Mihu Yana Guhula Athu ana Gutanga Mikanda Yetu
“Anjelo atombewe” adi muzuelewa mu 1 Timote 5:21 adi akhuatshi?
Mupostolo Phaula wasonegele mukulu Timote egi: “Ngudi guguwambela gutuama dia Nzambi nu gutuama dia Klisto Yesu nu gutuama dia anjelo atombewe egi tumagela malongo awa, ukhadigo nu khadilo dia gutangijila athu ako ndaga jiabola, nga lutondo.”—1 Tim. 5:21.
Thomo, tutadilenu gula akhuatshi mbaahinyina gifua anjelo. Anjelo ene ashigo mukatshi dia athu 144 000. Tangua Phaula wasonegele Timote mukanda, Aklisto ambiwe maji mu nyuma akhalele khenji asendesa ndo gufuzumuga ha guya mu dilu. Apostolo nu Aklisto ako ambiwe maji mu nyuma akhalele khenji abua gale ndo athu a mu nyuma, hene tuajiya guzuela egi “anjelo atombewe” ishigo ene.—1 Kol. 15:50-54; 1 Tes. 4:13-17; 1 Yone 3:2.
Luko, “anjelo atombewe” ashigo anjelo anyi alumbugile Nzambi mu tangua dia Mvula ya Kola ya mu tangua dia Nowa. Anjelo ene alanduile Satana hene abuile bademo, abuile nji mbalagaji jia Yesu. (Gis. 6:2; Luka 8:30, 31; 2 Phet. 2:4) Mu masugu adi muza, mbaambiwa mu wina dimoshi dialeha mbaatshita muene ivo 1 000. Gungima mbaashiyiwa hamoshi nu Satana.—Yuda 6; Gumo. 20:1-3, 10.
Mu verse eyi, “anjelo atombewe” anyi Phaula wakhalele muzuelela adi naye gukhala anjelo anyi adi mu dilu ana tshita mudimo hamoshi nu ‘Nzambi nu Yesu.’
Anjelo ana zumba Nzambi adi diago avula. (Heb. 12:22, 23) Tushigo naye gutangiza egi mukut’awo agasue Yehowa wana guahana mudimo umoshi. (Gumo. 14:17, 18) Ha gufezegesa, Yehowa watumine muanjelo mumoshi ha gushiya masuta a enya Asiliya 185 000. (2 Maf. 19:35) Anjelo avula ajiya guhanewa ginemo gia ‘gukatula mu Ufumu wa Yesu ima yagasue idi mubuisa mu gubola nu athu agasue adi mushiya mikhuala.’ (Mat. 13:39-41) Anjelo ako ajiya guhanewa ginemo gia gubungisa Aklisto ambiwe maji mu nyuma ha guya mu dilu. (Mat. 24:31) Ako nji ajiya guhanewa ginemo gia ‘gutubamba.’—Ngi. 91:11; Mat. 18:10; tala nji Matayo 4:11; Luka 22:43.
“Anjelo atombewe” adi muzuelewa mu 1 Timote 5:21 ajiya gukhala ene ahanewe ginemo gia gubamba mahungu. Gula tuatadila ndaga jidi gu thunda nu gu mbongo ya verse eyi, mbatumona egi Phaula wakhalele muhana malongo adi mutadila luholo akulu adi naye gutagenesa inemo yawo nu luholo aphangi mu hungu adi naye guanemesa. Phaula wazuelele egi akulu ashigo naye gukhala nu “khadilo dia gutangijila athu ako ndaga jiabola, nga lutondo,” uvi adi naye gutangiza muabonga gutuama dia guzula badesizio. Phaula waahanele malongo a ndando ha zuelele muene egi akulu ana kalegela aphangi’awo mudimo “gutuama dia Nzambi nu gutuama dia Klisto Yesu nu gutuama dia anjelo atombewe.” Idi yadiago egi anjelo ako ana khala nu inemo ya gukuatesa hungu gifua, gubamba akombeledi a Nzambi, gutuameza mudimo wa gulongesa nu guhana rapore gudi Yehowa mu ndaga amonyi.—Mat. 18:10; Gumo. 14:6.