LONGO DIA 7
LUNGIMBO 15 Vive le Premier-né de Jéhovah !
Gubonga Tuana Heta Luholo Yehowa Wana Gututotesela
‘Gutotesela gua giamatshidia guana katuga gudi aye.’—NGI. 130:4.
MU GUHIHIA
Tuza muzuelela ifezegeselo ya mu Biblia yana monesa luholo Yehowa wana gututotesela mu luholo lua gushimana. Tuza nji mumona luholo Yehowa wana gutukuatesa ha gukudisa khadilo dia gumuhana mersi mukunda nu khadilo dienji dia gutotesela.
1. Mukunda natshi yana khala lamba ha gukotelesa ndaga muthu udi mutshigina guzuela gula wazuela egi “ngagutotesela?”
LUHOLO lutshi wadivuile tangua muthu waguwambelele egi: “Ngagutotesela?” Yajiya gukhala egi wadivuile muabonga handaga wajiyile egi wazuelele mbimbi imoshi nga ndo wakalegele ndaga imoshi yamusagesele! Uvi mbimbi “ngagutotesela” yana kotelesa diago itshi? Muthu udi guguwambela mbimbi eyi udi mutshigina guzuela egi muavutugila diago ufuta wenu ba? Nga ndo udi mutshigina guzuela egi wabuitshi genji mulonga wene mutshima uvi ufuta wenu mbawushigo muvutuga gifua luholo wakhalele thomo ba? Hene yakhala lamba ha gukotelesa ndaga muthu udi mutshigina guzuela gula wazuela egi “ngagutotesela.”
2. Luholo lutshi Biblia yana zuelela gutotesela gua Yehowa? (Tala nji mbimbi goshi’a diyiji.)
2 Luholo Yehowa wana gututotesela luana khala diago lua gudisha nu luholo esue tuana totesela athu ako. Gushigo nga nu muthu wana totesela athu ako gifua Yehowa. Muyimbi wa ngimbo wazuelele mukunda nu Yehowa egi: “Gutotesela gua giamatshidia guana katuga gudi aye, hene tuana gugunemesa.”a (Ngi. 130:4) Yadiago, Yehowa wana gututotesela mu luholo lua giamatshidia. Muene wana gutuwambela gula gutotesela gua giamatshidia gudi mukotelesa itshi. Mu verse jiko, athu asonegele Biblia akalegele mbimbi imoshi ya Hebelu ha guzuelela luholo Yehowa wana gututotesela; uvi mbimbi yene ajiyilego guyikalegela ha guzuelela luholo athu ana guditotesela.
3. Mu luholo lutshi gutotesela gua Yehowa guana khala gua gudisha nu gua athu? (Yeshaya 55:6, 7)
3 Gula Yehowa watotesela muthu gubola, wana gumutotesela mayilago. Ngenyi yana gutukuatesa ha guvutugila luko ufuta wakola n’enji. Tuana suanguluga luholo Yehowa wana gututotesela mayilago nu wana guyikalagala mbala jiavula.—Tanga Yeshaya 55:6, 7.
4. Mu luholo lutshi Yehowa wana gutukuatesa ha gukotelesa gutotesela gua giamatshidia?
4 Gula luholo Yehowa wana totesela athu ludi lua gudisha nu lua athu, mu luholo lutshi athu ashigo atagana ajiya gukotelesa gula gutotesela gua giamatshidia gudi itshi? Yehowa wana kalegela ifezegeselo yabonga ha gutukuatesa ha gukotelesa luholo luana gututotesela muene. Mu longo edi tuza muzuelela ifezegeselo iko mukatshi dia ifezegeselo yene. Ifezegeselo yene iza mumonesa egi tangua tuana balumuna mutshima Yehowa wana gututotesela gubola guetu, iza nji mumonesa egi wana tshigina egi tuvutugile luko ufuta wetu n’enji. Tangua tuza mutadila ifezegeselo yene, iza gutukuatesa ha guzumba luko muavula Tata wetu wa mu dilu wazala pha nu khenda nu gisemo nu gumuhana mersi, handaga wana gututotesela mu maluholo a gudisha.
YEHOWA WANA KATULA GUBOLA GUETU
5. Ndaga itshi yana gubua gula Yehowa watutotesela gubola?
5 Mbala jiavula, Biblia yana fuanesa gubola nu ginemo giakola. Fumu Davidi wazuelele mukunda nu gubola guenji egi: ‘Gubola guami gudi guakoma, gudi guanema sulu, gudi guanema gubalega ginemo ngajiya gubata.’ (Ngi. 38:4) Uvi Yehowa wana totesela athu anyi ana balumuna mutshima. (Ngi. 25:18; 32:5) Mbimbi ya Hebelu yabalumuiwe egi “gutotesela” yana kotelesa egi “guthuphula” nga “gubata.” Hene tangua Yehowa wana gututotesela gubola guetu, wana gutukatula ginemo tuakhalele nagio. Yana khala gifua tuakhalele mubata ginemo giakola ha phanga uvi muene wagikatula.
‘Gutotesela’ (Ngi. 32:5)
6. Mu luholo lutshi Yehowa wana katula gubola guetu gualeha nu esue?
6 Biblia yana kalegela gifezegeselo giko gidi mumonesa luholo Yehowa wana gututotesela mayilago. Ngimbo 103:12 idi muzuela egi: ‘Muene udi mukhaphumuna gubola guetu gualeha nu esue, gifua mudi mazogelo a kumbi gualeha nu mayilo a kumbi.’ Khanda ya mazogelo a kumbi yana khala gualeha diago nu ya mayilo a kumbi. Mafundo ene agasue mbadi ajiyilego gudibungisa hamoshi nga hazonda. Yakotelesa egi Yehowa wana katula gubola guetu gualeha nu esue. Ndaga yene idi gututshiginyisa egi Yehowa wana gututotesela mayilago!
‘Gifua mudi mazogelo a kumbi gualeha nu mayilo a kumbi’ (Ngi. 103:12)
7. Itshi Biblia yana zuela mukunda nu luholo Yehowa wana tadila gubola guetu? (Mika 7:18, 19)
7 Luholo Yehowa wana katula gubola guetu gualeha nu esue mu luholo lua gifuanesa, idi mukotelesa egi wana landula gutangiza gubola guene ba? Ndo sha. Fumu Ezekiase wasonegele mukunda nu Yehowa egi: ‘Aye watshuigile gubola guami guagasue.’ (Yesh. 38:9, 17) Mbimbi eji jia gifuanesa jidi mumonesa egi Yehowa wana bishila gualeha gubola gua athu ana balumuna mutshima, gubola guene guajiyilego gumonega luko. Verse yene yajiya gubalumuiwa nji egi: ‘Wabuishile [gubola guami] gifua guakalegewego.’ Biblia yana zuelela ndaga eyi mu luholo luko lua gifuanesa mu mukanda wa Mika 7:18, 19. (Tanga.) Verse jiene jidi muzuela egi Yehowa wana bishila gubola guetu mu muta udi nu jinga dialeha. Mu tangua dikulu gula muthu wabuisa gima mu muta udi nu jinga dialeha, gakhalelego nu luholo lua gugimona luko.
‘Aye watshuigile gubola guami guagasue’ (Yesh. 38:17)
‘Aye mbawusonona gubola guetu ha jinga’ (Mika 7:19)
8. Malongo atshi tuazula mu gitshinyi egi?
8 Biblia idi mumonesa haphelo egi gula Yehowa watotesela muthu gubola, wana gumutotesela mayilago, ngenyi muthu muene gajiyilego luko gudisagesa mukunda nu gubola guene. Yadiago, gifua luholo Davidi wazuelele egi: “Gusuanguluga gudi nu athu anyi Nzambi waatotesele gubola guawo nu watshuigile masumu awo. Gusuanguluga gudi nu muthu Yehowa mbagashigo mutangiza luko gubola guenji.” (Roma 4:7, 8) Guene gutotesela gua giamatshidia!
YEHOWA WANA WEVUA GUBOLA GUETU
9. Luholo lutshi Biblia yana gutukuatesa ha gumona egi Yehowa wana gututotesela mayilago?
9 Yehowa udi mukalegela mbimbi jiko jia gifuanesa ha gutukuatesa ha gumuhana mersi luholo gibawu giahanele muene giana kuatesa ha gutotesa gubola gua athu ana balumuna mutshima. Biblia idi muzuela egi Yehowa wana wevua nu wana phelegetesa gubola guetu. Gutshita ngenyi guana phelegetesa muthu wakalagala gubola. (Ngi. 51:7; Yesh. 4:4; Yel. 33:8) Yehowa udi mumonesa gubonga ndaga yene yana bata, hadi muzuela muene egi: ‘Ngatshima gubola guenu guahaga matona abenguluga, ame mbangumiphelegetesa gifua phezo. Gula gudi guabenga sha baba, mbaguphelegeta gifua uvuji wa imeme ilaphe.’ (Yesh. 1:18) Yana khala lamba ha gukatula matona abenguluga nga alababa gu mulele. Yehowa udi mukalegela mbimbi eji jia gifuanesa ha gututshiginyisa egi gubola guetu guajiya guphelegetesewa hagula gumonegago luko.
‘Ngatshima gubola guenu guahaga matona abenguluga, ame mbangumiphelegetesa gifua phezo.’ (Yesh. 1:18)
10. Mbimbi jitshi jiko jia gifuanesa jidi mumonesa luholo Yehowa wana gututotesela nu mutshima umoshi?
10 Gifua luholo tuayimonele mu longo dia balega, Biblia yana fuanesa nji gubola nu “mikudi.” (Mat. 6:12; Luka 11:4) Tangua diagasue tuana gubua mu gubola, yana khala gifua mukudi wetu udi muya nu gudivudisa muavula diago. Tudi naye gufuta Yehowa mukudi wakoma! Uvi tangua diana gutotesela muene gubola, yana khala gifua wakatula mukudi wene tuakhalele naye gufuta. Ganago gututoga ha gufuta mukunda nu gubola guatutotesele gale muene. Gifezegeselo egi giabonga gidi mumonesa gusuanguluga tuana khala nago tangua Yehowa wana gututotesela!
“Tutotesele gubola guetu” (Mat. 6: 12)
11. Itshi Biblia yana tshigina guzuela tangua yana monesa egi gubola guetu “guatotesewe”? (Makalegelo 3:19)
11 Yehowa ganago gukatula phamba mikudi yetu nga gubola guetu uvi wana gututotesela. Mbimbi ya Greke yabalumuiwe egi gutotesela idi mukotelesa gumuanga mayilago. (Tanga Makalegelo 3:19.) Ha gukotelesa muabonga luholo Yehowa wana muanga gubola guetu, tutadilenu gifezegeselo egi. Mu tangua dikulu akhalele mukalegela encre yagufutula nu carbone nu gomme nu meya ha gusonega. Muthu wajiya guzula eponje yateba ha gumuanga isona yene. Hene tangua akhalele ‘mumuanga’ mukudi wa muthu, mukudi wene wakhalele mutota mayilago. Ndaga jiakhalele jia gusonega ha diyiji diene, jiakhalelego mumonega luko. Yakhalele gifua mukudi wene wakhalelego guene. Tudi diago nu gusuanguluga ha gujijya egi gula Yehowa watutotesela gubola guetu, yana khala gifua tuakalegelego gubola guene nga hazonda!—Ngi. 51:9.
“Hagula gubola guenu gutotesewe” (Makal. 3: 19)
12. Longo ditshi tuazula mu gifezegeselo gia tuta diakoma?
12 Yehowa udi mukalegela mbimbi jia luholo lumoshi ha gumonesa luholo luana gututotesela muene gubola guetu. Udi muzuela egi: ‘Mbangutotesa gubola guaye gifua gungima dia tuta dia mvula, mbangukatula masumu aye gifua tuta diakoma.’ (Yesh. 44:22) Gula Yehowa watutotesela gubola, yana khala gifua udi mukalegela tuta diakoma ha gusuega gubola guene hagula gumonegago luko gumeso athu agasue.
‘Mbangutotesa gubola guaye gifua gungima dia tuta’ (Yesh. 44:22)
13. Luholo lutshi tuana gudivua gula Yehowa watutotesela gubola guetu?
13 Ndaga yene idi gutulongesa itshi? Idi gutulongesa egi gula Yehowa watutotesela gubola, tushigo naye gulandula gudisagesa mukunda nu gubola guene. Nzambi wakatudile mikudi yetu mayilago mu njila ya mahatshi a Yesu Klisto. Gula Yehowa watutotesela gubola, yana khala gifua tuakalegelego gubola guene. Yehowa wana tshita ngenyi gula tuabalumuna mutshima.
YEHOWA WANA GUTUKUATESA HA GUVUTUGILA LUKO UFUTA WABONGA N’ENJI
Luholo Tata wetu wa mu dilu wana gututotesela, yana gutukuatesa ha gukolesa luko ufuta wetu n’enji (Tala paragrafe 14)
14. Mukunda natshi tudi naye gusha mutshima egi Yehowa mbawututotesela? (Tala nji ifuanesa.)
14 Gula Yehowa watutotesela gubola, tuajiya luko gubua mafuta enji. Gujiya ndaga yene guana gutukuatesa ha gutuna gudisagesa muavula mukunda nu gubola guetu. Tushigo naye guvua woma egi Yehowa wana gutuvuila khabu nu wana kamba luholo lua gutuhana ndola. Gajiyilego gutshita ndaga ya luholo elu nga hazonda. Gula Yehowa watuwambela egi watutotesela, mukunda natshi tudi naye gumushila mutshima? Yehowa wawambelele profete Yelemiya ha gusonega egi: ‘Mbanguatotesela gubola guawo, mbangushigo muwunguluga luko masumu awo.’ (Yel. 31:34) Mupostolo Phaula wavutugidile mbimbi eji tangua dia sonegele muene egi: “Mbangutangizago luko nga hazonda gubola guawo.” (Heb. 8:12) Uvi mbimbi jiene jidi diago mukotelesa itshi?
‘Mbangushigo muwunguluga luko masumu awo’ (Yel. 31:34)
15. Mu luholo lutshi Yehowa ganago guwunguluga luko gubola guetu?
15 Mu Biblia, mbimbi “guwunguluga” yanago gumonesa phamba gutangiza ndaga imoshi ngenyi yabalegele gale. Uvi mbimbi yene yajiya nji gumonesa muthu udi mutshita ndaga imoshi ngenyi. Nzangi yakhokhewe hehi nu Yesu yamuwambelele egi: “Yesu, ngutangize tangua mbawuza mu Ufumu waye.” (Luka 23:42, 43) Nzangi yene yakhalelego phamba mutoga Yesu ha gumuwunguluga mu tangua diene. Mvutu yamuhanele Yesu yamonesele egi mbawumukalegela ndaga imoshi, yakotelesa egi mbawumufuzumuna. Hene tangua Yehowa wana zuela egi mbagashigo muwunguluga luko gubola guetu, wana monesa egi mbagashigo luko mutshita nga ndaga imoshi mukunda nu gubola guene. Mbagashigo luko gutuhana ndola mu masugu adi muza mukunda nu gubola gunu guatutotesele gale muene.
16. Mbimbi itshi iko ya gifuanesa Biblia yana kalegela ha gutukuatesa ha gukotelesa luholo Yehowa wana gututotesela?
16 Biblia yana kalegela mbimbi iko ya gifuanesa ha gutukuatesa ha gukotelesa luholo Yehowa wana gutukatula mu uhiga wa gubola. Yana zuela egi luholo tushigo athu atagana tudi “ahiga a gubola.” Uvi tangua Yehowa wana gututotesela gubola guene, tuana gubua gifua athu ‘akudiwe mu uhiga wa gubola.’ (Roma 6:17, 18; Gumo. 1:5) Yadiago, tangua tuana jiya egi Yehowa watutotesela gubola guetu, tuana gusuanguluga gifua athu anyi akudiwa mu uhiga.
“Muakudiwe mu uhiga wa gubola” (Roma 6: 18)
17. Mukunda natshi tuazuela egi gula Yehowa watutotesela gubola yana khala gifua watusagi? (Yeshaya 53:5)
17 Tanga Yeshaya 53:5. Biblia yana monesa egi luholo tudi enya gubola, tudi gifua athu adi nu misongo yana shiya athu. Yehowa wahanele monyo wa mun’enji gifua gibawu ha gutusaga gu misongo yene. (1 Phet. 2:24) Gula tuabua mu gubola, tuana bolesa ufuta wetu nu Yehowa. Uvi mu njila ya gibawu, Yehowa wajiya gututotesela gubola guene hagula tukuate luko ufuta wakola n’enji. Gula muthu wasagewa misongo yakola wana suanguluga muavula, luholo lumoshi nji nu esue, tuana suanguluga muavula gula Yehowa watutotesela gubola handaga yana gutukuatesa ha gukuata luko ufuta wakola n’enji.
“Tuahetele guhuima mu lamba diamuenene muene” (Yesh. 53:5)
GUBONGA TUANA HETA LUHOLO YEHOWA WANA GUTUTOTESELA
18. Malongo atshi tuazula mu mbimbi jia gifuanesa jidi mu Biblia jidi mumonesa luholo Yehowa wana gututotesela? (Tala galuanda, “Luholo Yehowa Wana Gututotesela.”)
18 Malongo atshi tuazula mu mbimbi jia gifuanesa jidi mu Biblia jidi mumonesa luholo Yehowa wana gututotesela? Tualonguga egi, tangua Yehowa wana gututotesela, wana gututotesela mayilago. Gutshita ngenyi guana gutukuatesa ha guvutugila luko ufuta wabonga n’enji. Guana gutukuatesa nji ha gujiya egi gutotesela gua giamatshidia gudi kado. Tudi mujiya egi luholo Yehowa wana gututotesela idi kado handaga wana gutuzumba nu wana gutuvila khenda jiavula, uvi ishigo esue tuana gumutoga.—Roma 3:24.
19. a) Ndaga itshi yana gututuma ha gukhala nu gusuanguluga? (Roma 4:8) b) Itshi mbatuzuelela mu longo dia landula?
19 Tanga Roma 4:8. Mukut’etu agasue tudi nu gusuanguluga luholo Yehowa wana ‘gututotesela’! (Ngi. 130:4) Gula tudi mutshigina egi Yehowa atutotesele, tudi naye gutshita ndaga imoshi ya ndando. Yesu wazuelele egi: “Gula mushigo mutotesela athu gubola guawo, Sh’enu udi mu dilu mbagashigo gumitotesela nji gubola guenu.” (Mat. 6:14, 15) Idi nu ndando egi tulandule khadilo dia Yehowa dia gutotesela athu ako. Longo dia landula mbadimonesa luholo tuajiya gulandula khadilo diene.
LUNGIMBO 46 Merci, Jéhovah
a Mu zuelelo dia Hebelu ana kalegela mbimbi yabalumuiwe egi ‘gutotesela,’ ha guzuelela gutotesela gua giamatshidia, ngatshima guana khala nu maluholo ako a gutotesela. Mu Biblia jiavula, akatudile mbimbi eji jia ndando jidi mu mukanda wa Ngimbo 130:4, uvi mu La Bible. Traduction du monde nouveau verse yene yabalumuiwe gifua luholo yakhalele mu zuelelo dia gishina.