Ngabembelego Gulonguga nga Hazonda

Ngavualewe mu 1927 gu Illinois gadimbo gamoshi gazonda ga gu Chicago gu États-unis. Tuavualewe ana 5, Jetha, Don, ame, Karl nu Joy. Tuazudile desizio dia gukalegela Yehowa mu monyo wetu. Phangi wami wa mukhetu Jetha wanginyile khalasa dia mbadi dia Gileade mu 1943. Mu 1944 Don wayile gu Betele ya Brooklyn gu New York, mu 1947 Karl wayile gu Betele, mu 1951 Joy nji waalanduile gu Betele. Gifezegeselo giawo nu gia mvuaji jiami gianguhanele gikhesa ha gukalagala ndaga jiavula mu mudimo wa Yehowa.

LUHOLO FAMI YETU YAJIYILE GIAMATSHIDIA

Tata nu mama akhalele mu tanga Biblia, akhalele muzumba Nzambi, atulongesele nji ha gumuzumba. Athu akhalelego luko munemesa tata gu église handaga wakhalele suta gu Europe mu tangua dia Ita ya thomo ya ha Mavu Agasue. Mama wahanele Nzambi mersi avula luholo tata wavutugile nu monyo gungima dia ita, wawambelele phangi’ami Karl egi: “Tuye gu église gifua luholo tuakhalele guyitshita thomo.” Uvi tata wazuelele egi: “Ndenu uvi ame ngushigo muza ndo.” Mama wamuhudile egi: “Mukunda natshi ushigo muya?” Tata wazuelele egi: “Tangua tuakhalele mulua ita, mafumu a gikombelelo akhalele mukombelela mukunda nu masuta awo hagula abinge masuta ako anyi akhalele enya gikombelelo giawo! Na Nzambi wakhalele gu khanda ya akhuatshi?”

Gungima, tangua mama wayile gu église Matemue a Yehowa mbadi ajile gu inzo yetu. Ahanele Tata mikanda mbadi yana tamegewa egi Lumière, mikanda yene yakhalele muzuelela ndaga jidi mu mukanda wa Gumonesa. Tata wasuangulugile nu mikanda yene. Tangua mama wamonele mikanda yene, wasendesele nji guyitanga. Lusugu lumoshi, watangele journal imoshi yakhalele mumonesa egi athu atshigina gulonguga Biblia, ajiya guza guyilonguga mu njila ya mukanda Lumière. Mama wazudile desizio dia guya guene. Tangua mama wahetele guene, mukhetu mumoshi wa gukola wakangudile mufulo, wakhalele nu mikanda yene ha mago, hene mama wamuhudile egi: “Fundo muana longuga diene edi ba?” Mukhetu muene wamuwambelele egi: “Ayi, wajiya guza.” Mu phoso yalanduile, mama watuzudile tuayile n’enji, gungima tuasendesele guya phoso nu phoso.

Lusugu lumoshi mu gudibungisa gua mu hungu, phangi wakhalele mutuameza wanguwambelele ha gutanga mukanda wa Ngimbo 144:15, wana monesa egi athu adi mukombelela Yehowa ana khala nu gusuanguluga. Ngasuangulugile diago nu verse yene, ngasuangulugile nji nu verse jiko mbadi gifua 1 Timote 1:11 yana zuela egi Nzambi udi “Nzambi wa gusuanguluga” nu Efeso 5:1 yana zuela egi: “Landulenu gifezegeselo gia Nzambi.” Ngakotelesele egi ngudi naye gukhala nu gusuanguluga ha gukombelela Mufugi wami nu gumuhana mersi mukunda nu luendu luanguhanele muene ha gujiya giamatshidia mu monyo wami.

Hungu dia hehi tuakhalele muya diakhalele mu ulehelo wa ba kilometre 32 mu dimbo dia Chicago. Ikhale ngenyi, tualanduile guya mu gudibungisa, hene ngajiyile ndaga jiavula. Ngudi muwunguluga luko, mu okazio umoshi phangi wakhalele mutuameza watombele Jetha ha guhana komantere. Tangua ngamutegelele, ngazuelele egi: ‘Ngajiya nji guyitshita, ngajiya nji guthuphula koko ha guhana komantere.’ Ngasendesele gulondega komantere jiami hakhami. Ndaga ya ndando idi egi ngakudile mu nyuma hamoshi nu aphangi ami. Ngabatijiwe mu 1941.

NGALONGUGILE NDAGA JIA YEHOWA GU BA ASAMBLE

Ngana wunguluga asamble tuakalegele mu 1942 gu dimbo dia Cleveland gu Ohio. Enya fami yetu akhalele musala mu jinzo jia tenta nu enya fami jiko ako avula hehi nu fundo akhalele mukalagala asamble. Uvi Aphangi ako akhalele mulandula asamble ene gu telefone mu mafundo gubalega 50 gu États-Unis. Mu sungi ya Ita ya mbadi ya ha Mavu Agasue, Matemue a Yehowa ataganele nu usageshi wakola diago. Mu ngueze ngamonele aphangi avula a mala mumagenesa tumiyo tuawo nu minda hehi nu camp. Muthu wagasue mukatshi diawo wakhalele nu muthu mu gamiyo genji wakhalele mumagana ha gubamba gamiyo mu phipha. Gula ndaga imoshi ishigo muyila muabonga, aphangi ene akhalele mutalesa minda nu gushiga phungi ya tumiyo gukhanda ya athu akhalele muza ha guatshita gubola, ngenyi yakhalele guabuitshisa gu meso. Aphangi ako akhalele muza ha guakuatesa. Ngamonele diago egi akombeledi a Yehowa ana khala ya gudilondega muabonga mukunda nu ndaga jiagasue!’ Gushigo nga ndaga imoshi yabola yatubuidile, luholo tuakhalele mu ubambi, ngakhalele mubanda muabonga.

Gungima dia ivo, tangua ngatangijile ndaga jiabalegele mu asamble ene, ngamonele egi mama gakhalelego muvua gikenene nga woma. Wakhalele mushila Yehowa nu ulondegi wenji mutshima. Mbangujimbilago gifezegeselo gienji giabonga nga hazonda.

Masugu azonda gutuama egi asambele akalegewe, mama wabuile muvundji wa njila wa tangua diagasue. Wakhalele mutegelela muabonga nu gusonega ndaga jiatadila mudimo wa tangua diagasue akhalele mulongesa mu ba diskur. Tangua tuakhalele muvutuga guembo, mama wakhalele muzuela egi: “Ngana khala nu funu ya gulandula gutshita mudimo wa muvundji wa njila, uvi ngudi nu ndaga jiavula jia gutshita gu inzo.” Watutogele gula tuajiya gumukuatesa. Tuatshiginyile, gungima wahanele muthu wagasue ginemo gia guwevua sugu imoshi nga mbadi gutuama egi tudie mu gimenegena. Gula tuakatuga gu khalasa, wakhalele mutala gula ima idi ya gulondega muabonga gu inzo, gungima wakhalele muya mu mudimo wa gulongesa. Ngatshima mama wakhalele nu ndaga jiavula jia gutshita, uvi wakhalele mutshita yagasue hagula tukhale muabonga. Tangua tuakhalele muvutuga gu inzo ha gudia nga gungima gia guzoga gu khalasa, wakhalele guene ha gutukuatesa. Masugu ako gula tuazoga gu khalasa, tuakhalele muya n’enji mu mudimo wa gulongesa, ngenyi yakhalele gutukuatesa ha gujiya muabonga mudimo wa avundji a njila.

MUDIMO WA TANGUA DIAGASUE

Tangua ngataganesele ivo 16 ngabuile muvundji wa njila. Ikhale Tata wetu gakhalelego Temue wa Yehowa mu tangua diene, uvi wakhalele musuanguluga luholo ngakhalele mukalagala mudimo wa gulongesa. Lusugu lumoshi ngamuwambelele egi, ngatshita yagasue ha gukamba muthu ngajiya gulongesa Biblia uvi ngahetelego nga muthu mumoshi. Ngahenele, gungima ngamuhudile egi: “Tata, ngajiya gusendesa gugulongesa Biblia ba?” Gungima dia gutangiza, watshiginyile gulonguga. Muthu wa thomo ngasendesele gulonguga n’enji Biblia yakhalele tata. Yakhalele diago luendu luakoma!

Tualongugile n’enji mukanda « La vérité vous affranchira. » Luholo tuakhalele mulandula gulonguga nu tata, ngakotelesele egi ngakhalele naye gulonguga Biblia muabonga nu guyilongesa athu ako. Ha gufezegesa, lusugu lumoshi mu ngueze tangua tuakhalele mulonguga, gungima dia gutanga paragrafe wazuelele egi: “Ngakotelesa ndaga jidi muzuela mukanda owu. Uvi ndaga jiene jidi diago jia giamatshidia ba?” Ngakhalelego ya gudilondega ha gumuhana mvutu gu muhu wene, ngamuwambelele egi: “Ngushigo guguhana mvutu mangino, uvi mbanguguhana mvutu tangua mbatulonguga luko.” Yene ndaga ngakalegele. Ngahetele verse jiakhalele muzuelela ndaga tuazuelele. Gungima, ngakalegele ba recherche ha gudilondega muabonga. Gutshita ngenyi guatukuatesele nu tata ha gukula mu nyuma. Wakhalele mukalegela ndaga jiakhalele mulonguga muene, hene wabatijiwe mu 1952.

NGALONGUGILE NDAGA JIAVULA GU BETELE

Ngakatugile gumbo dietu tangua ngakhalele nu ivo 17. Jethaa wabuile misionere, uvi Don wayile gu Betele. Mukut’awo agasue akhalele muzumba mudimo wawo muavula, ndaga yene yanguhanele diago gikhesa. Ngakhalele musuanguluga gukalagala mudimo gu Betele nu guya gu khalasa dia Gileade, hene ngabembele ndaga yene ha mago a Yehowa. Ngahetele gubonga guavula. Mu 1946 angutamegele gu Betele.

Mu ivo yagasue ngatshitshile guene, ngakalegele midimo ya gudisha, hene ngalongugile ndaga jiavula jihe-jihe. Mu ivo 75 ngakalagala gale gu Betele, ngalongugile ndaga jiatadila gulondega mikanda nu ndaga jia comptabilité. Ngalongugile nji luholo lua gusumba ima tuakhalele mukalegela gu Betele nu gutuma ima iko ya ndando mu mafundo ako. Ndaga jiana gungusuanguluisa muavula jidi malongo tuana heta mu gukombelela gua mu gimenegena nu ba diskur.

Ngalongugile nji ndaga jiavula gudi phangi’ami Karl munu wayile gu Betele mu 1947. Wakhalele mulonguga Biblia nu guyilongesa muabonga. Tangua ngahetele diskur, ngamutogele ukuateshi ha gudikalagala muabonga. Ngamuwambelele egi, ngudi nu ikadigilo yavula uvi ngushigo mujiya luholo lua guyikalegela. Ha gungukuatesa wanguhudile egi: “Muto wa lumene wa diskur diaye udi egi itshi?” Ngakotelesele ndaga yakhalele mutshigina guzuela muene. Ngakhalele naye gukalegela phamba ndaga jiakhalele naye gungukuatesa ha gukotelesa muabonga muto wa lumene wa diskur diami, uvi ngakhalelego naye guzuelela ndaga jinyi jiakhalelego gudivua nu diskur. Ngana jimbilago longo diene nga hazonda.

Ha gukhala nu gusuanguluga gu Betele, tudi naye gutshita yagasue ha gulongesa lukuma luabonga. Gula tudi mutshita ngenyi mbatuhana athu ako gikhesa. Ngudi muwunguluga luko ndaga imoshi yakalegewe mu ngueze imoshi mu dimbo dia Bronx gu New York. Tuayile nu phangi muko wa yala ha guvutugila mukhetu mumoshi tuahanele Inzo Yaleha ya Mutaledi nu Réveillez-vous ! Tuawambelele mukhetu muene egi: “Mu ngueze ya mangino, tudi mukuatesa athu ha gulonguga ndaga jiavula jidi mu Biblia.” Wazuelele egi: “Gula mudi mutshigina guzuelela ndaga jiatadila Biblia, muajiya guzuela.” Tuatangele verse jiavula jiana zuelela Ufumu wa Nzambi nu mavu ahe-ahe. Wadihudile muavula mukunda nu maga tuatele n’enji, hene mu phoso yalanduile watamegele nji mafuta enji avula ha guza mutegelela ndaga tuakhalele gumulongesa. Gungima, muene nu mulumi’enji abuile akombeledi a Yehowa.

NDAGA NGALONGUGILE GUDI MUKAJI’AMI

Ngazudile desizio dia guzula mukhetu mu ulo, uvi ngabalegesele luko ivo 10 gutuama egi nguhete mukhetu wabonga ha gudizula n’enji mu ulo. Itshi yangukuatesele ha guheta mukhetu wabonga? Ngakombelele Yehowa muavula mukunda nu ndaga yene, ngatangijile ndaga tudi naye gutshita gungima dia gudizula n’enji mu ulo.

Mu 1953 tuakalegele asamble a masugu thathu mu stade ya Yankee, guene tuadimonele nu phangi wa mukhetu Mary Aniol. Muene nu Jetha anginyile khalasa dia mbadi dia Gileade, mukut’awo agasue akhalele ba misionere. Mary wanguwambelele nu gusuanguluga guagasue luholo luana tshita muene mudimo wa gimisionere gu Caraïbes nu athu avula gana longuga nawo Biblia. Tangua tuadijiyile muabonga, tuakotelesele egi mukut’etu agasue tuakhalele nu mafelela a mu nyuma a luholo lumoshi. Tuadizumbile muavula, hene tuadizudile mu ulo mu Avril 1955. Mary wamonesele mu maluholo avula egi wakhalele khapho dianguhanele Yehowa, wakhalele diago gifezegeselo giabonga. Wakhalele musuanguluga nu mudimo wagasue akhalele gumuhana. Wakhalele mutshita mudimo wakola, wakhalele gudisagesa muavula mukunda nu athu ako nu wakhalele musha ndaga jia Ufumu wa Nzambi ha fundo dia thomo mu monyo wenji. (Mat. 6:33) Tuakalegele n’enji mudimo wa mutadi muwendji ivo thathu, gungima atutamegele gu Betele mu 1958.

Ngalongugile ndaga jiavula gudi Mary. Ha gufezegesa, masugu azonda gungima dia gudizula mu ulo, tuakhalele mutanga Biblia hamoshi, tuakhalele mutanga verse jia Biblia 15 lusugu nu lusugu. Gungima dia gutanga verse imoshi, tuakhalele guyizuelela nu gukamba luholo tuajiya giyikalegela mu monyo wetu. Mary wakhalele gunguwambela ndaga jialongugile muene gu khalasa dia Gileade nu mu mudimo wa gimisionere. Ndaga tuakhalele muzuelela n’enji jiangukuatesele ha gutshita muabonga ba diskur nu ha gujiya luholo lua guhana aphangi a akhetu gikhesa.​—Ish. 25:11.

Mukaji’ami Mary ngakhalele muzumba muavula wafile mu 2013. Ngudi munengena nu gusuanguluga guagasue ha gumumona luko mu mavu ahe-ahe! Uvi henyaha, ngana landula gulonguga ndaga jiatadila Yehowa nu ngana sha mutshima wami wagasue gudi muene. (Ish. 3:5, 6) Ngana heta gikhesa nu gusuanguluga luholo ngana tangiza ndaga mbajikalagala akombeledi a Yehowa mu mavu ahe-ahe. Mukatshi dia ndaga jiene, mbangulonguga ndaga jihe-jihe jiatadila Mulongeshi Wakoma! Ngudi diago muhana Yehowa mersi mukunda nu ndaga jiagasue jiangulongesele muene nu luholo luana gungumonesela muene gisemo.