Phetelo Watuna Yesu

Tangua Yesu wakhalele nu apostolo enji gu sugu ya gosa, waawambelele egi: ‘Mukut’enu agasue muza gungubemba mu phipha ya mangino.’ Phetelo wazuelele egi: ‘Ndo sha! Ikhale athu agasue agubemba, uvi ame ngajiyilego gugubemba nga hazonda.’ Uvi Yesu wawambelele Phetelo egi: ‘Gutuama egi kolombolo didile, aye mbawuzuela mbala thathu egi ushigo gungujiya.’

Tangua masuta abatele Yesu gumbo dia Kayifa, apostolo avula alengele. Uvi apostolo muyadi akhalele mulandula athu ene. Yakhalele Phetelo nu mupostolo muko. Phetelo wanginyile mu luphango lua Kayifa, wayile muweta tshuya. Luholo tshuya tuakhalele mulema muavula, muenya mudimo mumoshi wa mukhetu wamonele Phetelo, wazuelele egi: ‘Ngudi gugujiya! Aye nji wakhalele nu Yesu!’

Phetelo wazuelele egi: ‘Ndo gami, ngakhalelego n’enji! Ngushigo mujiya ndaga udi muzuela!’ Phetelo wayile gu khanda ya mufulo. Uvi muenya mudimo muko wa mukhetu wamumonele, wawambelele athu egi: ‘Muthu yowu wakhalele nu Yesu!’ Phetelo wazuelele egi: ‘Ngushigo mujiya Yesu nga hazonda!’ Yala muko wazuelele egi: ‘Aye nji wakhalele nawo! Luholo luaye lua guzuela ludi mumonesa egi udi muenya gu Galileya gifua Yesu.’ Uvi Phetelo wadilogele egi: ‘Ngushigo gumujiya!’

Mu tangua diene, kolombolo diadidile. Yesu wabalumugile watalele Phetelo. Phetelo wawungulugile mbala imoshi ndaga jiazuelele Yesu, wazogele hanze; wasendesele gudila mangololo.

Mu tangua diene, enya Sanedrene adivile ha gusophesa Yesu mu inzo ya Kayifa. Akhalele adivi gale ha gumushiya, uvi henyaha adi mukamba gishina gia gumushiyila. Uvi akhalelego mumona nga ndaga imoshi yabola ya gumufundila. Gungima, Kayifa wahudile Yesu mbala imoshi egi: ‘Aye udi Mun’a Nzambi ba?’ Yesu wazuelele egi: ‘Ayi.’ Kayifa wazuelele egi: ‘Tushigo luko nu funu ya gukamba mathemua. Muthu yowu udi mushinga Nzambi!’ Enya Sanedrene agasue azuelele egi: ‘Muthu yowu udi naye gushiyiwa.’ Asendesele gumuwasa jimbanda, amufitshile mate, amutshuigile mulele gu meso, amubetele, akhalele muzuela egi: “Gula udi profete, tuwambele nanyi wa gubeta!”

Hatshiele guma, ayile nu Yesu gu inzo yakhalele gudibungisa enya Sanedrene, amuhudile egi: ‘Aye udi Mun’a Nzambi ba?’ Yesu waavutudile egi: ‘Enue hakhenu muazuela egi ngudi mun’a Nzambi.’ Amonele egi washinga Nzambi, ayile n’enji gudi Phonse Pilato, guvernere wa gu Roma. Ndaga jiene jiasugile gikhuatshi? Tumuza guyimona.