Fumu wa Thomo wa gu Isalele

Yehowa wahanele enya Isalele manzuji ha guatuameza, uvi ene akhalele mutshigina gukhala nu fumu. Awambelele Samuele egi: ‘Ifutshi yagasue idi hehi nu esue idi nu mafumu. Esue nji tudi mutshigina gukhala nu fumu.’ Samuele watangijile egi ndaga yazuelele enya Isalele yakhalele yabola; hene, wakombelele Yehowa mukunda nu ndaga yene. Uvi Yehowa wamuwambelele egi: ‘Athu ashigo gugutuna aye, uvi adi gungutuna ame. Awambele egi ngudi guahagela fumu; uvi ajiye egi fumu muene mbawaatoga ima yavula.’ Ikhale ngenyi athu azuelele egi: ‘Ishigo mulonga. Esue tudi mutshigina gukhala nu fumu!’

Yehowa wawambelele Samuele ha gutomba yala mumoshi jina dienji Saula ha gukhala fumu. Muene wakhalele fumu wa thomo gu Isalele. Tangua Saula wayile mutala Samuele gu Rama, Samuele wamumbile maji holu dia muto ha gubua fumu.

Gungima Samuele wabungishile enya Isalele agasue ha guadijiga fumu muhe-muhe. Uvi Saula watotele, akhalelego gumumona. Aye mujiya mukunda natshi? Idi handaga wadisuegele mukatshi dia ima. Tangua amumonele, amuzolele gonze, amumagenesele mukatshi dia athu. Saula wakhalele waleha gubalega athu agasue, wakhalele wabonga diago. Samuele wazuelele egi: ‘Muthu Yehowa watombi muene yowu.’ Athu azuelele mu dijui diakola egi: ‘Fumu akhale nu monyo!’

Thomo Fumu Saula wakhalele mutegelela malongo a Samuele nu gutumagela Yehowa. Uvi gungima wasombegesele. Ha gufezegesa, ishigo fumu wakhalele nu ginemo gia guhana milambu. Uvi lusugu lumoshi, Samuele wawambelele Saula ha gumunenga ha guhana milambu, uvi luholo Samuele washiphile, Saula wahanele milambu yene muene hakhenji. Itshi Samuele watshitshile? Wamuwambelele egi: ‘Udi naye gutumagela Yehowa.’ Saula wazudile malongo mu gubola guenji ba?

Gungima, tangua Saula wayile muluise enya Maleke, Samuele wamuwambelele egi gashigo naye gubemba nga gima gimoshi nu monyo. Uvi Saula wabembele Fumu Agaga nu monyo. Yehowa wawambelele Samuele egi: ‘Saula wangutuna, gashigo luko gungutumagela.’ Samuele wavile gikenene giavula, wawambelele Saula egi: ‘Luholo wabemba gutumagela Yehowa, muene mbawutomba fumu muko.’ Tangua Samuele wabalumugile ha guya genji, Saula wamukuatele mangololo mu mulele, mulele wa Samuele watawugile. Gungima Samuele wawambelele Saula egi: “Mangino Yehowa wagutambula ufumu.” Mbawuwuhana gudi muthu munu mbawumuzumba nu mbawumutumagela.