Mihu Yana Guhula Athu Ana Gutanga Mikanda Yetu

Mukunda natshi 2 Samuele 21:7-9 idi muzuela egi Davidi ‘wavuidile Mefiboshete khenda’ uvi gungima wamuhana ha mago dia athu ha gumushiya?

Athu ako ana tanga lumene elu phushi-phushi ana gudihula nji muhu owu. Uvi lumene luene ludi muzuelela athu mbadi akhalele nu jina dia Mefiboshete. Tutadilenu luko lumene luene ha gujiya ndaga jiakalegewe diago.

Fumu Saula wa gu Isalele wakhalele nu ana a mala sambadi nu a akhetu mbadi. Mun’enji wa thomo wakhalele Yonatana. Gungima Fumu Saula wavualele mona muko wa yala nu Lisepha, jina dienji diakhalele Mefiboshete. Uvi, Yonatana nji wavualele mona wa yala, jina dienji Mefiboshete. Hene, Fumu Saula wakhalele nu mona mu jina dia Mefiboshete nu mujigulu mu jina diene.

Mu tangua dimoshi ngenyi, Fumu Saula gakhalelego luko muzumba enya Gibeona anyi akhalele gu Isalele nu wakambele nji guashiya mukut’awo agasue. Yajiya gukhala egi avula mukatshi diawo ashiyiwe. Ndaga yene yakhalele yabola diago. Mukunda natshi? Handaga mu tangua dia Yoshua, mafumu a Isalele akotele gikotelo gia guhuima nu enya Gibeona—Yosh. 9:3-27.

Gikotelo giene giakhalele nu ndando mu uhinyinyi wa Fumu Saula. Uvi Saula ganemeselego gikotelo giene handaga wakambele gushiya enya Gibeona. Ndaga yene yakalegele egi ‘Saula nu enya fami yenji akhale nu mukudi wa mahatshi.’ (2 Sam. 21:1) Gungima, Davidi wabuile fumu. Enya Gibeona anyi asalele nu monyo, awambelele Davidi ndaga jiabola jiakalegele Saula. Davidi wahudile enya Gibeona ndaga akhalele mutshigina egi a akalegele ha gutotesela Saula mukunda nu gubola guakalegele muene. Ngenyi, Yehowa wajiya luko gukuatesa mavu awo. Ha fundo dia gutoga makuta, enya Gibeona atogelele egi ana a mala sambadi a muthu ‘watshiginyile guashiya’ mukut’awo agasue, akuatewe nu ashiyiwe nji. (Lutang. 35:30, 31) Davidi wakalegele ndaga yatogele ene.—2 Sam. 21:2-6.

Mu tangua diene, Saula nu Yonatana akhalele afui gale gu ita, uvi Mefiboshete mun’a Yonatana wakhalele nu monyo. Wakalegele aksida hakhalele muene mona, hene wabuile gikata (kikalaba). Gadinginyishilego mu ndaga jia khakha wenji ha gushiya enya Gibeona. Davidi wakotele gikotelo nu Yonatana ha gukhala mafuta, gikotelo giene giakhalele naye gubatela ajugulu a Yonatana gubonga. Mefiboshete mun’a Yonatana wahetele nji gubonga gua gikotelo giene. (1 Sam. 18:1; 20:42) Biblia idi muzuela egi: ‘Mukunda nu gudiloga guadilogele muene gutuama dia Yehowa, fumu [Davidi] wavuile khenda mukunda nu Mefiboshete mun’a Yonatana, mujigulu wa Saula.’—2 Sam. 21:7.

Davidi wakalegele ndaga enya Gibeona amutogele. Waahanele ana a Saula mbadi a mala, mukatshi diawo muakhalele nji Mefiboshete nu ajigulu a Saula thano. (2 Sam. 21:8, 9) Ndaga yakalegela Davidi yatshitshile egi mavu akhadigo luko nu mukudi wa mahatshi.

Lumene elu ludi gutulongesa ndaga jiavula. Mukhuala wa Nzambi wakhalele muzuela haphelo egi: ‘Ana ajiyilego gushiyiwa mukunda nu gubola guakalegele atata awo.’ (Mikh. 24:16) Nga ana mala a Saula mbadi nu ajugulu enji 5 akalegelego gubola, nga Yehowa gatshiginyilego egi ashiyiwe. Mukhuala wakhalele muzuela luko egi: “Muthu nu muthu mbawushiyiwa mukunda nu gubola guenji hakhenji.” Yajiya gukhala egi ana nu ajigulu a Saula sambadi anyi afuile, adibungishile nu Saula ha gushiya enya Gibeona. Hene, mukut’awo agasue sambadi ashiyiwe mukunda nu gubola guawo.

Lumene elu ludi gutulongesa egi muthu gajiyilego gutangiza nga guzuele egi ngakalagala ndaga yabola handaga angutogi ha guyikalagala. Uvi, udi naye gubata ginemo gia ndaga jidi mukalagala muene. Mukanda wa Ishima udi muzuela egi: ‘Ujiye muabonga ndaga udi mutshita nu gui udi muya.’—Ish. 4:24-27; Ef. 5:15.