Lmuut el Mo Ungil a Duch er Kid el Ngar er a Omesiunged—Rolel a Donger er Tirke el Merrob a Cheldechedechad

A Uchul Me Ngklou a Ultutelel: Ke mo mekerang sel bo modengei el kmo a klou el tellemall a meremang el sebechel el mo uchul a kodellir a rechad a lsekum e ngdiak lechiis? Ke ulterekokl el mo er a blil a tonari er kau el mo ouchais er ngii. Engdi ke mo mekerang a lsekum ngtorebengii a cheldechedecham e dmu el kmo ngmechesang? Ke ulterekokl el diak di mereched el choitii e lak mngesuir. Me ngdi osisiu, a rebetok el chad el doldingel er tir a oltngakl er kid e le ngdiak lodengei el kmo a klumech el dobang a mo uchul a klengar er tir. Sel taem el bo doldingel er tir e te locha mechesang. (Mt. 24:37-39) Me a lechub e te mla remenges a cheleblad el tekoi el kired. (Mt. 11:18, 19) Me te locha omdasu el kmo kede di ua aike el bebil er a klechelid el oltobed a mekngit el rodech. (2 Pe. 2:1, 2) Me a lsekum a chad er a blai a di kot e diak lesemeriar, e ngdiak el kired el di mereched el mo ikrii a chad e merael.

Rolel a Moruul er Ngii:

A uchei er a bo moldingel a obliil, e molatk el kirel aike el tekoi el sebechel el mo uchul e ngmeterob a cheldechedecham e molatk el kmo ngmekerang a bo monger.
A lsekum e a chad er a blai a mo omtok er kau, e molasem el melemolem er a cheldechedecham el ngar er a medemedemek el rolel. Nglocha sebechem el meruul el uaisei el oeak sel mchat er ngii. El uai tiang, a lsekum e ngdmu er kau el kmo ngar er ngii a klechelid er ngii, e nglocha sebechem el melekoi el kmo, “Ngmera el mle soak el mo metik er a chad el uai kau el kmal semeriar er a tekingel a Dios.” A lebebil er a taem e a omerellem el ochotii el kmo ke mengull er a uldesuel a chad er a blai a mo uchul e ngkongei er kau me ke melemolem el ousioning el mo er ngii. El uai tiang, a lsekum e ngdmu el kmo ngmechesang, e nglocha sebechem el melekoi el kmo: “Mousubes, ngsebechek el meskau tia el babier er a uchei er a kurael?” Ngdirrek el sebechem el oker er a ker sel sekum a chad er a blai a dmu el kmo ngdiak el semeriar. Nglocha sebechem el dmu el kmo, “Ngbelkul a kmo ngdiak msemeriar el kirel a Biblia, me a lechub e ngkuk di diak msemeriar er a klechelid?”
Bo mungil el melilt a tekoi el bo moruul. Lak mobes el kmo a Jehovah a diak lorrimel er a rechad el mo orrenges. (Dut. 30:19) A rokui el chad a kirir el mo chemur a ngerechelir er medal a Jehovah. (Gal. 6:⁠5) Me a lsekum a chad er a blai a di olsibes er a uldesuel, e ngbai ungil a dorael. Sel dolecholt a omengull el kirel a uldesuel, e ngmo sebechel a kuk ta er a publisher el mo ousioning el mo er ngii er a uriul.—1 Pe. 3:15.

Molasem er Tiang er Chelecha el Buil:

Sel sekum e a chad a mo merrob er a cheldechedecham, e a uriul er a omorael, e ngsebechem el mesaod el obengkel a chad el mdak el oldingel el kmo ngerang a mle ungil el rolel a omonger er ngike el chad.