Tshita Ngolo ha Gukhala Hamoshi nu Aphangi mu Hungu

Tangua tuana khala mukatshi dia aphangi Aklisto, tuana gudivua gifua luholo luadivile Fumu Davidi hazuelele muene egi: ‘Idi ndaga yabonga nu ya gusuanguluga gula aphangi adi hamoshi!’ (Ngimbo 133:1) Gukhala hamoshi guanaza ndo mu gisagumuisa. Mukut’etu agasue tudi naye gutshita ngolo ha gukhala hamoshi.

1. Ndaga itshi wana mona mukatshi dia Matemue a Yehowa?

Gula waya mu gudibungisa gua mu hungu mu gifutshi giko, yajiya gukhala egi ushigo mukotelesa mbimbi adi muzuela; uvi mu ndaga jiko wajiya gudivua gifua udi gumbo diaye. Mukunda natshi? Handaga tuana longuga Biblia mu njila ya mikanda ya luholo lumoshi mafundo agasue. Tuana tshita nji ngolo ha gudizumba. Ikhale fundo ditshi tuana jinga, mukut’etu agasue tuana ‘tumbuisa jina dia Yehowa, nu gumukombelela hamoshi.’​—Sefanya 3:9.

2. Itshi wajiya gutshita ha gukhala hamoshi nu aphangi?

“Zumbenu athu ako mangololo nu mutshima umoshi.” (1 Phetelo 1:22) Luholo lutshi wajiya gutumagela longo edi? Ha fundo dia gutala phamba ndaga jiabola jia aphangi ako, khala mutala nji makalegelo awo abonga. Ukuatshigo ufuta phamba nu athu ana tshigina ndaga jia luholo lumoshi nu aye, uvi tshita ngolo ha gujiya nji aphangi a mala nu a akhetu anyi adi nu ndaga jia gudisha nu jiaye. Tudi naye nji gutshita ngolo ha gukatula matangi agasue abola tudi nawo mukunda nu athu ako.​—Tanga 1 Phetelo 2:17.a

3. Itshi wajiya gutshita gula mushigo gudivua nu phangi mumoshi?

Tuana khala hamoshi, uvi tushigo athu atagana. Matangua ako tuajiya gukalegela athu ako ndaga yabola. Mbimbi ya Nzambi yana gutuwambela egi: “Khalenu . . . guditotesela,” idi muzuela luko egi: “Khalenu guditotesela gifua luholo Yehowa wamitotesele gubola guenu nu mutshima umoshi.” (Tanga Kolosai 3:13.) Tuana kalegela Yehowa gubola matangua avula, uvi muene wana gututotesela. Hene, wana gututoga ha gutotesela nji aphangi etu. Gula wajiya egi wakalegela muthu mumoshi gubola, tshita yagasue ha gulondega n’enji mulonga wene.​—Tanga Matayo 5:23, 24.b

TUKAMBE GUJIYA NDAGA JIAVULA

4. Ukhadigo mutangijila athu ako ndaga jiabola

Tudi naye guzumba aphangi etu agasue. Uvi, yajiya gukhala lamba ha guzumba muthu munu gashigo luholo lumoshi nu esue. Itshi yajiya gugukuatesa? Tanga Makalegelo 10:34, 35, gungima zuelelenu mihu eyi:

• Yehowa wana tshigina egi athu a maluholo agasue abue Matemue enji. Luholo lutshi wajiya gulandula gifezegeselo gienji mu luholo luaye lua gutadila athu adi a gudisha nu aye?

• Ha fundo wana jinga, matangi atshi abola athu ana khala nawo mukunda nu athu ako udi naye gutuna?

Tanga 2 Kolinto 6:11-13, gungima zuelelenu muhu owu:

• Luholo lutshi wajiya gukolesa ufuta waye nu aphangi a mala nu a akhetu anyi adi a gudisha nu aye?

5. Totesela athu ako nu mutshima umoshi, kamba nji guhuima

Yehowa wana gututotesela nu mutshima umoshi ngatshima muene gajiyilego gutshita nga ndaga imoshi yabola hagula tumutotesele. Tanga Ngimbo 86:5, gungima zuelelenu mihu eyi:

• Verse eyi idi gutulongesa itshi mu luholo Yehowa wana gututotesela?

• Mukunda natshi udi naye guhana Yehowa mersi mu luholo luana gututotesela muene?

• Ndaga jitshi jiajiya gutshita egi ikhale lamba ha gubamba guhuima nu athu ako?

Luholo lutshi tuajiya gulandula gifezegeselo gia Yehowa ha gukhala hamoshi nu aphangi a mala nu a akhetu? Tanga Ishima 19:11, gungima zuelelenu muhu owu:

• Gula muthu mumoshi wagukalegela ndaga yabola, itshi wajiya gutshita ha gulondega n’enji ndaga?

Matangua ako tuajiya gukalegela nji athu ako gubola. Itshi tuajiya gutshita mu tangua diene? Tala VIDEO, gungima zuelelenu muhu owu walandula.

VIDEO: Gukamba Guhuima Guana Bata Gubonga Guavula (6:01)

• Mu video eyi tuatala, ndaga itshi phangi wa mukhetu wakalegele ha guvutula guhuima nu phangi muko?

6. Tala makalegelo abonga a aphangi a mala nu a akhetu

Gula tudi nu ufuta wakola nu aphangi a mala nu a akhetu, mbatujiya makalegelo awo abonga nu abola. Luholo lutshi tuajiya gutala phamba makalegelo awo abonga? Tala VIDEO, gungima zuelelenu muhu owu walandula.

VIDEO: Khala Mutadila Aphangi’aye mu Luholo Luabonga! (5:10)

• Itshi yajiya gugukuatesa ha gumona makalegelo abonga gudi aphangi a mala nu a akhetu?

Yehowa wana mona makalegelo etu abonga. Tanga 2 Gudilanduluila 16:9a, gungima zuelelenu muhu owu:

• Wana gudivua gikuatshi luholo wana jiya egi Yehowa wana mona makalegelo aye abonga?

NDAGA WALONGUGA

Wajiya gukhala hamoshi nu aphangi mu hungu gula udi guatotesela nu guazumba.

Mihu ya Guvutugila

• Luholo lutshi wajiya gubemba gutangijila athu ako ndaga jiabola?

• Itshi wajiya gutshita gula mushigo gudivua nu phangi mumoshi?

• Mukunda natshi udi naye gutotesela athu ako gifua Yehowa?

NDAGA JIKO JIA NDANDO

Tala luholo ifezegeselo yahanele Yesu yajiya gutukuatesa ha gutuna gusophesa athu ako.

Retire la poutre de ton œil (6:56)

Tuajiya gutoga pardo gula tudi mujiya egi tuakalegelego ndaga yabola ba?

“Les excuses contribuent à la paix” (Inzo Yaleha ya Mutaledi ya 1 Novembre 2002 ya français)

Tala luholo athu ako alongugile ha gukalegela athu ndaga mu luholo luabonga gutomba-tomba ndo.

Ne jugeons pas d’après l’apparence (5:06)

Tala luholo wajiya gulonda ndaga nu phangi mumoshi gutuama egi ndaga yene ikatule guhuima mu hungu.

“Règle les désaccords avec amour” (Inzo Yaleha ya Mutaledi ya Mai 2016 ya français)