Wana Guyijiya Ba?
Mukunda natshi Biblia yana vutugila ndaga jiko mbala jiavula?
MATANGUA ako, athu asonegele Biblia akhalele muvutugila mbimbi jiko mbala jiavula. Yajiya gukhala egi gudi nu ndaga jiaatumile ha gutshita ngenyi; tutadile ndaga thathu mukatshi dia ndaga jiene:
Tangua ayisonegele. Mu tangua dikulu, enya Isalele agasue akhalelego nu bakopi a Mikhuala. Matangua avula akhalele phamba mutegelela tangua akhalele guyitanga gu inzo ya tenta gula adibungisa. (Mikh. 31:10-12) Matangua ako yakhalele lamba hagula muthu ategelele muabonga handaga wawunganesa matangi nga ndo wamagana gualeha handaga athu adi avula. (Neh. 8:2, 3, 7) Mu ba okazio a luholo elu, guvutugila matangi a ndando guakhalele ndaga yabonga, handaga guakhalele naye gukuatesa athu ha guwunguluga mikhuala nu ha guyikalegela. Guvutugila mbimbi jiko guakhalele guakuatesa ha guwunguluga ndaga jiko jiazonda-zonda gifua mikhuala ya Nzambi nu badesizio enji.—Levi 18:4-22; Mikh. 5:1.
Luholo ayisonegele. Itshinyi iko ya Biblia yakhala ya gusonega gifua ngimbo—gifua: Mukanda wa Ngimbo, Lungimbo lua Salomo, nu wa Isenzele. Matangua ako ngimbo jiana vutugila mbimbi ha gumonesa muto wa lumene wa lungimbo nu ha gukuatesa athu ha gukuata mbimbi jiene mu muto. Ha gufezegesa, tala mbimbi jidi mu Ngimbo 115:9-11: ‘O Isalele, shila Yehowa mutshima—handaga muene udi mukuateshi nu mubambi wawo. O aye fami ya Alona, shila Yehowa mutshima—handaga muene udi mukuateshi nu mubambi wawo. Enue muana vuila Yehowa woma, shilenu Yehowa mutshima—handaga muene udi mukuateshi nu mubambi wawo.’ Guvutugila mbimbi eji guajiya gukuatesa muthu udi muyimba ha gukuata matangi a ndando mu muto.
Gishina ayisonegele. Matangua ako athu asonegele Biblia akhalele muvutugila matangi a ndando mbala jiavula. Ha gufezegesa, tangua Yehowa wahanele enya Isalele mukhuala egi ashigo naye gudia mahatshi, wawambelele Moize ha guvutugila mukhuala wene mahugo avula. Nzambi wakhalele mutshigina gumonesa egi monyo wa gima giafugiwe udi mu mahatshi, yakotelesa egi, monyo wana khala mu mahatshi. (Levi 17:11, 14) Gungima, tangua apostolo nu akulu a gu Yelusalema asonegele ndaga jinyi Aklisto adi naye gutshita ha gusuanguluisa Nzambi, amonesele luko egi tushigo naye gudia mahatshi.—Makal. 15:20, 29.
Ngatshima Biblia yana vutugila mbimbi jiko, uvi ishigo mukotelesa egi Yehowa wana tshigina egi tukhale nu khadilo dia guvutugila mbimbi jidi mu Biblia. Ha gufezegesa, Yesu wazuelele egi: “Tangua mudi mukombelela, mukhadigo muvutugila ima imoshi yene.” (Mat. 6:7) Wamonesele ndaga tudi naye guzuela tangua tudi mukombelela ha gudivua nu gutshigina gua Nzambi. (Mat. 6:9-13) Hene, ikhale tushigo muvutugila mbimbi jimoshi jiene mu isambu yetu, uvi tuajiya guvutugila ndaga jiko mbala jiavula.—Mat. 7:7-11.
Guakhalele nu ndaga jiatumile Nzambi ha guvutugila ndaga mu Biblia. Idi mukatshi dia maluholo avula anyi Mulongeshi wetu Wakoma wana gutulongesa mukunda nu gubonga guetu.—Yesh. 48:17, 18.