Referanse jia Mukanda wa Gukalegela mu Gudibungisa gua Lujingu nu Mudimo wa Uklisto (10/2019)

Referanse jia Mukanda wa Gukalegela mu Gudibungisa gua Lujingu nu Mudimo wa Uklisto

OCTOBRE 7-13

UMONYI UDI MU MBIMBI YA NZAMBI | YAKOBA 3-5

“Monesa Ndunge jia Nzambi”

(Yakoba 3:17, NWT) Uvi ndunge jia mu dilu, gudiangela jidi jiatagana diago, hangima jidi nu guhuima, jidi nu guhuiminyina, nu jidi hehi ha gutumagela, nu jidi jiazala pha nu khenda nu midimo yabonga, jishigo nu lutondo nu mambo.

cl-F diyiji 221-222 par. 9-10

“Ndunge jia mu Dilu” Jiana Gutuameza Monyo Waye ba?

⁹ “Gudiangela jidi jiatagana diago.” Gukhala muthu watagana guakotelesa egi gukhala muthu waphelegeta hanze nu mukatshi. Ngatshima Biblia yana guzuela egi ndunge jiana gukatuga mu mutshima, uvi ndunge jia mu dilu jianago gungina mu mutshima udi nu matangi nu nzala nga makalegelo abola. (Ishima 2:10; Matayo 15:19, 20) Hene, gula mitshima yetu idi yatagana—mu luholo ludi naye gukhala muthu udi gashigo watagana—mbatutuna “ndaga jiabola nu mbatutshita ndaga jiabonga.” (Ngimbo 37:27; Ishima 3:7) Gishina giene gutagana guana gutangewa gifua khadilo dia thomo mu makalegelo a ndunge. Uvi, gula tushigo nu makalegelo nga nyuma yabonga, yajiya gukhala lamba ha gumonesa makalegelo ako a ndunge jia mu dilu.

¹⁰ “Hangima jidi nu guhuima.” Ndunge jia mu dilu jiana gutukuatesa ha gukhala mu guhuima, handaga khadilo edi didi mukatshi dia mabundu a nyuma ya Nzambi. (Galatiya 5:22) Tuana tshita ngolo ha gutuna gubolesa “guhuima” guana gubungisa akombeledi a Yehowa. (Efeso 4:3) Tuana kalagala nji ngolo ha gukamba guhuima guene gula guabolesewa. Mukunda natshi idi nu ndando? Biblia idi muzuela egi: “Landulenu . . . gukhala mu guhuima; nu Nzambi wa guzumba nu wa guhuima mbawukhala nu enue.” (2 Kolinto 13:11, NWT) Hene, gula tualandula gukhala mu guhuima, Nzambi wa guhuima mbawukhala nu esue. Luholo tuana gukalegela aphangi’etu Aklisto ndaga luana gutadila nji ufuta wetu nu Yehowa. Luholo lutshi tuajiya gumonesa egi tuana gukamba guhuima? Tutadile gifezegeselo gimoshi.

cl-F diyiji 223-224 par. 12

“Ndunge jia mu Dilu” Jiana Gutuameza Monyo Waye ba?

¹² “Jidi nu guhuiminyina.” Gukhala muthu wa guhuiminyina gudi mukotelesa itshi? Enya ndunge ana guzuela egi mbimbi ya Greki yabalumuiwe egi “guhuiminyina” mu Yakoba 3:17 idi yakola ha gubalumuna. Athu ana gubalumuna Biblia ana gukalegela mbimbi gifua “gisemo,” “gutulumuga,” nu “gudisha ha fundo dia athu ako.” Mu Traduction du monde nouveau, mbimbi goshi’a diyiji idi mumonesa egi mbimbi yene idi mukotelesa diago “gutuna gukhala muenya ndaga jiakola-kola.” Luholo lutshi tuajiya gumonesa egi khadilo edi dia ndunge jia mu dilu diana gututuameza?

cl-F diyiji 224-225 par. 14-15

“Ndunge jia mu Dilu” Jiana Gutuameza Monyo Waye ba?

¹⁴ “Jidi hehi ha gutumagela.” Mbimbi ya Greki yabalumuiwe egi “hehi ha gutumagela” yanago gukhala fundo diko mu Écritures Grecques Chrétiennes. Muenya ndunge mumoshi wazuelele egi mbimbi eyi “yana gukalegewa muavula mu mudimo wa gisuta.” Idi muhana matangi a “gutshigina ndaga muphushi” nu “gutumagela.” Muthu udi mutuamezewa mu ndunge jia mudilu wana khala hehi ha gutumagela ndaga Biblia yana guzuela. Ganago gujiyiwa gifua muthu wana gutuna gusombegesa ba desizio enji ngatshima udi naye guasombegesa. Uvi, wana khala hehi ha gusombegesa gula amumonesa mu njila ya Biblia egi desizio diazudi muene dishigo diabonga nga ndo matangi’enji ashigo abonga. Wana gujiyiwa gudi athu ako egi udi muthu wa luholo elu ba?

“Jidi Jiazala pha nu Khenda nu Midimo Yabonga”

¹⁵ “Jidi jiazala pha nu khenda nu midimo yabonga.” Khadilo dia khenda didi gitshinyi gia ndando gia ndunge jia mu dilu, handaga Biblia idi muzuela egi ndunge jiene jidi “jiazala pha nu khenda.” Tudi mumona egi khadilo dia “khenda” nu “midimo yabonga” adi mutangewa hamoshi. Idi diago ngenyi, handaga mu Biblia, matangua avula khadilo dia khenda diana gumonesa gudisagesa muavula mukunda nu athu ako, nu gutshita ndaga jidi mumonesa egi tuana gudisha ha fundo diawo. Mukanda umoshi udi muzuela egi khadilo dia khenda diakotelesa “guvua gikenene mukunda nu muthu udi mumona lamba nu gukamba luholo lua gumukuatesa.” Hene, ndunge jia Nzambi jiana khala nu guzumba, jiana khalago phamba mu matangi. Jiana khala diago jia giamatshidia nu jiana gutadila luholo athu ako adi gudivua. Luholo lutshi tuajiya gumonesa egi tudi ya guzala pha nu khenda?

cl-F diyiji 226-227 par. 18-19

“Jidi Jiazala pha nu Khenda nu Midimo Yabonga”?

¹⁸ “Jishigo nu lutondo.” Ndunge jia Nzambi jianago gutomba ilema ya muila nu jianago gudihala mukunda nu gifutshi giawo. Gula tudi mubemba egi ndunge jia Nzambi jitutuameze, mbatutshita ngolo ha gukatula khadilo dia lutondo mu mitshima yetu. (Yakoba 2:9) Tuanago gukalegela athu ako ndaga ha gutadila makhalasa alongugile, nga falanga jiawo nga inemo adi nayo mu hungu; tuanago nji gusegulula aphangi’etu Aklisto ikhale adi mumonega gifua adi phutu. Gula Yehowa wana guzumba athu a luholo elu, esue nji tudi naye guazumba.

¹⁹ “Jishigo . . . nu mambo.” Mbimbi ya Greki adi mukalegela ha guzuelela “mambo” yajiya gumonesa “muthu udi mutshita saga jia teyatre.” Mu tangua dikulu, athu akhalele mutshita saga gu Greki nu gu Roma akhalele musudiga mbuya. Hene, mbimbi ya Greki yabalumuiwe egi “mambo” yana gukalegewa gudi muthu udi musuega umuthu wenji nga udi mumba mambo. Khadilo edi dia ndunge jia Nzambi, didi naye gutukuatesa ha gutala luholo tuana kalegela aphangi’etu Aklisto ndaga nu luholo tuana guatadila.

Kamba Ndaga Jiko jia Ndando jia mu Nyuma

(Yakoba 4:5) Nga ndo mudi mutangiza egi mukanda wa Nzambi udi mulaba guzuela egi: “Nyuma idi mukatshi dietu idi mulandula guvua nzala ya ima ba”?

w08-F 15/11 diyiji 20 par. 6

Ndaga jia Ndando Jidi mu Mukanda wa Yakoba nu Phetelo

4:5—Verse tshi Yakoba udi muzuelela mu verse eyi? Yakoba gashigo muzuelela verse imoshi ngenyi. Uvi, yajiya gukhala egi mbimbi eji jiasonegewe mu ngolo jia Nzambi jiazudiwe mu matangi’a verse eji: Gisendeselo 6:5; 8:21; Ishima 21:10; nu Galatiya 5:17.

(Yakoba 4:11, 12, NWT) Aphangi, mudifuetshigo mukatshi dienu. Muthu udi mufueta nga udi musophesa phangi’enji, muene udi mufueta nu udi musophesa mukhuala. Uvi gula udi musophesa mukhuala, aye ushigo mutumagela mukhuala, uvi udi nzuji wayo. ¹² Gudi phamba nu muthu mumoshi udi Mumbi wa Mikhuala nu Nzuji, muene hakhenji wajiya guhuluisa nu gukulula. Uvi aye, udi nanyi ha gusophesa muthu na muku’enu?

w97-F 15/11 diyiji 20-21 par. 8

Gutshigina Guana Gutukuatesa ha Gukhala nu Guhuiminyina nu ha Gukombelela Muavula

⁸ Gufueta phangi’etu wa Muklisto gudi ndaga yabola. (Yakoba 4:11, 12) Uvi yajiya gukhala egi aphangi Aklisto ako ana gufueta aphangi’awo Aklisto, handaga ana gutangiza egi ene adi athu abonga nu ana tshigina gudikanduisa ha gusegulula athu ako. (Ngimbo 50:20; Ishima 3:29) Mbimbi ya Greki yabalumuiwe egi ‘gufueta’ idi muhana matangi a umbalagaji nu khadilo dia gumbila muthu mambo nga gubalegesa ndaga. Idi gifua udi musophesa phangi’aye mu luholo luabola. Mu luholo lutshi tuajiya ‘gufueta nu gusophesa mukhuala wa Nzambi’? Ha gufezegesa, alongeshi a mikhuala nu Afalese akhalele musombegesa mikhuala ya Nzambi, akhalele nji musophesa athu nu mikhuala yawo hakhawo. (Mako 7:1-13) Hene, gula tudi musophesa phangi yonu Yehowa gasopheselego, ngenyi tudi ‘musophesa mukhuala wa Nzambi’ nu tudi mutshita gubola ha gumona egi mukhuala wene ushigo watagana. Tuajiyilego gutaganesa mukhuala wa guzumba gula tudi mufueta aphangi etu.—Lomo 13:8-10.

OCTOBRE 14-20

UMONYI UDI MU MBIMBI YA NZAMBI | 1 PHETELO 1-2

“Mudi Naye Gukhala Athu Agijila”

(1 Phetelo 1:14, 15, NWT) Gifua ana atumaga, mulandulago luko ngina jimuakhalele najio hathomo hamuakhalelego nu ujiyi, ¹⁵ uvi gifua mudi Wagijila wamitamegele, mukhale agijila mu makalegelo enu agasue,

w17.02-F diyiji 9 par. 5

Gibawu—Gidi “Kado Gatagana” Gakatuga gua Tata

⁵ Luholo lutshi tuajiya gumonesa egi tuana guzumba jina dia Yehowa? Mu makalegelo etu. Yehowa wana gutshigina egi tukhale athu agijila. (Tanga 1 Phetelo 1:15, 16.) Yakotelesa egi tudi naye gukombelela phamba Yehowa nu gumutumagela nu mutshima umoshi. Ikhale tangua tudi mugatana nu umbalagaji, tuana gutshita yagasue ha gujinga mu gudivua nu malongo nu mikhuala yenji. Tangua tudi mutshita ndaga jiatagana, tudi mulemesa myenda yetu, ngenyi tudi mutumbuisa jina dia Yehowa. (Mat. 5:14-16) Luholo tudi athu agijila, tuana monesa mu luholo luetu lua gujinga egi mikhuala ya Yehowa idi yabonga, uvi Satana udi muenya mambo. Tangua tuana tshita gubola gifua athu agasue, tuana balumuna mutshima nu tuana bemba makalegelo anago gutumbuisa Yehowa.—Ngi. 79:9.

(1 Phetelo 1:16) Handaga mukanda wa Nzambi udi muzuela egi: ‘Mudi naye gukhala athu agijila, handaga ame ngudi wagijila.’

lvs-F diyiji 77 par. 6

Luholo Lutshi Tudi Naye Gutomba Saga

⁶ Yehowa udi gutuwambela egi: ‘Mudi naye gukhala athu agijila, handaga ame ngudi wagijila.’ (1 Phetelo 1:14-16; 2 Phetelo 3:11) Yehowa wajiya gutshigina gukombelela guetu phamba gula gudi guagijila nga guaphelegeta. (Mikhuala 15:21) Gukombelela guetu guajiyilego gukhala guaphelegeta gula tudi mutshita ndaga jianago gusuanguluisa Yehowa, gifua uthambi, ndaga jia khuta, nu ndaga jidi gudivua nu bademo. (Lomo 6:12-14; 8:13) Gula tudi gudikenesa nji nu ndaga eji Yehowa gajiyilego gusuanguluga. Ndaga eji jiajiya gubolesa gukombelela guetu, luko, Yehowa gajiyilego gutshigina gukombelela guene; jiajiya nji gubolesa ufuta wetu nenji.

Kamba Ndaga Jiko jia Ndando jia mu Nyuma

(1 Phetelo 1:10-12, NWT) Mukunda nu guhuluga ogu, ba profete anyi azuelele ndaga yatadila mutshima wabonga wakoma owu atshiginyile gumimonesela, ahudile mihu nu gikhesa nu akambele muabonga diago. ¹¹ Ene alolele gukamba gujiya sungi nu hugo ditshi ndaga jinyi nyuma yakhalele mukatshi dienu yamonesele mukunda nu Klisto jiakhalele naye gutagana. Nyuma yene yakhalele muzuela gutuama malamba Klisto wakhalele naye gumona nu lutumbu luakhalele naye muene guheta gungima. ¹² Aamonesele egi mudimo wawo wakhalelego mukunda nu ene hakhawo, uvi awutshitshile mukunda nu enue, mukunda nu ndaga jidi gumilongesewa luenyelu gudi athu amilongesele lukuma luabonga nu nyuma yabonga inyi yakatugile mu dilu. Anjelo ana tshigina gutala ndaga eji.

w08-F 15/11 diyiji 21 par. 9

Ndaga jia Ndando Jidi mu Mukanda wa Yakoba nu Phetelo

1:10-12. Anjelo atshiginyile gutala nu gukotelesa jinga dia ndaga jia mu nyuma eji ba profete a Nzambi a mu tangua dikulu asonegele jidi mutadila hungu dia Aklisto ambiwe maji nyuma. Uvi, ndaga eji jiamonegele haphelo tangua Yehowa wasendesele gukalegela hungu diene. (Ef. 3:10) Esue tudi naye gulandula gifezegeselo gia anjelo ha gukamba gujiya “jinga dia ndaga jia Nzambi”?—1 Kol. 2:10.

(1 Phetelo 2:25, NWT) Handaga muakhalele muwungagana gifua imeme, uvi lunyelu muavutuga gudi mubambi nu mutadi wa mionyo yenu.

it-2-F diyiji 1021 par. 4

Mutadi

Mutadi Wakoma. Mukanda wa 1 Phetelo 2:25 udi muzuelela ndaga jidi mu Yeshaya 53:6 egi athu ‘adi muwungagana gifua imeme,’ nu Phetelo udi muzuela luko egi: “Uvi lunyelu muavutuga gudi mubambi nu mutadi wa mionyo yenu.” Idi naye gukhala egi verse yene idi muzuelela Yehowa Nzambi, handaga athu mupostolo Phetelo gasonegele mukanda abembelego Klisto Yesu, uvi, mu njila yenji ananewe gudi Yehowa Nzambi, Mubambi Wakoma wa akombeledi enji. (Ngi 23:1; 80:1; Yel 23:3; Ezek 34:12) Yehowa udi nji mutadi, wana gutala mitshima yetu. (Ngi 17:3) Mbimbi gutala (mu zuelelo dia Greki: épiskopê) yajiya gudivua nu mbimbi ya usopheshi wa Yehowa wakalegewe gu Yelusalema mu siekle ya thomo ya tangua dietu. Enya dimbo diene akoteleselego tangua dimbo diakhalele naye ‘gutalewa [Greki: épiskopê].’ (Luka 19:44) Usopheshi wene wajiya gubata gubonga, gifua gudi athu adi mutumbuisa Nzambi mu lusugu luenji lua guza “mutala [Greki: épiskopê].”—1Phet 2:12.

OCTOBRE 21-27

UMONYI UDI MU MBIMBI YA NZAMBI | 1 PHETELO 3-5

“Gisugishilo gia Ndaga Jiagasue Gidi Hehi”

(1 Phetelo 4:7, NWT) Gisugishilo gia ndaga jiagasue gidi hehi. Hene, mukhale nu matangi abonga nu mukhale nu gutema ha gukombelela.

w13-F 15/11 diyiji 3 par. 1

“Mukhale nu Gutema ha Gukombelela”

MUTHU mumoshi wana gutshita mudimo mu phipha sendese mualeha wazuelele egi: “Tangua diana gukhala diago lamba mu phipha ha gukhala gikolekole didi tangua gisugu giana sendesa gutshia”. Idi yadiago egi athu ana gukhala gikolekole mu phipha yagasue adi mujiya ndaga yene muabonga. Aklisto a mangino adi mutagana nu lamba dia luholo lumoshi handaga lunyelu, phipha yaleha ya ndaga jia ha mavu awa a Satana idi mubuita sha mangololo. (Lomo 13:12) Hene, gubanda tulo mu tangua edi dia gisugishilo, gudi diago gingoza! Tudi naye diago ‘gukhala nu matangi abonga.’ Luko, Biblia idi gututoga ha ‘gukhala nu gutema ha gukombelela.’—1 Phet. 4:7.

(1 Phetelo 4:8, NWT) Holu dia ndaga jiagasue, mudizumbe mangololo, handaga guzumba guana gutotesa ndaga jiavula jiabola.

w99-F 15/4 diyiji 22 par. 3

Luholo Lutshi Tuajiya Gujiya nu Gubinga Guleba gua mu Nyuma

Gu gisugishilo, tudi naye gulandula ndaga jiazuelele mupostolo Phetelo egi: “Gisugishilo gia ndaga jiagasue gidi hehi. Hene, mukhale nu matangi abonga nu mukhale nu gutema ha gukombelela. Holu dia ndaga jiagasue, mudizumbe mangololo, handaga guzumba guana gutotesa ndaga jiavula jiabola.” (1 Phetelo 4:7, 8, NWT) Idi ndaga yaleba ha gubemba egi gubola gua athu ako nga guetu hakhetu gungine mu mitshima yetu, nu mu matangi etu, nu guajiya gubua gikhakhuishilo. Satana wana gujiya muabonga guleba gua athu. Wana gukalegela nu gutema guagasue khadilo dia gukhaphumuna athu ha guabinga. Hene, tudi naye gukhala hehi ha gutotesela aphangi adi gutukalegela gubola nu guzumba guavula, hagula ‘tuhanyigo Diabulu njila ha gutuhinyina.’—Efeso 4:25-27.

(1 Phetelo 4:9, NWT) Mudimonesele khadilo dia guyamba nu mudibogutshilago.

w18.03-F diyiji 14-15 par. 2-3

Khadilo dia Guyamba Didi Khadilo Diabonga nu dia Ndando!

² Mupostolo Phetelo wakolesele aphangi enji ha ‘gudimonesela khadilo dia guyamba.’ (1 Phet. 4:9) Mu zuelelo dia Greki, mbimbi eji “khadilo dia guyamba” jidi mukotelesa “gumonesa mutshima wabonga nga gisemo gudi ngenji.” Uvi mupostolo Phetelo wakolesele aphangi’enji a Aklisto ha ‘gudimonesela’ khadilo dia guyamba, yakotelesa gudi athu akhalele ene mujiya nu anyi akhalele nawo ufuta. Luholo lutshi khadilo edi dia guyamba diaakuatesele?

³ Khadilo diene diaakuatesele ha gukhala hamoshi. Tangiza gusuanguluga wakhalele nago tangua watamegele muthu mumoshi gumbo diaye. Yakhalele diago tangua diabonga nu muakolesele ufuta wenu, ishigo ngenyi? Tangua tuana guyamba aphangi a mala nu a akhetu gumbo dietu, tuana khala nu luendu lua guajiya muabonga gubalega fundo diko tuajiya gukhala nawo. Luholo ndaga jiakhalele muya nu gubola muavula, Aklisto a mu tangua dia Phetelo akhalele nu funu ya gukolesa ufuta wawo. Esue Aklisto a mangino nji, tudi naye gukolesa ufuta wetu handaga tudi mujinga “mu masugu a gisugishilo.”—2 Tim. 3:1.

Kamba Ndaga Jiko jia Ndando jia mu Nyuma

(1 Phetelo 3:19, 20, NWT) Muene wayile mulongesa nyuma jidi mu bologo, ²⁰ nyuma jiene jiatumagelego mu tangua dikulu tangua Nzambi wakhalele munengena nu guhuiminyina guagasue mu masugu a Nowa, hakhalele mutungiwa masuwa. Athu azonda, khuta nage, anginyine mu masuwa, ene ahuluishiwe mu meya.

w13-F 15/6 diyiji 23

Mihu Yana Guhula Athu ana Gutanga Mikanda Yetu

Biblia yana zuela egi Yesu “wayile mulongesa nyuma jidi mu bologo.” (1 Phet. 3:19) Idi mukotelesa itshi?

▪ Mupostolo phetelo udi muzuela egi “nyuma jiene jiatumagelego mu tangua dikulu tangua Nzambi wakhalele munengena nu guhuiminyina guagasue mu masugu a Nowa.” (1 Phet. 3:20, NWT) Idi diago mumonega haphelo egi, mupostolo Phetelo udi muzuelela anjelo anyi alumbugile gifua Satana. Mulandudi Yuda udi muzuelela anjelo anyi “asuangulugilego nu fundo diawo dia gisendeselo, uvi abembele fundo diawo akhalele mujinga. Nzambi waabambele agujitshiga nu malenge a ivo nu ivo, mukatshi dia phipha yakola diago mukunda nu lusugu luakoma lua gusophesa.”—Yuda 6, NWT.

Mu luholo lutshi anjelo alumbugile mu masugu a Nowa? Gutuama egi mvula yakola ya mu tangua dia Nowa inoge, nyuma eji jiabola jiadibuishile athu—ndaga Nzambi galondelego mukunda nu ene. (Gis. 6:2, 4) Luko, anjelo ene atshitshile ndaga yabola diago luholo abungushile muila nu akhetu. Nzambi gaafugilego mukunda nu gubungisa muila nu akhetu. (Gis. 5:2) Anjelo awa alumbugile mbaashiyiwa mu tangua diatagana diahagele Nzambi. Uvi henyaha, gifua luholo mulandudi Yuda wayimonesa, nyuma jiene jiabola jidi “mukatshi dia phipha yakola diago”—yakotelesa egi mu bologo dia mu nyuma.

Tangua ditshi nu luholo lutshi Yesu wayile mulongesa “nyuma jidi mu bologo”? Phetelo wasonegele egi ndaga yene yakalegewe tangua Yesu “wafuzumugile mu nyuma.” (1 Phet. 3:18, 19, NWT) Luko, Phetelo udi muzuela egi Yesu “wayile mulongesa.” Luholo Phetelo udi muzuela egi Yesu “wayile mulongesa,” ludi mumonesa egi ndaga yene yakalegewe gutuama egi Phetelo asonege mukanda wenji wa thomo. Idi mumonega egi matangua azonda gungima dia gufuzumuga guenji, Yesu wayile mulongesa nyuma jiabola ndaga yatadila ndola adi naye guheta. Gayilego mulongesa nyuma jiene mukunda nu guahana felela. Uvi wayile gualongesa ndaga yatadila usopheshi wawo. (Yona 1:1, 2) Luholo Yesu gamonesele gutshigina guenji nu wasalele ya gujinginyina uu nu gu gufua guenji gungima wafuzumuga, wamonesele egi Diabulu gakhalelego nu ngolo jia gumutshita nga gima. Yesu wakhalele diago nu gishina gia gulongesa usopheshi wa luholo elu.—Yone 14:30; 16:8-11.

Mu masugu adi muza, Yesu mbawujitshiga nu mbawumba nyuma jiene hamoshi nu Satana mu wina dialeha. (Luka 8:30, 31; Yat. 20:1-3) Uvi lunyelu, anjelo awa alumbugile adi mukatshi dia phipha yakola ya mu nyuma, nu adi diago munengena gufua guawo.—Yat. 20:7-10.

(1 Phetelo 4:6, NWT) Ha ndaga eyi, hene lukuma luabonga lualongesewe nji gudi athu agufua, ngatshima asophesewe mu muila ha gutadila matangi a athu, ajiya gujinga mu gudivua nu nyuma ya matangi a Nzambi.

w08-F 15/11 diyiji 21 par. 7

Ndaga jia Ndando Jidi mu Mukanda wa Yakoba nu Phetelo

4:6—Akuatshi akhalele “athu agufua” anyi ‘alongesewe lukuma luabonga’? Athu agufua adi athu anyi ‘afuile mukunda nu gujimbila nu gubola guawo,’ nga ndo akhalele agufua mu nyuma, gutuama dia guvua lukuma luabonga. (Ef. 2:1) Gungima dia gusha gutshigina mu lukuma luabonga, hene, asendesele “gujinga” mu nyuma.

OCTOBRE 28–NOVEMBRE 3

UMONYI UDI MU MBIMBI YA NZAMBI | 2 PHETELO 1-3

‘Ungulugenu Tangua Diagasue Guza gua Lusugu lua Yehowa’

(2 Phetelo 3:9, 10, NWT) Yehowa gashigo mushipha ha gutaganesa ndaga jiatendelele muene, gifua mudi athu ako mutangiza, uvi muene udi muhuiminyina mukunda nu enue, handaga muene gashigo mutshigina nga muthu mumoshi afue, uvi udi mutshigina egi athu agasue abalumune mitshima yawo. ¹⁰ Uvi lusugu lua Yehowa mbaluza gifua muanaza nzangi, mu lusugu luene dilu mbaditota nu gutotologa guakoma, ima yagasue ya mu dilu mbayikuluga gu tshuya, mavu nu ima yagasue idi muene mbayishiginyina.

w06-F 15/12 diyiji 27 par. 11

Yehowa ‘Mbawutshita Hagula Ndaga Jikalegewe nu Nduedi’

¹¹ Luholo lutshi tudi naye gukotelesa ndaga jiazuelele Yesu egi Yehowa mbawutshita “muphushi” hagula ndaga jikalegewe nu nduedi? Mbimbi ya Nzambi idi mumonesa egi “ngatshima [Yehowa] udi mumonesa mutshima waleha,” mbawutshita muphushi hagula egi ndaga jikalegewe nu nduedi mu tangua diatagana. (Luka 18:7, 8; 2 Phetelo 3:9, 10) Mu tangua dia Nowa, hanogele mvula, athu abola ashiyiwe mbala imoshi. Luholo lumoshi nji, mu masugu a Lota, tshuya tuakatugile mu dilu nu tuashiyile athu abola. Yesu wazuelele egi: ‘Mbayikhala nji ngenyi mu lusugu lua gumonega gua Muna muthu.’ (Luka 17:27-30) Luko, athu abola ‘mbashiyiwa mu gisagumuisa.’ (1 Tesalonike 5:2, 3) Hene, tuajiya gusha diago mutshima egi Yehowa mbagashigo muhana njila egi mavu awa a Satana abalege lusugu luatombele muene ha guashiya.

(2 Phetelo 3:11, 12, NWT) Handaga ima eyi yagasue mbayikuluga muhu owu, mutadile luholo lua athu mudi naye gukhala. Mudi naye gukhala nu makalegelo abonga nu gutshita ndaga jidi mumonesa gujinginyina gudi Nzambi, ¹² ha mudi munengena nu guwunguluga tangua diagasue guza gua lusugu lua Yehowa, mu lusugu luene dilu mbadishiyiwa, nu tshuya nu ima mbayishiginyina gu kiza gia tshuya tua mu dilu!

w06-F 15/12 diyiji 19 par. 18

“Lusugu Luakoma lua Yehowa Luasuena Hehi”

¹⁸ Tushigo naye gudihula luholo mupostolo Phetelo udi gututoga ha guwunguluga tangua diagasue “guza gua lusugu lua Yehowa”! Luholo lutshi tuajiya guwunguluga tangua diagasue lusugu luene? Tuajiya guluwunguluga gula tudi nu “makalegelo abonga nu tudi mutshita ndaga jidi mumonesa gujinginyina gudi Nzambi.” (2 Phetelo 3:11, 12, NWT) Gulandula gutshita ndaga eji mbagutukuatesa ha guwunguluga tangua diagasue guza gua “lusugu lua Yehowa” nu gikhesa giagasue. Mbimbi ya Greki yabalumuiwe egi “guwunguluga tangua diagasue” idi mukotelesa egi gutshita “muphushi.” Tuajiyilego gubalegesa masugu muphushi hagula lusugu lua Yehowa luze. Uvi, masugu mbaabalega muphushi gula tudi gudihana ha gutshita muavula mudimo wa Nzambi.—1 Kolinto 15:58.

Kamba Ndaga Jiko jia Ndando jia mu Nyuma

(2 Phetelo 1:19, NWT) Hene, tudi nu mbimbi jiazuelele profete, eji jidi mubua jia giamatshidia diago, nu mudi mutshita muabonga ha gujitegelela, handaga jidi gifua muenda udi mulema fundo didi phipha (uu nu hatshia guma nu hazoga themua ya mu gimenegena) mu mitshima yenu.

w08-F 15/11 diyiji 22 par. 2

Ndaga jia Ndando Jidi mu Mukanda wa Yakoba nu Phetelo

1:19—Nanyi udi “themua ya mu gimenegena,” tangua ditshi gazogele, nu luholo lutshi tudi mujiya egi ndaga yene yakalegewe gale? “Themua ya mu gimenegena,” idi Yesu Klisto mu ngolo jia Ufumu. (Yat. 22:16) Mu givo 1914, Yesu wazogele gutuama dia ima yagasue yafugiwe gifua Fumu nu Masiya, yene yamonesele lusugu luhe-luhe. Vizio ya gutumbuga gua Yesu yadiangele gumonesa lutumbu nu ngolo jia Yesu tangua mbadihinyina muene mu Ufumu wa Nzambi. Yamonesele diago giamatshidia gia mbimbi ya profesi ya Nzambi. Gula tudi mutegelela mbimbi eyi idi muphelegetesa mitshima yetu, mbatujiya diago egi Themua ya mu gimenegena yazogele.

(2 Phetelo 2:4, NWT) Yadiago, Nzambi gabambelego anjelo atshitshile muabola ha guahana ndola, uvi waambile mu Tartare, fundo adi agujitshiga nu malenge mu phipha yakola ha gunengena lusugu lua gusophesewa.

w08-F 15/11 diyiji 22 par. 3

Ndaga jia Ndando Jidi mu Mukanda wa Yakoba nu Phetelo

2:4—“Tartare” idi itshi, nu tangua ditshi ambile anjelo alumbugile muene? Tartare idi gifua bologo, diambiwe phamba nyuma jiabola uvi athu ndo. Adi mu phipha ya matangi luholo anago gujiya nga felela dimoshi dia Nzambi. Akhalago nu felela mukunda nu masugu adi muza. Nzambi wambile anjelo awa amulumbugidile mu Tartare mu masugu a Nowa, nu mbakhala guene uu nu tangua mbashiyiwa.