Gitshinyi 2
Luholo Tshi Aye Gujiya Giamatshidia mu Ndaga ya Nzambi?
1, 2. Njimbu tshi idi mudijiga egi tudi nu funu ya nduedi nga githeselo gimoshi hagusugisa giphapha mu ndaga ya ikombelelo?
LUHOLO TSHI esue gujiya Nzambi? Ndag’eyi imulomba egi tujiise muabonga sha malongo a ikombelelo yavula ba? Yajiya gukhala lamba. Gula idi ngenyi, luholo tshi esue gujiya egi malongo wawa adi abonga?
2 Ya diago, hagumona matangi agudiyila mundaga ya Nzambi, idi yatagana gujiya nduedi nga githeselo gimoshi giajiya gutshigina athu agasue hagukotelesa giamatshidia. Tuzule njimbu yeyi: Gula adi mudiga mulele umoshi ha gisalo mu mametele, muthu mumoshi wasumba gimbundu gimoshi. Mudigi wazuela egi mulele wene udi wagulunga, uvi musumbi udi mumona egi ushigo walungando. Luholo tshi ajiya gumanesela ndageyi? Khuta gula athesa mulele wene nu metele adi muene mudigila.
3. Bibiliya yafundjiwe mukunda natshi?
3 Gudi nu metele aguthesela nga nduedi mu ndaga ya ikombelelo ba? Ai, idi Bibiliya. Nzambi wafundjishile Bibiliya hagula athu a ifutshi yagasue alonguge giamatshidia gienji. Inunu ya makopi a Bibiliya yazolewe. Ya balumuiwe gale yagasue nga ya gitshinyi, mu mazuelelo gubalega 2 100. Muthu yagasue wajiya gulonguga giamatshidia gia Nzambi mu zuelelo dienji.
4. Ndaga tshi tuajiya guheta mukhatshi dia Bibiliya?
4 Bibiliya idi bunda dia ndando dia katugile gudi Nzambi. Idi mukotelesa ima ii tuajilego gujiya esue hakhetu gula yene ishigo. Yanatukotelesa ndaga jia athu anajinga mu mafundo a ivule. Idi mutukotelesa matangi a Nzambi, uthu wenji, nu felela dienji. Idi mutudijiga luholo tshi Nzambi wanakuatesa athu sendese inunu ya ivuo. Yanagutukotelesa ndaga ji mbajibua mu masugu amuza gutuama. Nu idi mutuwambela luholo tshi guheta njila idi mutuameza gu monyo wa ivuo nu ivuo.
Ndaga Jiagishina Jiajiya Gugutuma Aye Gutshigina Bibiliya
5. Njimbu itshi idi mudijiga egi Bibiliya idi ya gudivua nu siansi?
5 Njimbu jidi jiavula jiajiya gututshiginyisa, nga ha esue gutaya egi Bibiliya idi diago Mbimbi ya Nzambi. Njimbu ya gudiangela idi egi Bibiliya idi gudivua nu ndaga jianazuela siansi. Mu masugu agumangima athu avula hamavu akhalele mutangiza egi mavu akhala holu dia gima gimoshi gianaguakuata. Idi gifua gu Afrika a Weste, athu akhalele mutangiza egi mavu anakhala holu dia nyoga imoshi ya koma ya gudilanga-gudilanga mu mabende mahugo 3 500 holu dia mavu nu 3 500 goshi’a mavu. Uvi, hagudivua nu siansi, mufundji wa Bibiliya mumoshi wafundjile gale ivuo 3 500 gudiangela egi Nzambi “wazenzelesele mavu mu gituu, gima gia guakuata ndo.”—Yobo 26:7.
6. Njimbu tshi yakoma imudijiga egi Bibiliya idi diago mukanda wa Nzambi?
6 Njimbu ya koma idi mudijiga egi Bibiliya idi diago mukanda wa Nzambi, idi luholo luayo luatagana lua gudijiga mulongo wa ndaga jii mba jibua mu masugu amuza gutuama. Nzambi gashigo gifua maprofeta a athu, muene wanajiya diago ima imbayibua mu masugu amuza gutuama, nu yagasue idi muene muzuela mbaitagana.
7. Ndaga tshi jia zuelele azueledi a Nzambi mu Bibiliya jia taganene mu masugu abalegele gungima?
7 Ndaga jiavula jia Bibiliya ji jiazuelele azueledi a Nzambi jiataganene mu masugu a balegele gungima. Tuzule gifezegeselo: Bibiliya yazuelele ivuo 700 gutuama gamba Yesu mba ubutshiwa gu Betelemi, nu mbimbi’eyi yatagenene. (Mika 5:2; Matayo 2:3-9) Mukatshi dia ndag’eji jiavula jia zuelewe mukunda nu Yesu, Bibiliya yazuelele luko egi mbaubutshiwa gudi mona mukhetu khenji gajiyiwa galego gudi yala nu mbaudigiwa mu falanga jia ibende 30. Ndag’eji, jiatagenene nji. Ya diago, gushigo nga muthu mumoshi wazuelele gale ima ya muho uu!—Yeshaya 7:14; Zakaliya 11:12, 13; Matayo 1:22, 23; 27:3-5.
8. Tanga gabuta ga ndaga jia zuelele azueledi a Nzambi mu Bibiliya jii jidi mutagana mu masugu etu wawa, nu jidi mudijiga itshi?
8 Ndaga jiavula jia zuelele azueledi a Nzambi mu Bibiliya jidi mutagana mu masugu etu wawa. Tala gabuta ga ndaga jiene:
● “Gifutshi giko mbagiluisa giko [gu ita], nu ufumu uko mbawuluisa uko. Mavu mbadigita mangololo, nzala nu misongo yabala mbayikhala khanda nu khanda.”—Luka 21:10, 11.
● “Gubola mbagudivudisa.”—Matayo 24:12.
● “Mu masugu a gisugishilo . . . athu mbakhala muditanga, ene hakhawo, azumba mbongo, . . . mbalumbugiila mvuaji jiawo, . . . enya nguma, enya khuta, nu mbalagaji jia ndaga jiabonga, . . . mbakhala azumbi a gusuanguluga gua hamavu uvi guzumba Nzambi ndo.”—2 Timote 3:1-5.
Ushigo mutshigina egi ndag’eji jidi mutagana mu masugu etu wawa ba? Hagumona ndaga jia Bibiliya mutagana mu giamatshidia gia gasue idi mudijiga egi Bibiliya ishigo mukanda gifua mikanda iko. Idi Mbimbi ya fundjiwe gudi Nzambi sha!—2 Timote 3:16.
Ndaga Jia mu Bibiliya Jia Sombegesewe Gale Ba?
9, 10. Itshi imudijiga egi Nzambi gahuilego athu njila ha gusombegesa Bibiliya?
9 Gula udi nu kompanyi yaye nu washila athu aye amudimo mikhuala idi nayo ene gulandula. Gula mbalagaji wabalumuna mikhuala i wafundjile, itshi wajiya gutshita? Ulonda mafundo abalumuna muene nga ubemba ngenyi? Luholo lumoshi, Nzambi gashigo mutshigina athu asombegese giamatshidia gidi mu Bibiliya, Mbimbi yenji.
10 Athu agasue ago atangijile ha gusombegesa malongo a Mbimbi ya Nzambi, anungilego. Gula tuafuanegesa Bibiliya itudi nayo mangino nu makopi amualeha a Bibiliya, jiagasue jidi luholo lumoshi. Idi mudijiga egi Bibiliya idi luholo lungoshi nga tshima ivuo ya balega gale yavula.
Mikhuala Idi Athu Muhana Khuta Gukano—Tuajiya Guishila Mutshima Ba?
Ikombelelo ya mambuta a mu Afrika ishigo nu mikanda ya gijila ya mualeha. Shigu jia mambuta, luholo lua gukombelela, nu malongo a Nzambi analongewa gindongo nu gindongo khuta gukano. Mukanda umoshi (La religion traditionnelle en Afrique occidentale) umuzuela egi: “Mene jia natewa gukano jia nakondago ifu. Mahugo avula athu analezela, anakatula, nu anabalumuna giamatshidia, analezela mungua nu tundoma mu mene jiavile ene, hene idi lamba ha gukhaphumuna giamatshidia nu mambo.”
[Muhu wa longo]
Luphango: Itshi idi muzuela mukanda umoshi mukunda nu ndando ya mene nga mikhuala idi athu muhana khuta gukano?
[Fundo diazanguiwa foto idi ha diyiji 6]
Mona nu ginenji adi mufwa gu nzala: © Giacomo Pirozzi/Panos Pictures