Ngimbo
Mikitame* ya Davidi.
16 Oo Nzambi, ngubambe handaga ngana lengela gudi aye.
2 Ngawambelele Yehowa egi: “Aye udi Yehowa, ima yami yagasue yabonga yana katuga gudi aye.
3 Athu a gijila adi ha mavu,
athu akoma, ana gunguhana gusuanguluga guavula.”
4 Athu adi mukombelela nzambi jiko adi gudivudishila malamba.
Mbangushigo mubundula milambu yawo ya mahatshi,
kano guami mbagutumbulago majina awo.
5 Yehowa udi khapho diami, shinda diami dianguhuiwe, udi khopho diami.
Muene wana bamba khapho diami.
6 Athesele mafundo abonga mukunda nu ame.
Ayi, ngana suanguluga nu khapho diami.
7 Mbangutumbuisa Yehowa, handaga muene wanguhanele malongo.
Mutshima wami wana gunguhana lubelo ikhale mu phipha.
8 Ngana haga Yehowa gutuama diami tangua diagasue.
Mbangushigo munyigishiwa,* handaga muene udi gu koko diami dia madia.
9 Mutshima wami udi nu gusuanguluga, ngudi diago nu gusuanguluga guavula.
Ngana khala mu ubambi.
10 Handaga mbawushigo gungubemba mu Malumba.*
Mbawushigo mubemba egi muthu udi ya gujinginyina gudi aye afukhe mu malumba.*
11 Wana gungudijiga njila ya monyo.
Ngana khala nu gusuanguluga luholo ngana khala gutuama diaye;*
gukhala gu koko diaye dia madia, guana bata gusuanguluga ivo nu ivo.