Wana Guyijiya Ba?

Luholo lutshi tudi mujiya egi miziki yakhalele nu ndando gudi enya Isalele?

ENYA Isalele akhalele musuanguluga nu miziki muavula diago. Mbala jiavula, Biblia yana zuelela athu akhalele mushiga ima ya miziki nu guyimba ngimbo. Mikanda iko ya Biblia yasonegewe mu ngimbo. Ha gufezegesa, mukanda wa Ngimbo, Lungimbo lua Salomo nu Isenzele ya Yelemiya yasonegewe hagula athu akhale muyimba. Mukanda umoshi wana zuelela luholo athu akhalele mujinga mu tangua dikulu, udi mumonesa egi Biblia yana zuelela haphelo egi enya Isalele akhalele mukalegela miziki mu ndaga jiavula.

Luholo enya Isalele akhalele mukalegela miziki lusugu nu lusugu. Enya Isalele akhalele mushiga miziki ha gumonesa gusuanguluga guawo. (Yesh. 30:29) Akhetu akhalele mushiga ngoma nu guyimba ngimbo jia gusuanguluga nu gukina tangua akhalele musha fumu muhe-muhe, mu mawono a gukombelela Nzambi nu tangua masuta akhalele mubinga ita. (Manz. 11:34; 1 Sam. 18:6, 7; 1 Maf. 1:39, 40) Enya Isalele akhalele nji muyimba ngimbo jia gikenene gula muthu wafua. (2 Gudi. 35:25) Idi yadiago egi enya Isalele akhalele muzumba miziki muavula.

Mafumu a gu Isalele akhalele muzumba miziki. Fumu Saula watamegele Davidi gumbodi’enji hagula egi akhale gumushigila miziki. (1 Sam. 16:18, 23) Gungima tangua Davidi muene hakhenji wabuile fumu, wasonegele ngimbo jiabonga, watombele mahunji a athu anyi akhalele muyimbila Yehowa mu tempelo gungima dia gufua guenji. (2 Gudi. 7:6; Am. 6:5) Fumu Salomo wakhalele nu mala nu akhetu akhalele muyimba ngimbo gumbodi’enji.​—Mulo. 2:8.

Enya Isalele akhalele mukalegela miziki ha gukombelela Yehowa. Mala gubalega 4 000 akhalele mushiga ima ya gushigila miziki mu tempelo gu Yelusalema. (1 Gudi. 23:5) Akhalele mushiga sembale nu ima ya gushigila miziki yana khala nu shinga, itare nu phungi. (2 Gudi. 5:12) Uvi ishigo phamba athu awa akhalele mujiya gushiga miziki muabonga akhalele mukombelela Yehowa nu miziki. Idi yadiago egi enya Isalele ako avula akhalele muyimba ngimbo tangua akhalele muya gu Yelusalema, lungimbo luene luana tamegewa egi Lungimbo lua awendji a njila. (Ngi. 120-134) Mikanda ya enya Yuda yakhalele mumonesa egi enya Isalele akhalele muyimba ngimboa tangua akhalele mukalagala Wano wa Pake.

Uu nu mangino, akombeledi a Nzambi ana zula miziki nu ndando yavula. (Yak. 5:13) Tuana yimba ngimbo ha gutumbuisa Yehowa. (Ef. 5:19) Guyimbila Yehowa hamoshi nu aphangi’etu a mala nu a akhetu guana kolesa ufuta wetu nawo. (Kol. 3:16) Ngimbo jiene jiana gutukuatesa tangua tuana tagana nu malamba. (Makal. 16:25) Miziki yana gutukuatesa ha gumonesa gutshigina nu guzumba guetu gudi Yehowa.