LONGO DIA 8
LUNGIMBO 130 Tukhale Guditotesela
Luholo Lutshi Tuajiya Gulandula Khadilo dia Yehowa dia Gutotesela Athu?
“Khalenu guditotesela gifua luholo Yehowa wamitotesele gubola guenu nu mutshima umoshi.”—KOL. 3:13.
MU GUHIHIA
Tuza muzuelela ndaga tuajiya gukalagala ha gutotesela muthu watukalegela gubola.
1-2. a) Tangua ditshi yajiya gukhala lamba ha gutotesela muthu? b) Luholo lutshi phangi Denise wamonesele khadilo dia gutotesela athu ako?
GUTOTESELA athu ako guana guguhana lamba ba? Gula muthu watshita nga wazuela ndaga imoshi yatusagesa, yana khala lamba ha gumutotesela. Uvi gudi nu ndaga jiajiya gutukuatesa ha gulebesa khabu nu ha gutotesela athu. Tutadilenu luholo phangi Denisea watotesele muthu mu luholo lua gushimana. Mu 2017 Denise nu enya fami yenji ayile mutala Biro Diakoma dia Matemue a Yehowa gu Warwick. Tangua akhalele muvutuga gu inzo, yala mumoshi wakumine gamiyo genji gu gamiyo gawo. Mu tangua diene, phangi Denise gakhalelego luko gudijiya. Tangua Denise wadijiyile, amuwambelele egi an’enji anamana mangololo uvi mulumi’enji Brian wafui. Phangi Denise umuzuela egi: “Mu tangua diene, ngavile gikenene giavula, ngabuile tunga-tunga.” Gungima amuwambelele egi yala waakumine gamiyo ganuilego matombe, gakhalelego nji mutshita ndaga imoshi yakhalele gumuwunganesa matangi. Phangi Denise watogele egi: “Yehowa ngukuatese ha gutulula mutshima.”
2 Mafumu akuatele muenya gamiyo gene egi washiya mulumi’a phangi Denise. Akhalele hehi ha gumumba mu bologo. Nzuji mumoshi wawambelele Denise egi: “Ndaga uza muzuela jiene jiza mutshita egi yala muene ambiwe mu bologo nga ndo.” Phangi Denise udi muzuela egi: “Ngakhalele naye guzuelela ndaga jia lamba jia ngubuidile, mu tangua diene ngavuile gifua muthu mumoshi wakangula phuta yami, wangutadiginya mangololo.” Gungima dia phoso jiazonda, phangi Denise wayile gu tribinale ha guzuelela ndaga yaabuidile gutuama dia yala wabatele lamba diakola mu fami yawo. Phangi Denise wazuelele itshi? Watogele nzuji ha gutotesela yala muene.b Hamanesele muene guzuela, nzuji wasendesele gudila. Wazuelele egi: “Ngudi gale nu ivo 25 mu mudimo owu, uvi khenji ngamonelego ndaga ya luholo elu mu tribinale eyi. Khenji ngamonelego muthu mutoga nzuji ha gubemba muthu waabatela malamba. Khenji ngamonelego nji muthu mutotesela muko nu guzumba guagasue ngegi.”
3. Ndaga itshi yakuatesele phangi Denise ha gumonesa khadilo dia gutotesela athu ako?
3 Ndaga itshi yakuatesele phangi Denise ha gumonesa khadilo dia gutotesela? Wakhalele mutangigiza luholo Yehowa wana totesela athu. (Mika 7:18) Gula tudi muhana Yehowa mersi luholo luana gututotesela muene, mbayitukuatesa nji ha gutotesela athu ako.
4. Ndaga itshi Yehowa wana gututoga ha gutshita? (Efeso 4:32)
4 Yehowa wana tshigina egi tutotesele athu ako nu mutshima umoshi gifua luholo muene wana gututotesela. (Tanga Efeso 4:32.) Wana gututoga ha gukhala hehi ha gutotesela athu ana gutukalegela gubola. (Ngi. 86:5; Luka 17:4) Mu longo edi, tuza muzuelela ndaga thathu jiajiya gutukuatesa ha gutotesela athu ako.
UTSHITSHIGO GIFUA GUSHIGO MULONGA
5. Ha gutadila Ishima 12:18, luholo lutshi tuajiya gudivua gula muthu watukalegela ndaga imoshi yatusagesa?
5 Tuajiya gudisagesa muavula diago gula futa dietu wakola nga muenya fami yetu wazuela nga watukalegela ndaga imoshi yabola. (Ngi. 55:12-14) Mutangua diene, tuajiya guvua khabu jiakola, lamba tudi muvua diajiya gukhala gifua atunamenesa. (Tanga Ishima 12:18.) Tushigo naye gubamba khabu mu mutshima. Gukalagala ngenyi guajiya gukhala gifua atunamenesa, gungima tuabemba gaphogo ha phuta. Luholo lumoshi nji, tuajiyilego gudivua muabonga gula tuabambela muthu watukalegela gubola khabu mu mutshima.
6. Itshi tuajiya gutshita gula muthu watuwambela nga watukalegela ndaga imoshi yatusagesa?
6 Gula muthu wazuela nga watshita ndaga yatusagesa, tuajiya guvua khabu. Biblia yana zuela egi ishigo yabola ha guvua khabu, uvi yana monesa nji egi tushigo naye gushipha nu khabu. (Ngi. 4:4; Ef. 4:26) Mukunda natshi? Handaga khabu jiajiya gututuma ha gukalagala ndaga jiabola. Gula muthu udi nu khabu yana khala lamba gudi muene ha gutshita ndaga jiabonga. (Yak. 1:20) Tudi mujiya egi gula muthu watukalegela gubola yajiya gutuhana khabu, uvi tuajiya guzula desizio dia gutuna gumubambela khabu nga ndo.
Gula muthu watukalegela gubola yajiya gutuhana khabu, uvi tuajiya guzula desizio dia gutuna gumubambela khabu nga ndo
7. Luholo lutshi tuajiya gudivua gula muthu mumoshi watukalegela ndaga yabola?
7 Gula muthu watukalegela ndaga yabola, yajiya gutusagesa muavula. Ha gufezegesa, phangi Ann udi muzuela egi: “Tangua ngakhalele mona wazonda tata wabembele mama, wazudile muenya mudimo wetu mu ulo. Ngadivile hakhami. Tangua avualele an’awo, ngakhalele mumona egi ngushigo luko nu fundo mu inzo yetu. Ngakhalele mutangiza egi ngushigo nu ndando.” Phangi Georgette udi mumonesa luholo luadivile muene tangua mulumi’enji wakalegele uthambi. Udi muzuela egi: “Tuakhalele mafuta sendese ulenge. Tuakhalele mutshita mudimo wa muvundji wa njila hamoshi! Ndaga yene yangusagesele muavula.” Phangi Naomi udi muzuela egi: “Ngakhalelego mutangiza nga hazonda egi mulumi’ami wajiya gungukalegela ndaga yajiya gungusagesa. Hene tangua ganguwambelele egi wakhalele mutala pornografi mu gisuegi, yangusagesele muavula.”
8. a) Ndaga jitshi jidi naye gututuma ha gutotesela athu ako? b) Gubonga gutshi tuana heta gula tuatotesela athu ako? (Tala galuanda, “Ndaga Tuajiya Gutshita Gula Muthu Watukalegela Ndaga idi Gutusagesa”)
8 Tuajiyilego gutunyisa athu ha guzuela nga gutshita ndaga adi mutshigina, uvi tuajiya gudikanda gu mvutu tudi guahana. Ndaga yabalega ndando idi gutotesela athu ako. Mukunda natshi? Handaga Yehowa Nzambi tuana zumba muene udi gututoga ha gutotesela athu. Gula tudi mulandula gubamba khabu nu gutuna gutotesela athu ako, tudi mutshita ndaga yabola handaga gutshita ngenyi guajiya gutukatesa. (Ish. 14:17, 29, 30) Tutadilenu gifezegeselo gia phangi Christine. Wazuelele egi: “Gula ngudi nu khabu nganago gumuemueta. Khabu jiana gungutuma nji ha gudia ima iko yajiya gungusagesa mu muila. Tulo tuana gungulenga, yana ngubuila nji lamba ha gudikanda. Ndaga jiji jiagasue jiana bolesa gudivua guami nu mulumi’ami nga nu athu ako.”
9. Mukunda natshi tudi naye gubemba khadilo dia gulandula guvila athu ako khabu?
9 Ikhale muthu watukalegela ndaga yabola gatutogelego ha gumutotesela, uvi tuajiya gumutotesela hagula ndaga yene itusagesago muavula. Luholo lutshi tuajiya guyikalagala? Phangi Georgette tuazuelela gu thunda wazuelele egi: “Ndaga yene yazudile tangua diavula, uvi ngatshitshile ngolo ha gutuna guvila yala tuadikhaphele nenji khabu. Gutshita ngenyi guangukuatesele ha gukhala mu guhuima.” Gula tushigo mulandula guvua khabu, mbatukalegela athu ako ndaga mu luholo luabonga. Gutshita ngenyi guajiya gutukuatesa ha gudivua muabonga nu ha gukhala luko nu gusuanguluga. (Ish. 11:17) Uvi itshi udi naye gukalagala gula udi mulandula guvila muthu khabu?
LUHOLO LUA GUBEMBA KHABU
10. Mukunda natshi idi nu ndando ha guzula tangua dia gutotesela muthu watukalegela ndaga yabola? (Tala nji gifuanesa.)
10 Ndaga itshi yajiya gugukuatesa ha gubemba khadilo dia guvua khabu? Ndaga yajiya gugukuatesa idi gubemba egi tangua dibalege gale. Yana zula tangua hagula egi muthu wanamana avue muabonga ikhale amusaga. Luholo lumoshi nji, yajiya gutoga tangua ha gutotesela muthu watukalegela ndaga yabola nu mutshima umoshi.—Mulo. 3:3; 1 Phet. 1:22.
Yana zula tangua hagula phuta tuanamana iye, luholo lumoshi nji, gula muthu watukalegela ndaga yatusagesa yana zula tangua ha gumutotesela (Tala paragrafe 10)
11. Luholo lutshi gisambu giajiya gugukuatesa ha gutotesela athu ako?
11 Toga Yehowa ha gugukuatesa ha gutotesela athu ako.c Phangi Ann tuazuelela gu thunda udi mumonesa luholo gisambu giamukuatesele. Wazuelele egi: “Ngatogele Yehowa ha gutotesela muthu wagasue mu fami yetu mukunda nu ndaga jiabola tuazuelele nu jinyi tuakalegele. Gungima ngasonegele tata nu mukaji’enji munu gadizudile nenji mu ulo mukanda, ngaawambelele egi ngamitotesela.” Phangi Ann udi muzuela egi gukalagala ngenyi guakhalelego ndaga yaleba. Wazuelele egi: “Ngudi musha mutshima egi luholo ngana landula khadilo dia Yehowa dia gutotesela athu, yajiya gutuma tata nu mukaji’enji ha gulonguga ndaga jiavula jiatadila Yehowa.”
12. Mukunda natshi tudi naye gusha mutshima egi Yehowa wana kotelesa luholo tuana gudivua? (Ishima 3:5, 6)
12 Shila Yehowa mutshima uvi matangi aye ndo. (Tanga Ishima 3:5, 6.) Yehowa wana jiya ndaga jidi jiabonga mukunda nu esue. (Yesh. 55:8, 9) Gajiyilego gututoga nga hazonda ha gukalagala ndaga yajiya gutubatela malamba. Udi gututoga ha gutotesela athu ako, tudi naye gusha mutshima egi khadilo diene mbaditubatela gubonga. (Ngi. 40:4; Yesh. 48:17, 18) Uvi gula tudi mulandula matangi etu, yajiya gukhala lamba ha gutotesela athu ako. (Ish. 14:12; Yel. 17:9) Naomi tuazuelela gu thunda wazuelele egi: “Hathomo, ngakhalelego nu ngolo jia gutotesela mulumi’ami khadilo dienji dia gutala pornografi. Ngakhalele mumona gifua mbawuvutugila luko ndaga yene nga ndo mbawujimbila luholo ndaga yene yangusagesele. Ngakhalele mumona gami egi Yehowa udi gungukotelesa. Uvi gungima ngajile mukotelesa egi luholo Yehowa wakhalele mukotelesa matangi ami, yamoneselego egi wakhalele musuanguluga nu matangi ene. Yadiago, Yehowa wakhalele mujiya luholo ngakhalele gudivua, wajiyile nji egi khabu jiajiya gunguzula matangua avula. Uvi wakhalele mutshigina diago egi ngutotesele mulumi’ami.”d
KHALA MUTOTESELA ATHU AKO
13. Hagutadila Roma 12:18-21, itshi tudi naye gutshita?
13 Gula tuatotesela muthu watukalegela ndaga yatusagesa muavula, tudi naye guzula desizio dia gutuna guzuelela luko ndaga yene. Tudi naye nji gukalagala ndaga jiko jiavula. Gula muthu watukalegela ndaga yene udi phangi’etu wa Muklisto, tudi naye gukamba guhuima. (Mat. 5:23, 24) Ha fundo dia gumubambela khabu, tudi naye gumuvuila khenda nu gumutotesela. (Tanga Roma 12:18-21; 1 Phet. 3:9) Itshi yajiya gutukuatesa ha gutshita ngenyi?
14. Itshi tudi naye gutshita? Mukunda natshi?
14 Tudi naye gutadila muthu watukalegela gubola gifua luholo Yehowa wana gumutadila. Yehowa wana tala ndaga jiabonga jinyi athu ana kalagala. (2 Gudi. 16:9; Ngi. 130:3) Gula tudi nu khadilo dia gukamba makalegelo abola gudi athu ako mbatudi guamona, idi nji luholo lumoshi nu makalegelo abonga. Uvi gula tudi mutala makalegelo abonga a athu ako, mbayikhala yaleba ha guatotesela. Ha gufezegesa, phangi Jarrod wazuelele egi: “Yana khala yaleba ha gutotesela phangi gula ngatangiza ndaga jiavula jiabonga ngana suanguluga najio gudi muene ha fundo dia gutangiza gubola guenji.”
15. Mukunda natshi yajiya gukhala nu ndando ha guwambela muthu wagukalegela gubola egi ngagutotesela?
15 Ndaga iko ya ndando tudi naye gutshita idi guwambela muthu munu watukalegela gubola egi ngagutotesela. Mukunda natshi? Tutadilenu ndaga yakalegele phangi Naomi tuazuelela gu thunda. Wazuelele egi: “Mulumi’ami wanguhudile egi ‘wangutotesela ba?’ Tangua ngamuwambelele egi: ‘Ngagutotesela,’ ngahenele tedie. Ngakotelesele egi ngamutoteselego nu mutshima umoshi. Mu tangua diene ngamuwambelele nu mutshima umoshi egi: ‘Ngagutotesela.’ Tangua ngatotesele mulumi’ami, wadidile. Ngadihudile ha gumona luholo luadivuile muene muabonga. Sendese mu tangua diene, ngasendesele luko gumushila mutshima, tuana khala nji mafuta akola.”
16. Longo ditshi tuazula mukunda nu khadilo dia gutotesela athu ako?
16 Yehowa wana tshigina egi tutotesele athu ako. (Kol. 3:13) Matangua ako yajiya gukhala lamba ha gutotesela athu ako. Uvi tuajiya guatotesela gula tuatshita ngolo ha gubuita ndaga yene mutshima nu tuabemba guvua khabu. Gutshita ngenyi guajiya gutukuatesa ha gukudisa khadilo dia gutotesela athu.—Tala galuanda “Ndaga Thathu Jiajiya Gutukuatesa ha Gutotesela Athu Ako.”
GUBONGA WAJIYA GUHETA GULA UDI MUTOTESELA ATHU
17. Gubonga gutshi tuana heta gula tudi mutotesela athu ako?
17 Gudi nu ndaga jiavula jiana gututuma ha gutotesela athu ako. Tutadilenu ndaga jiko mukatshi dia ndaga jiene. Thomo, tuana landula gifezegeselo gia Yehowa Tata wetu wa khenda nu tuana tshigina gumusuanguluisa. (Luka 6:36) Ya mbadi, tuana khala nu gusuanguluga luholo Yehowa wana gututotesela. (Mat. 6:12) Ya thathu, tuana khala nu sante yabonga nu tuana khala nu ufuta wabonga n’enji.
18-19. Ndaga itshi yajiya gubua gula tudi mutotesela athu ako?
18 Gula tudi mutotesela athu ako, tuajiya guheta gubonga guavula gunu tuatangijilego. Ha gufezegesa, tutadilenu ndaga yabuidile phangi Denise tuazuelela gu thunda. Yala munu wakumine gamiyo gawo wazudile desizio dia gudishiya gungima dia usopheshi wenji, phangi Denise gajiyilego desizio dia zudile yala muene. Uvi yala muene wadihudile ha gumona luholo phangi Denise wamutotesele, hene wasendesele gulonguga Biblia nu Matemue a Yehowa.
19 Tuajiya gutangiza egi gutotesela muthu gudi mukatshi dia ndaga jia lamba jinyi tuajiyilego gutshita. Uvi tuajiya guheta gubonga guavula gula tuatshita ngenyi. (Mat. 5:7) Hene tudi naye gutshita ngolo ha gulandula gifezegeselo gia Yehowa gia gutotesela athu ako.
LUNGIMBO 125 “Heureux les miséricordieux”
a Mu longo edi, majina ako asombegesewe.
b Mu ndaga ya luholo elu, Muklisto wagasue udi naye guzula desizio dia ndaga idi naye gukalagala muene.
c Tala video eji jia ngimbo jiko: “Pardonnons-nous les uns aux autres,” “Aide-moi à pardonner,” nu “L’amitié retrouvée,” mu jw.org.
d Tudi mujiya muabonga egi gutala pornografi gudi ndaga yabola nu guana bata malamba, uvi Biblia ishigo muhana njila gudi yala nga mukhetu munu ganago guyitala ha gushiya ulo nu mukaji’enji nga mulumi’enji gula wayitadi.