Ngimbo

9 Oo Yehowa, mbangugutumbuisa nu mutshima wami wagasue;

mbanguwambela athu midimo yaye ya gushimana.

 2 Mbangukhala nu gusuanguluga guavula mukunda nu aye;

Oo Nzambi wa Gudinyinyiga, mbanguyimba ngimbo* ha gutumbuisa jina diaye.

 3 Tangua mbalagaji jiami mbajilenga,

mbajibua, mbajitota gutuama diaye.

 4 Handaga wana gunguluila;

udi ha nguasa yaye ya ufumu ha gusophesa mu luholo luabonga.

 5 Wabalele ifutshi, washiyile athu abola,

watotesele majina awo mayilago.

 6 Mbalagaji jiashiyiwe mayilago,

membo awo nji ashiyiwe,

athu mbaashigo guatangiza luko.

 7 Uvi Yehowa udi ha nguasa yenji ya ufumu mayilago;

wahagi nguasa yenji ya ufumu ha gusophesa.

 8 Muene mbawusophesa mavu mu luholo luabonga;

mbawubatula milonga ya ifutshi mu luholo luabonga.

 9 Yehowa mbawubua fundo diabonga dia gulengela mukunda nu muthu udi nu gikenene,

fundo diabonga dia gulengela mu tangua dia lamba.

10 Athu adi mujiya jina diaye, mbaagushila mutshima;

Oo Yehowa, aye mbawubembigo nga hazonda athu ana gugukamba.

11 Yimbenu ngimbo ha gutumbuisa Yehowa wana khala gu Siona;

wambelenu athu midimo yenji.

12 Nzambi mbawuwunguluga athu adi mumona malamba,

mbawuvutula gubola mukunda nu mahatshi awo,

mbagashigo mujimbila gudila guawo.

13 Oo Yehowa nguvile khenda, tala lamba didi gungumonesa athu anago gunguzumba,

mbawunguhuluisa mu gufua,*

14 hagula ngulongese ndaga jiaye jia gushimana ha mifulo ya dimbo dia mona mukhetu wa gu Siona,

mbangusuanguluga handaga wanguhuluisa.

15 Ifutshi yabua mu wina diahagele ene;

malu awo akuatagana mu wanda atele.

17 Muthu wabola mbawuya mu Malumba,*

diene fundo mbadiya ifutshi yagasue idi mubuita Nzambi mutshima.

18 Uvi Nzambi mbagashigo mujimbila phutu;

felela dia muthu wa gudibulumuisa mbadishigo mutota nga hazonda.

20 Oo Yehowa vuisa athu a ifutshi yene woma,

hagula ajiye egi ene adi ana a athu. (Sela)