Referanse jia Mukanda wa Gukalegela mu Gudibungisa
5-11 MARS
UMONYI UDI MU MBIMBI YA NZAMBI | MATAYO 20-21
‘Muthu wagasue watshigina gukhala wakoma mukatshi dienu, udi naye gukhala muenya mudimo wenu’
(Matayo 20:3) Wazogele luko ha kumbi dia divua mu gimenegena, wamuenene athu ako mulaba gumagana ha fundo dia zando;
nwtsty media
Fundo dia zando
Mafundo ako a mazando, gifua awa adi muzuelewa mu verse eyi, akhalele mu khulo ya njila. Mahugo avula, asumbishi akhalele muhaga ima ya gudiga yavula mu njila, hene yakhalele mukanga njila. Enya mu dimbo akhalele musumba ima athu avula ana gukalegela monzo, nu nzungu jia mabungu, nu makhopho a wuma, nu ima iko ya gudia. Luholo guakhalelego nu fundo dia gubambela ima hagula egi ibodigo (frigo, congélateur), athu akhalele muya gu zando lusugu luagasue ha gusumba ima ya gudia. Gula muthu waya gu zando, wajiwa guvua mene jiavula gudi asumbi nu asumbishi nga gudi athu akhalele muza mutala zando. Ana akhalele nji mukene ha zando; luko athu anyi akhalelego nu midimo, akhalele muya nji mumagana ha zando hagula azudiwe gu mudimo. Yesu wasagele muenya misongo mumoshi ha fundo dia zando; mupostolo Pholo walongesele nji mbimbi ya Nzambi ha fundo dia zando. (Makal 17:17) Uvi, alongeshi a mikhuala nu Afalese anyi akhalele enya lulendo, akhalele mutshigina muavula gujiyiwa nu gumenegewa ha mafundo a athu avula.
(Matayo 20:20, 21) Hangima gin’a an’a Zebedayo wajile nu an’enji gudi Yesu, wafugamene ha mabongo guphala yenji, wamutogele gima gimoshi. 21 Yesu wamuhudile egi: “Itshi watshigina?” Muene wamuwambelele egi: “Umbe mbimbi hagula an’ami awa a mala muyadi akhale muko gu koko diaye dia madia, muko gu koko diaye dia mahidi mu Ufumu waye.”
Noti jia gulonguga jia nwtsty jidi mu Mat 20:20, 21
gin’a an’a Zebedayo: Wakhalele gin’a apostolo awa mbadi: Yakoba nu Yone. Mukanda wa Mako udi mumonesa egi Yakoba nu Yone ene hakhawo ayile mumona Yesu. Idi mumonega diago egi ene muyadi akhalele ha gishina gia ndaga yene, uvi atumile gin’awo Salome ha gutoga Yesu ha fundo diawo. Yajiya gukhala egi Salome wakhalele mama wa Yesu wa galenge.—Mat 27:55, 56; Mako 15:40, 41; Yone 19:25.
muko gu koko diaye dia madia, muko gu koko diaye dia mahidi: Mu verse eyi, guhaga gu koko dia madia nga dia mahidi gudi mumonesa lutumbu nu ufumu. Uvi fundo dia lutumbu luavula diana gukhala gu koko dia madia.—Ngi 110:1; Makal 7:55, 56; Lomo 8:34.
(Matayo 20:25-28) Uvi Yesu waatamegele, wazuelele egi: ‘Mudi mujiya egi mafumu a ifutshi ana guhinyina athu gu ngolo, luko athu akoma ana gumonesa egi adi nu ufumu holo diawo. 26 Ishigo naye gukhala ngenyi mukatshi dienu. Uvi muthu wagasue watshigina gukhala wakoma mukatshi dienu, udi naye gukhala muenya mudimo wenu, 27 nu muthu wagasue udi mutshigina gukhala muthu wa thomo mukatshi dienu udi naye gukhala muhiga wenu. 28 Luholo lumoshi nji, Mun’a Muthu gajilego hagula athu amukuatele mudimo, uvi wajile ha gukuatela athu mudimo nu ha guhana monyo wenji gifua gibawu mukunda nu gukula athu avula.’
Noti jia gulonguga jia nwtsty jidi mu Mat 20:26, 28
muenya mudimo: Biblia yana gukalegela mbimbi ya zuelelo dia Greki diakonos ha guzuelela muthu gashigo mubemba ha gukalegela athu ako mudimo nu gudibulumuisa guagasue. Ana gukalegela nji mbimbi eyi ha guzuelela Klisto (Lomo 15:8), enya mudimo a Klisto (1Kol 3:5-7; Kol 1:23), akuateshi a mudimo (Fili 1:1; 1Tim 3:8), athu akhalele mutshita mudimo gu wano nga mu jinzo jia athu (Yone 2:5, 9). Mbimbi eji jiana gutadila nji mafumu a leta (Lomo 13:4).
gajilego hagula athu amukuatele mudimo, uvi wajile ha gukuatela athu mudimo: Nga ndo “gajilego hagula athu amukalegele, uvi ha gukalegela athu.”
Kamba Ndaga Jiko jia Ndando jia mu Nyuma
(Matayo 21:9, NW) Luko, athu avula akhalele muya gutuama dienji nu anyi akhalele gumulandula, akhalele guzuela mu dijui diakola egi: ‘Nzambi, tudi gugububila, huluisa Mun’a Davidi! Gubonga gukhale gudi muthu udi muza mu jina dia Yehowa! Tudi gugububila, umuhuluise, gununu mu madilu!’
Noti jia gulonguga jia nwtsty jidi mu Mat 21:9
Tuagububila, muhuluise: Mu zuelelo dia gishina “Hosanna.” Mbimbi eji jia Greki “Hosanna” jiazudiwa mu mbimbi jia zuelelo dia Hebelu jidi mukotelesa egi “tuagutoga, muhuluise” nga ndo “tuagububila, muhuluise.” Mu verse eyi, akalegela mbimbi eji ha gumonesa muthu udi mutoga Nzambi ha guhuluisa nga gubingisa. Yajiya nji gubalumuiwa egi “tuagububila, muhuluise gu.” Gungima, athu asendesele gukalegela mbimbi eji ha gutshita gisambu nu ha gutumbuisa Nzambi. Mbimbi eji, mu zuelelo dia Hebelu, jidi mu mukanda wa Ngimbo 118:25, jiakhalele mukastshi dia Ngimbo jia Hallel jiakhalele muyimbiwa muavula mu sungi ya wano wa Pake. Hene, akhalele muwunguluga muavula mbimbi jiene mu sungi eyi. Nzambi wahanele mvutu gu gisambu egi giatadila guhuluisa Mun’a Davidi tangua gafuzumuine Yesu gu gufua. Mu Mat 21:42, Yesu hankhenji watangele mbimbi jidi mu mukanda wa Ngimbo 118:22, 23, nu wamonesele egi mbimbi jiene jiakhalele muzuelela Masiya.
Mun’a Davidi: Mu verse eyi, mbimbi eji jidi mumonesa giphuta giavualewe Yesu nu mudimo wenji gadi nawo gifua Masiya watendelewe.
(Matayo 21:18, 19) Mu gimenegena hakhalele Yesu muvutuga mu dimbo, wavuile nzala. 19 Wamonele mutshi umoshi wa mabundu a figi mu khulo ya njila, wayile guene, uvi gasangelego nga gima, khuta mayiji, hene wawutele mukumbu egi: “Aye mbawuhagigo luko mabundu mayilago.” Ngenyi, mutshi wa figi wa miginyile lusugu luene.
Yesu Wahana Gifezegeselo gia Mutshi wa Figi ha Guhana Longo Diatadila Gutshigina
Uvi, mukunda natshi Yesu wamiginyishile mutshi wene? Muene hakhenji wamonesele gishina gia mutumine ha guwumiginyisa tangua gazuelele egi: “Giamatshidia ngudi gumiwambela egi, gula mudi nu gutshigina nu mushigo nu giphapha, mbamukalagalago phamba gifua luholo ngatshitshile mutshi wa figi, uvi gula muawambela nji mulundu owu egi, ‘katuga nu dibishile mu kianga,’ mbayitshitshiwa ngenyi. Luko, ndaga jiagasue jimuatoga mu gisambu mbamujiheta gula mudi nu gutshigina.” (Matayo 21:21, 22, NW) Ngenyi, Yesu wavutugile matangi gadiangele guzuelela atadila funu ya gukhala nu gutshigina gua gukatula milundu ha fundo diayo.—Matayo 17:20.
Hene luholo Yesu gamiginyishile mutshi wa figi, wahanele longo didi mumonesa funu ya gukhala nu gutshigina gudi Nzambi. Wazuelele egi: “Ima yagasue mudi mutoga mu gisambu, khalenu nu gutshigina egi muayihetshi gale, nu mbamuyiheta.” (Mako 11:24, NW) Edi longo dia ndando diago mukunda nu alandudi agasue a Yesu! Diakhalele diago nu funfu yavula gudi apostolo handaga masugu azonda gungima, akhalele naye gutagana nu malamba. Uvi, gudi nji nu gudivua guko gudi mukatshi dia gumigina gua mutshi wa figi nu gukhala nu gutshigina.
Luholo lumoshi nu mutshi wa Figi, gifutshi gia Isalele giakhalele mumonesa gifua gidi nu gutshigina, uvi mu guzuela guabonga yakhalele ndo ngenyi. Athu a mu gifutshi egi akotele gikotelo nu Nzambi, nu yajiya gukhala egi akhalele mumonesa egi ana gunemesa mikhuala yenji. Uvi, gifutshi egi giagasue giamonesele egi giakhalelego nu gutshigina, nu giakhalelego muzola mabundu abonga. Gifutshi giene giatunyile diago Mun’a Nzambi! Hene, luholo Yesu wamiginyishile mutshi wa Figi wakhalelego muhaga mabundu, wamonesele ndaga mbajibuila gifutshi egi giakhalelego muhaga mabundu abonga, nu giakhalelego nu gutshigina.
12-18 MARS
UMONYI UDI MU MBIMBI YA NZAMBI | MATAYO 22-23
“Nemesa Mikhuala Mbadi ya Balega Gukoma”
(Matayo 22:36-38) “Mulongeshi, mukhuala utshi wabalega iko yagasue gukoma?” 37 Yesu wamuwambelele egi: “‘Udi naye guzumba [Yehowa] Nzambi waye nu mutshima waye wagasue, nu monyo waye wagasue, nu matangi aye agasue.’ 38 owu udi mukhuala wa gudiangela wabalega mikhuaka iko yagassue gukoma.
Noti jia gulonguga jia nwtsty jidi mu Mat 22:37
mutshima: Gula akalegela mbimbi eyi mu luholo lua gifuanesa, yana gukotelesa egi umuthu wetu wa mukatshi. Uvi, tangua mbimbi “monyo” nu “matangi” jiana gubungishiwa hamoshi, jiana gukotelesa ndaga jiko jiavula. Jiana gumonesa ndaga muthu gadi mutangiza, gadi najio funu nu luholo adi gudivua. Mbimbi eji thathu akalegela mu verse eji (mutshima, monyo, nu matangi) jiajiyilego gukotelesa phamba gima gimoshi. Ana gukalegela imoshi ha gutagenesa iko, ngenyi yana gumonesa funu ya gukhala nu guzumba guakola gua Nzambi nu mutshima wagasue.
monyo: Nga ndo “nu monyo wagasue.”
matangi: Yakotelesa egi, ndunge jietu jiagasue jia gutangiza. Muthu udi naye gukalegela ndunge jienji ha gujiya Nzambi nu ha gukudisa guzumba guenji mukunda nu Nzambi. (Yone 17:3, mbimbi goshi’a diyiji; Lomo 12:1) Mu mukanda wa Mikhuala 6:5, zuelelo dia Hebelu dia gishina didi muzuelela mbimbi jitatu, ‘mutshima, monyo, nu ngolo.’ Uvi, ha gutadila ndaga jidi mu mukanda wa Matayo mu zuelelo dia Greki, akalegela mbimbi “matangi” uvi “ngolo” ndo. Yajiya gukhala egi gudi nu ishina yavula yatumine ha gukalegela mbimbi eji jia gudisha. Thomo, mu zuelelo dia Hebelu dikulu, akhalelego diago nu mbimbi ajiya gukalegela ha guzuelela “matangi,” hene ha guzuelela matangi, akhalele mukalegela mbimbi iko ya Hebelu idi muzuelela “mutshima.” Ngenyi, gula akalegela mbimbi eyi “mutshima” mu luholo lua gifuanesa, yakhalele mutadila umuthu wagasue wa moshi, matangi a muthu muene, luholo gadi gudivua, nu ndaga jidi gumutuma ha gukalagala gima gimoshi ngenyi. (Mikh 29:4; Ngi 26:2; 64:6; tala nji noti jia gulonguga jidi muzuelela mutshima mu verse eyi.) Hakiene, hafundo mikanda ya zuelelo dia Hebelu yakhalele mukalegela mbimbi “mutshima,” mikanda ya Hebelu yinyi ya balumuiwe mu zuelelo dia Greki (la Septante), yakhalele mukalegela muavula mbimbi “matangi” ha guzuelela mutshima. (Gis 8:21; 17:17; Ish 2:10; Yesh 14:13) Yajiya gukhala egi tangua Matayo gakhalele muzuelela ndaga jidi mu mukanda wa Mikhuala 6:5, gishina giko giamutumine ha gukalegela mbimbi ya Greki “matangi” uvi “ngolo” ndo, gidi egi mbimbi ya Hebelu akadigile ha guzuelela “ngolo” yakhalele mutadila ngolo jia mu muila nu jia mu matangi. Luholo matangi a mbimbi jia zuelelo dia Hebelu adi gudita nu jia zuelelo dia Greki, yajiya gutukuatesa ha gukotelesela athu ako mukunda natshi asonegi a Evanjile akhalelego mutshitshila mbibmbi jia luholo lumoshi, tangua akhalele muzuelela ndaga jidi mu mukanda wa Mikhuala.
(Matayo 22:39, NW) Wa mbadi udi egi: ‘Udi naye guzumba muthu na mukuenu gifua wana guzumba muila waye.’
Noti jia gulonguga jia nwtsty jidi mu Mat 22:39
Wa mbadi: Mu mukanda wa Matayo 22:37, mvutu yahanele Yesu gudi Mufalese yakhalele ya sonegewe gale. Uvi Yesu wazuelele ndaga jiko jiavula jiatadila muhu unu, gungima watangele mukhuala wa mbadi (Levi 19:18). Ngenyi, walongesele egi mikhuala eyi mbadi yajiyilego gukhaphumunyiwa nga hazonda; luko egi mikhuala yagasue ya Moise nu ndaga jia sonegele ba profete yakhalele mukatshi dia mikhuala eyi mbadi.—Mat 22:40.
muthu na mukuenu: Mbimbi ya Greki adi mukalegela mu verse eyi ha guzuelela “muthu na mukuenu” (ha gishina, “muthu udi hehi”), jidi mukotelesa ndaga jiavula. Jishigo muzuelela phamba athu tuana gujinga nawo hehi. Jiajiya gutadila muthu wagasue tuatagana nenji.—Luka 10:29-37; Lomo 13:8-10.
(Matayo 22:40) Mikhuala yagasue nu ngambi jia Nzambi idi muzegemena mu mikhuala eyi mbadi.”
Noti jia gulonguga jia nwtsty jidi mu Mat 22:40
Mikhuala . . . ngambi: “Mikhuala” adi muzuelela mu verse eyi idi mukotelesa egi, mikanda thano ya thomo, sendese mu mukanda wa Gisendeselo uu nu mukanda wa Mikhuala. Mbimbi “ngambi” jidi mukotelesa egi, mikanda ya sonegele ngambi jia Nzambi, idi mu gitshinyi gia Biblia gia sonegewe mu zuelelo dia Hebelu. Uvi, gula mbimbi eji jiyadi “Mikhuala” nu “ngambi” jiabungishiwa hamoshi, jiana gukotelesa egi, gitshinyi gia Biblia gia sonegewe mu zuelelo dia Hebelu (Écritures hébraïques).—Mat 7:12; 22:40; Luka 16:16.
idi muzegemena: Mu verse eyi, mbimbi jia Greki adi mukalegela ha guzuelela “guzegemena,” adi mujikalegela mu luholo lua gifuanesa. Jidi mukotelesa egi, “ya katuga gu.” Hene, tangua Yesu wazuelele egi mikhuala, gakhalelego muzuelela phamba Mikhuala Kumi, uvi yakhalele mutadila ndaga jiagasue jidi mu mikanda ya sonegewe mu zuelelo dia Hebelu jidi muzuelela guzumba.—Lomo 13:9.
Kamba Ndaga Jiko jia Ndando jia mu Nyuma
(Matayo 22:21) Abalumuine egi: “Sezale.” Hene Yesu wawambelele egi: “Hanenu ima ya Sezale gua Sezale, uvi ima ya Nzambi gua Nzambi.”
Noti jia gulonguga jia nwtsty jidi mu Mat 22:21
ima ya Sezale gua Sezale: Mvutu ya Yesu adi muzuelela mu verse eyi, idi nji mu lumene ludi mu mukanda wa Mako 12:17 nu Luka 20:25. Idi mumonesa egi mu Biblia, Yesu watangele jina dia fumu wa Roma phamba fundo dimoshi. Mbimbi “ima ya Sezale gua Sezale” jia kotelesa egi, makuta athu akhalele gufuta mafumu a enya Roma mukunda nu mudimo akhalele ene mutshitshila athu. Jidi mukotelesa nji lutumbu nu gutumaga athu akhalele naye gumonesa gudi mafumu awa.—Lomo 13:1-7.
ima ya Nzambi gua Nzambi: Mbimbi eji “ima ya Nzambi gua Nzambi” jidi mukotelesa egi, gukombelela Nzambi nu mutshima wagasue, gumuzumba nu mutshima wagasue, nu gumutumagela nu mutshima wagasue.—Mat 4:10; 22:37, 38; Makal 5:29; Lomo 14:8.
(Matayo 23:24, NW) Enue atuameji adi nu meso a gufua, mudi mukela gatangi’a ngema mu ima ya gunua, uvi mudi muminya shamo!
Noti jia gulonguga jia nwtsty jidi mu Mat 23:24
mudi mukela gatangi’a ngema mu ima ya gunua, uvi mudi muminya shamo: Gatangi’a ngema nu shamo yakhalele mukatshi dia ima enya Isalele akhalele mumona gifua ima ya usala. (Levi 11:4, 21-24) Yesu wazuelele mu luholo lua gufuanesa, ha gumonesa egi mafumu a mangumba akhalele mukela matombe hagula tutangi’a ngema tuaabuishigo enya usala, uvi akhalelego mutshita ndaga jia balega funu jiakhalele mu Mukhuala wa Moise. Ngenyi yakhalele gifua akhalele muminya shamo.
19-25 MARS
UMONYI UDI MU MBIMBI YA NZAMBI | MATAYO 24
“Mu Masugu awa a Gisugishilo, Khalenu Agudimuga mu Nyuma”
(Matayo 24:12, NW) luko, handaga khadilo dia gushiya mikhuala mbadidivudisa, guzumba gua athu avula mbaguleba.
it-1-F diyiji 112 par. 10
Guzumba
Guzumba gua Muthu Guajiya Guleba. Yesu Klisto wakhalele muwambela alandudi enji ndaga mbajikalegewa mu masugu adi muza. Wamonesele egi guzumba (agapê) gua athu avula, anyi ana guzuela egi ana gusha gutshigina guawo gudi Nzambi, mbaguleba. (Mat 24:3, 12) Mupostolo Pholo wazuelele egi mu masugu a gisugishilo ndaga jiakola mbajikhala, nu athu ‘mbaazumba mbongo.’ (2Tim 3:1, 2) Idi yadiago egi, muthu wajiya gubemba gutumagela mikhuala yabonga, ngenyi guzumba guakhalele nago muene thomo guajiya guhua. Idi mumonesa diago funu ya gukhala tangua diagasue nu guzumba gudi Nzambi nu gulandula gukudisa guzumba guene. Ha guyitshita, tudi naye gutangigiza ndaga tudi mutanga mu Mbimbi ya Nzambi nu gutumagela mikhuala yenji mu lujingu luetu.—Ef 4:15, 22-24.
(Matayo 24:39, NW) luko, ene ahagelego matshui awo gu ndaga jiakhalele muzuelewa uu nu tangua Mvula Yakola yajile nu yaashiyile khungi awo agasue; guza gua Mun’a Muthu mbagukhala nji ngenyi.
w99-F 15/11 diyiji 19 par. 5
Wana Gutagenesa Mudimo Waguhuile Nzambi ba?
5 Mukunda nu masugu awa abola tudi mujinga, Yesu wazuelele egi: “Guza gua Mun’a muthu mbagukhala gifua muakhalele ndaga mu masugu a Nowa. Mu masugu anyi hakhalele mvula khenji inoga galego, athu akhalele mudia nu gunua, mala akhalele muwata akhetu, nu akhetu akhalele muzudiwa mu ulo, uu nu lusugu Nowa wanginyile mu masuwa. Luko, ene ahagelego matshui awo gu ndaga jiakhalele muzuelewa uu nu tangua Mvula Yakola yajile nu yaashiyile khungi awo agasue; guza gua Mun’a Muthu mbagukhala nji ngenyi.” (Matayo 24:37-39, NW) Yadiago, gudia nu gunua mu luholo luatagana gushigo ndaga yabola. Luko, ulo udi ulondegi wa Nzambi. (Gisendeselo 2:20-24) Uvi, gula tuamona egi ima eyi tudi nayo funu mu lujingu yasendesa guzula fundo dia thomo mu lujingu luetu, yajiya gutoga egi tukalagale gisambu mukunda nu ndaga yene. Yehowa wajiya gutukuatesa ha guhaga ndaga jia Ufumu ha fundo dia thomo, ha gutshita ndaga jiabonga, nu ha gutagenesa mudimo watuhuile muene.—Matayo 6:33; Lomo 12:12; 2 Kolinto 13:7.
(Matayo 24:44) Ngenyi, enue nji mudi naye ya gudilonda handaga Mun’a Muthu udi muza mu kumbi dimudi mushigo mutangiza.
Apostolo Atogele Gijiyishilo
Yesu wazuelele egi alandudi enji adi naye gukhala atema, adimuga, nu agudilonda. Yesu wamonesele ndaga yene mu gifezegeselo giko. Wazuelele egi: ‘Jiyenu ndaga eyi: Nga fumi’a inzo wajiyile kumbi diakhalele naye guza nzangi, nga wakhalele mutala, nu nga gabembelego egi nzangi ingene monzo yenji. Ngenyi, enue nji mudi naye ya gudilonda handaga Mun’a Muthu udi muza mu kumbi dimudi mushigo mutangiza.’—Matayo 24:43, 44.
Kamba Ndaga Jiko jia Ndando jia mu Nyuma
(Matayo 24:8) Ndaga eji jiagasue jidi khuta gisendeselo gia malamba.
Noti jia gulonguga jia nwtsty jidi mu Mat 24:8
gisendeselo gia malamba: Mbimbi jia Greki adi mukalegela mu verse eyi ha guzuelela gisendeselo gia malamba, jidi mumonesa lamba diakola diana guvua mukhetu mu tangua dia guvuala. Luholo akalegela mbimbi eji mu verse eyi ha guzuelela lamba dia luholo luagasue, idi mumonesa egi, luholo lumoshi nu lamba diana guvua mukhetu mu tangua dia guvuala, malamba awa azuelele Yesu mu verse eyi, mbaakola, mbaadivudisa, nu mbaashipha gutuama egi lamba diakoma didi muzuelewa mu Matayo 24:21 disendese.
(Matayo 24:20) Landulenu gukombelela hagula gulenga guenu gukhadigo mu sungi ya guhuma nga mu Lusugu lua Guhuluguga;
Noti jia gulonguga jia nwtsty jidi mu Mat 24:20
mu sungi ya guhuma: Mvula jiakola, guzala gua mita, nu guhuma guakola mu sungi eyi, mbagukalagala egi ikhale lamba ha guwenda, ha guheta ima ya gudia nu ha guheta fundo dia gubanda.—Ezela 10:9, 13.
mu Lusugu lua Guhuluguga: Mu ifutshi iko, gifua mu membo a gu Yudea, mikhuala yatadila Lusugu lua Guhuluguga yakhalele mutunyisa athu ha guwenda njila yaleha, nu ha gubata inemo. Luko mu lusugu luene, ijidigo ya dimbo yakhalele ya gujidiga lusugu lua mudidi.—Tala Makal 1:12 nu Appendice B12.
26 MARS–1 AVRIL
UMONYI UDI MU MBIMBI YA NZAMBI | MATAYO 25
“Temienu”
(Matayo 25:1-6, NW) “Ufumu wa mu dilu udi gifua tundongo tu’akhetu kumi tuazudile mienda yato, nu tuayile ha gutagana nu yala udi muzula mukhetu mu ulo. 2 Tundongo tutano tuakhalele tuaheya, uvi tuko tutano tuakhalele tuatema. 3 Tundongo tuaheya tuazanguile mienda yato, uvi tuayilego nu maji ako, 4 uvi tundongo tuatema tuayile nu maji ako mu milondo mukunda nu mienda yato. 5 Yala udi muzula mukhetu mu ulo washiphile, tundongo tuagasue tuakhalele muwunduga tulo, nu tuabandele. 6 Mukatshi dia phipha, mulolo wadidile egi: ‘Tadienu, yala udi muzula mukhetu mu ulo mueny’owu! Zogienu mutagane n’enji.’
(Matayo 25:7-10) Tundongo tunu tuagasue tuazugile, tualondele mienda yato. 8 Uvi tundongo tuaheya tuawambelele tundongo tuatema egi, ‘tuhanenu ndambo yenu ya maji, handaga mienda yetu idi mukamba gujima.’ 9 Tundongo tuatema tuazuelele egi: ‘Ndo, maji etu ashigo atagana mukunda nu esue nu enue. Ndjienu gudi asumbishi mudisumbile maji.’ 10 Hayile tuene ha gusumba maji, yala udi muzula mukhetu mu ulo wajile. Tundongo tuakhalele tuagudilonda tuanginyine nenji mu wano dia ulo, gungima gijidigo giajidigiwe.
(Matayo 25:11, 12) Hangima, tundongo tuko tuajile nji, tuazuelele egi, ‘Fumu, Fumu, tuzuluile!’ 12 Uvi muene wabalumuine gamba, ‘Giamatshidia ngudi gumiwambela egi, ngushigo gumijiya ndo.’
Kamba Ndaga Jiko jia Ndando jia mu Nyuma
(Matayo 25:31-33) “Tangua mbadiza Mun’a Muthu mu gutumbuga guenji nu anjelo agasue nawo, muene mbawukhala ha nguasa yenji ya lutumbu. 32 ifutshi yagasue mbayibungishiwa gu phala yenji, nu muene mbawuyikhaphumuna gifua mudi mubambi wa shitu mukhaphumuna imeme nu khombo. 33 Muene mbawuhaga imeme gu koko dienji dia madia, uvi khombo gu koko dienji dia mahidi.
w15-F 15/3 diyiji 27 par. 7
Tukuatesenu Aphangi’a Klisto nu Gujinginyina Guagasue
7 Mangino, tudi mukotelesa muabonga gifezegeselo gia imeme nu khombo. Ha gutadila ima adi muzuelela mu gifezegeselo egi, “Mun’a muthu,” adi muzuelela udi Fumu Yesu. Athu anyi Fumu adi mutamega egi “aphangi’ami” adi Aklisto a mala nu a akhetu ambiwe maji mu nyuma, anyi mbaahinyina nu Klisto mu dilu. (Lomo 8:16, 17) “Imeme” nu “khombo” idi mumonesa athu a mu ifutshi yagasue. Ene ashigo Aklisto ambiwe gale maji mu nyuma. Tangua ditshi mbadiza Yesu ha gusophesa athu? Gusophesewa mbagukalegewa gu gisugishilo gia lamba diakoma didi muza gutuama. Mukunda natshi athu ako mbaahagewa gu khanda ya imeme, uvi ako gu khanda ya khombo? Mbaasophesewa ha gutadila gula akuatesele nga ndo aphangi’a Klisto anyi ambiwe maji mu nyuma, adi ha mavu. Gisugishilo gia mavu awa giasuena diago hehi, hene tudi muhana diago Yehowa mersi luholo gatukuatesa ha gukotelesa gifezegeselo egi, nu ifezegeselo iko thathu idi mu mukanda wa Matayo mukhapho 24 nu 25!
(Matayo 25:40) Fumu mbawaabalumuna egi, ‘Giamatshidia ngudi gumiwambela egi tangua muatshitshile ndaga eji gudi muthu mungoshi mukatshi dia aphangi’ami awa agudibulumuisa, muayitshitshile gudi ame.’
w09-F 15/10 diyiji 16 par. 16-18
“Enue Mudi Mafut’ami”
16 Gula mudi mudifelela ha gujinga ha mavu awa mu uhinyinyi wa Ufumu wa Nzambi, luholo lutshi muajiya gumonesa ufuta wenu gudi aphangi’a Klisto? Tutadilenu maluholo thathu a guyitshita. Thomo, gula tudi mulongesa mbimbi ya Nzambi nu mutshima wagasue. Klisto wahanele aphangi’enji ginemo gia gulongesa lukuma luabonga ha mavu agasue. (Mat. 24:14) Uvi, aphangi’a Klisto adi ha mavu mangino, akhalele naye gumona lamba ha gutagenesa ginemo egi gula imeme iko yaakuatesele ndo. Yadiago, tangua diagasue aphangi adi mukatshi dia imeme iko ana gudihana mu mudimo wa gulongesa, ana gukuatesa aphangi’a Klisto ha gutagenesa ginemo giawo egi gia gijila. Aphangi a mu Hunji dia Akulu Atuameji ana gumihana mvudi yavula mukunda nu ufuta wenu, luholo lumoshi nu Klisto nji.
17 Luholo lua mbadi aphangi adi mukatshi dia imeme iko ajiya gukuatesa aphangi’a Klisto ludi, guhana musomonyi ha gukuatesa mudimo wa gulongesa. Yesu wawambelele alandudi enji ha gukuata ufuta mu njila ya ‘umonyi wa ha mavu awa.’ (Luka 16:9) Ishigo mukotelesa nga hazonda egi tuajiya gusumba ufuta wa Yesu nga wa Yehowa. Uvi idi mukotelesa egi, gula tudi mukalegela ima yetu hagula ndaga jia Ufumu jiye gutuama, mbatumonesa egi ufuta wetu nu guzumba guetu gushigo phamba gua mukano, uvi gudi mu “makalegelo nu mu giamatshidia.” (1 Yone 3:16-18) Tuana guhana ukuateshi wene tangua tuana gudihana mu mudimo wa gulongesa, tuana guhana makuta ha gutunga nu gulondega mafundo etu a gudibungisa, nu tangua tuana guhana mbongo hagula mudimo wa gulongesa uye gutuama. Ikhale mbongo tuana guhana jidi jiavula nga jiazonda, Yehowa nu Yesu ana gusuanguluga muavula nu khadilo dietu dia guhana.—2 Kol. 9:7.
18 Luholo lua thathu lua gumonesa egi tudi mafuta a Klisto ludi, gutumagela utuameji wa akulu a mu hungu, nu gudivua nawo muabonga. Aphangi a mala awa atombewe mu njila ya nyuma ya Nzambi, mu utuameji wa Klisto. (Ef. 5:23) Mupostolo Pholo wasonegele egi: “Tumagelenu athu adi gumituameza, nu khalenu guaavuila.” (Heb. 13:17, NW) Matangua ako, yajiya gukhala lamba ha gutumagela malongo akatuga mu Biblia adi gutuhana akulu a mu hungu dietu. Yajiya gukhala egi tudi mujiya ndaga jiawo jiabola, hene yajiya gututuma ha gutadila malongo awo muabola. Uvi Klisto, Mutuameji wa hungu dia Uklisto, wana gusuanguluga gukalegela athu awa, ikhale ene ashigo atagana. Hene, luholo tuana gutadila utuameji wawo, luajiya gukalagala egi ufuta wetu nu Klisto ukhale wabonga nga ndo. Gula tushigo mutala makalegelo awo abola, nu tudi mulandula malongo awo nu mutshima wagasue, mbatumonesa diago egi tuana guzumba Klisto.