Kalegela Mukanda Heta Monyo wa Ivo nu Ivo! mu Mudimo wa Gulongesa

Tudi nu gusuanguluga luholo tuaheta gamukanda nu mukanda uhe-uhe ha gulonguga nu athu Biblia! Tudi mutoga Yehowa ha gutukuatesa ha gukalagala muabonga mudimo wa gubuisa athu avula alandudi. (Mat 28:18-20; 1Kol 3:6-9) Luholo tshi tuajiya gukalegela ikadigilo eyi ihe-ihe?

Mukanda Heta Monyo wa Ivo nu Ivo!, gulonguga gua Biblia, udi nu ba metode ahe-ahe a gulongesela. Landula malongo ene muabonga tangua udi gudilondega nu tangua udi mutuameza gulonguga gua Biblia.a

• Tangenu paragrafe, gungima zuelelenu muhu wa paragrafe yene

• Tangenu verse jiasonegewa egi “tanga”, gungima kuatesa muthu udi mulonguga nenji Biblia ha gukotelesa luholo ajiya gukalegela verse jiene

• Talesa video, gungima izuelelenu, hula mihu yatadila video yene

• Tshita yagasue ha gulonguga longo dimoshi mu lusugu

Tangua udi mu mudimo wa gulongesa hana gale thomo muthu gamukanda gene ha gukotelesa gula udi musuanguluga nu giamatshidia. (Tala galuanda “Luholo Wajiya Guhana Muthu Gamukanda Heta Monyo wa Ivo nu Ivo! mu Gudimona gua Thomo.”) Gula wamanesela gulonguga nenji gamukanda gene nu gula muthu muene nji udi mutshigina gulandula gulonguga, muhane mukanda nu sendesa gulonguga nenji mu longo dia 04. Gula wana longuga nu muthu Biblia mu njila ya mikanda tuana kalegela ha gulonguga nu athu Biblia, ibembe, sendesa gulonguga nenji mukanda Heta Monyo wa Ivo nu Ivo! Tomba fundo muajiya gusendesa gulonguga nenji mu mukanda wene.

TALENU VIDEO IDI MUZUELA EGI: SUANGULUGA NU GULONGUGA GUAYE GUA BIBLIA. GUNGIMA, HANENU MVUTU GU MIHU EYI:

• Ndaga jitshi alongogi a Biblia mbaalonguga mu mukanda owu uhe-uhe?

• Mukunda natshi tudi naye gutalesa athu tuasendesa gulonguga nawo Biblia video eyi?

• Mafelela atshi tudi naye gukuatesa muthu tudi mulongesa Biblia ha gudishila nu ha gutagenesa?—Tala galuanda “Ishina nu Ba Desizio Adi mu Gitshinyi Giagasue”