LONGO DIA 05
Biblia Idi Mbimbi ya Nzambi Mukunda nu Athu
Yehowa watuhanele Biblia. Idi kado ga ndando, idi nu mikanda ya zonda-zonda 66 mukatshi. Uvi wajiya gudihula egi: ‘Biblia yakatugile gui? Udi mukanda wa nanyi?’ Ha guheta mvutu gu mihu eyi, tutadile thomo luholo tuahetele Biblia.
1. Athu asonegele Biblia, uvi mukunda natshi tuana zuela egi yakatugile gudi Nzambi?
Biblia yasonegewe gudi athu 40 mu sungi ya ivo 1 600, sendese mu givo 1513 gutuama dia guvualewa gua Yesu (G.G.Y.) uu nu mu givo 98 gungima dia guvualewa gua Yesu (G.Y.) Athu asonegele Biblia akhalele athu a maluholo a gudisha, akhalele nji mujinga mu mafundo a gudisha, uvi ndaga jiagasue jiasonegele ene mu Biblia jiana gudivua. Mukunda natshi? Handaga “Biblia idi mbimbi ya Nzambi.” (Tanga 1 Tesalonike 2:13.) Athu asonegele Biblia asonegelego matangi awo. Uvi “nyuma ya Nzambia yatumile athu ha guzuela ndaga jiakatugile gudi Nzambi.” (2 Phetelo 1:21) Nzambi watumile nyuma yenji ha gukuatesa athu ha gusonega matangi enji.—2 Timote 3:16.
2. Nanyi wajiya guheta gubonga gua malongo adi mu Biblia?
“Athu a ifutshi yagasue, a iphuta yagasue, a mazuelelo agasue nu a ilema yagasue” ajiya guheta gubonga gua lukuma luabonga ludi mu Biblia. (Tanga Gumonesa 14:6.) Nzambi watshitshile yagasue hagula Biblia ibalumuiwe mu mazuelelo avula gubalega mikanda iko yagasue. Mangino athu avula ajiya gutanga Biblia, ikhale fundo ditshi ana khala nga zuelelo ditshi ana zuela.
3. Luholo lutshi Yehowa wabambele Biblia?
Biblia yasonegewe nu ima yana bola, gifua ilema ya shitu nu papyrus. Uvi athu anyi akhalele muzumba Biblia asonegele kopi jienji ha ima iko. Mafumu a ikombelelo nu mafumu ako atshitshile yagasue ha gutotesa Biblia, uvi athu ako akhalele hehi ha gutotesa mionyo yawo ha gubamba Biblia. Yehowa gabembelego egi gima gimoshi nga muthu mumoshi amukange njila hagula athu atangigo Mbimbi yenji. Biblia idi muzuela egi: ‘Mbimbi ya Nzambi wetu idi musala ivo nu ivo.’—Yeshaya 40:8.
TUKAMBE GUJIYA NDAGA JIAVULA
Tala luholo Nzambi wakuatesele athu ha gusonega Biblia, nu luholo luayibambele muene nu ndaga yatshitshile muene hagula muthu wagasue akhale nayo.
4. Biblia yana monesa egi idi mukanda wa Nzambi
Tala VIDEO. Gungima tanga 2 Timote 3:16, gungima dienji zuelelenu mihu eyi yalandula.
Biblia yasonegewe gudi athu, uvi mukunda natshi yana tamegewa egi Mbimbi ya Nzambi?
Udi mutangiza egi tuajiya diago gutshigina egi Nzambi wakuatesele athu ha gusonega matangi enji ba?
Gula fumu mumoshi wawambela muenya mudimo wenji ha gusonega mukanda, tuajiyilego guzuela egi mukanda wene udi wa muenya mudimo handaga matangi adi muene adi a fumu wenji. Idi luholo lumoshi nu Biblia, yasonegewe gudi athu uvi ndaga jidi mukatshi jiakatugile gudi Nzambi/
5. Athu abingilego ha gutotesa Biblia
Gula Biblia idi lume mukanda wa Nzambi, muene udi naye guyibamba kiawaha. Sendese mualeha, mafumu avula atshitshile yagasue ha gutotesa Biblia. Mafumu a ikombelelo nji akadigile yagasue ha guyisuega hagula athu ayitangigo. Ikhale athu avula atagenele nu umbalagaji nu gufua, uvi akadigile yagasue ha gubamba Biblia. Ha gujiya lumene lua muthu mumoshi mukatshi diawo, tala VIDEO, gungima zuelelenu mihu yalandula.
Luholo wajiya ndaga jiagasue jiakalegewe ha gubamba Biblia idi gugutuma ha guyitanga ba? Mukunda natshi wazuela ngenyi?
Tanga Ngimbo 119:97, gungima zuelelenu muhu owu walandula:
Itshi yatumine athu avula ha gubalumuna Biblia nu ha guyikhaphela athu ako ngatshima mionyo yawo yakhalele mu gingonza?
6. Biblia idi mukanda wa athu agasue
Biblia idi mukanda umoshi wabalumuiwe gale mu mazuelelo avula nu wakhaphewe gale gubalega mikanda iko yagasue. Tanga Makalegelo 10:34, 35, gungima zuelelenu mihu eyi yalandula:
Mukunda natshi Nzambi wana tshigina egi Mbimbi yenji ibalumuiwe nu ikhaphewe muavula gubalega?
Ndaga itshi yana gugusuanguluisa mukunda nu Biblia?
Athu hehi nu
100%
a ha mavu agasue
adi nu Biblia mu mazuelelo ana kotelesa kiawaha
Biblia idi ya mudidi
nga ya gitshinyi mu
mazuelelo gubalega
3 000
Biblia jiazolewe gale jiavula, hehi nu
5 000 000 000
Mutango wuwu udi wavula gubalega mikanda iko
ATHU AKO ANA ZUELA EGI: “Biblia idi mukanda wa ginono wasonegewe gudi athu.”
Itshi udi mutangiza?
Ndaga jitshi jidi mumonesa egi Biblia idi mukanda wa Nzambi?
NDAGA WALONGUGA
Biblia idi mukanda wa Nzambi, muene wana kalagala yagasue hagula muthu wagasue akhale nayo.
Mihu ya Guvutugila
Tangua tudi muzuela egi Nzambi wakuatesele athu ha gusonega Biblia, idi mukotelesa itshi?
Ndaga itshi ya gushimana wamona mu luholo Biblia yabambewe, yana balumuiwa nu luholo ana guyikhaphela athu?
Luholo lutshi udi gudivua ha wajiya egi Nzambi wakalegele yagasue hagula ujiye ndaga jiamutadila mu Biblia?
NDAGA JIKO JIA NDANDO
Tanga lumene ludi mumonesa luholo Biblia yasendesele, sendese mu bamaniskri akulu uu nu luholo idi mubalumuiwa mangino.
“Comment la Bible nous est parvenue” (Réveillez-vous! ya Novembre 2007)
Tala luholo athu akambele gutotesa Biblia mbala thathu uvi abingilego.
“La Bible: histoire d’une rescapée” (Inzo Yaleha ya Mutaledi No. 4 2016 ya français)
Tala luholo athu ako ambile monyo wawo mu gingonza luholo azudile desizio dia gubalumuna Biblia.
Athu atshitshile ba kopi avula a Biblia nu ayibalumuine gale mbala jiavula. Itshi idi gugutuma ha gutshigina egi mbimbi ya Nzambi yasombegesewego?
“La Bible a-t-elle été modifiée ou falsifiée?” (Longo edi didi mu jw.org)
a Gifua luholo tuza guyimona mu Longo dia 07, nyuma ya Nzambi idi ngolo jienji jiana kalegela muene midimo