Mavuala a Mala​—Tshitenu Ngolo ha Gubua Aklisto a Gukula mu Nyuma

1. Ndaga itshi muvuala wa Muklisto udi naye gutshita ha gubinga ndaga jidi muene mutshita?

FUMU Davidi wawambelele Salomo egi: ‘Khala nu ngolo, monesa egi udi yala.’ (1 Maf. 2:1-3) Mangino aphangi a mala agasue ana tshita ngolo ha gukalegela longo edi dia Yesu. Ha gubinga, adi naye gulonguga ha gutumagela mikhuala ya Nzambi nu gukalegela malongo adi mu Biblia mu ndaga jiagasue ana tshita. (Luka 2:52) Mukunda natshi idi nu ndando egi mavuala a mala atshite ngolo ha gubua Aklisto a gukula mu nyuma?

2-3. Mukunda natshi idi nu ndando egi mavuala a mala abue Aklisto a gukula mu nyuma?

² Phangi wa yala wana khala nu inemo yandando ya gutagenesa mu fami nu mu hungu. Idi yadiago egi muvuala wa yala, wana tangiza inemo wajiya guheta mu masugu adi muza. Yajiya gukhala egi wana tshigina gubua muvundji wa njila wa tangua diagasue, mukuateshi wa mudimo, gungima wajiya gubua mukulu mu hungu. Yajiya nji gukhala egi, wana tshigina guzula mukhetu mu ulo nu guvuala ana. (Ef. 6:4; 1 Tim. 3:1) Ha gutagenesa mafelela awa agasue nu guabinga, udi naye gukhala Muklisto wa gukula mu nyuma.b

³ Itshi yajiya gumikuatesa ha gubua Aklisto a gukula mu nyuma? Gudi nu ndaga jia ndando mudi naye gulonguga ha gukula mu nyuma. Ndaga itshi muajiya gutshita sendese mangino mukunda nu inemo muajiya guheta mu masugu adi muza nu guyibinga?

NDAGA MUAJIYA GUTSHITA HA GUBUA AKLISTO A GUKULA MU NYUMA

4. Fundo ditshi mavuala ajiya guheta ifezegeselo yabonga yagulandula? (Tala nji gifuanesa.)

⁴ Landula ifezegeselo ya athu adi nu makalegelo abonga. Biblia idi nu ifezegeselo yavula yabonga mavuala a mala ajiya gulandula. Mala ene a mutangua dikulu akhalele muzumba Nzambi, atagenesele inemo ya gudisha ha gukuatesa akombeledi a Nzambi. Muajiya nji guheta ifezegeselo iko yabonga ya Aklisto agukula mu nyuma mu fami yenu nga mu hungu dienu. (Heb. 13:7) Yesu Klisto nji udi gifezegeselo giatagana mukunda nu mavuala. (1 Phet. 2:21) Tangua mudi mulonguga muabonga ifezegeselo ya athu awa, tangigizenu makalegelo awo ana gumisuanguluisa. (Heb. 12:1, 2) Gungima, tangigizenu luholo muajiya gulandula gifezegeselo giawo.

5. Luholo lutshi mavuala ajiya guheta matangi abonga? Mukunda natshi idi nu ndando? (Ngimbo 119:9)

⁵ Kudisa khadilo dia ‘gutangigiza . . . muabonga.’ (Ish. 3:21) Muthu udi nu khadilo dia gutangiza muabonga wana tema gutangigiza gutuama dia gutshita ndaga. Hene, tshitenu ngolo ha guheta ndunge nu gujibamba. Mukunda natshi? Handaga mavu awa adi azala pha nu mavuala a mala ana tshita ndaga ana tshigina nu jinyi jiana guasuanguluisa. (Ish. 7:7; 29:11) Televizio, filme, Internet yajiya gubolesa luholo lua gutangiza nu makalegelo a mavuala. Uvi luholo lutshi muajiya gusombegesa luholo luenu lua gutangigiza? Sendesenu gulonguga malongo a Biblia, khalenu nji mutangigiza gubonga muajiya guheta gula mudi mukalegela malongo ene. Gungima, kalegelenu malongo ene ha guzula badesizio abonga anyi mbaasuanguluisa Yehowa. (Tanga Ngimbo 119:9.) Gula muatshita ndaga eji jia ndando, mbajimikuatesa ha gubua Aklisto a gukula mu nyuma. (Ish. 2:11, 12; Heb. 5:14) Tutadilenu luholo gukhala nu matangi abonga guajiya gumikuatesa mu ndaga eji mbadi: 1) luholo mudi naye gutadila aphangi a akhetu 2) tangua mudi muzula badesizio atadila gusudiga nu gulondega muila.

6. Luholo lutshi gukhala nu matangi abonga guajiya gukuatesa phangi wa muvuala ha gunemesa aphangi a akhetu?

⁶ Gukhala nu matangi abonga mbagumikuatesa ha gunemesa aphangi a akhetu. Ishigo ndaga yabola gula phangi mumoshi wa muvuala udi mukamba gukuata ufuta nu phangi wa mukhetu ha gumujiya muabonga. Uvi muvuala udi nu matangi abonga, gula gashigo nu matangi a guzula phangi wa mukhetu mu ulo, gajiyilego guzuela, gusonega nga gutshita ndaga imoshi yajiya gutuma phangi muene wa mukhetu ha gutangiza egi udi mutshigina gumuzula mu ulo. (1 Tim. 5:1, 2) Uvi gula yala udi mutshigina guzula mukhetu mu ulo, ha gutuna gubolesa lukuma lua mukhetu muene, adi naye gukamba muthu muko (chaperon) gila fundo adi muta maga athu ako ashigo guamona.​—1 Kol. 6:18.

7. Luholo lutshi gukhala nu matangi abonga guajiya gukuatesa muvuala tangua didi muene mutomba milele nu luholo lua gubunga sanga?

⁷ Ndaga iko mavuala ajiya gutshita ha gumonesa egi adi mukudisa matangi abonga, idi gutomba milele yabonga ya gusudiga nu luholo luabonga lua gubunga sanga. Avula mukatshi dia athu ana londa milele nu guzola maluholo ahe-ahe a gusudiga, ananemesago Yehowa. Ndaga jiamusonyi ana kalagala jiana monega mu luholo ana sudiga milele yakama inyi yana buisa mala gifua akhetu. Gula muvuala wa yala udi mutshita ngolo ha gubua Muklisto wa gukula mu nyuma udi mutomba milele ya gusudiga, udi naye gulandula malongo a Biblia nu ifezegeselo yabonga ya aphangi mu hungu. Wajiya gudihula egi: ‘Luholo luami lua gusudiga luana monesa egi ngudi nu matangi abonga nu ngana nemesa athu ako ba? Luana monesa nji egi ngudi mukombeledi wa Yehowa ba?’ (1 Kol. 10:31-33; Tito 2:6) Gula muvuala wa yala udi nu matangi abonga, aphangi mu hungu mbaamunemesa, Tata wetu wa mu dilu nji mbawumunemesa.

8. Ndaga jitshi muvuala wa yala wajiya gutshita ha gubua muthu munu athu ako ajiya gushila mutshima?

⁸ Khala muthu munu athu ako ajiya gushila mutshima. Gula muvuala wa yala udi mutagenesa inemo yenji yagasue muabonga, athu ako ajiya gumushila mutshima. (Luka 16:10) Tutadilenu gifezegeselo giatagana gia Yesu. Wakhalele mutagenesa inemo yenji muabonga. Wakalegele ndaga jiagasue jiamuwambelele Yehowa ikhale matangua ako yakhalele lamba ha guyitshita. Wakhalele muzumba athu, uvi wazumbile alandudi enji muavula gubalega, hene wahanele monyo wenji mukunda nu ene. (Yone 13:1) Ha gumonesa egi wana landula gifezegeselo gia Yesu, khala mutshita mudimo wakola ha gutagenesa inemo yagasue idi guguhanewa. Gula wamona egi ushigo diago mujiya luholo lua gutshita mudimo wene, monesa khadilo dia gudibulumuisa ha gutoga ukuateshi gudi aphangi agukula mu nyuma. Ukalagalago phamba ndambo yazonda ya mudimo waguhanewa. (Roma 12:11) Tshita mudimo waye muabonga; utshite gifua udi wa “Yehowa uvi athu ndo.” (Kol. 3:23) Uvi jiya egi ushigo muthu watagana; hene gula wakalegelego ndaga mu luholo luabonga, monesa khadilo dia gudibulumuisa nu gutshigina gubola guaye.​—Ish. 11:2.

KHALENU MULONGUGA NDAGA JIAJIYA GUMIKUATESA LUSUGU NU LUSUGU

9. Mukunda natshi mavuala a mala adi naye gulonguga ndaga jiajiya guakuatesa lusugu nu lusugu?

⁹ Ha gubua Aklisto a gukula mu nyuma, mudi naye gulonguga ndaga jiajiya gumikuatesa lusugu nu lusugu. Ndaga jiene mbajimikuatesa ha gutshigina inemo mu hungu, gutshita mudimo wajiya gumikuatesa nu enya fami yenu nu ha gukhala nu ufuta wabonga nu athu ako. Tutadilenu ndaga eji jia ndando jiajiya gumikuatesa.

10-11. Gula muvuala wa yala udi mujiya gutanga nu gusonega muabonga, gubonga gutshi muene nu aphangi ako mu hungu ajiya guheta? (Ngimbo 1:1-3) (Tala nji gifuanesa.)

¹⁰ Khala mulonguga gutanga nu gusonega muabonga. Biblia yana zuela egi, muthu wana khala nu gusuanguluga nu wana binga mu ndaga jiagasue jiana tshita muene, wana zula tangua dia gutanga Mbimbi ya Nzambi lusugu nu lusugu nu guyitangigiza. (Tanga Ngimbo 1:1-3.) Gula udi mutshita ngenyi, mbawujiya matangi a Yehowa anyi mbaamukuatesa ha gukalegela ndaga jidi mulonguga muene. (Ish. 1:3, 4) Aphangi a mala adi mutshita ndaga jia luholo elu, adi nu ndando mu hungu. Mukunda natshi?

¹¹ Handaga aphangi mu hungu ana khala nu funu ya ukuateshi wa aphangi a mala ana longesa muabonga nu ana hana malongo adi mukatuga mu Biblia. (Tito 1:9) Gula udi mujiya gutanga nu gusonega muabonga, mbayigukuatesa ha gulondega badiskur adi muhana gikhesa nu adi mukolesa gutshigina gua aphangi nu guhana komantere jiabonga. Mbagugukuatesa nji ha gusonega matangi a ndando tangua udi mulonguga nu tangua udi mulandula badiskur mu gudibungisa nu gu baasamble. Ndaga jiene mbajigukuatesa ha gukolesa gutshigina guaye nu guhana athu ako gikhesa.

12. Itshi yajiya gukuatesa aphangi a mala ha guta maga muabonga nu athu ako?

¹² Khala muta maga muabonga nu athu ako. Aphangi a mala adi naye gujiya guta maga muabonga nu athu ako. Yakotelesa egi adi naye gutegelela nu gukotelesa matangi a athu ako nu gudisha ha fundo diawo. (Ish. 20:5) Ajiya gukotelesa luholo muthu muko udi gudivua, gu dijui dienji nga mu luholo luenji lua gunyigisa mago nu phala. Wajiyilego gujiya ndaga eji jiagasue, gula ushigo mubalegesa tangua hamoshi nu aphangi. Gula udi mukalegela telefone nga apareyi ako muavula ha guta maga nu athu nga guasonegela mesaje, mbayikhala lamba gudi aye ha guta maga nu athu gula mudi fundo dimoshi. Hene tshita ngolo ha guta maga nu athu gula mudi fundo dimoshi.​—2 Yone 12.

13. Ndaga jitshi jiko muvuala wa yala udi naye gulonguga? (1 Timote 5:8) (Tala nji gifuanesa.)

¹³ Khala mukamba mbongo ha gudikuatesa. Phangi wa yala wa gukula mu nyuma udi naye gudikuatesa nu gukuatesa enya fami yenji. (Tanga 1 Timote 5:8.) Mu ifutshi iko mvuaji nga enya fami, ajiya gulongesa an’awo luholo lua gutshita mudimo. Uvi mu ifutshi iko, mavuala a mala ajiya gulonguga luholo lua gutshita mungenda nga midimo iko gu khalasa. Ikhale muanginyile makhalasa nga ndo, idi nu ndando ha gulonguga ndaga mbajimikuatesa ha guheta midimo. (Makal. 18:2, 3; 20:34; Ef. 4:28) Tshitenu yagasue ha gujiyiwa gifua athu ana tshita mudimo muabonga nu ana guwukalagala uu nu gusuga. Gula muatshita ngenyi, mbayishigo mukhala lamba ha guheta midimo nu ha guyibamba. Makalegelo nu ndaga jiko tuamonyi, idi nji nu ndando gudi phangi wa yala handaga yajiya gumukuatesa ha gutagenesa inemo iko mu masugu adi muza. Tutadilenu inemo iko mukatshi dia inemo yene.

DILONDEGENU HAGUTAGENESA INEMO MUAJIYA GUHETA MU MASUGU ADI MUZA

14. Luholo lutshi muvuala wa yala wajiya gudilondega ha gutshita mudimo wa tangua diagasue?

¹⁴ Mudimo wa tangua diagasue. Aklisto avula a gukula mu nyuma, asendesele gukalegela Yehowa mudimo wa tangua diagasue hakhalele ene mavuala. Gutshita mudimo wa muvundji wa njila guana kuatesa muvuala ha gutshita mudimo muabonga nu athu a maluholo agasue. Guana gumukuatesa nji ha gukalegela mbongo muabonga uvi mu luholo luabola ndo. (Fili. 4:11-13) Luholo luabonga lua gutshita mudimo wa tangua diagasue ludi, gusendesa thomo nu mudimo wa muvundji wa njila wa tangua diazonda. Athu avula ana sendesa gutshita mudimo wa muvundji wa njila wa tangua diazonda. Gutshita ngenyi guana guakuatesa ha gutshita mudimo wa muvundji wa njila wa tangua diagasue. Gutshita mudimo wa muvundji wa njila, guana hana muthu luendu lua gutshita midimo iko ya tangua diagasue gifua, gutunga jinzo jia Ufumu, nga gutshita mudimo gu Betele.

15-16. Itshi yajiya gukuatesa muvuala wa yala ha gubua mukuateshi wa mudimo nga mukulu?

¹⁵ Gubua mukuateshi wa mudimo nga mukulu. Aphangi agasue a mala adi naye gutagenesa ndaga jiana togewa hagula ajiya gubua akulu, ngenyi ajiya gukuatesa aphangi mu hungu. Biblia yana zuela egi aphangi a mala ana tagenesa ndaga eji ana tshigina “ha gukalagala mudimo wabonga.” (1 Tim. 3:1) Gutuama egi phangi wa yala abue mukulu, udi naye gubua thomo mukuateshi wa mudimo. Akuateshi a mudimo ana kuatesa akulu mu maluholo avula. Ene nu akulu ana gukuatesa aphangi mu hungu nu gudibulumuisa guagasue. Ana longesa nji lukuma luabonga nu gikhesa giagasue. Mavuala a mala ajiya gutagenesa ndaga jiana togewa ha gubua akuateshi a mudimo ikhale adi nu ivo 17 uu nu 20. Gula mukuateshi wa mudimo watagenesa mudimo wenji muabonga, wajiya gutombewa ha gubua mukulu gula watagenesa ivo 20.

¹⁶ Biblia yana monesa makalegelo udi naye gukhala nawo ha gubua mukuateshi wa mudimo nu ha gubua mukulu. Ndaga yajiya gugukuatesa ha gutagenesa makalegelo ene idi, guzumba guaye mukunda nu Yehowa nu enya fami yaye nu aphangi mu hungu. (1 Tim. 3:1-13; Tito 1:6-9; 1 Phet. 5:2, 3) Itshi wajiya gutshita ha gutagenesa felela diene? Khala mutshita ngolo ha gukotelesa makalegelo ene agasue Biblia idi muzuelela. Khala nji mutshita gisambu ha gutoga ukuatesa gudi Yehowa hagula utagenese ndaga jiene.c

17. Luholo lutshi muvuala wajiya gudilondega hagukhala yana nu fumu wa fami wabonga? (Tala nji gifuanesa.)

¹⁷ Yala nu fumu wa fami. Gifua luholo Yesu wayimonesele, aphangi ako a mala ana sala undumbu. (Mat. 19:12) Uvi gula wazula desizio dia guzula mukhetu mu ulo, mbawuheta ginemo giko gifua yala gudi muakaji’aye nu fumu wa fami. (1 Kol. 11:3) Yehowa wana tshigina egi yala azumbe mukaji’enji, atagenese nzala jienji, akhale futa dienji wabonga nu amukuatese ha gukolesa ufuta wenji nu Yehowa. (Ef. 5:28, 29) Makalegelo nu ndaga jiko tuazuelela mu longo edi, gifua gukhala nu matangi abonga, gunemesa aphangi a akhetu nu gukhala muthu munu athu ako ajiya gushila mutshima, mbagugukuatesa ha gukhala yala wabonga. Gutshita ngenyi mbagugukuatesa nji ha gutagenesa ginemo giaye gifua yala nu fumu wa fami wabonga.

18. Luholo lutshi muvuala wa yala wajiya gudilondega ha gukhala tata wabonga?

¹⁸ Tata. Gula wazula mukhetu mu ulo, gungima wajiya gubua tata. Luholo lutshi gifezegeselo gia Yehowa giajiya gugukuatesa ha gukhala tata wabonga? Giajiya gugukuatesa mu maluholo avula. (Ef. 6:4) Yehowa wawambelele Mun’enji Yesu haphelo egi wana gumuzumba muavula nu wana gumusuanguluisa. (Mat. 3:17) Gula wabua tata, khala muwambela an’aye muavula egi wana guazumba. Khala guashimana mukunda nu ndaga jiabonga ana kalagala. A tata ana landula gifezegeselo gia Yehowa, ana kuatesa an’awo a mala nu a akhetu ha gubua Aklisto a gukula mu nyuma. Wajiya gudilondega sendese mangino ha gukhala tata wabonga, gula udi muzumba enya fami yaye nu aphangi mu hungu nu guamonesa egi wana gudisagesa mukunda nu ene. Khala nji guawambela egi wana guazumba nu adi nu ndando yavula gu meso aye. (Yone 15:9) Gutshita ngenyi mbagugukuatesa ha gukhala yala nu tata wabonga. Ngenyi, mbawukhala nu ndando gu meso a Yehowa, gudi enya fami yaye nu gudi aphangi mu hungu.

ITSHI MUAJIYA GUTSHITA SENDESE MANGINO?

19-20. Ndaga jitshi jiajiya gukuatesa mavuala a mala ha gubua Aklisto a gukula mu nyuma? (Tala gifuanesa holu dia gizula.)

¹⁹ Mavuala a mala jiyenu egi muajiyilego gubua mbala imoshi Aklisto a gukula mu nyuma. Uvi mudi naye gutomba ifezegeselo yabonga ha gulandula, gukhala nu matangi abonga nu gukhala athu anyi athu ako ajiya gushila mutshima. Mudi naye nji gulonguga ndaga jiajiya gumikuatesa ha gutshita mudimo nu gudilondega mukunda nu inemo muajiya guheta mu masugu adi muza.

²⁰ Matangua ako, gula muatangiza ndaga jiagasue mudi naye gutshita, muajiya gumona gifua idi lamba ha gutagenesa ndaga jiene. Uvi muajiya gujitagenesa. Mujimbilago egi Yehowa wana tshigina gumikuatesa. (Yesh. 41:10, 13) Idi yadiago egi aphangi a mala nu a akhetu mu hungu mbaamikuatesa nji. Gula muatshita ndaga eji jiagasue ha gubua Aklisto a gukula mu nyuma, mbamukhala diago nu gusuanguluga. Mavuala a mala jiyenu egi tuana gumizumba! Tudi mutoga Yehowa ha gumisuanguluisa muavula, luholo mudi mutshita ngolo ha gubua Aklisto a gukula mu nyuma.​—Ish. 22:4.