Kadikila Muabonga Mukanda Qu’enseigne la Bible ? (Itshi Biblia Yana Gulongesa?)

Gula muthu wana gulongesa Biblia udi gulonguga ndaga Biblia yana lume gulongesa nu gujikadila, mba ukula muabonga mu nyuma. (Ngi. 1:1-3) Gila tuakadigila malongo a ndando adi mu mukanda Qu’enseigne la Bible ? tuajiya gukuatesa athu tuana gulongesa Biblia akule mu nyuma.

Mihu ya Gisendeselo: Mukhapho wagasue wasendesa nu mihu, mvutu jia mihu yene jidi mukatshi dia mukhapho. Udi naye guhula mihu yene hagumuhana nzala ya ndaga muatshigina gulonguga. Nga wajiya gumuhana njila ya guzuela muguhihia gu muhu nu muhu. Gila ahaneleko mvutu jiatagana, ishigo ndo tangua dia gumuwambela mvutu jiene. Mvutu jienji jiajiya gugukuatesa hagujiya ndaga jitshi udi naye gumukotelesela.​—Ish. 16:23; 18:13.

Apendise: Gula muthu wana gulongesa Biblia wakotelesa nu watshigina malongo tangua udi gumulongesa mu baparagrafe ya mukanda, wajiya gumuleza egi gungima atadile hakhenji matangi ako adi mu apendise, adi guzuelela longo mualonguga n’enji. Lusugu luko mba mulonguga n’enji, wajiya guzula minuta yazonda hagutala gila wakuatshi longo diene. Uvi, gila wamona egi ashiko gukotelesa nga gutshigina longo diene, udi naye gutanga n’enji apendise nga gitshinyi gienji, gungima wajiya gumuhula mihu yiwalondega gumatuamena.

Galuanda ga Guvutugila: Tadilenu galuanda gadi gu suga ya mukhapho wagasue gadi nu mvutu jia mihu ya gisendeselo gia mukhapho. Wajiya gukalegela galuanda gene hagujiya gila muthu wana gulongesa Biblia wakuatshi gishina gia matangi a ndando, nga wajiya guakotelesa hakhenji gudi muthu muko. Tangenu n’enji mvutu imoshi imoshi idi mu galuanda gene, nu verse yagasue ya Biblia yahanewa. Hula muthu wana gulongesa, azole matangi adi mu verse jiene hagukotelese mvutu idi mu galuanda.​—Makal. 17:2, 3.