Ndaga Yehowa Wakalegele ha Gukatula Athu mu Gubola nu mu Gufua

1-2. a) Gubola gudi itshi? Luholo lutshi tuajiya gubinga gubola guene? (Tala nji “Ukoteleshi wa Mbimbi.”) b) Itshi tuza mumona mu longo edi nu dinyi dialandula? (Tala nji mbimbi jidi ha diyiji 32 “Aphangi” tala nji “Mbimbi Gudi Athu Ana Tanga Mikanda Yetu” idi mu zulunalo yiyi.)

WANA tshigina gujiya gula Yehowa wana guguzumba diago ba? Idi ndaga yabonga gula wakamba gujiya ndaga yakalegele muene ha guguhuluisa mu gubola nu mu gufua. Gubolaa gudi mbalagalaji wakoma, tuajiyilego gubinga gubola guene mu ngolo jietu hakhetu. Tuana kalagala gubola lusugu nu lusugu, tuana fua nji mukunda nu gubola guene. (Roma 5:12) Uvi ndaga yabonga idi egi, Yehowa wajiya gutukuatesa ha gubinga gubola guene nu gufua.

² Ivo hehi nu 6 000 yabalega gale sendese Yehowa wana kuatesa athu ha gumukombelela ngatshima adi enya gubola. Mukunda natshi? Handaga wana gutuzumba. Yehowa wazumbile athu sendese tangua dia afugile muene. Wana guazumba muavula, wana tshita ndaga jiavula ha guakuatesa ana tshita gubola. Nzambi wana jiya egi gubola guana bata gu gufua, hene ganago gutshigina egi tufue. Wana tshigina egi tusale nu monyo mayilago. (Roma 6:23) Yene ndaga idi mutshigina muene gudi aye. Mu longo edi tuza muzuelela mihu thathu: 1) Felela ditshi Yehowa wahanele athu abola? 2) Luholo lutshi akombeledi a Yehowa a mu tangua dikulu amusuanguluishile, ngatshima akhalelego athu atagana? 3) Itshi Yesu watshitshile ha guhuluisa athu abola gu gubola nu gu gufua?

FELELA DITSHI YEHOWA WAHANELE ATHU ABOLA?

3. Luholo lutshi mvuanji jietu jia thomo jiabuile enya gubola?

³ Tangua Yehowa wafugile yala nu mukhetu wa thomo, wakhalele mutshigina egi akhale nu gusuanguluga. Waahagele ha fundo dimoshi diabonga. Waahanele kado yabonga diago; kado yene idi ulo. Wahanele nji mudimo wabonga wa gutshita. Akhalele naye guzalesa mavu nu an’awo nu guabuisa phaladiso gifua dihia dia Edene. Waahanele phamba mukhuala umoshi waleba. Waawambelele egi gula atumagelego mukhuala wene, mbaatshita gubola nu mbaafua. Tudi mujiya ndaga yakalegewe. Muanjelo wabola munu gakhalelego guazumba nu guzumba Nzambi, waahuigile ha gukalagala gubola. Adama nu Eva atumagele muanjelo muene. Atshitshile gubola luholo atunyile gutumagela Nzambi munu wakhalele guazumba. Gifua luholo tudi guyijiya, ndaga Yehowa wazuelele jiatagenesewe. Sendese lusugu luene, asendesele gukola, gungima afile. Gungima, avutugile mu fuluguta dia mavu.​—Gis. 1:28, 29; 2:8, 9, 16-18; 3:1-6, 17-19, 24; 5:5.

4. Mukunda natshi Yehowa wana tuna gubola? Luholo lutshi wana gutukuatesa ha gukuata luko ufuta wakola n’enji? (Roma 8:20, 21)

⁴ Yehowa wasonegesele lumene elu mu Biblia hagula tuajiya gukotelesa ndaga imoshi ya ndando. Lumene luene luana gutukuatesa ha gujiya gishina Yehowa wana tuna diago gubola. Gubola guana bolesa ufuta wetu nu Tata wetu wa mu dilu nu guana gutubata gu gufua. (Yesh. 59:2) Satana ganago guzumba Yehowa nu athu. Gishina giene walolele Adama nu Eva ha gutshita gubola, wana landula nji gulola athu uu nu mangino. Yajiya gukhala egi Satana watangijile egi tangua Adama nu Eva akalegele gubola, felela dia Nzambi mukunda nu athu diabolele. Uvi wajimbidile egi Yehowa wana gutuzumba muavula. Hene, gasombegeselego nga hazonda felela dienji mukunda nu ana a Adama nu Eva. Guzumba guene guamutumile ha guahana felela mbala imoshi. (Tanga Roma 8:20, 21.) Yehowa wajiyile egi ana ako a Adama mbaamuzumba nu mbaamutumagela. Hene walondele ndaga hagula athu akuate luko ufuta n’enji nu ahuluishiwe mu gubola nu gufua. Itshi Yehowa watshitshile ha gutagenesa ndaga eji jiagasue?

5. Tangua ditshi Yehowa wahanele felela dia thomo gudi athu abola? Kotelesa. (Gisendeselo 3:15)

⁵ Tanga Gisendeselo 3:15. Yehowa wahanele athu ashigo atagana felela dia thomo, hazuelele muene ndaga mbajibuila Satana. Wazuelele gamba, “vungu” mbadihuluisa athu. Vungu diene mbadishiya Satana nu mbadilondega ndaga jiagasue jiabolesele muene mu dihia dia Edene. (1 Yone 3:8) Uvi ha gutagenesa ndaga jiene, vungu diene diakhalele naye gumona lamba. Satana wakhalele naye ‘gusuma’ vungu diene, yakotelesa egi gumushiya. Ndaga yene yahanele Yehowa lamba diavula. Uvi wabembele egi ndaga yene ikalegewe hagula tuhete luendu lua guhuluishiwa mu gubola nu mu gufua!

LUHOLO LUTSHI AKOMBELEDI A YEHOWA A MU TANGUA DIKULU AMUSUANGULUISHILE, NGATSHIMA AKHALELEGO ATHU ATAGANA?

6. Itshi Abele nu Nowa nu athu ako akhalele nu gutshigina guakola gudi Yehowa akalegele ha gusala yagujinginyina gudi muene?

⁶ Gungima dia ivo, Yehowa wasendesele gumonesa mage-mage luholo athu ashigo atagana ajiya gusala yagujinginyina gudi muene. Abele mona wa mbadi wa Adama nu Eva wakhalele muthu wa thomo wasalele yagujinginyina gudi Yehowa ikhale mvuaji jienji jiatunyile gumutumagela. Wahanele Yehowa mulambu handaga wakhalele gumuzumba nu wakhalele mutshigina gumusuanguluisa nu gusala yagujinginyina gudi muene. Abele wakhalele mubambi wa imeme; hene wazanguile mitumba ya imeme, wayishiyile ha guhana mulambu gudi Yehowa. Yehowa wasuangulugile nu mulambu wene ba? Ayi, “watshiginyile Abele nu mulambu wenji.” (Gis. 4:4) Yehowa watshiginyile nji milambu ya athu anyi akhalele gumuzumba nu gumushila mutshima, mukatshi dia athu ene tuajiya gutanga Nowa. (Gis. 8:20, 21) Luholo Yehowa watshiginyile milambu yene, idi mumonesa gamba athu ashigo atagana ajiya gubua mafuta enji nu gusala yagujinginyina gudi muene.b

7. Luholo Abalahama watshiginyile guhana mun’enji gifua mulambu, idi gutulongesa itshi?

⁷ Abalahama wakhalele nu gutshigina guakola gudi Yehowa. Yehowa wamutogele ha guhana mun’enji Izake gifua mulambu, ndaga yene yakhalele lamba diago mukunda nu Abalahama. Uvi watumagele Yehowa. Tangua Abalahama watshiginyile gushiya mun’enji, Yehowa wamutunyishile. Gifezegeselo giene giakhalele mumonesa ndaga Yehowa wakhalele naye gukalagala gungima. Yehowa wakhalele naye guhana Mun’enji gakhalele muzumba muavula gifua mulambu. Yehowa wana zumba diago athu muavula.​—Gis. 22:1-18.

8. Milambu yavula athu akhalele muhana yakhalele mumonesa itshi? (Levi 4:27-29; 17:11)

⁸ Gungima dia ivo, Yehowa wahanele enya Isalele mikhuala. Waawambelele ha guhana milambu ya shitu hagula gubola guawo gutotesewe. (Tanga Levi 4:27-29; 17:11.) Milambu yene yakhalele mumonesa egi Yehowa mbawuhana mulambu watagana ha guhuluisa athu agasue mu gubola. Mu ukuateshi wa nyuma ya Nzambi, baprofete azuelele egi vungu diene, yakotelesa egi Mun’a Nzambi wakhalele naye gumona malamba nu gushiyiwa. Wakhalele naye gubua gifua mulambu wa mun’a gimeme. (Yesh. 53:1-12) Tangiza gale: Yehowa walondele ndaga hagula Mun’enji mumoshi ha mumoshi munu gakhalele muzumba muavula afue ha guhuluisa athu mu gubola nu mu gufua, aye nji udi mukatshi dia athu ene!

LUHOLO LUTSHI YESU WAHULUISHILE ATHU?

9. Itshi Yone Mubatiji wazuelele tangua diamonele muene Yesu? (Hebelu 9:22; 10:1-4, 12)

⁹ Mu givo 29 Gungima dia Guvualewa gua Yesu (G.Y.), tangua Yone mubatiji wamonele Yesu wa gu Nazaleta, wazuelele egi: “Talenu Mun’a Gimeme wa Nzambi udi mukatula gubola gua athu ha mavu!” (Yone 1:29) Mbimbi jiene jiakhalele mumonesa egi Yesu wakhalele vungu dinyi Nzambi walayele. Yesu wakhalele naye guhana monyo wenji gifua mulambu. Gungima vungu dinyi Yehowa walayele diajile ha guhuluisa athu agasue mu gubola, yakotelesa egi gubinga gubola mayilago.​—Tanga Hebelu 9:22; 10:1-4, 12.

10. Luholo lutshi Yesu wamonesele egi wajile ha “gutamega” enya gubola?

¹⁰ Yesu wakhalele gudihana thomo ha gukuatesa athu anyi akhalele gudisagesa mukunda nu gubola guawo nu wakhalele guatamega ha gubua alandudi enji. Wajiyile egi athu ana mona malamba mukunda nu gubola. Hene wakhalele mukuatesa mala nu akhetu anyi akhalele gudisagesa mukunda nu gubola guawo. Mu gifezegeselo gimoshi, Yesu wazuelele egi: “Athu adi muabonga, ana kambago munganga, uvi athu adi mukata, ene ana kamba munganga.” Wazuelele luko egi: “Ngajilego ha gutamega athu abonga, uvi ngajile ha gutamega enya gubola.” (Mat. 9:12, 13) Yene ndaga Yesu watshitshile. Nu gisemo giagasue, watotesele gubola gua mukhetu munu wakhalele gumuwevua ikanzo nu masoji enji. (Luka 7:37-50) Yesu walongesele muenya Samaliya wa mukhetu longo dia ndando ikhale wajiyile egi mukhetu muene wakhalele thambi. (Yone 4:7, 17-19, 25, 26) Nzambi wahanele Yesu ngolo ha gumanesela gubola nu gufua. Luholo lutshi Yesu wamonesele ngolo jiene? Wafuzumuine athu ikhale mala, akhetu, ana nga mambuta.​—Mat. 11:5.

11. Mukunda natshi athu abola akhalele musuanguluga gukhala fundo dimoshi nu Yesu?

¹¹ Tudi mukotelesa gishina athu akhalele mukalagala ndaga jiabola, akhalele musuanguluga gukhala fundo dimoshi nu Yesu. Wakhalele guavila khenda nu gudihaga ha fundo diawo. Athu ene akhalelego muvua woma ha gusuena hehi n’enji. (Luka 15:1, 2) Yesu wakhalele guashimana nu guashimbiga luholo akhalele musha gutshigina gudi muene. (Luka 19:1-10) Walanduile gifezegeselo gia Sh’enji mu luholo luatagana mu ndaga yatadila guvila athu ako khenda. (Yone 14:9) Wamonesele mu mbimbi nu mu makalegelo enji egi, Sh’enji wakhala muenya khenda, wana totesela athu ana tshita gubola, wana guazumba nu wana tshigina guakuatesa. Yesu wakhalele mukuatesa athu abola ha gusombegesa makalegelo awo ha gumulandula.​—Luka 5:27, 28.

12. Ndaga itshi Yesu wazuelele mukunda nu gufua guenji?

¹² Yesu wakhalele mujiya ndaga jiakhalele naye gumubuila. Mbala jiavula, wakhalele muwambela alandudi enji egi mbawuhanewa ha mago a athu nu mbawushiyiwa ha mutshi wa lamba. (Mat. 17:22; 20:18, 19) Gifua luholo Yone nu baprofete azuelele, Yesu wajiyile gamba mulambu wenji wakhalele naye gukatula gubola gua athu agasue ha mavu. Wazuelele egi gungima dia guhana monyo wenji, “mbawunana athu a maluholo agasue” gudi muene. (Yone 12:32) Ha gusuanguluisa Yehowa, athu abola akhalele naye gutshigina Yesu gifua Fumu nu gulandula mikhuala yenji. Gula atshita ngenyi mbaakudiwa “mu uhiga wa gubola.” (Roma 6:14, 18, 22; Yone 8:32) Yesu watshiginyile nu gikhesa giagasue gumona malamba nu gufua ha gutuhuluisa.​—Yone 10:17, 18.

13. Luholo lutshi Yesu wafile? Gufua guenji gudi gutulongesa itshi mukunda nu Nzambi? (Tala nji gifuanesa.)

¹³ Yesu wahanewe ha mago a athu, amukuatele, amushingile, amumbidile mambo nu amumonesele lamba. Masuta ayile n’enji ha fundo dia gumushiya, gungima amukhokhele ha mutshi wa lamba. Yehowa Nzambi wavile gikenene giavula tangua Yesu wakhalele mukolesela ha mutshi wene. Wakhalele nu ngolo jia gukuatesa Mun’enji hagula malamba amubuilago, uvi gatshitshilego ngenyi. Mukunda natshi? Yehowa wakhalele muzumba Mun’enji muavula, uvi mukunda natshi wabembele egi Mun’enji muene amone malamba nu afue? Handaga wana gutuzumba. Yesu wazuelele egi: “Nzambi wazumbile athu a ha mavu muavula, wahanele Mun’enji mumoshi ha mumoshi hagula muthu wagasue washa gutshigina gudi muene, gafuigo uvi ahete monyo wa ivo nu ivo.”​—Yone 3:16.

14. Mulambu wahanele Yesu udi gugulongesa itshi?

¹⁴ Mulambu wahanele Yesu wana monesa egi, Yehowa wana zumba diago ana Adama nu Eva. Idi mumonesa egi aye nji Yehowa wana guguzumba muavula. Wahanele Mun’enji mumoshi ha mumoshi nu wakolesele mu malamba mukunda nu guguhuluisa mu gubola nu gufua. (1 Yone 4:9, 10) Yadiago, Yehowa wana tshigina gutukuatesa ha gumukalegela ngatshima tushigo athu atagana, wana tshigina nji gukatula gubola mayilago mu masugu adi muza!

15. Ndaga itshi tudi naye gutshita ha guheta gubonga gua mulambu wa Yesu?

¹⁵ Kado yahanele Nzambi, yakotelesa egi gibawu gia Mun’enji mumoshi ha mumoshi, giatuhanele luendu hagula gubola guetu gutotesewe. Uvi hagula egi Nzambi atutotesele, tudi naye gutshita ndaga imoshi. Ndaga yene idi itshi? Yone Mubatiji nu Yesu Klisto ahanele mvutu gu muhu wene. Azuelele egi: “Balumunyenu mitshima, handaga Ufumu wa mu dilu wasuena hehi.” (Mat. 3:1, 2; 4:17) Gubalumuna mutshima gudi ndaga ya ndando gula tudi mutshigina gusuena hehi nu Tata wetu wa guzumba. Uvi gubalumuna mutshima gudi mukotelesa itshi? Luholo lutshi guana gutukuatesa ha gusuanguluisa Yehowa ikhale tushigo athu atagana? Mu longo dia landula mbatuheta mvutu gu mihu yene.