Yobo
37 “Hene mutshima wangubudiga muphushi
gifua udi mutshigina gukatuga ha fundo dienji.
2 Tegelelenu muabonga gubala gua dijui dienji
nu muandu udi mukatuga mu kano dienji.
3 Muene wana tuma muandu ha mavu,
wana tuma nji guhenya guenji uu nu gugisugishilo gia mavu.
4 Gungima dia matululu akola;
wana numisa muandu nu dijui dienji dia lutumbu,
ganago gubemba tangua dijui dienji didi muvuiwa.
5 Nzambi wana numisa muandu nu dijui dienji mu luholo lua gushimana;
wana tshita ndaga jiakoma jinyi tuajiyilego gukotelesa.
6 Handaga muene udi muwambela neje egi: ‘Bua ha mavu,’
udi muwambela nji mvula egi: ‘Noga muavula ha mavu.’
7 Nzambi wana sugisa midimo ya athu agasue*
hagula athu agasue a ha mavu ajiye mudimo wenji.
8 Shitu jia mu foto jidi muya mu mawina ajio
jidi nji mukhala mu mawina ene.
9 Muhehe wakola wana bunda sendese ha fundo diana khala wene,
funji ya gu khanda ya nord yana bata guhuma.
10 Muhehe wa Nzambi wana buisa meya gifua seso dia huma,
meya avula ana kuatagana ha gubua gifua seso diahuma.
11 Muene wana zalesa matuta nu manoso* a meya;
wana sonona muandu wenji mu matuta;
12 matuta ana balumuga khanda nu khanda ha fundo didi muene guatuameza;
ana kalagala ndaga yagasue yana guawambela muene ha gutshita ha mavu.*
13 Wana guyitshita ha guhana ndola* nga ha gutebesa mavu
nga mukunda nu guzumba guenji gua giamatshidia.
14 Ngabuba Yobo tegelela ndaga eyi;
hena tedie, tangigiza muabonga midimo ya gushimana ya Nzambi.
15 Udi mujiya luholo Nzambi wana tuameza matuta,
nu luholo luana henyesa muene muandu wana katuga mu tuta dienji ba?
16 Udi mujiya luholo matuta ana wenda gosa ba?
Eyi midimo ya gushimana ya muthu wana khala nu ujiyi watagana.
17 Mukunda natshi milele yaye idi mubua tshuya-tshuya
hadi mavu tedie mukunda nu muhehe wa gukhanda ya sud?
18 Aye wajiya gusununa n’enji dilu
nu gudibuisa diakola gifua nganza ya utadi ba?
19 Tuwambele ndaga tudi naye gumuwambela;
tuajiyilego guhana mvutu handaga guma gudi guabuita.
20 Adi naye gumuwambela egi ngudi mutshigina guzuela ba?
Nga ndo gudi nu muthu wazuedi ndaga imoshi adi naye gumuwambela ba?
21 Ajiyilego gumona nga wene muanya,
ngatshima udi muhenya mu dilu,
uu nu tangua muhehe mbawubalega nu mbawumuanga matuta.
22 Muanya udi muhenya gifua wolo wana katuga gu khanda ya nord;
lutumbu lua Nzambi ludi muvuisa woma.
23 Tuajiyilego gukotelesa Nzambi wa Ngolo Jiagasue;
udi nu ngolo jiavula diago,
gajiyilego gusophesa mu luholo luabola, wana kalagala ndaga jiabonga.
24 Uvi, athu adi naye gumuvuila woma,
handaga muene ganago gusuanguluga nu athu ana tangiza egi adi atema.”*