Ayile nu Yesu Gudi Ana, Gungima Ayile Nenji Gudi Kaife

Tangua masuta nu mafumu a enya Yuda ajitshigile Yesu gifua mutshitshi wa ndaga jiabola, ayile nenji gudi Ana, yonu wakhalele thomo nganga-nzambi wakoma tangua Yesu wayitugishile alongeshi a mikhuala mu tempelo. (Luka 2:42, 47) Gungima, ana a mala a nganga-nzambi owu abuile nji nganga-nzambi jiakoma. Mu tangua edi akuatele Yesu, giwaji gienji Kaife wakhalele nganga-nzambi wakoma.

Hakhalele Yesu gumbo dia Ana, Kaife wahetele tangua dia gubungisa athu agasue a gu tribinale ya enya Yuda yakhalele mutamegewa egi Sanhédrin. Tribinale yene yakhalele nu asopheshi 71, nu nganga-nzambi wakoma nu athu ako anyi akhalele nji thomo nganga-nzambi jiakoma.

Ana wahudile Yesu mihu ‘yatadila alandudi enji nu malongo enji.’ Uvi Yesu wabalumuine gamba: ‘Ngalongesele athu haphelo. Ngakhalele mulongesa masugu agasue mu ikombelelo nu monzo ya Nzambi, mafundo ana gudibungisa enya Yuda agasue. Ngazuelelego nga mbimbi imoshi mu mafumbe. Itshi udi munguhudila ame? Hula athu avuile mbimbi yami mu ndaga eji ngawambelele.’—Yone 18:19-21.

Mubambi mumoshi wakhalele mumagana hehi n’enji, wabetele Yesu mbanda mu phala, wazuelele egi: ‘Ngenyi udi naye gubalumuina nganga-nzambi wakoma?’ Uvi Yesu wajiyile egi gatshitshilego nga gima gimoshi giabola, hene wavutudile gamba: ‘Gula ngazuedi muabola, ulondolole ndaga eyi ngajimbila; uvi gula ngazuedi muabonga, mukunda natshi wangubetela giwa mbanda?’ (Yone 18:22, 23) Gungima, Ana watumine Yesu gudi giwaji gienji Kaife.

Mu tangua diene, athu agasue akhalele mukatshi dia tribinale ya enya Yuda (sanhédrin), adibungishile. Mukatshi diawo, tuajiya gutanga nganga-nzambi wakoma wa mu tangua dinyi, malemba a athu, nu alongeshi a mikhuala. Adibungishile gumbo dia Kaife. Mukhuala wakhalele mutunyisa ha gusophesa muthu mu phipha mu lusugu lua Pake, uvi ene adibungishile ha gutagenesa felela diawo diabola.

Athu awa akhalele diago nu matangi abola. Tangua Yesu wafuzumuine Lazare, tribinale ya sanhédrin yazudile desizio dia gushiya Yesu. (Yone 11:47-53) Luko, masugu azonda egi Yesu akuatewe, mafumu a mangumba ayile giphungi ha gukuata Yesu ha gumushiya. (Matayo 26:3, 4) Hene, gutuama egi amusophese, akhalele azudi gale desizio dia gumushiya!

Mafumu a nganga-nzambi nu asopheshi ako a mu sanhédrin adibungishile ha gusophesa Yesu mu luholo luakhalelego gudivua nu mikhuala. Luko, akambele mathemua hagula azuele ndaga jia mambo jiajiya gubuisa Yesu. Amonele mathemua avula, uvi ndaga akhalele ene muzuela jiakhalele jia gudisha. Gugisugishilo, ayile nu azuelele egi: “Tuamuvuile muzuela gamba, ‘Mbangumuanga inzo ya Nzambi eyi yatungile athu nu mago, uvi mu masugu atatu mbangutunga iko idi ishigo ya gutungiwa gudi athu nu mago.’” (Mako 14:58) Uvi, mathemua awa nji akhalelego mbimbi imoshi.

Kaife wahudile Yesu egi: ‘Aye ushigo nu mbimbi ya gubalumuna ba? Ndaga eyi idi athu awa muzuela mukunda nu aye idi gutshi?’ (Mako 14:60) Yesu wahuenele tedie gutuama dia mathemua awa akhalele muzuela ndaga jia gudisha. Hene, Nganga-nzambi Wakoma Kaife wakadigile ndunge jiko.

Kaife wakhalele mujiya muabonga egi enya Yuda ana guvua khabu gula muthu udi muditamega egi mun’a Nzambi. Masugu abalega, tangua Yesu watamegele Nzambi egi Sh’enji, enya Yuda atshiginyile gumushiya handaga azuelele egi, muene “waditesele nu Nzambi.” (Yone 5:17, 18; 10:31-39) Luholo Kaife wakhalele mujiya ngenyi, wahudile Yesu nu matangi agasue abola egi: ‘Ngudi mugulogesa mu jina dia Nzambi wa monyo, tuwambele gula udi Klisto, mun’a Nzambi!’ (Matayo 26:63) Yadiago, Yesu wakhalele muzuela egi muene udi Mun’a Nzambi. (Yone 3:18; 5:25; 11:4) Henyaha, gula Yesu watuna gutshita ngenyi, mbayimonega gifua udi mutuna egi ashigo mun’a Nzambi, nga Klisto. Hene, Yesu wazuelele egi: ‘Ngudi muene. Mbamumona khungi yenu yagasue, Mun’a muthu muditumbiga gu koko gua madia gua Nzambi wa ngolo jiagasue, nu udi muza mu matuta a mu dilu.’—Mako 14:62.

Tangua Kaife wavile ngenyi, watshiamuine milele yenji nu khabu jiagasue, wazuelele egi: ‘Muene nu gushinga Nzambi ngenyi, na itshi tukambela luko mathemua ako? Muamona! Henyaha muavua mashingana enji! Itshi mudi mutangiza?’ Enya sanhédrin azudile desizio diabola, azuelele egi: “Udi naye gushiyiwa diago.”—Matayo 26:65, 66, NW.

Gungima, asendesele gulela Yesu, nu gumukuma jikhome. Ako amuwasele mbanda mu phala, amufitshile mate. Gungima, atshuigile phala yenji yagasue, amubetele mbanda. Amuhudile nu gusegulula guagasue egi: “Aiwee, usolole, nanyi waguwasa?” (Luka 22:64) Tala luholo enya Yuda atshitshile Mun’a Nzambi ndaga, tangua amusophesele mu phipha mu luholo lushigo gudivua nu mikhuala.