Gusuanguluga Guakhala Guavula Gula Muenya Gubola Wabalumuna Mutshima

Tangua Yesu wakhalele mulongesa lukuma luabonga, wakhalele muzuelela muavula funu ya gukhala nu khadilo dia gudibulumuisa. (Luka 14:8-11) Wakhalele nu funu ya mala nu akhetu adi mutshigina gukombelela Nzambi nu gudibulumuisa guagasue. Uvi, mu tangua dinyi, yajiya gukhala egi ako mukatshi diawo akhalele mujiyiwa gifua enya gubola.

Afalese nu alongeshi a mikhuala amonele athu akhalele ene mumona egi ashigo atagana, adi mulandula Yesu nu gutegelela mbimbi yenji. Azuelele egi: “Muthu owu udi mutshigina enya gubola, udi mudia nawo nji.” (Luka 15:2) Afalese nu alongeshi a mikhuala akhalele gudimona gifua adi athu abonga gubalega athu ako, akhalele nji mumona athu ako gifua fuphi gu ikanzo yawo. Ha gumonesa egi akhalele musegulula athu a luholo elu, akhalele guatamega mu mbimbi jia zuelelo dia hebelu egi ‛am ha·’aʹrets , yakotelesa egi “athu a guembo [a mu mavu].”

Uvi Yesu wakhalele munemesa athu agasue, nu guaamonesela gisemo nu guaavila jikhenda. Hene, avula mukatshi dia athu awa a akhalele mumonewa gifua athu a githuhu, ikhale anyi akhalele mujiyiwa gifua enya gubola, akhalele musuanguluga gutegelela Yesu. Uvi, luholo lutshi Yesu wadivuile mu ndaga jiabola jiakhalele muzuelewa mukunda nu muene, luholo akhalele mukuatesa athu akhalele mumonewa gifua athu a githuhu? Mvutu itshi gahanele?

Mvutu yenji yamonegele haphelo tangua gahanele gifezegeselo giabonga, gidi gudifuana nu gifezegeselo gahanele gu Kaphelenauma ivo mbadi yabalega. (Matayo 18:12-14) Wazuelele ndaga mu luholo ludi mumonesa egi Afalese adi athu atagana, nu adi mu ubambi mukatshi dia imeme ya Nzambi. Uvi athu awa akhalele mumonewa gifua athu a githuhu adi gifua imeme yabemba dinda diayo nu yatungagana. Yesu wazuelele egi:

“Muthu mutshi mukatshi dienu udi nu imeme 100, gula gimeme gienji gimoshi giatota, muene gatunyi gubemba imeme 99 mu temu ha guwenda nu gukamba gingoshi giatotshi uu nu ha gimona muene? Gungima gula muene wagimona, mbawugihaga ha phanga jienji, nu mbawusuanguluga diago. Havutuga muene gumbo dienji, mbawutamega mafuta enji nu athu ana gujinga nawo hehi, mbawawambela egi, ‘Suanguluge nu ame handaga ngamonyi gimeme giami giatotshi.’”—Luka 15:4-6, NW.

Longo ditshi diazolele Yesu mu gifezegeselo egi? Wazuelele egi: ‘Ngudi gumiwambela egi luholo lumoshi nji, gusuanguluga mbagukhala guavula mu dilu mukunda nu muenya gubola mumoshi wabalumuna mutshima, gubalega mukunda nu athu 99 atagana anyi abalumuinego mitshima.’—Luka 15:7.

Afalese avuile khabu luholo Yesu wazuelele ndaga yatadila gubalumuna mutshima. Akhalele gudimona ene hakhawo gifua athu atagana, akhalele nji gudimona egi ashigo nu funu ya gubalumuna mitshima yawo. Tangua Afalese ako azuelele ndaga jiabola mukunda nu Yesu ivo mbadi yabalega gale handaga wakhalele mudia fundo dimoshi nu afutshishi a gitadi nu enya gubola, Yesu wawambelele egi: ‘Ame ngajilego ha gutamega athu atagana, uvi ngajile ha gutamega enya gubola.’ (Mako 2:15-17) Afelese awa akhalele gudimona ene hakhawo egi adi athu atagana, amonelego funu ya gubalumuna mitshima, hene gusuanguluga guakhalele ndo mu dilu mukunda nu ene. Uvi gusuanguluga guakhala guavula mu dilu gula enya gubola abalumuna diago mitshima.

Ha gumonesa diago egi tangua enya gubola ana gubalumuna mitshima yana gubata gusuanguluga guavula mu dilu, Yesu wahanele gifezegeselo giko. Wazuelele egi: “Mukhetu mutshi udi nu mbongo jia utadi badrakime kumi, gula watotesa drakime imoshi, gashigo muhaga muenda tshiuya ha gukomba inzo nu gukamba muabonga uu nu ha imona muene? Gula wayimona, mbawutamega mafuta enji nu athu ana gujinga nawo hehi, mbawawambela egi: ‘Suangulugenu nu ame handaga ngamonyi drakime yami yatotshi.’”—Luka 15:8, 9, NW.

Longo diazolele Yesu mu gifezegeselo egi didi luholo lumoshi nu longo gazolele muene tangua wahanele gifezegeselo gia gimeme giatotele. Gungima, wazuelele egi: ‘Luholo lumoshi nji, ngudi gumiwambela egi anjelo a Nzambi akhala nu gusuanguluga mukunda nu muenya gubola mumoshi wabalumuna mutshima.’—Luka 15:10.

Tangiza gale, anjelo a Nzambi ana gusuanguluga muavula gula enya gubola abalumuna mitshima! Idi diago nu funu handaga enya gubola anyi ana gubalumuna mitshima nu ana guheta fundo mu Ufumu wa Nzambi wa mu dilu, mbaakhala nu ufumu wakoma gubalega anjelo. (1 Kolinto 6:2, 3) Yadiago, anjelo anago guvua giphi nga hazonda. Luholo lutshi esue nji tudi naye gudivua gula muenya gubola wa balumuna mutshima nu wavutuga gudi Nzambi?