UDI MUJIYA LUKO BA?

Watangele muabonga Inzo Yaleha ya Mutaledi ya 2024 Ba? Gula idi ngenyi, wajiya guhana mvutu gu mihu eyi yalandula:

Gifezegeselo gitshi Yehowa watuhanele giatadila luholo lua gukalegela akhetu ndaga?

Mukut’awo agasue wana guazula luholo lumoshi. Nzambi wana tegelela isambu ya akhetu, wana kotelesa luholo ana gudivua nu wana guahana ima adi nayo funu. Wana guashila mutshima egi mbaatshita mudimo wenji muabonga.​—w24.01 diyiji 15-16.

Luholo lutshi tuajiya gukalegela ndaga jidi mu Efeso 5:7 jidi muzuela egi: “Mudibungisago” nu athu ana kalagala ndaga jiabola?

Mupostolo Phaula watutemesele ha gutuna gudibungisa nu athu anyi ashigo gutukuatesa ha gunemesa mikhuala ya Nzambi. Athu ene tudi muzuelela adi athu tuajiya gubalegesa nawo tangua hamoshi nga anyi tuajiya gubalegesa nawo tangua mu njila ya Internet.​—w24.03 diyiji. 22-23.

Itshi tuajiya gutshita gula tuavua mene jia mambo?

Tudi naye gumonesa gutema gula mafuta etu atuwambela ndaga jinyi ene hakhawo ashigo mujiya muabonga. Tudi naye nji gumonesa gutema gula athu tushigo mujiya atutumina mesaje mu Internet, athu ene ajiya gumonesa gifua adi musuanguluga nu giamatshidia uvi adi baaposta.​—w24.04, diyiji 12.

Ndaga jitshi tuana jiya nu ndaga jitshi tuanago gujiya mu luholo Yehowa mbawusophesa Fumu Salomo nu athu anyi afile mu dimbo dia Sodoma nu Gomola nu anyi afile gu Mvula Yakola ya mu tangua dia Nowa?

Tuanago gujiya gula Yehowa waashiyile mayilago, uvi tuana jiya egi muene wana jiya ndaga jiagasue nu wana khala nu khenda jiavula.​—w24.05, diyiji 3-4.

Itshi tudi naye gutshita luholo tudi mujiya egi Nzambi udi gifua “Seso” dietu? (Mikh. 32:4)

Tuajiya gulengela gudi Yehowa handaga udi watagana ha gushila mutshima, wana tagenesa nji ndaga jiana laya muene. Yehowa ganago gusombegesa, wana zuela giamatshidia nu wana tagenesa ndaga jiana laya muene.​—w24.06, diyiji 26-28.

Itshi yajiya gugukuatesa ha gujidila mu hungu dihe-dihe?

Shila Yehowa mutshima, muene mbawugukuatesa gifua luholo luakuatesele muene akombeledi enji a mu tangua dikulu. Ukhadigo mufuanesa hungu dihe-dihe nu hungu dikulu. Khala gudihana muavula mu midimo ya mu hungu dihe-dihe nu khala mukuata mafuta ahe-ahe.​—w24.07 diyiji 26-28.

Malongo atshi tuajiya guzula mu ifezegeselo thathu idi mu Matayo mukhapho 25?

Gifezegeselo gia imeme nu khombo gidi mumonesa egi idi nu ndando ha gusala yagujinginyina gudi Yehowa. Gifezegeselo gia tundongo tuatema nu tuaheya gidi mumonesa egi tudi naye gukhala yagudilondega nu gumonesa gutema. Gifezegeselo gia talanta gidi mumonesa egi idi nu ndando ha gukhala ya gudilondega nu gumonesa gutema.​—w24.09 diyiji 20-24.

Fundo dia gunginyina dia tempelo ya Salomo diakhalele nu bametre guvula gutshi?

Mukanda wa 2 Gudilanduluila 3:4 nu ba manuscrits ako a mu tangua dikulu akhalele mumonesa egi fundo dia gunginyila mu tempelo diakhalele nu ulehelo wa ‘bakude 120’ nga bametre 53. Uvi mikanda iko nji yatagana ha gushila mutshima yakhalele mumonesa egi fundo dia gunginyila mu tempelo diakhalele nu ulehelo wa ‘bakude 20’ nga ndo bametre 9. Idi mumonega egi mikanda idi muzuelela bakude 20 yene idi muzuela giamatshidia giatadila ulehelo wa ibayi ya tempelo yene.​—w24.10 diyiji 31.

Mbimbi mukuateshi wa mudimo udi naye gukhala nu “mukhetu phamba mumoshi” jidi mukotelesa itshi? (1 Tim. 3:12)

Idi mukotelesa egi udi naye gukhala phamba nu mukhetu mumoshi nu gashigo naye gutshita uthambi. Gashigo naye gukalegela akhetu ako ndaga jidi mumonesa gifua udi guazumba.​—w24.11 diyiji 19.

Mukunda natshi tudi muzuela egi mukanda wa Yone 6:53 wakhalelego muzuelela Gudia gua Fumu gua mu Ngueze?

Mukanda wa Yone 6:53 udi muzuelela gudia muila wa Yesu nu gunua mahatshi enji. Yesu wazuelele ndaga eji mu givo 32 G.Y gu Galilea gudi enya Yuda anyi akhalele naye gusha gutshigina gudi muene. Uvi Gudia gua Fumu gua mu Ngueze guakalegewe gungima dia givo gimoshi gu Yelusalema. Mu tangua diene Yesu wakhalele muzuelela athu anyi mbaahinyina n’enji mu dilu.​—w24.12 diyiji 10-11.