Lazalo Wafuzumugile

Hataganele Yesu nu Mata nu Mariya hehi nu Betaniya, ayile gu ndumba ya Lazalo. Ndumba yakhalele nu seso dia gutshiga ha mufulo. Yesu wazuelele egi: “Katudienu seso.” Mata pangi’a Lazalo, gakoteleselego ndaga Yesu watshiginyile gutshita. Wazuelele egi: “Fumu, luenyelu udi gale mu nukha ndaga ya udi gale ya gufua masugu awana.” Uvi Yesu wamuwambelele egi: ‘Ngaguwambelelego egi gula watshigina mbawumona gutumbuga gua Nzambi ba?’—Yone 11:39, 40.

Hene akatudile seso ha mufulo. Gungima Yesu wazumbuile meso gosa watshitshile gisambu egi: ‘Tata, Ngudi guguhana mersi handaga wana gunguvuila. Giamatshidia, Ngudi mujiya egi wana gunguvuila masugu agasue; uvi ngazuela ngenyi ndaga ya athu adi mungujieta ajiye egi aye wangutumine.’ Gisambu giatshitshile Yesu ha meso a athu avula giamonesele egi ndaga yatshiginyile muene gukalagala yakhalele mu ngolo jia Nzambi. Gungima Yesu wazuelele mu dizui dia kola egi: “Lazalo, zoga!” Lazalo wazogele, wagulalewa milele gu mago nu gu malu, phala yenji yakhalele yagulalewa gilengo. Yesu waawambelele gamba, “mujitululenu mu mubembe aye.”—Yone 11:41-44.

Enya Yuda ajile ha guwalagana Mariya nu Mata amonele ndaga ya gushimana yatshitshile Yesu, hene ashile gutshigina gudi muene. Uvi athu ako asuangulugilego enji awambelele Afalese ndaga yatshitshile Yesu. Afalese nu nganga-nzambi ayile giphungi nu thundu ya manene a enya Yuda, gu tribinale yana gutamegewa egi Sanhédrin. Mukatshi dia thundu muakhalele nganga-nzambi wakoma, Kaife. Athu ako azuelele egi: ‘Tutshita gutshi handaga muthu yowu udi mutshita ndaga jiavula jia gushimana? Gula tuamumbemba ngenyi, athu agasue mbaamutshigina, enya Roma mbaaza ha guzangela inzo yetu ya Nzambi nu gifutshi gietu.’ (Yone 11:47, 48) Ngatshima avile ndaga jiazuelele athu amonele “ijiyishilo yavula” yatshitshile Yesu, mala ene asuangulugilego luholo Nzambi wakalegele ndaga yene munjila yenji. Ene akhalele muhaga lukuma nu ufumu wawo ha fundo dia thomo.

Gufuzumuga gua Lazalo guamonesele diago egi Asadoke akhalele enya mambo handaga akhalele muzuela egi muthu gajiyilego gufuzumuga. Kaife, wakhalele musadoke, wazuelele egi: ‘Enue muajiyilego nga gima gimoshi, mushigo mukotelesa egi, yabalega gubonga egi muthu mumoshi afue mukunda nu enue agasue hagula gifutshi gia mudidi gifuigo.’—Yone 11:49, 50; Makalegelo 5:17; 23:8.

daga yazuelele Kaife, gayizuelelego mu ngolo jienji hakhenji—uvi “wazuelele mu ngolo jia Nzambi.” Gudi muene Yesu wakhalele naye gushiyiwa ha gubamba lukuma nu ufumu wa mafumu a mangumba a enya Yuda. Uvi, profesi ya Kaife yamonesele egi Yesu mbawufuta gibawu mu njila ya gufua guenji mukunda nu “ana a Nzambi adi agumuangana mu ifutshi iko,” uvi mbagashigo mugifuta phamba mukunda nu enya Yuda.—Yone 11:51, 52.

Kaife watshiginyishile enya tribinale ya Sanhédrin ha gushiya Yesu. Nikodemo yago wakhalele nji muenya Sanhédrin wakhalele muzumba Yesu. Muene wawambelele Yesu ndaga yazuelewe mu giphungi giene ba? Ikhale ngenyi nga ndo, Yesu wakatugile mbala imoshi gu Yelusalema ha gula gashiyiwago handaga tangua diatombele Nzambi diakhalele khenji ditagana ndo.