Luholo Tuajiya Gukolesa Gutshigina Guetu mu Laji Diatuhanele Yehowa dia Mavu Ahe-ahe

1-2. Itshi tudi naye gutshita tangua tudi munengenena mavu ahe-ahe?

TUANA hana Yehowa mersi luholo atulayele egi mbawukatula mavu awa abola ha guhaga mavu ahe-ahe. (2 Phet. 3:13) Tushigo mujiya tangua Yehowa mbawutagenesa laji diene, uvi ndaga jidi mukalegewa mangino jidi mumonesa egi ishigo luko gualeha.​—Mat. 24:32-34, 36; Makal. 1:7.

² Ngatshima tudi gale mu giamatshidia sendese mualeha, mukut’etu agasue tudi naye gukolesa gutshigina guetu mu laji diene. Mukunda natshi? Handaga ikhale tudi nu gutshigina guakola guajiya nji guleba. Mupostolo Phaula watamegele gutshigina gunu gushigo guakola egi, “disumu diana gutukanga njila muphushi.” (Heb. 12:1) Ha gula gutshigina guetu gulebigo, tudi naye gukhala nu khadilo dia gutangiza muavula ndaga jidi mumonesa egi mavu ahe-ahe ashigo luko gualeha.​—Heb. 11:1.

3. Itshi tuza muzuelela mu longo edi?

³ Mu longo edi tuza mumona maluholo thathu tuajiya gukolesa gutshigina guetu mu laji diahanele Yehowa dia mavu ahe-ahe. Ya thomo, gutangiza muavula mulambu wa Yesu, ya mbadi gutangigiza ngolo jia Yehowa nu ya thathu gudihana muavula mu ndaga jia mu nyuma. Gungima tuza mumona luholo ndaga Yehowa wawambelele Habakuka jiajiya gukolesa gutshigina guetu. Tuzuelelenu thomo ndaga tuajiya gutagana najio mangino, jinyi jiajiya gutoga egi tukhale nu gutshigina guakola mu laji diatulayele Yehowa dia mavu ahe-ahe.

NDAGA JIANA TOGA EGI TUKHALE NU GUTSHIGINA GUAKOLA

4. Badesizio atshi tuana zula anyi ana toga egi tukhale nu gutshigina guakola?

⁴ Lusugu nu lusugu, tuana zula ba desizio ana toga egi tukhale nu gutshigina guakola. Ha gufezegesa tuana zula ba desizio mu ndaga yatadila mafuta, saga, makhalasa, ulo, ana nu mudimo. Tudi naye gudihula egi: ‘Badesizio ami ana monesa egi ngana jiya egi gualeha ndo, Nzambi mbawushiya mavu awa ha guhaga mavu ahe-ahe? Nga ndo ngana tshita ndaga gifua athu ana tangiza egi gula muthu wafua, ndaga jiagasue jiasugi ba?’ (Mat. 6:19, 20; Luka 12:16-21) Gula tudi nu gutshigina egi mavu ahe-ahe ashigo luko gualeha, mbayitukuatesa ha guzula badesizio abonga.

5-6. Mukunda natshi tudi naye gukhala nu gutshigina guakola mu tangua dia lamba? Hana gifezegeselo.

⁵ Tuana tagana nji nu malamba anyi ana toga egi tukhale nu gutshigina guakola. Ha gufezegesa, tuajiya gutagana nu usageshi, tuajiya gukata misongo yakola nga gutagana nu ndaga jiko jiajiya gutulebesa muila. Thomo tuajiya gukolesela gula tuatagana nu malamba ene. Uvi gula ashigo muhua muphushi yana toga egi, tukhale nu gutshigina guakola ha gulandula gukolesela mu malamba ene nu ha gukalegela Yehowa nu gusuanguluga guagasue.​—Roma 12:12; 1 Phet. 1:6, 7.

⁶ Gula tudi mutagana nu lamba, tuajiya gutangiza egi mavu ahe-ahe atulayele Yehowa mbaashigo muza nga hazonda. Ndaga yene idi mumonesa egi tushigo nu gutshigina guakola ba? Ndo sha. Tuzulenu gifezegeselo. Gula tudi mukatshi dia gishiyo giakola, tuajiya gutangiza egi mvula mbayishigo munoga. Uvi gungima mvula yana noga. Luholo lumoshi nji gula tualeba muila tuajiya gutangiza egi mavu ahe-ahe mbaashigo muza. Uvi gula tudi nu gutshigina guakola mbatusha mutshima egi Nzambi mbawutagenesa ndaga jiatulayele muene. (Ngi. 94:3, 14, 15; Heb. 6:17-19) Ngenyi mbatulandula gusha ndaga jia Yehowa ha fundo dia thomo mu monyo wetu.

7. Mu ndaga itshi tudi naye gumonesa gutema?

⁷ Tuana khala nji nu funu ya gutshigina guakola ha gulongesa lukuma luabonga. Athu avula ana tangiza egi “lukuma luabonga” tuana gualongesa mukunda nu mavu ahe-ahe atulayele Nzambi lushigo lua giamatshidia. (Mat. 24:14; Ezek. 33:32) Tudi naye gumonesa gutema hagula esue nji tukhadigo mutangiza gifua ene. Ha gula ndaga yene itubuilago tudi naye gulandula gukolesa gutshigina guetu. Tutadilenu maluholo thathu tuajiya gukolesa gutshigina guetu.

GUTANGIZA MUAVULA MULAMBU WA YESU

8-9. Luholo lutshi gutangigiza mulambu wa Yesu guajiya gukolesa gutshigina guetu?

⁸ Luholo lua thomo tuajiya gukolesa gutshigina guetu, idi gutangigiza mulambu wa Yesu. Mulambu wa Yesu wana gututshiginyisa egi ndaga jiatulayele Nzambi mbajitagana. Gula tudi mutangigiza muavula ndaga yatumile Yehowa ha guhana mulambu nu ndaga jiakalegele muene ha guhana mulambu wene, mbayitukuatesa ha gukolesa gutshigina guetu egi laji dia Yehowa dia gutuhana monyo wa mayilago mu mavu ahe-ahe mbaditagenesewa. Mukunda natshi tuazuela ngenyi?

⁹ Itshi Yehowa wakalegele ha guhana mulambu? Wakatudile Mun’enji mumoshi ha mumoshi mudilu, futa dienji wakola ha guza muvualewa ha mavu. Hajile Yesu ha mavu, wataganele nu malamba avula. Wasagesewe, gungima wafuile gufua gumoshi gua lamba. Mulambu wahanele Yehowa wakhalele diago nu ndando yavula. Yehowa tata wetu wa guzumba gajiyilego gutshigina egi mun’enji amone malamba nu afue hagula esue tujinge muabonga phamba mukunda nu masugu azonda. (Yone 3:16; 1 Phet. 1:18, 19) Luholo Yehowa wahanele mun’enji wa guzumba, mbawutshita yagasue hagula tuhete monyo wa mayilago watulayele muene mu mavu ahe-ahe.

GUTANGIGIZA NGOLO JIA YEHOWA

10. Ha gutadila Efeso 3:20, itshi Yehowa wajiya gutshita?

¹⁰ Ndaga ya mbadi yajiya gutukuatesa ha gukolesa gutshigina guetu idi gutangiza ngolo jia Yehowa. Yehowa udi nu ngolo jia gutagenesa ndaga jiagasue jialayele muene. Athu avula ana tangiza egi laji diatuhanele Yehowa dia monyo wa ivo nu ivo, diajiyilego gutagenesewa nga hazonda. Uvi sendese mualeha Yehowa wana laya ndaga jinyi athu ajiyilego gutagenesa nga hazonda. Phamba muene wajiya gutagenesa ndaga jiene, handaga udi Nzambi wa Ngolo Jiagasue. (Yobo 42:2; Mako 10:27) Hene esue tuajiyilego gudihula gula Yehowa walaya ndaga imoshi inyi athu adi mumona egi yajiyilego gutagenesewa.​—Tanga Efeso 3:20.

11. Hana gifezegeselo gia ndaga imoshi yalayele Yehowa yakhalele mumonega gifua yajiyilego gutagenesewa. (Tala galuanda “Ndaga jia Gushimana Jialayele Yehowa Jiatagenesewe.”)

¹¹ Tutadilenu ndaga Yehowa walayele akombeledi enji mu tangua dikulu. Ndaga jiene jiakhalele mumonega gifua jiajiyilego gutagenesewa. Wawambelele Abalahama nu Sara egi mbaavuala mona ngatshima akhalele athu agukola. (Gis. 17:15-17) Wawambelele nji Abalahama egi mbawuhana ajigulu enji mavu a Kanana. Uvi ajigulu a Abalahama atshitshile ivo yavula mu uhiga gu Ejipitu, yakhalele mumonega gifua ndaga yalayele Yehowa mbayishigo mutagenesewa. Uvi gungima yatagenesewe. Yehowa wazuelele egi Elizabete mbawuvuala mona ngatshima wakhalele muthu wa gukola. Gungima Yehowa walayele nji Madiya munu wakhalele khenji gabungishilego muila nu yala egi mbawuvuala mona yala, ha gutagenesa ndaga yalayele muene sendese mualeha mu dihia dia Edene!​—Gis. 3:15.

12. Ndaga jitshi Yoshua 23:14 nu Yeshaya 55:10, 11 yana zuela mukunda nu ngolo jia Yehowa?

¹² Gula tudi mutangigiza ndaga jiagasue jialayele Yehowa nu luholo ndaga jiene jiatagenesewe, mbatukotelesa diago egi udi nu ngolo jiavula. Ngenyi mbatukolesa gutshigina guetu mu laji dienji dia gutuhana mavu ahe-ahe. (Tanga Yoshua 23:14; Yeshaya 55:10, 11.) Ndaga yene mbayitukuatesa ha guwambela athu ako egi laji diatuhanele Yehowa dia mavu ahe-ahe dishigo nzoji. Yehowa walayele egi mbawuhaga dilu dihe-dihe nu mavu ahe-ahe. “Mbimbi eji jidi naye guhagewa mutshima nu jidi jia giamatshidia.”​—Gumo. 21:1, 5.

KHALA GUDIHANA MU NDAGA JIA MU NYUMA

13. Luholo lutshi gudibungisa guajiya gutukuatesa ha gukolesa gutshigina guetu? Hana gifezegeselo.

¹³ Ndaga ya thathu yajiya gutukuatesa ha gukolesa gutshigina guetu, idi gudihana muavula mu ndaga jia mu nyuma. Tutadilenu gubonga tuana heta tangua tuana guya mu gudibungisa gua mu hungu. Ha gufezegesa, phangi Anna, watshitshile ivo yavula mu mudimo wa tangua diagasue udi muzuela egi: “Gudibungisa gua mu hungu guana gungukuatesa ha gukolesa gutshigina guami. Ikhale phangi udi mutshita diskur gashigo mulongeshi wabonga nga ndo gashigo muzuela ndaga imoshi ihe-ihe, matangua avula ngana heta ndaga imoshi yana gungukuatesa ha gukotelesa Biblia muabonga nu ha gukolesa gutshigina guami.”b Tuajiya nji gukolesa gutshigina guetu gula tudi mutegelela komantere aphangi adi muhana mu gudibungisa.​—Roma 1:11, 12; 10:17.

14. Luholo lutshi mudimo wa gulongesa wana kolesa gutshigina guetu?

¹⁴ Tuana kolesa nji gutshigina guetu tangua tuana kalagala mudimo wa gulongesa. (Heb. 10:23) Phangi Barbara wana kombelela Yehowa ivo 70 yabalega gale. Udi muzuela egi: “Mudimo wa gulongesa wana kolesa gutshigina guami. Tangua ngana wambela athu ako ndaga jia gushimana mbajikalagala Yehowa, ngana kolesa diago gutshigina guami.”

15. Luholo lutshi gulonguga guetu hakhetu guana kolesa gutshigina guetu? (Tala nji ifuanesa.)

¹⁵ Ndaga iko yana kolesa gutshigina guetu idi: Gulonguga guetu hakhetu. Phangi Susan wakotelesele egi gukhala nu programe ya gulonguga guana gumukuatesa muavula. Udi muzuela egi: “Mu lubingo, ngana londega longo dia Inzo Yaleha ya Mutaledi mbatulonguga phoso idi muza. Mu lusugu lua thomo nu lua mbadi, ngana londega gudibungisa gua mukatshi dia phoso. Mu masugu ako asala, ngana tshita gulonguga guami hakhami.” Luholo phangi Susan wana nemesa programe yenji ya gulonguga, yana gumukuatesa ha gukolesa gutshigina guenji. Phangi Irene wakalegele ivo yavula gu biro diakoma dia Matemue a Yehowa wakotelesele egi gulonguga profesi jia Biblia, guana kolesa gutshigina guenji. Udi muzuela egi: “Ngana gudihula muavula ha gumona luholo profesi jia Biblia jiana tagenesewa ikhale mu ndaga jiazonda zonda.”c

‘MBAYITAGENESEWA DIAGO’

16. Mukunda natshi tudi muzuela egi ndaga Yehowa wawambelele Habakuka jidi gututadila nji mangino? (Hebelu 10:36, 37)

¹⁶ Akombeledi ako a Yehowa ana nengenena gushiyiwa gua mavu awa abola sendese mualeha. Athu ako ana tangiza egi ndaga jialayele Nzambi jidi mushipha ha gutagenesewa. Profete Habakuka wakhalele gudisagesa nji mukunda nu ndaga yene, hene Yehowa wamuwambelele egi: ‘Vizio mbayitagana mu tangua diatombewe, tangua diene didi muza muphushi. Ndaga ngudi guguwambela idi ya giamatshidia. Ngatshima idi mulalega, landula gunengenena. Handaga mbayitagana diago. Mbayishigo mulalega!’ (Hab. 2:3) Nzambi wazuelele ndaga eji phamba mukunda nu Habakuka, nga ndaga jiene jidi nji gututadila esue? Nyuma ya Yehowa yakuatesele mupostolo Phaula ha gukalegela mbimbi jiene ha gukuatesa Aklisto adi munengenena guza gua mavu ahe-ahe. (Tanga Hebelu 10:36, 37.) Ngatshima, laji diatuhanele Yehowa dia gutuhuluisa didi mumonega gifua didi mushipha, tudi naye gusha mutshima egi ‘mbadimutagenesewa diago, mbadishigo mulalega!’

17. Luholo lutshi phangi mumoshi wa mukhetu wakalegele longo Yehowa wahalene Habakuka?

¹⁷ Akombeledi avula a Yehowa ana tumagela longo dienji dia “gulandula gunengenena.” Ako mukatshi diawo ana nengenena gale sendese mualeha. Ha gufezegesa phangi Louise, wasendesele gukalegela Yehowa mu 1939. Udi muzuela egi: “Mu tangua diene ngakhalele mutangiza egi Alemagedona adi naye guza gutuama egi nguzule diplome. Uvi yakalegewego ngenyi. Mu ivo yene yagasue, ngakhalele mutanga mene jia akombeledi a Yehowa akhalele munengenena gutagenesewa gua ndaga jialayele muene, gifua Nowa, Abalahama nu Yozefe nu athu ako. Gutshita ngenyi guangukuatesele ha gunengenena tangua Yehowa mbawutagenesa ndaga jialayele muene. Gusha mutshima egi ndaga jialayele Yehowa mbajimutagenesewa, guangukuatesele nu athu ako ha gujiya egi mavu ahe-ahe ashigo luko gualeha.” Aphangi ako ana kombelela nji Yehowa sendese mualeha, ana tshiginyisa ndaga yene!

18. Luholo lutshi gutala ima yafugile Nzambi guajiya gutukuatesa ha gukolesa gutshigina guetu mu laji diatuhuile muene dia mavu ahe-ahe?

¹⁸ Idi yadiago egi mavu ahe-ahe khenji ajile gale ndo. Uvi tangiza gale ima tuana mona, themua, mitshi, shitu nu athu. Thomo, ima eyi yakhalelego guene. Uvi mangino gushigo nga muthu wajiya gusha giphapha egi ima yene yana khalago guene. Yana khala guene handaga Yehowa wayifugile. (Gis. 1:1, 26, 27) Yehowa Nzambi wetu watulayele egi mbawuhaga mavu ahe-ahe. Mbawutagenesa diago laji dienji. Mu mavu ahe-ahe athu mbaajinga mayilago nu sante yabonga. Tudi naye gusha mutshima egi mavu ene mbaaza mu tangua Yehowa watombele.​—Yesh. 65:17; Gumo. 21:3, 4.

19. Luholo lutshi wajiya gukolesa gutshigina guaye?

¹⁹ Ha udi munengenena guza gua mavu ahe-ahe, tshita ngolo ha gukolesa gutshigina guaye. Khala muhana Yehowa mersi mukunda nu mulambu wa Yesu. Khala mutangigiza ngolo jia Yehowa. Khala nji gudihana muavula mu ndaga jia mu nyuma. Gula watshita ngenyi, mbawukhala mukatshi dia ‘athu anyi mbaaheta ndaga jialayele Nzambi handaga adi nu gutshigina nu guhuiminyina.’​—Heb. 6:11, 12; Roma 5:5.