Ngimbo
ל [Lamede]
10 Oo Yehowa, mukunda natshi wamagana gualeha?
Mukunda natshi wadisuega mu tangua dia lamba?
2 Muthu wabola udi muhata muthu udi mu lamba nu lulendo luagasue,
uvi muene mbawukuatagana mu miheto idi muta muene.
3 Muthu wabola udi gudisunzula mukunda nu nzala jienji jiabola,
udi mushimbiga muthu udi nu ngina jiabola;*
נ [Nune]
muene gana nemesa ndo Yehowa.
4 Muthu wabola wana khala nu lulendo, gana kamba ndo gujiya Nzambi;
wana zuela mu mutshima wenji egi: “Nzambi gashigo guene.”
5 Wana binga mu ndaga jiagasue jiana kalagala muene,
uvi mbagashigo mukotelesa nga hazonda usopheshi waye;
muene wana segulula mbalagaji jienji jiagasue.
6 Wana zuela mu mutshima wenji egi: “Mbangushigo munyigishiwa* nga hazonda;
mbangushigo mumona malamba
mu indongo yagasue.”
פ [Pe]
7 Kano guenji gudi guazala pha nu mikumbu nu mambo nu mbimbi jia khuta;
wana zuela ndaga jiana sagesa nu jiana namenesa.
8 Muene wabandemena hehi nu membo;
wazoga ha fundo dia disuegi muene, washiya muthu gakalegelego gubola.
ע [Ayine]
Meso enji adi mukamba muthu wa gusagesa.
9 Muene udi ya gudisuega, udi munengenena gifua khoshi.
Udi mubandemena ha gukuata muthu udi mu lamba.
Wakuata muthu udi mu lamba hadi muene munana wanda wenji ha guwukanga.
10 Muthu udi mu lamba wabuishiwa hashi;
athu aleba abua ha mago a muthu wabola.
11 Muthu wabola udi muzuela mu mutshima wenji egi: “Nzambi wajimbidile gale genji.
Udi mutala guekha.
Gashigo mumona nga hazonda.”
ק [Qoph]
12 Oo Yehowa, zuga. Oo Nzambi, thuphula koko guaye.
Ujimbilago athu adi mumona lamba.
13 Mukunda natshi muthu wabola gashigo munemesa Nzambi?
Udi muzuela mu mutshima wenji egi: “Mbawushigo gungusophesa.”
ר [Resh]
14 Uvi aye wana mona tangua ndaga jia lamba nu jia gikenene jiana bua.
Wana mona ndaga jiagasue, wana khala hehi ha gukuatesa.
Athu adi mu lamba ana lengela gudi aye;
wana kuatesa ana a shiye.*
ש [Shin]
15 Bogola koko dia muthu wabola nu dia mbundudi,
ngenyi gula wakamba gubola guawo,
mbawushigo gugumona.
16 Yehowa udi Fumu ivo nu ivo.
Ifutshi yatotele ha mavu.
ת [Taw]
17 Uvi mbawuvua gudila gua athu a gudibulumuisa, Oo Yehowa.
Mbawaahana gikhesa, mbawaategelela.
18 Mbawubatula milonga mu luholo luabonga mukunda nu ana a shiye nu athu adi nu gikenene,
hagula athu a ha mavu a avuishigo luko woma.