Yehowa udi Mutshigina egi Athu Agasue Abalumune Mutshima

1.Gubalumuna mutshima guakotelesa itshi?

GULA tuakalagala ndaga imoshi yabola, tudi naye gubalumuna mutshima. Biblia yana zuela egi gula muthu wabalumuna mutshima udi naye gudisagesa mukunda nu ndaga yabola yakalagala muene, udi naye gubemba gukalagala ndaga yene, nu gutuna guyivutugila luko.​—Mat. 3:8; Makal. 3:19; 2 Phet. 3:9.

2.Mukunda natshi mukut’etu agasue tudi naye gulonguga ndaga yatadila gubalumuna mutshima? (Nehemiya 8:9-11)

² Muthu wagasue udi naye gulonguga ndaga jiatadila gubalumuna mutshima. Mukunda natshi? Handaga mukut’etu agasue tuana tshita gubola lusugu nu lusugu. Luholo tudi ajigulu a Adama nu Eva, mukut’etu agasue tuana vualewa nu gubola guana gutubatela gufua. (Roma 3:23; 5:12) Ndaga yene idi mutadila muthu wagasue mukatshi dietu. Nu ene enya gutshigina guakola gifua Phaula, akhalele nji mulua nu matangi a gutshita ndaga jiabola. (Roma 7:21-24) Yakotelesa egi tudi naye gudisagesa masugu agasue a monyo wetu mukunda nu gubola guene ba? Ndo, Yehowa udi Nzambi wa khenda, wana tshigina egi tukhale nu gusuanguluga. Tutadilenu gifezegeselo gia enya Yuda a mu tangua dia Nehemiya. (Tanga Nehemiya 8:9-11.) Yehowa gatshiginyilego egi alandule gudisagesa muavula gubalega mukunda nu gubola akalegele, uvi wakhalele mutshigina egi amukombelele nu gusuanguluga guagasue. Yehowa udi gutulongesa ndaga jiatadila gubalumuna mutshima handaga udi mujiya egi muthu wana heta gusuanguluga gula wabalumuna mutshima. Gula tuabalumuna mutshima, tuajiya diago gudifelela egi Tata wetu wa khenda mbawututotesela.

3. Itshi tuza mumona mu longo edi?

³ Mu longo edi tuza muzuelela muavula ndaga jiatadila gubalumuna mutshima. Tuza mumona ndaga thathu: 1) Ndaga Yehowa walongesele enya Isalele mukunda nu gubalumuna mutshima. 2) Luholo Yehowa wana kuatesa athu ana tshita gubola ha gubalumuna mutshima. 3) Ndaga Yesu Klisto walongesele alandudi enji mukunda nu gubalumuna mutshima.

NDAGA YEHOWA WALONGESELE ENYA ISALELE MUKUNDA NU GUBALUMUNA MUTSHIMA

4. Itshi Yehowa walongesele enya Isalele mu ndaga yatadila gubalumuna mutshima?

⁴ Tangua Yehowa wabuishile enya Isalele gifutshi, wakotele nawo gikotelo, adivile egi gula atumagela mikhuala yenji, mbawabamba nu mbawashimbiga. Waawambelele mukunda nu mikhuala yene egi: “Mukhuala ngudi gumihana mangino ushigo diago wakola mukunda nu enue, ushigo nji gualeha nu enue.” (Mikh. 30:11, 16) Adivile nji egi gila amulumbugila nu akombelela nzambi jiko, Yehowa mbagashigo guashimbiga nu mbaamona malamba. Uvi yakhalelego mukotelesa egi gula atshita gubola Nzambi mbawatuna mayilago. Guakhalele nu luholo egi ‘avutugile Yehowa Nzambi wawo nu ategelele luko Mbimbi yenji.’ (Mikh. 30:1-3, 17-20) Mu guzuela guko, guakhalele nu luholo egi abalumune mutshima. Yakotelesa egi, gula abalumuna mutshima Yehowa wajiya gudivua luko nawo nu guashimbiga luko muavula.

5. Mu luholo Yehowa wamonesele egi gabembelego akombeledi enji? (2 Mafumu 17:13, 14)

⁵ Enya Isalele alumbugile Yehowa mbala jiavula. Akombelele nzambi jia isongo, akalegele nji ndaga jiavula jia musonyi. Khadilo diawo diaabatele malamba. Uvi Yehowa walanduile guakuatesa hagula amukombelele luko. Wakhalele guatumila baprofete ha guakuatesa ha gubalumuna mutshima nu ha guvutuga luko gudi muene.​—Tanga 2 Mafumu 17:13, 14.

6. Luholo lutshi Yehowa wamonesele akombeledi enji mu njila ya baprofete egi gubalumuna mutshima gudi nu ndando? (Tala nji gifuanesa.)

⁶ Tangua enya Isalele akhalele mukalagala ndaga jiabola, Yehowa wakhalele mutuma baprofete enji ha guahana lubelo nu guawambela malamba ajiya guabuila gula atuna gubalumuna mutshima. Ha gufezegesa, Nzambi watumine Yelemiya ha guwambela enya Isalele egi: ‘Vutuga, O Isalele mulumbugi. . . mbangushigo gugutala nu diso dia khabu, handaga ngudi muenya khenda . . . nganago gubamba khabu jiami masugu agasue. Tshigina egi watshitshi gubola, handaga walumbugila Yehowa.’ (Yel. 3:12, 13) Yehowa watumine nji Yowele ha guzuela egi: ‘Vutugenu gudi ame nu mitshima yenu yagasue.’ (Yow. 2:12, 13) Watumine Yeshaya ha guzuela egi: ‘Diphelegetesenu; katulenu midimo yenu yabola mudi mutshita gu meso ami; bembenu gutshita gubola.’ (Yesh. 1:16-19) Yehowa wahudile mu njila ya Ezekiele egi: ‘Ngana suanguluga ha gumona muthu wabola mufua ba? . . . ndo, ngana tshigina egi abembe njila jienji jiabola ha gula asale nu monyo. Ngana suanguluga ndo nu gufua gua muthu nga mumoshi, . . . na vutugenu gudi ame hagula mukhale nu monyo.’ (Ezek. 18:23, 32) Yehowa wana suanguluga gula athu abalumuna mutshima, handaga wana tshigina egi asale nu monyo mayilago! Yehowa ganago gunengenena egi muthu abalumune thomo mutshima gutuama dia gumukuatesa. Tutadilenu ifezegeselo iko idi mumonesa ndaga yene.

7. Longo ditshi Yehowa wahanele akombeledi enji mu lumene lua profete Hoshea?

⁷ Tutadilenu longo Yehowa wahanele akombeledi enji mu gifezegeselo gia Gomere mukaji’a Hoshea. Gomere wakalegele uthambi, gungima wabembele mulumi’enji Hoshea wayile mukhala nu mala ako. Guakhalele nu luholo lua gumukuatesa ba? Yehowa wana tala mitshima ya athu, wawambelele Hoshea egi: ‘Vutugila luko guzumba mukhetu munu udi muzumbiwa gudi yala muko nu udi mukalagala uthambi, tshita luholo Yehowa wana zumba enya Isalele tangua ana kombelela nzambi jiko.’ (Hosh. 3:1; Ish. 16:2) Mukaji’a Hoshea wakhalele mulandula gukalagala gubola guakoma. Uvi Yehowa wawambelele Hoshea ha gumutotesela nu ha gumuvutula luko monzo.a Yehowa wakalegele lumene lua Gomere ha gukuatesa akombeledi enji ha gukotelesa luholo wana guatadila. Alanduile gukalagala gubola guakoma, uvi Yehowa wakhalele guamonesela guzumba. Wakhalele mulandula gutuma baprofete ha guakuatesa ha gubalumuna mutshima nu ha gusombegesa makalegelo awo. Gifezegeselo egi gidi gutulongesa egi Yehowa wana jiya ndaga jiagasue jiatadila muthu nu muthu mukatshi dietu, wana tshita yagasue ha gukuatesa muthu udi mulandula gutshita gubola guakoma ha gubalumuna mutshima. (Ish. 17:3) Tutadilenu ndaga yene.

LUHOLO YEHOWA WANA KUATESA ATHU ANA TSHITA GUBOLA HA GUBALUMUNA MUTSHIMA

8. Luholo lutshi Yehowa wakambele gukuatesa Gayino ha gubalumuna mutshima? (Gisendeselo 4:3-7) (Tala nji gifuanesa.)

⁸ Gayino wakhalele somi ya Adama nu Eva. Wavualewe nji nu gubola guakatugile gudi mvuaji jienji. Uvi Biblia idi muzuela nji egi: “Midimo yenji yakhalele yabola.” (1 Yone 3:12) Yajiya gukhala egi yene ndaga yatshitshile egi Yehowa ‘atune Gayino nu mulambu wenji.’ Uvi ha fundo dia gusombegesa khadilo dienji, “Gayino wavuile khabu jiabala, muila nji wamulebele.” Uvi itshi Yehowa wakalegele? Wamutamegele ha gumukuatesa. (Tanga Gisendeselo 4:3-7.) Yehowa wamukuatesele nu gisemo giagasue ha gutangiza muabonga. Wamuwambelele egi gila wakalagala ndaga jiabonga mbawutshigina mulambu wenji; wamuwambelele nji egi gila walandula guvua khabu yajiya gumutuma ha gutshita gubola. Uvi, watunyile gutumagela Yehowa. Watunyile egi Yehowa amukuatese ha gubalumuna mutshima. Yehowa wazudile desizio egi mbagashigo luko mukuatesa athu akalagala gubola ha gubalumuna mitshima handaga Gayino watunyile gumuvila ba? Ndo sha!

9. Luholo lutshi Yehowa wakuatesele Davidi ha gubalumuna mutshima?

⁹ Yehowa wazumbile Fumu Davidi muavula. Wamutamegele nji egi “muthu wana kalagala diago ndaga ngana tshigina.” (Makal. 13: 22) Uvi Davidi wakalegele ndaga jiabola diago, watshitshile uthambi, washiyile nji muthu. Ha gutadila mukhuala wa Moize, Davidi wakhale naye gushiyiwa. (Levi 20:10; Lutang. 35:31) Uvi Yehowa wazudile desizio dia gumukuatesa ha gubalumuna mutshima.b Davidi wakhalele khenji gatshita galego nga ndaga imoshi ha gumonesa egi wabalumuna mutshima, uvi Yehowa watumine profete Natana ha guya gumumona. Natana wahanele gifezegeselo ha gukuata mutshima wa Davidi. Gungima Davidi wabalumuine mutshima handaga wakotelesele egi wakalegele gubola guakoma gu meso a Yehowa, (2 Sam. 12:1-14) Wasonegele lungimbo lumoshi ludi mumonesa egi gubola guenji guamuhanele gikenene giavula. (Ngi. 51, mbimbi jia gisendeselo) Lungimbo luene luana kuatesa athu avula ana kalagala gubola, luana guatuma nji ha gubalumuna mutshima. Idi diago ndaga ya gusuanguluga ha gumona egi Yehowa wakuatesele Davidi nu guzumba guagasue ha gubalumuna mutshima.

10. Udi gudivua gikhuatshi mu ndaga yatadila guhuiminyina gua Yehowa nu luholo luana totesela muene athu gubola?

¹⁰ Yehowa wana tuna gubola gua maluholo agasue. (Ngi. 5:4, 5) Uvi wana jiya egi tushigo athu atagana, mu guzumba guenji, wana tshigina gutukuatesa gula tuakalagala gubola. Wana kuatesa nji athu anyi akalagala gubola guakoma diago ha gubalumuna mitshima nu ha guvutugila luko ufuta wawo n’enji. Gujiya ndaga yene yana hana diago gikhesa! Gula tudi mutangiza khadilo dia Yehowa dia guhuiminyina nu dia gutotesela athu, mbayitukuatesa ha gusala ya gujinginyina gudi muene nu ha gubalumuna mutshima muphushi gula tuatshita gubola. Henyaha tutadilenu ndaga Yesu walongesele alandudi enji mukunda nu gubalumuna mutshima.

NDAGA YESU KLISTO WALONGESELE ALANDUDI ENJI MUKUNDA NU GUBALUMUNA MUTSHIMA

11-12. Ndaga tshi Yesu walongesele athu mukunda nu khadilo dia Sh’enji dia gutotesela athu? (Tala gifuanesa holu dia gizula.)

¹¹ Gifua luholo tuayimonele mu longo diabalega, mu siekle ya thomo G.Y. mu tangua Masiya wakhalele naye guza, Yehowa wakalegele Yone Mubatiji nu Yesu Klisto ha gukuatesa athu ha gujiya mukunda natshi idi nu ndando ha gubalumuma mutshima.​—Mat. 3:1, 2; 4:17.

¹² Hakhalele Yesu mulongesa, wawambelele athu egi Yehowa wana totesela athu gubola guawo. Wazuelele ndaga yene haphelo tangua diaahanele muene gifezegeselo gia mona watotele. Muvuala muene wa yala wazudile desizio dia gukatuga gumbo diawo nu wakalegele ndaga jiavula jiabola. Uvi gungima “wakotelesele egi wakalegele gubola” hene gavutugile gumbo diawo. Itshi sh’enji wakalegele? Yesu wazuelele egi: “Hakhalele muene ndambo gualeha, sh’enji wamumonele, wavuile khenda, wayile phushi gumutagana, wamuyambele.” Mona muene wakhalele mutshigina gutoga sh’enji gula watshigina wajiya gumuzula gifua muenya mudimo mu inzo yenji, uvi sh’enji wamutamegele egi “mun’ami” wamuvutudile luko mu inzo. Sh’enji wazuelele egi mun’enji “watotele, henyaha wamonega.” (Luka 15:11-32) Hakhalele Yesu mu dilu wamonele luholo Sh’enji wakhalele muvila athu akalagala gubola khenda gula abalumuna mutshima. Gifezegeselo egi gia Yesu gidi diago gutuhana gikhesa nu gidi mumonesa egi Yehowa tata wetu wa mu dilu wana vila athu khenda!

13-14. Longo ditshi mupostolo Phetelo wazudile mu ndaga yatadila gubalumuna mutshima? Longo ditshi diahanele muene athu mu ndaga yatadila gubalumuna mutshima? (Tala nji gifuanesa.)

¹³ Yesu wakuatesele Phetelo ha gukotelesa ndaga jiavula jiatadila gubalumuna mutshima nu gutotesela. Phetelo wakhalele mukalagala gubola mbala jiavula, uvi Yesu wakhalele gumutotesela nu mutshima umoshi. Ha gufezegesa Phetelo wadisagesele muavula tangua diatunyile muene Yesu mbala thathu. (Mat. 26:34, 35, 69-75) Uvi hafuzumugile Yesu, wayile gudi Phetelo, yajiya gukhala egi akhalele phamba ene muyadi. (Luka 24:33, 34; 1 Kol. 15:3-5) Yesu wajiyile egi Phetelo wabalumuine mutshima, hene wamonegele gudi muene ha gumutshiginyisa egi wamutotesela gubola guenji.​—tala nji Mako 16:7

¹⁴ Phetelo wajiyile luholo muthu wana gudivua gula wabalumuna mutshima nu amutotesela gubola. Tangua diazonda gungima dia wano wa pantekote, Phetelo watshitshile diskur gutuama dia enya Yuda anyi akhalelego musha gutshigina gudi Yesu. Waawambelele egi ashiyile Masiya. Uvi wawambelele luko nu guzumba guagasue egi: “Balumunenu mitshima yenu, sombegesenu makalegelo enu hagula gubola guenu gutotesewe. Ngenyi Yehowa hakhenji mbawumihana sungi jia guhuima.” (Makal. 3:14, 15, 17, 19) Phetelo wamonesele egi gula muthu wabalumuna mutshima, udi naye sombegesa matangi nu makalegelo enji. Udi naye nji gusendesa ngutshita ndaga jiana suanguluisa Nzambi. Mupostolo Phetelo waamonesele nji egi Yehowa mbawatotesela gubola guawo guagasue. Mbayikhala gifua wakatula gubola guene mayilago. Ivo yavula gungima wasonegele Aklisto egi: “Yehowa . . . udi nu guhuiminyina mukunda nu enue, handaga gana tshiginago egi nga muthu mumoshi afue, uvi wana tshigina egi athu agasue abalumune mutshima.” (2 Phet. 3:9) Ndaga yene idi diago gutusuanguluisa ha gujiya egi Yehowa mbawututotesela diago gubola guetu, ngatshima gubola guene gudi guakoma diago!

15-16.a) Longo ditshi mupostolo Phaula wazudile mu ndaga yatadila gutotesela gubola? (1 Timote 1:12-15) b) Itshi mbatulonguga mu longo dialandula?

¹⁵ Phaula wakalegele ndaga jiavula jiabola. Wakhalele musagesa Aklisto muavula diago. Yajiya gukhala egi Aklisto avula akhalele mumona gifua Phaula gajiyilego gubalumuna mutshima. Uvi Yesu wakhalele mujiya egi wajiya gubalumuna mutshima. Muene nu Sh’enji amonele egi Phaula wakhalele nji nu makalegelo ako abonga. Yesu wazuelele egi: “Muthu yowu udi bungu ngatombi.” (Makal. 9:15) Yesu wakalegele ndaga ya gushimana ha gukuatesa Phaula ha gubalumuna mutshima. (Makal. 7:58–8:3; 9:1-9, 17-20) Habuile Phaula Muklisto, wamonesele mbala jiavula egi wakhalele nu gusuanguluga luholo Yehowa nu Yesu amuvidile khenda nu amutotesele. (Tanga 1 Timote 1:12-15.) Wazuelele egi: “Nzambi mu mutshima wenji wabonga, udi mutshigina gugukuatesa ha gubalumuna mutshima.”​—Roma 2:4.

¹⁶ Itshi Phaula watshitshile havile muene egi enya mu hungu dia Kolinto abemba muthu mumoshi udi mutshita uthambi mu hungu? Ndaga jiazuelele Phaula jidi gutukuatesa ha gukotelesa luholo Yehowa wana monesa guzumba tangua diana hana muene akombeledi enji disipline. Jidi gutukuatesa nji ha gukotelesa egi guvila athu khenda gudi nu ndando yavula. Mu longo dialandula mbatuzuelela ndaga jiabuile mu hungu dia gu Kolinto.