Gitshinyi 7
Akhuatshi Adi mu Gikombelelo gia Giamatshidia?
1. Itshi tuajiya gutshita haguswanguluisa Nzambi?
HA GUSUANGULUGA nu ufuta wa guzumba gua bonga nu Nzambi, tuajiyilego gukuata nga gima gimoshi gia gikombelelo gia mambo. Tudi naye gukombelela mu giamatshidia. Mangino inunu y’athu mu mavu wawa adi mukombelela mushindo ou.
2. Gui tuajiya gumona Alondolodi a Yehowa, nunji mudimo wawo udi itshi?
2 Gifua muazuelele Bibiliya, akombeledi a giamatshidia adi agudibungisa mukhatshi dia “thundu yakoma y’athu” inyi ‘yakatuga mu ifutshi yagasue nu mu iphuta yagasue nu mukatshi di’athu agasue nu mazuelelo agasue.’ (Yatuwuwe 7:9) Mu membo 235, inunu ya Alondolodi a Yehowa adi mukuatesa athu hagulonguga njila ya guzumba gua Yehowa nu ndaga ji ganalomba.
Luholo lua Gujiya Akombeledi a Giamatshidia
3. Alondolodi anakombelela nanyi, nu ukombeledi wa luholo tshi wanatuna ene?
3 Alondolodi anajiya egi Yehowa muene hakhenji walunga ha gukombelewa. Anatuna gufugamena ikhokho nga ifuanesa iko ya ikombelelo. (1 Yone 5:21) Anashago masaga hagukhala mubanda hanze mukunda nu gukombelela muthu wagufua, gumunemesa nga gutshita ndaga jiko jidi mukumbulula milonga ya gikombelelo gia mambo nu “malongo a mademo.” (1 Timote 4:1) Uvi, anakolesa athu afundji nu gu’akotelesela egi felela dia Nzambi didi egi athu agufua mbafuzumuga mukunda ha ene gujinga mu paladisu hamavu.—Yone 5:28-29; Makalegelo 24:15.
4. Muho tshi athu a Nzambi anatalela maji?
4 Alondolodi anatshitshilago maji, wanga, nga unganga-ngombo, mukunda anajiya egi ndaga eji jiagasue jianakatuga gudi Diabulu. Anatangizago egi maji ajiya guabamba nga guakuatesa, anasha mutshima wawo gudi Yehowa.—Ishima 18:10.
5. Luholo tshi Alondolodi a Yehowa, ashigo a hamavu wawa’?
5 Yesu wazuelele gamba alandudi enji “ashigo a ha mavu.” (Yone 17:16) Yesu muene hakhenji watunyine gungina mu ndaga jia politiki jia mu kumbi dienji. (Yone 6:15) Luholo lumoshi luene, Alondolodi ananginago mu ndaga jia politiki, ndaga jia guzumba gua dimbo, nu gudiluisa ha guheta fundo dia ginemua mu mavu wawa. Uvi, anafuta itadi yawo nu anatumaga gu shigu jia dimbo di adi mujinga.—Yone 15:19; Lomo 13:1, 7.
6. Mikhuala tshi idi atshitshidi a Nzambi mulandula mu ndaga ya mahata nu ya gushiya mahata?
6 Mukunda ananemesa utuameji wa mbula-matadi, Alondolodi anasonegesa mahata awo gudi mbula-matadi. (Tito 3:1) Anatumaga mu mikhuala ya Nzambi, ngenyi ene anatuna khongo. (1 Timote 3:2) Luyadi, luholo luanalandula ene gutshitshila mikhuala ya Bibiliya mu lujingu luawo, yanakhala lamba gudi atshitshidi a Nzambi hagushiya mahata awo.
7. Luholo tshi Alondolodi anadijiga guzumba mu khatshi diawo?
7 Alondolodi anagudizumba. Nga tshima adi athu a mu iphuta yavula nu membo avula, uvi guzumba gua mushindo wou, nu guzumba Nzambi, guana guabungisa sha. Mukumbi dianabua malamba mu ifutshi iko nga mu kumbi didi athu nu funu ya guakuatesa, Alondolodi ako anaza muphushi hagukuatesa aphangi awo. Alondolodi anadijiga guzumba mu luholo luawo lua gujinga.—Yone 13:35.
8. Midimo tshi yabola atshitshidi a Nzambi anatuna?
8 Athu a Yehowa anasha ngolo ha gujinga mu ndaga jia giamatshidia, nu gulongologa. Anatuna gukaba, gumba mambo, gutshita uthambi, gukuatewa matombe, nga midimo ya mumbungu wa gukonda gulongologa. Mala anawasa akajiawo ndo. Gudiangela abue Alondolodi, athu ako mukatshi diawo akhalele mutshita ndaga jia luholo lulu, uvi mu gukuatesa gua Yehowa abembele gale. ‘Awovuewe’ gu meso a Nzambi.—1 Kolinto 6:9-11.
Anatshita Felela dia Nzambi
9. Itshi ya zuelele mukanda umoshi mukunda nu jinzo jia Nzambi mu Afrika?
9 Diago, ikombelelo yavula yanazuela egi adi mu giamatshidia. Ajiya gutshita ndaga jia gushimana hagutshiginyisa matangi awo. Hagufezegesa, mukunda nu jinzo jia Nzambi mu Afrika, mukanda umoshi umuzuel’egi: “Fundo dia mudimo wa muenya maji nga dia nganga-ihemba diazanguwe gale gudi ji [thundu jiampha jia Akilisto]. . . . Anazuel’egi anathondolola ima ii mba yibua gutuama nunji anatshita ndaga jia gushimana. Ngambi jiawo jianalota imonamona nu jianalondolola nji nzoji. Anatshitshila lusamphulu, maji a santu, buji nu mishi ya gambambula ha gusaga nu hagukatula misongo gudi athu.”
10, 11. Mukunda na tshi tuajiya guzuela egi ndaga jia gushimana jidi mutshitshiwa masugu awa mu ikombelelo jishigo mudijigago egi anatshiginyiwa gudi Nzambi?
10 Enya ikombelelo eyi anazuel’egi ndaga jia gushimana jianatshita ene jianadijiga egi gikombelelo giawo gidi nu luendu gudi Nzambi. Uvi ndaga jia gushimana jiene jishigo mudijigago egi Yehowa wanatshigina gikombelelo giene. Satana wanahana jingolo gudi akombeledi a mambo ako hagutshita “ndaga jia gushimana.” (2 Tesalonike 2:9) Hene, Bibiliya ya diangele guzuela egi ndaga jia gushimana ji jianakatuga gudi Nzambi, gifua gulongesewa gua Mbimbi ya Nzambi, guzuela mu mazuelelo angane, nu ndunge ‘mbajisuga.’—1 Kolinto 13:8.
11 Yesu wananele athu matshui egi: “Muthu yagasue udi mungutamega egi: ‘Fumu, Fumu,’ mbaganginyigo mu Ufumu wa mu dilu, khuta yago udi mutshita gifua mudi mutshigina Sh’ami udi mu dilu. Uvi mu lusugu lunu avula mbanguwambela egi: ‘Fumu, Fumu, tualongeselego mbimbi ya Nzambi mu jina diaye ba, tuakatuilego ivule ya Satana mu jina diaye ba nu tuatshitshilego ndaga jiavula jia gushimana mu jina diaye ba!’ Lusugu lunu mbanguawambela etshi: ‘Ngamijiyilego, katugienu gudi ame, enue akalagadi a ndaga jiabola.’”—Matayo 7:21-23.
12. Akhuatshi mbaangina mu Ufumu wa mu dilu?
12 Gula idi ngenyi, na akhuatshi mbaangina mu Ufumu wa mu dilu? Idi athu anatshita gifua mudi mutshigina Yehowa.
Analongesa Ufumu wa Nzambi
13. Mudimo tshi udi Nzambi mutuameza athu enji hagutshita mu masugu awa, nunji akuatshi adi gu utshita?
13 Itshi idi felela dia Nzambi mukunda nu athu enji mu masugu awa? Yesu wazuelel’egi: “Lukuma olu luabonga lua Ufumu mbalulongesewa gu songi jiagasue jia mavu gifua ulondolodi gudi ifutshi yagasue.” (Matayo 24:14) Ou udi mudimo Alondolodi a Yehowa adi mutshita nu ngolo jiagasue.
14. Ufumu wa Nzambi udi gima tshi, nu nanyi mba uhinyina Ufumu wene?
14 Mu “mavu agasue,” Alondolodi a Yehowa adi mulonga Ufumu wa Nzambi gifua uhinyinyi wa mu dilu unu mbauhinyina mavu agasue mu masonga. Analonga egi Yehowa watombele Kilisto Yesu hagukhala Fumu ya Ufumu wene, mbauhingana nu athu ako 144 000 mba akhala gifua phingua jia ufumu. Athu ene asolewe mu khatshi dia athu a hamavu.—Danyele 7:14, 18; Yatuwuwe 14:1, 4.
15. Ufumu wa Nzambi mbauza mushiya itshi?
15 Alondolodi anatshitshila Bibiliya hagudijiga athu egi Ufumu wa Nzambi mbaushiya gindongo gia Satana giagasue. Nzambi mbaushiya gikombelelo gia mambo nu malongo agio anagumukatula ginemua nu ananemesa Diabulu! (Yatuwuwe 18:8) Ufumu wa athu wagasue udi muluisa Nzambi mbaushiyiwa nji!—Danyele 2:44.
16. Akuatshi mba’akhala athu a Kilisto Yesu, nu mbaajinga mu fundo tshi?
16 Ha ndag’eyi, Alondolodi a Yehowa anadijiga egi Kilisto Yesu mbautshita ndaga jiabonga mukunda nu athu ago adi mutshita idi Nzambi mualomba. Mba’akhala mu uhinyinyi wenji hamavu. Bibiliya idi mutendelela egi: “Muene udi mukula athu a phutu adi mudila gudi muene, nu enya malamba adi gashigo nu muthu ya guakuatesa. Muene udi nu jikhenda gudi athu aleba nu gudi jiphutu. Muene udi muhuluisa mionyo y’athu adi gashigo nu gima.”—Ngimbo 72:12, 13.
17. Akuatshi analonga Ufumu wa Nzambi khuta ene hakhawo?
17 Gushigo nu thundu iko ya athu adi mutshita felela dia Nzambi dia gulonga lukuma lua bonga lua Ufumu. Khuta Alondolodi a Yehowa ene hakhawo analonga Ufumu wa Nzambi mu mavu agasue.
[Foto ha diyiji 23]
Alondolodi a Yehowa adi agudibungisa mu uphangi mu mavu agasue