Longi dia 2

Nzambi Udi Futa Dingoshi Diabalega Gubonga Wajiya Guzula

Gubwa futa dia Nzambi gudi gima giabalega gubonga gi wajiya guheta. Nzambi mbawugulonga luholo lwa gukhala nu kiese nu mu lubambu; mbawugukatula mu malongi avula abola nu mu makhalegelo abola. Mbomuvwa isambu yaye. Mbomokwatesa hagukhala nu guhuima nunji nu guhaga mutshima. (Ngimbo 71:5; 73:28) Nzambi mbomokwatesa mu matangua a malamba. (Ngimbo 18:18) Nunji Nzambi udi muguhwa gabalu genji ga khenda ga monyo wa ivo nu ivo.​—Lomo 6:23.

Gula waswena hehi nu Nzambi, mbawumuswena nji hehi nu mafuta a Nzambi. Mbaamubwa nji mafuta aye. Nunji, mbaakhala gifua aphangiaye amala nu aphangiaye a akhetu. Mbaamukhala nu kiese ha gugulonga ndaga jidi mutalela Nzambi nunji mba adigugukwatesa nunji mbaadi guguhua ngolo.

Tushigo giteso gingoshi nu Nzambi. Gula udi mukamba ufuta nu Nzambi, udi naye gujiya ndaga ingoshi ya funu. Ufuta nu Nzambi ushigo gifwa ufuta utanuta nu athu tudi nayo luholo lumoshi. Mwene watubalega gualeha sha gu mvula, gu gutema, nu gu ngolo. Mwene udi nu njila ya gukhala Fumi’etu. Ngenyi, gula tuatshigina gukhala mafuta enji, tudi naye gumuvila nu gukita ndaga jiadi mutuleza egi tukite. Ngenyi, tangua diagasue ndaga jetu mbajikhala mukunda nu gubonga guetu.​—Yeshaya 48:18.