Gabriyele Waya Gudi Madiya

Elizabete wakhalele nu phang’enji mumoshi wa muvuala, jina dienji Madiya. Wakhalele mukhala mu dimbo dia Nazaleta ya gu Galileya. Madiya wakhalele walayewa gale ulo gudi Yozefe munu wakhalele mutshita mudimo wa mabaya. Tangua Elizabete wakhalele nu vumo dia mbeji 6, muanjelo Gabrieye wamonegele gudi Madiya. Wazuelele egi: ‘Moyo, Madiya. Yehowa waguvuila khenda jiavula.’ Madiya gakoteleselego ndaga muanjelo wakhalele mutshigina guzuela. Muanjelo wamuwambelele egi: ‘Mbawumita vumo, mbawuvuala mona yala, udi naye gumuhana jina egi Yesu. Muene mbawukhala Fumu, Ufumu wenji mbawukhala mayilago.’

Madiya wazuelele egi: ‘Mbayikalegewa gikhuatshi, handaga khenji ngubungishile gale ndo muila nu yala?’ Gabriyele wamuwambelele egi: ‘Gushigo nga nu ndaga imoshi yakhala yakola gutuama dia Yehowa. Nyuma ya Nzambi mbayigujila nu mbawuvuala mona yala. Phangi’aye Elizabete nji udi gu vumo.’ Gungima Madiya wazuelele egi: ‘Ame ngudi muenya mudimo wa Yehowa. Ndaga jiagasue jikalegewe gifua luholo wazuela.’

Gungima Madiya wayile mu dimbo diakhalele gu milundu ha gutala Elizabete. Tangua Madiya wamuhanele lumene, mona wakhalele mu vumo dia Elizabete wadinyigishile. Elizabete wazalele nu nyuma ya Nzambi, wazuelele egi: ‘Madiya, Yehowa wa gushimbiga muavula. Ngaheta lutumbu, luholo mama wa Fumi’ami waza gumbo diami.’ Madiya wazuelele egi: ‘Monyo wami udi mutumbuisa Yehowa.’ Madiya watshitshile mbeji thathu gumbo dia Elizabete, gungima wavutugile gu Nazaleta.

Tangua Yozefe wajiyile egi Madiya udi gu vumo, watshiginyile gumubemba. Uvi muanjelo wamonegele gudi Yozefe mu nzoji, wamuwambelele egi: ‘Uvigo woma ha guzula Madiya mu ulo. Gakalegelego nga ndaga imoshi yabola.’ Hene, Yozefe wazudile Madiya mu ulo, wayile n’enji gumbo dienji.