Mavuala a Akhetu​—Tshitenu Ngolo ha Gubua Aklisto a Gukula mu Nyuma

1. Itshi tudi naye gutshita ha gulandula gifezegeselo gia Yesu?

TUAJIYA gudihula ha gumona luholo mona wazonda wana kula muphushi. Yajiya gumonega gifua yana khalago lamba gudi ana ha gukula. Uvi, gula tudi mutshigina gulandula gifezegeselo gia Yesu, tudi naye gutshita ndaga iko.b (1 Kol. 13:11; Heb. 6:1) Ha gutagenesa ndaga yene, tudi naye gukhala nu ufuta wakola nu Yehowa. Tuana khala nji nu funu ya nyuma yenji hagutukuatesa ha gukudisa makalegelo abonga anyi ana gumusuanguluisa, nu ha gudilondega mukunda nu inemo tuajiya guheta mu masugu adi muza.​—Ish. 1:5.

2. Longo ditshi tuazula mu Mukanda wa Gisendeselo 1:27? Itshi tuza mumona mu longo edi?

² Tangua Yehowa wafugile athu, waafugile yala nu mukhetu. (Tanga Gisendeselo 1:27.) Uvi yala nu mukhetu ana khalago luholo lumoshi; gudi nu ndaga jiko jiana tshita egi akhale a gudisha. Ha gufezegesa, Yehowa wafugile yala nu mukhetu ha gutagenesa inemo yawo. Ngenyi, adi naye gumonesa makalegelo abonga anyi ajiya guakuatesa ha gutagenesa inemo yene. (Gis. 2:18) Mu longo edi tuza mumona ndaga muvuala wa mukhetu wajiya gutshita ha gubua Muklisto wa gukula mu nyuma. Uvi, mu longo dia landula mbatumona ndaga mavuala a mala ajiya gutshita ha gubua Aklisto a gukula mu nyuma.

KUDISA MAKALEGELO ANA SUANGULUISA YEHOWA

3-4. Gui mavuala a akhetu ajiya guheta ifezegeselo yabonga ya gulandula? (Tala nji gifuanesa.)

³ Biblia yana zuelela akhetu avula anyi akhalele muzumba Yehowa nu gumukombelela. (Tala longo “Les femmes dans la Bible: que pouvons-nous apprendre d’elles?” mu jw.org.) Akhalele nu makalegelo adi muzuelewa mu muto wa lumene wa longo edi gifua, “makalegelo abonga,” nu akhalele “agujinginyina gudi Nzambi mu ndaga jiagasue.” Luholo lumoshi nji, aphangi a akhetu ajiya gulandula gifezegeselo giabonga gia aphangi a akhetu agukula mu nyuma a mu hungu diawo ana gudihana gudi Yehowa.

⁴ Mavuala a akhetu, muajiya gutangiza aphangi a akhetu muana jiya muabonga ana monesa makalegelo abonga nu luholo muajiya gulandula gifezegeselo giawo. Khalenu mutala muabonga makalegelo awo; gungima, tangizenu luholo muajiya gumonesa makalegelo ene. Mu paragrafe jialandula, tuza muzuelela makalegelo mbadi a ndando aphangi a akhetu ajiya gumonesa ha gubua akhetu a gukula mu nyuma.

5. Mukunda natshi khadilo dia gudibulumuisa didi nu ndando gudi phangi wa mukhetu wa gukula mu nyuma?

⁵ Ha gukhala Muklisto wa gukula mu nyuma, tudi naye gumonesa khadilo dia gudibulumuisa. Gula phangi wa mukhetu udi nu khadilo dia gudibulumuisa, mbawukolesa ufuta wenji nu Yehowa nu athu ako. (Yak. 4:6) Ha gufezegesa, phangi wa mukhetu wana zumba Yehowa nu gudibulumuisa guagasue, udi naye gutumagela malongo adi mu 1 Kolinto 11:3 adi mumonesa muthu udi nu ginemo gia gutuameza hungu nu fami. Malongo ene adi diago nu ndando ha guakalegela mu hungu nu mu fami.c

6. Longo ditshi mavuala a akhetu ajiya guzula mu khadilo dia gudibulumuisa dia Rebeka?

⁶ Tutadilenu gifezegeselo gia Rebeka. Wakhalele mukhetu watema, wakhalele muzula badesizio nu gikhesa giagasue nu wakhalele mujiya tangua nu luholo luabonga lua gutshita ndaga mu monyo wenji wagasue. (Gis. 24:58; 27:5-17) Yadiago, wakhalele nu khadilo dia gunemesa athu ako nu gulandula utuameji. (Gis. 24:17, 18, 65) Gula udi nu khadilo dia gudibulumuisa gifua Rebeka nu udi mutumagela athu Yehowa wahanele ginemo gia gutuameza, mbawuhana gifezegeselo giabonga gudi enya fami yaye nu aphangi ako mu hungu.

7. Luholo lutshi mavuala a akhetu ajiya gulandula gifezegeselo gia Esete mu ndaga yatadila gujiya fundo diawo?

⁷ Khadilo diko diajiya gukuatesa Aklisto agasue a gukula mu nyuma didi gujiya fundo dietu mu hungu. Biblia yana zuela egi: ‘Ndunge jidi gudi athu ana jiya fundo diawo.’ (Ish. 11:2) Esete wakhalele mujiya fundo dienji muabonga, wakhalele nji mukombelela Nzambi nu gujinginyina guagasue. Luholo luakhalele mujiya muene fundo dienji muabonga, gakhalelego nu lulendo tangua diabuile muene fumu. Wavuile longo diamuhanele gisonyi gienji Mordekayi nu watumagele longo diene. (Es. 2:10, 20, 22) Wajiya nji gumonesa khadilo diene gula udi mutoga athu ako malongo nu udi mukalegela malongo ene.​—Tito 2:3-5.

8. Ha gutadila 1 Timote 2:9, 10, luholo lutshi gudibulumuisa guajiya gukuatesa phangi wa mukhetu ha gusudiga mu luholo luabonga?

⁸ Esete wamonesele nji egi wakhalele mujiya fundo dienji mu luholo luko. Wakhalele ‘wabonga gu gitala nu gu phala;’ uvi gakhalelego gudisunzula mukunda nu gubonga guenji. (Es. 2:7, 15) Luholo lutshi phangi wa mukhetu wajiya guheta gubonga mu gifezegeselo gia Esete? Ndaga yene idi muzuelewa mu 1 Timote 2:9, 10. (Tanga.) Mupostolo Phaula wahanele malongo gudi aphangi a akhetu ha gusudiga mu luholo luabonga nu luatagana nu ha gukhala nu matangi abonga. Mbimbi ya Greke akalegele mu verse eyi idi mumonesa egi aphangi akhetu adi naye gusudiga mu luholo luabonga, adi naye nji gunemesa athu ako mu luholo luawo lua gusudiga. Tuana suanguluga diago nu aphangi akhetu a gukula mu nyuma anyi ana sudiga mu luholo luabonga!

9. Longo ditshi tuajiya guzula mu gifezegeselo gia Abigayile?

⁹ Khadilo diko aphangi agasue a akhetu a gukula mu nyuma adi naye gumonesa didi ndunge jia gukhaphuna ndaga. Ndunge jiene jidi itshi? Jidi ndunge jinyi jiana gutukuatesa ha gujiya ndaga jiabola nu jiabonga, nu ha gutomba gutshita ndaga jiabonga. Tuzule gifezegeselo gia Abigayile. Mulumi’enji wazudile desizio diabola diakhalele naye guabatela malamba mu fami yagasue. Abigayile gahenelego tedie. Wakalegele ndaga nu gutema guagasue, hene wahuluishile mionyo ya athu agasue. (1 Sam. 25:14-23, 32-35) Ndunge jiene jiana gutukuatesa ha gujiya tangua dia guzuela nu dia guhena tedie. Jiana gutukuatesa nji ha gutuna gutshita ndaga imoshi yajiya gusagesa athu ako.​—1 Tes. 4:11.

LONGUGA NDAGA JINYI JIAJIYA GUGUKUATESA MU LUJINGU LUAYE

10-11. Gubonga gutshi aye nu athu ako muajiya guheta gula wajiya gutanga nu gusonega muabonga? (Tala nji gifuanesa.)

¹⁰ Aphangi a akhetu adi naye gulonguga ndaga jiajiya guakuatesa. Midimo iko mona mukhetu wana longuga mu ulenge, yana gumukuatesa lujingu luenji luagasue. Tuzulenu ifezegeselo yazonda.

¹¹ Longuga gutanga nu gusonega muabonga. Mu kutime jiko, yana khalago nu ndando egi akhetu alonguge gutanga nu gusonega. Uvi, idi diago nu ndando egi Muklisto ajiye gutanga nu gusonega.d (1 Tim. 4:13) Hene, ubembigo nga gima gimoshi gigukange njila ha gulonguga gutanga nu gusonega muabonga. Gubonga gutshi mbawuheta? Gujiya gutanga nu gusonega mbagugukuatesa ha guheta mudimo. Mbagugukuatesa nji ha gulonguga nu gulongesa Mbimbi ya Nzambi muabonga. Uvi ndaga yabalega ndando idi egi, mbawukolesa ufuta waye nu Yehowa gula udi mutanga Mbimbi yenji nu udi guyitangigiza.​—Yosh. 1:8; 1 Tim. 4:15.

12. Luholo lutshi mukanda wa Ishima 31:26 wajiya gugukuatesa ha guta maga muabonga nu athu?

¹² Longuga luholo wajiya guta maga muabonga nu athu ako. Muklisto udi naye gujiya guzuela muabonga. Mupostolo Yakoba wahanele longo diatadila ndaga yene hazuelele muene egi: “Muthu wagasue udi naye gukhala hehi ha gutegelela, gashigo naye guzuela muphushi.” (Yak. 1:19) Gula udi mutegelela athu ako muabonga tangua adi muzuela, mbawaavila khenda nga ndo, ‘mbawudihaga ha fundo diawo.’ (1 Phet. 3:8) Gula ushigo mukotelesa ndaga jidi muzuela muthu nu luholo ludi gudivua muene, wajiya gumuhula mihu mu luholo luabonga. Gungima huiminyina ndambo, tangiza gutuama dia guzuela. (Ish. 15:28) Dihule egi: ‘Ndaga ngumutshigina guzuela jidi jia giamatshidia nu jidi muhana gikhesa ba? Jidi jia ginemua nu jidi mumonesa gisemo ba?’ Zula malongo mu luholo aphangi a akhetu a gukula mu nyuma ana ta maga. (Tanga Ishima 31:26.) Tegelela muabonga luholo adi muzuela. Gula walonguga luholo lua guzuela muabonga, mbawukhala nu ufuta wabonga nu athu ako.

13. Luholo lutshi wajiya gulonguga midimo ya monzo? (Tala nji gifuanesa.)

¹³ Longuga midimo ya monzo. Mu mafundo avula, akhetu ana kalagala midimo yavula mu jinzo jiawo. Mama waye nga phangi muko wa mukhetu wajiya gugulongesa luholo lua gukalagala midimo yene muabonga. Phangi wa mukhetu Cindy udi muzuela egi: “Mama wangulongesele ndaga imoshi ya ndando; wanguwambelele egi, gutshita mudimo wakola guana bata gusuanguluga guavula. Gulonguga ndaga jiene gifua, guhiga nu gutelega ima ya gudia, gulondega ima ya monzo, gunyiga milele, nu gusumba ima, guangukuatesele muavula nu guanguhanele luendu lua gukalegela Yehowa muavula. Mama wangulongesele nji ha gukhala nu khadilo dia guyamba; khadilo diene diana gungukuatesa ha gudimona nu aphangi a mala nu akhetu avula anyi adi nu makalegelo abonga ngajiya gulandula.” (Ish. 31:15, 21, 22) Mukhetu munu wana tshita mudimo wakola, nu wana khala nu khadilo dia guyamba wana bata gusuanguluga gudi enya fami yenji nu gudi aphangi ako mu hungu.​—Ish. 31:13, 17, 27; Makal. 16:15.

14. Longo ditshi wazula mu gifezegeselo gia phangi Crystal? Ndaga itshi ushigo naye gujimbila?

¹⁴ Longuga gutshita midimo aye hakhaye. Idi nu ndando egi Aklisto agasue alonguge gukalagala midimo ene hakhawo. (Fili. 4:11) Phangi wa mukhetu Crystal udi muzuela egi: “Mvuaji jiami jiangukuatesele ha gutomba option wa gulandula gu khalasa unu wakhalele naye gungukuatesa ha gulonguga midimo ya mago. Tata wanguwambelele ha gulandula Commerciale, yakhalelele option wabonga.” Ushigo naye gusuga phamba ha gulonguga gutshita mudimo, uvi tshita ngolo ha gujiya luholo lua gukalegela makuta nu gutema guagasue nu gutuna badepanse a githuhu. (Ish. 31:16, 18) Ujimbilago egi gula udi musuanguluga nu ima yazonda udi naye, nu udi mutuna gulaba guzula mikudi, mbawudihana muavula mu mudimo wa Yehowa.​—1 Tim. 6:8.

DILONDEGE MUKUNDA NU MASUGU ADI MUZA

15-16. Mukunda natshi aphangi akhetu anyi adi undumbu ana khala nu ndando gudi athu ako? (Mako 10:29, 30)

¹⁵ Gula udi mukudisa makalegelo ana suanguluisa Yehowa, nu walonguga gutshita mudimo muabonga, mbayigukuatesa ha guzula ba desizio abonga mu monyo waye. Tutadilenu ifezegeselo ya ndaga wajiya gutshita.

¹⁶ Wajiya guzula desizio dia gunengena gutuama egi uye mu ulo. Gifua luholo Yesu wayizuelele, akhetu ako ana sala undumbu, ngatshima mu kutime jiawo ana segulula athu anyi adi undumbu. (Mat. 19:10-12) Athu ako ana sala undumbu mukunda nu ndaga jiko. Jiyenu egi Yehowa nu Yesu ana segulula ndo Aklisto anyi adi undumbu. Ha mavu a mudidi, aphangi akhetu anyi adi undumbu ana hana gifezegeselo giabonga gudi aphangi a mu hungu. Luholo ana zumba athu ako nu ana gudisagesa mukunda nu ene, ana gubua gifua aphangi nu amama a mu nyuma mukunda nu athu ako.​—Tanga Mako 10:29, 30; 1 Tim. 5:2.

17. Luholo lutshi phangi wa mukhetu wajiya gudilondega ha gusendesa mudimo wa tangua diagasue?

¹⁷ Wajiya gukalagala mudimo wa tangua diagasue. Aphangi a akhetu ana gudihana muavula ha gulongesa lukuma luabonga ha mavu agasue. (Ngi. 68:11) Wajiya gudilondega ha gusendesa mudimo wa tangua diagasue ba? Wajiya gubua muvundji wa njila, nga gukuatesa gu mudimo wa gutunga jinzo jia Ufumu, nga guya gu Betele. Khala mutoga Nzambi mukunda nu mafelela aye a mu nyuma. Wajiya guta maga nu aphangi anyi atagenesele gale mafelela ene, ha gujiya ndaga udi naye gutshita ha gutagenesa mafelela aye. Gungima, tshita ndaga jinyi jiajiya gugukuatesa ha gutagenesa mafelela ene. Gula wabua muvundji wa njila, mbayiguhana luendu lua gutshita ndaga jiko jiavula mu ulondegi wa Yehowa.

18. Mukunda natshi phangi wa mukhetu udi naye gutomba mulumi’enji nu gutema guagasue? (Tala nji gifuanesa.)

¹⁸ Wajiya giwa guya mu ulo. Ndaga eji jiagasue tuazuelela jiajiya gugukuatesa ha gukhala mukhetu wabonga mu ulo. Gula watshigina guya mu ulo, udi naye gutomba mulumi’aye nu gutema guagasue. Jiya egi gutomba yala gudi mukatshi dia badesizio akoma udi naye guzula. Jiya nji egi, yala muene mbawukhala fumi’aye. (Roma 7:2; Ef. 5:23, 33) Hene, dihule egi: ‘Yala muene udi Muklisto wa gukula mu nyuma ba? Wana gusha ndaga jia Ufumu ha fundo dia thomo mu monyo wenji ba? Wana zangula badesizio abonga ba? Wana tshigina gubola guenji ba? Wana nemesa akhetu ba? Muene mbawungukuatesa ha gubamba ufuta wabonga nu Yehowa ba? Mbawunguhana ima ngudi naye funu nu mbawukhala futa diami diawaha ba? Wana tagenesa inemo yenji kiawaha ba? Ha gufezegesa, inemo itshi ana khala nayo mu hungu, nu luholo lutshi ana guyitagenesa?’ (Luka 16:10; 1 Tim. 5:8) Gula watshigina guheta yala wabonga, aye hakhaye udi naye gukhala mukhetu wabonga.

19. Mukunda natshi ginemo gidi nagio mukhetu gia gukhala “mukuateshi” giana gumuhana lutumbu?

¹⁹ Biblia idi muzuela egi mukhetu wabonga wana khala “mukuateshi” udi gifua mulumi’enji. (Gis. 2:18) Idi mutshigina gumonesa egi mukhetu udi muthu wa githuhu ba? Ndo! Ginemo gienji giana gumuhana lutumbu. Biblia yana tamega nji Yehowa egi “mukuateshi.” (Ngi. 54:4; Heb. 13:6) Mukhetu wana khala mukuateshi mukunda nu mulumi’enji tangua diana gumukuatesa muene; ha gufezegesa, gula mulumi’enji wazula desizio mukunda nu fami, muene wana nemesa desizio diene, hagula ndaga jiyile muabonga. Luholo luana zumba muene Yehowa, wana tshita yagasue ha gukuatesa athu ako ha gumona makalegelo abonga a mulumi’enji. (Ish. 31:11, 12; 1 Tim. 3:11) Aye nji wajiya gudilondega ha gutagenesa ginemo giene mu masugu adi muza gula wakolesa guzumba guaye gudi Yehowa, nu gula udi mukuatesa athu ako mu fami yenu nu mu hungu.

20. Luholo lutshi khadilo diabonga dia mama diajiya gukuatesa enya fami yenji?

²⁰ Wajiya giwa gubua mama. Gula waya mu ulo, gungima dienji aye nu mulumi’aye muajiya guvuala ana. (Ngi. 127:3) Uvi udi naye gutangigiza gutuama gula gukhala mama wabonga gudi mukotelesa itshi. Hene, ndaga tuazuelela mu longo edi jiajiya gugukuatesa ha gukhala mukhetu wawaha mu ulo nga mama wabonga. Guzumba guaye, nu gisemo giaye, nu guhuiminyina guaye mbagukuatesa enya fami yaye ha gukhala nu gusuanguluga; an’aye mbaakhala mu ubambi, mbaakula nji muabonga.​—Ish. 24:3.

21. Tuana gudivua gikuatshi mukunda nu aphangi etu a akhetu? Mukunda natshi? (Tala gifuanesa holu dia gizula.)

²¹ Aphangi akhetu, tuana gumizumba muavula mukunda nu ndaga jiagasue muana kalagala mukunda nu Yehowa nu mukunda nu athu enji. (Heb. 6:10) Muana kalagala ngolo ha gukhala nu makalegelo abonga, ha gujiya midimo yajiya gumikuatesa nu athu muana jinga nawo, nu ha gudilondega mukunda nu inemo mbamuheta mu masugu adi muza. Mudi diago nu ndando yavula mu ulondegi wa Yehowa!