Yehowa Wana Guzula “Amen” Yaye nu Ndando

YEHOWA wana guzula isambu yetu nu ndando. Wana ‘gutegelela nu wana guvuila’ akombeledi enji, wana gusuanguluga nu ndaga yagasue tuana gutshita ha gumusuanguluisa ngatshima idi yazonda. (Mal. 3:16) Ha gufezegesa, tutadilenu mbimbi tuana guzuela muavula. Mbimbi yene idi “amen.” Yehowa wana guzula mbimbi eyi yazonda nu ndando ba? Ayi! Ha gujiya mukunda natshi wana guyizula nu ndando, tukambenu gujiya gula mbimbi yene yakotelesa itshi, nu luholo lutshi ana guyikalegela mu Biblia.

“ATHU AGASUE MBATAYA EGI, ‘AMEN!’”

Mbimbi “amen” idi mukotelesa egi “ikhale ngenyi,” nga ndo “yadiago.” Yazudiwa mu mbimbi ya zuelelo dia Hebelu idi mukotelesa “gukhala yagujinginyina,” nga ndo “gukhala muthu wa gushila mutshima.” Matangua ako, akhalele guyikalegela mu tangua dia gusopha milonga. Gula muthu wadiloga, wakhalele muzuela egi “amen” ha gumonesa egi ndaga jiazuedi muene jidi jia giamatshidia, nu ha gumonegesa egi watshigina malamba agasue ajiya gumubuila gungima dia ndaga yene. (Lutang. 5:22) Gula muthu wazuela egi “amen” ha fundo dia athu avula, wakhalele mumonesa egi mbawutagenesa mbimbi jienji.—Neh. 5:13.

Mukanda wa Mikhuala mukhapho 27 wana gumonesa luholo “amen” yazuelewe muavula gubalega. Tangua enya Isalele anginyile mu Mavu a Gutendelela, adibungishile mu baba didi hakatshi dia Mulundu wa Ebale nu wa Gerizime, ha gutegelela lutango lua Mikhuala. Akhalelego guene phamba ha gutegelela Mikhuala. Uvi akhalele nji mutaya egi “Amen” ha gumonesa egi atshiginyile ndaga Mikhuala yakhalele muzuela mukunda nu malamba ajiya guabuila gula alumbugila Yehowa. (Mikh. 27:15-26) Tangiza luholo mala nu akhetu nu ana avula akhalele mutaya mu dijui diakola ha guhana mvutu! (Yosh. 8:30-35) Idi yadiago egi abuitshilego mutshima mbimbi eji azuelele lusugu luene. Enya Isalele ene ataganesele mbimbi jiawo handaga Biblia idi muzuela egi: ‘Enya Isalele alandudile gukombelela Yehowa masugu agasue akhalele Yoshua nu monyo, nu mu masugu a manene asalele nu monyo, manene ago ajiyile ndaga jiagasue jiabonga Yehowa watshitshile gudi enya Isalele.’—Yosh. 24:31.

Yesu nji wakhalele muzuela egi “amen” ha gumonegesa egi ndaga yazuelele muene yakhalele ya giamatshidia. Uvi wakhalele guyikalegela mu luholo lua gudisha. Muene gakhalelego muzuela “amen” ha gutaya ndaga jiazuedi muthu muko, uvi wakhalele muzuela “amen” gutuama dia guzuela ndaga imoshi ha gumonesa egi ndaga yene idi ya giamatshidia. (Mu giphende, mbimbi yene yabalumuiwe egi “giamatshidia”) Matangua ako, Yesu wakhalele muvutugila mbimbi yene mahugo mbadi egi “amen amen.” (Mat. 5:18; Yone 1:51) Ngenyi, wakhalele mumonesa athu akhalele gumutegelela egi, mbimbi jienji jiakhalele diago jia giamatshidia. Yesu wakhalele muzuela ngenyi handaga ndaga jiagasue jialayile Nzambi jiakhalele naye gubua jia giamatshidia phamba mu njila yenji.—2 Kol. 1:20; Yat. 3:14.

“ATHU AGASUE AZUELELE GAMBA, ‘AMEN!’ NU ATUMBUISHILE YEHOWA”

Enya Isalele nji akhalele muzuela egi “amen” tangua akhalele mutumbuisa nu gukombelela Yehowa. (Neh. 8:6; Ngi. 41:13) Gungima dia gisambu, athu akhalele mutaya egi “amen” ha gumonesa egi atshigina ndaga jiazuelewa. Athu agasue akhalele hene akhalele mutaya egi amen ha gumonesa egi asuangulugile ha gukombelela Yehowa luholo elu. Ndaga ya luholo elu yakalegewe nji tangua Fumu Davidi wabatele Mushete wa gikotelo wa Yehowa gu Yelusalema. Gungima, akalegele wano. Gu wano wene, Davidi wakalegele gisambu gidi gifua lungimbo, mu mukanda wa 1 Gudilanduluila 16:8-36. Mbimbi jiazuelele Davidi jiatumine “athu agasue” akhalele hene ha guzuela egi: ‘Amen!’ Gungima, ‘atumbuishile Yehowa.’ Yadiago, athu asuangulugile ha gukombelela Yehowa hamoshi.

Aklisto a mu siekle ya thomo akhalele muzuela “amen” tangua akhalele mutumbuisa Yehowa. Athu asonegele Biblia, asonegele nji amen mahugo avula mu mikanda yawo. (Lomo 1:25; 16:27; 1 Phet. 4:11) Mukanda wa Yatuwuwe udi mumonesa luholo ima ya mu nyuma idi mu dilu yatumbuishile Yehowa. Azuelele egi: “Amen! Aleluya!” (Yat. 19:1, 4) Aklisto a mu tangua dia thomo, akhalele nu khadilo dia guzuela egi “amen” gungima dia gutshita gisambu mu gudibungisa guawo. (1 Kol. 14:16) Uvi, akhalelego mulaba guzuela mbimbi yene.

MUKUNDA NATSHI “AMEN” YAYE IDI NU NDANDO

Gungima dia gukotelesa luholo akombeledi a Yehowa akhalele mukalegela mbimbi “amen,” tuajiya giwa mukunda natshi idi nu ndando ha gusugisa isambu yetu nu “amen.” Tangua tuana guyizuela gu gisugishilo gia isambu yetu, tuana gumonesa egi tuakotelesa diago ndaga jiazuelewa mu gisambu. Gula phangi mumoshi watshita gisambu, tuana gutaya egi “amen,” ikhale mu mutshima, ha gumonesa egi tuatshigina ndaga jiazuelewa mu gisambu. Tukambenu gujiya mukunda natshi “amen” yetu idi nu ndando.

Tudi naye gutegelela muabonga tangua phangi udi mutshita gisambu. Tuanago gukombelela Yehowa phamba mu mbimbi tuana guzuela mu gisambu, uvi tuana gumukombelela nji mu khadilo dietu. Tuana gutegelela nu gumonesa khadilo diabonga tangua gisambu gidi mukalegewa handaga tuana gutshigina guzuela “amen” ya giamatshidia.

Esue akombeledi a Yehowa tuakhala hamoshi. Gula phangi mumoshi udi mutshita gisambu mu hungu, mukut’etu agasue tuana gulandula gisambu giene. (Makal. 1:14; 12:5) Tangua tuana gutaya amen, tuana gumonesa egi tudi hamoshi nu aphangi’etu a mala nu a akhetu. Luko, “amen” yetu, ikhale tuayizuedi mu dijui diakola nga mu mutshima, yana gutuma Yehowa ha gutshita ndaga tudi gumutoga mu gisambu gietu.

Phangi mumoshi wa mukhetu washigula muto wenji ha gulandula gisambu gidi mukalegewa mu gudibungisa mu njila ya telefone — “Amen” yetu yana gutumbuisa Yehowa

Tuana gutumbuisa Yehowa. Yehowa wana gumona ndaga jiagasue ikhale jiazonda tuana gutshita ha gumukombela. (Luka 21:2, 3) Yehowa wana gujiya matangi’etu nu ndaga jidi mu mitshima yetu. Ikhale tudi mulandula gudibungisa mu njila ya telefone, tudi naye gujiya egi Yehowa ganago gujimbila “amen” yetu. Tangua tuana guzuela egi “amen,” tuana gudibungisa hamoshi nu aphangi ako mu hungu ha gutumbuisa Yehowa.

Tangua diko tuajiya gumona gifua “amen” yetu idi nu ndando yazonda, uvi ishigo ngenyi. Étude perspicace des Écritures idi muzuela gamba, “mbimbi amen yana gumonesa egi akombeledi a Yehowa ana gusha mutshima gudi Nzambi, adi nu gutshigina guakola, nu adi nu felela dia giamatshidia mu mitshima yawo.” Tutshitenu ngolo hagula “amen” yetu, ikhale tuayizuedi mu dijui diakola nga mu mutshima, isuanguluise Yehowa.—Ngi. 19:14.

TUDI NAYE GUZUELA “AMEN” TANGUA DIAGASUE BA?

“Amen” idi mbimbi imoshi ya ndando. Uvi, itshi tuajiya gutshita gula phangi mumoshi wazuela ndaga imoshi yabola mu gisambu? Tudi naye gutaya “amen” ba? Tuajiya gutaya nga ndo. Yehowa wana gujiya egi matangua ako, mukut’etu agasue tuana gujimbila guzuela, uvi wana gututotesela. Tangua athu ako adi mukalagala gisambu, tudi naye guhaga matangi’etu mu ndaga adi muzuela uvi ndo mu mbimbi, ngenyi tuajiya gutaya “amen” mu ndaga jiazuelewa mu gisambu.

Uvi, gula muthu wakalagala gisambu gashigo Temue wa Yehowa, tushigo naye gutaya “amen,” ikhale mu dijui diakola nga moshi’a mutshima. Itshi tudi naye gutshita gula tudi hene tangua adi mukalagala gisambu giene? Tufezegese gale. Ajiya gututamega ha guya mu gudibungisa gumoshi ngenyi. Gungima, atoga muthu mumoshi ha gukalagala gisambu. Nga ndo, yajiya gukhala egi mu fami yenu aye hakhaye udi Temue wa Yehowa, uvi tata wenu wazula desizio dia gutshita gisambu. Itshi wajiya gutshita?

Gula tuatagana nu ndaga ya luholo elu, tudi naye guhena tedie. Tushigo naye gutaya egi “amen.” Tushigo naye nji gudikuata mago nu athu tangua adi mukalagala gisambu, hagula tudinginyisago mu gisambu giawo. Mu tangua diene, tuajiya gutshita gisambu gietu mu mutshima. Uvi tudi naye gutshita ngolo hagula tuzuedigo “amen” yetu mangololo handaga athu ako ajiya gumona gifua tuatayi ‘amen’ ya gisambu giawo. Gula athu azuga mu molu ha gukalagala gisambu, tuajiya guzuga nga ndo. Guzuga mu molu nga gushigula muto gushigo mukotelesa egi tudi mukombelela nawo hamoshi. Muklisto wagasue udi naye guzula desizio dia gujiya itshi adi naye gutshita gula watagana nu ndaga ya luholo elu. Tuajiyilego gumona gubola mukunda nu desizio dienji.

Ndaga eji tuazuelela, jidi mumonesa mukunda natshi Yehowa wana guzula “amen” yetu nu ndando.