LONGO DIA 51
Felela Diaye Mukunda nu Masugu adi Muza Mbaditagenesewa
“Felela dianago gukuatesa musonyi.”—ROMA 5:5.
LUNGIMBO 142 Tusale Yagujinginyina gu Felela Dietu
NDAGA JIDI MU LONGO EDIa
1. Itshi yakuatesele Abalahama ha gulandula gunengenena guvualewa gua mona?
YEHOWA walayele futa dienji Abalahama egi athu a mu ifutshi yagasue ya ha mavu mbaaheta gubonga mu njila ya an’enji. (Gis. 15:5; 22:18) Luholo Abalahama wakhalele nu gutshigina guakola gudi Nzambi, washile gutshigina egi felela diene mbaditagenesewa diago. Ikhale tangua Abalahama wakhalele nu ivo hehi nu 100 mukaji’enji nu ivo 90 akhalele khenji avuala ndo mona. (Gis. 21:1-7) Uvi Biblia idi muzuela egi: “Abalahama wakhalele nu felela nu gutshigina egi mbawubua tata wa ifutshi yavula gifua luholo luazuelele Nzambi.” (Roma 4:18) Tudi mujiya egi ndaga Nzambi walayele Abalahama jiatagenesewe. Wabuile tata wa Izake, mona wakhalele munenga muene sendese mualeha. Mukunda natshi Abalahama wakhalele musha mutshima egi Nzambi mbawutagenesa felela dienji?
2. Mukunda natshi Abalahama wakhalele musha gutshigina egi ndaga jiamulayele Yehowa mbajitagenesewa?
2 Luholo Abalahama wakhalele mujiya Yehowa muabonga, “washile diago mutshima egi Nzambi mbawutaganesa ndaga jialayele muene.” (Roma 4:21) Yehowa wakhalele musuanguluga nu Abalahama nu wamutangele egi muthu wabonga gumeso enji mukunda nu gutshigina guenji. (Yak. 2:23) Gifua luholo Roma 4:18 idi guyimonesa, Abalahama wakhalele nu gutshigina nu felela. Tutadilenu ndaga mupostolo Phaula wazuelele mukunda nu felela gifua luholo Roma mukhapho 5 idi guyimonesa.
3. Ndaga jitshi mupostolo Phaula udi muzuelela mukunda nu felela?
3 Phaula wamonesele ndaga yajiya gututuma ha gusha mutshima egi “felela dianago gukuatesa musonyi.” (Roma 5:5) Udi gutukuatesa nji ha gujiya luholo tuajiya gukolesa felela dietu mukunda nu masugu adi muza. Tangua tudi mutadila ndaga jiazuelele Phaula mu mukanda wa Roma 5:1-5, tangiza ndaga wana tagana najio. Gula watshita ngenyi, wajiya diago gumona egi wakolesele gale felela diaye mukunda nu masugu adi muza. Ndaga tuza mumona mu longo edi, jiza mumonesa luholo tuajiya gukolesa luko felela dietu muavula. Tuzuelelenu thomo felela diabalega ndando Phaula wazuelele dinyi dianago guhana musonyi.
FELELA DIETU DIABALEGA NDANDO
4. Ndaga itshi Roma 5:1, 2 idi muzuelela?
4 Tanga Roma 5:1, 2. Phaula wasonegele mbimbi eji gudi aphangi a mu hungu dia gu Roma. Aphangi ene a mala nu a akhetu alongugile ndaga jiatadila Yehowa nu Yesu, ashile gutshigina gudi ene, hene abuile Aklisto. Gishina giene, ‘Nzambi waatamegele egi athu abonga gu meso enji mukunda nu gutshigina guawo,’ waatombele nu nyuma yenji. Ahetele diago felela diabonga.
5. Felela ditshi Aklisto ambiwe maji mu nyuma ana khala nadio?
5 Gungima Phaula wasonegele Aklisto ambiwe maji mu nyuma akhalele gu Efeso mukunda nu felela diaahanele Nzambi. Felela diene diakhalele mumonesa egi adi naye guheta “gubonga mbaguhana muene gudi athu a gijila.” (Ef. 1:18) Phaula wawambelele luko Aklisto a gu Kolosai egi felela diawo mbaditagenesewa. Watamegele felela diene egi “gubonga guana gumibambela Nzambi mu dilu.” (Kol. 1:4, 5) Felela Aklisto ambiwe maji mu nyuma ana khala nadio didi egi, mbaafuzumuga ha guya mujinga mu dilu fundo mbaahinyina hamoshi nu Klisto.—1 Tes. 4:13-17; Gumo. 20:6.
Phangi Frederick Franz wazuelele egi, Aklisto ambiwe maji mu nyuma ana khala nu gutshigina mukunda nu felela diawo (Tala paragrafe 6)
6. Ndaga itshi phangi mumoshi wambiwe maji mu nyuma wazuelele mukunda nu felela dienji?
6 Aklisto ambiwe gale maji mu nyuma, ana suanguluga nu felela diene. Phangi Frederick Franz, wazuelele mukunda nu felela diene egi: “Felela dietu didi dia giamatshidia nu mbaditagenesewa; mukut’etu agasue 144 000 mbatuheta felela diatulayele Nzambi. Gishimbigo gietu mbagikhala giabonga gubalega ndaga jiko jiagasue.” Gungima dia gukalegela Nzambi mudimo nu gujinginyina guagasue, mu 1991 phangi Franz wazuelele egi: “[Tuana] zula felela dietu nu ndando yavula. . . . Luholo tuana nengenena felela diene, yana gutukuatesa ha gukhala nu gusuanguluga. Tuana nengenena felela diene, ikhale idi mutoga egi tunengene ivo yavula. Ngana zula felela diene nu ndando yavula gubalega.”
7-8. Mafelela atshi a gudisha akombeledi a Yehowa ana khala nawo? (Roma 8:20, 21)
7 Mangino Akombeledi a Yehowa ana khala nu mafelela a gudisha. Abalahama wahetele felela dia gujinga mayilago ha mavu mu Ufumu wa Nzambi. (Heb. 11:8-10, 13) Phaula wasonegele egi athu adi munengena felela diene mbaaheta lutumbu. (Tanga Roma 8:20, 21.) Tangua walongugile mafelela adi mu Biblia mu mbala ya thomo, ndaga itshi yagusuanguluishile muavula? Wana jiya egi gudi nu lusugu mbawubua muthu watagana nu mbawukhadigo luko nu gubola ba? Nga ndo, wana khala nu gusuanguluga ha gujiya egi athu wakhalele muzumba anyi afuile gale mbaajinga luko mu phaladiso ha mavu ba? Mukunda nu felela diatuhanele Nzambi, udi nu ndaga jiavula jiabonga jiajiya gugukuatesa ha gunengenena felela diene.
8 Ikhale tudi nu felela dia gujinga mayilago mu dilu nga ha mavu, tuana khala nu ndaga jiavula jiana gututuma ha gusuanguluga nu felela diene. Gutshita ngenyi guajiya gukolesa luko muavula felela dietu. Ndaga jiasonegele Phaula gungima jidi mukotelesa luholo ndaga mbajikalegewa. Henyaha, tutadilenu ndaga jiasonegele muene mukunda nu felela dietu. Mbimbi jiazuelele muene jidi gutukuatesa ha gusha mutshima egi felela diene mbaditagenesewa.
LUHOLO TUAJIYA GUKOLESA FELELA DIETU
Aklisto agasue ajiya gutagana nu malamba a gudisha (Tala paragrafe 9-10)
9-10. Gifua luholo gifezegeselo gia Phaula gidi guyimonesa, ndaga jitshi Aklisto ajiya gutagana najio? (Roma 5:3) (Tala nji gifuanesa.)
9 Tanga Roma 5:3. Phaula wasonegele egi tangua tuana tagana nu malamba, tuajiya gukolesa felela dietu. Tuajiya gudihula egi luholo lutshi? Idi yadiago egi alandudi agasue a Klisto adi naye gutagana nu malamba. Tutadilenu gifezegeselo gia Phaula. Wawambelele Aklisto a gu Tesalonike egi: “Tangua tuakhalele n’enu, tuadiangele gumiwambela egi mbatutagana nu malamba, malamba ene enyawa tudi mutagana nawo.” (1 Tes. 3:4) Uvi wawambelele Aklisto a gu Kolinto egi: “Aphangi, tudi mutshigina egi mujiye malamba tuataganele nawo, . . . Hene tuavile woma mukunda nu mionyo yetu.”—2 Kol. 1:8; 11:23-27.
10 Mangino nji Aklisto ajiya gutagana nu malamba a gudisha. (2 Tim. 3:12) Aye nji wataganele gale nu usageshi mu luholo washile gutshigina guaye gudi Yesu nu luholo wasendesele gumulandula ba? Mafuta aye nu enya fami yaye ajiya gugusegulula. Ajiya nji gugukalegela ndaga nu khuta. Nga ndo yajiya gukhala egi fumu waye nga mafuta aye a mudimo agusagesele luholo wana zuela giamatshidia. (Heb. 13:18) Mafumu a leta agusagesele luholo wana longesa lukuma luabonga luatadila felela diaye ba? Mupostolo Phaula udi gutuwambela egi tudi naye gukhala nu gusuanguluga ikhale tudi mutagana nu lamba dia luholo lutshi. Mukunda natshi?
11. Mukunda natshi tudi naye gukolesela mu malamba agasue tudi mutagana nawo?
11 Tuajiya gukhala nu gusuanguluga ikhale tudi mutagana nu malamba handaga tudi mujiya egi malamba ene ajiya gutukuatesa ha gukudisa khadilo dimoshi dia ndando. Mukanda wa Roma 5:3 udi muzuela egi: “Malamba ana gutukuatesa ha gukolesela.” Aklisto agasue adi naye gutagana nu malamba; hene mukut’awo agasue adi naye gukhala nu khadilo dia gukolesela. Tudi naye gukolesela mu malamba agasue tudi mutagana nawo. Ngenyi mbatumona gutagenesewa gua felela dietu. Tushigo mutshigina gukhala gifua athu anyi Yesu wafuanesele nu mbuto jiabuile mu maseso. Thomo, atshiginyile lukuma luabonga nu gusuanguluga guagasue, uvi ‘tangua malamba nu usageshi’ yaajidile, abembele giamatshidia. (Mat. 13:5, 6, 20, 21) Idi yadiago egi malamba nu usageshi yanago gusuanguluisa; uvi tuana heta gubonga gula tudi mukolesela nu tudi mulandula gukombelela Yehowa. Mu luholo lutshi?
12. Gubonga gutshi tuajiya guheta gula tudi mukolesela mu malamba?
12 Mulandudi Yakoba wamonesele gubonga tuajiya guheta gula tuakolesela mu malamba. Wasonegele egi: “Bembenu egi gukolesela gumanesele mudimo wenji, hagula mukhale muatagana nu mukhadigo nu gubola mu ndaga jiagasue nu hagula mumonyigo lamba nga dia gima gimoshi.” (Yak. 1:2-4) Yakoba wazuelele egi khadilo diagukolesela didi gifua ginemo gidi nagio muthu, mudimo, nga ndaga imoshi yatagenesa muene. Mudimo utshi khadilo dia gukolesela didi naye gutagenesa? Khadilo diene diajiya gugukuatesa ha gukudisa makalegelo gifua, guhuiminyina guavula, gutshigina nu gushila Nzambi mutshima. Uvi, khadilo dia gukolesela diana gutukuatesa ha gukudisa khadilo diko dia ndando.
13-14. Gubonga gutshi tuana heta gula tudi mukolesela? Gutshita ngenyi guana gutukuatesa ha gukolesa itshi? (Roma 5:4)
13 Tanga Roma 5:4. Phaula wazuelele egi khadilo dia gukolesela diana gutshita egi, “Nzambi atutshigine.” Gula udi nu khadilo dia gukolesela, Yehowa mbawugutshigina. Uvi ishigo mukotelesa egi Yehowa wana suanguluga tangua wana mona malamba. Nzambi wana suanguluga luholo wana kolesela nu gujinginyina guagasue. Ndaga yene idi gutusuanguluisa ha gujiya egi tangua tuana kolesela mu malamba, tuana suanguluisa Yehowa.—Ngi. 5:12.
14 Mujimbilago egi Abalahama nji wakolesele mu malamba nu gujinginyina guagasue hene Nzambi wamutshiginyile. Yehowa wamutamegele egi futa dienji nu wamumonele egi udi muthu wabonga gu meso enji. (Gis. 15:6; Roma 4:13, 22) Esue nji Yehowa wajiya gututamega egi mafuta enji nu gututadila gifua athu abonga gu meso enji. Nzambi ganago gututshigina mukunda nu ndaga tuana kalagala mu mudimo wenji nga mukunda nu inemo tudi nayo mu ulondegi wenji. Uvi wana gututshigina handaga tuana kolesela nu gujinginyina guagasue. Ikhale tudi athu agukola nga mavuala, mukut’etu agasue tuajiya gukolesela ikhale tudi mutagana nu ndaga jialuholo lutshi. Masugu awa, udi mukolesela mu lamba dimoshi ngenyi nu gujinginyina guagasue ba? Gula idi ngenyi, jiya egi wana suanguluisa Yehowa. Gujiya egi tuana suanguluisa Yehowa guajiya gutukuatesa ha gukolesela. Gutshita ngenyi guajiya gukolesa felela dietu.
FELELA DIANAGO GUKUATESA MUSONYI
15. Ndaga itshi Paula wazuelele mu Roma 5:4, 5? Mukunda natshi yajiya gukhala lamba gudi athu ako ha gukotelesa ndaga yene?
15 Phaula wazuelele egi, Yehowa wana suanguluga nu esue gula tudi mukolesela mu malamba nu gujinginyina guagasue. Wasonegele egi: “Gula Nzambi watutshigina, tuana heta felela. Felela dianago gukuatesa musonyi.” (Roma 5:4, 5) Yajiya gukhala lamba gudi athu ako ha gukotelesa ndaga yene. Mukunda natshi? Handaga mu Roma 5:2, Phaula wadiangele guzuela egi Aklisto a gu Roma adi nu felela, yakotelesa egi ‘felela dia guheta lutumbu lua Nzambi.’ Muthu muko wajiya gudihula egi: ‘Gula Aklisto ene akhalele nu felela, mukunda natshi Phaula watangele luko felela diene mu ndaga jiazuelele muene gungima?’
Gungima dia gujiya giamatshidia, wasendesele gusha mutshima egi felela diaye mbaditagenesewa diago. Wana nengenena gutagenesewa gua felela diene nu wana hana Nzambi mersi mukunda nu ndaga yene (Tala paragrafe 16-17)
16. Luholo lutshi muthu wana sendesa gukudisa felela dienji? (Tala nji gifuanesa.)
16 Tuajiya gukotelesa ndaga yazuelele Phaula gula tuajimbidilego egi felela diana kola. Ha gufezegesa: Udi muwunguluga luko mbala ya thomo tangua wavuile mafelela abonga adi mu Mbimbi ya Nzambi? Gula idi ngenyi, yajiya gukhala watangijile egi guheta monyo wa ivo nu ivo mu phaladiso idi felela diabonga, uvi watshiginyilego egi felela diene diajiya gutagenesewa. Uvi tangua wasendesele gulonguga ndaga jiavula jiatadila Yehowa nu ndaga jialayele muene jidi mu Biblia, watshiginyile egi felela diene mbaditagenesewa.
17. Luholo lutshi felela dietu diana landula gukola gungima dia gudihana gudi Yehowa nu gubatijiwa?
17 Tangua wadihanele gudi Yehowa nu wabatijiwe wamujiyile muabonga, wamuzumbile nji muavula. Gungima wasendesele gusha mutshima egi ndaga jiana laya muene mbajitagenesawa. (Heb. 5:13–6:1) Yajiya gukhala egi wamonele gutagenesewa gua ndaga jidi mu Roma 5:2-4. Wataganele nu malamba avula, uvi wakolesele mu malamba ene nu wakotelesele egi Yehowa wana suanguluga nu aye. Luholo udi mujiya egi Nzambi wana guguzumba nu wana suanguluga nu aye, henyaha wana sha diago mutshima egi ndaga jialayele muene mbajitagenesewa. Felela diaye diakolele diago gubalega tangua wajiyile giamatshidia. Felela diene diabuile diago dia giamatshidia mukunda nu aye nu wasendesele gusuanguluga nadio muavula. Diasombegesele ndaga jiavula mu monyo waye gifua, luholo lua gukalegela enya fami yaye ndaga, luholo wajiya guzula badesizio abonga nu luholo wajiya gukalegela tangua diaye.
18. Ndaga jitshi jiazuelele Yehowa jiatadila felela dietu?
18 Mupostolo Phaula wazuelele ndaga iko ya ndando yatadila felela tuana khala nadio gula Nzambi watutshigina. Udi gututshiginyisa egi felela diene mbaditagenesewa. Mukunda natshi tudi naye gutshigina ndaga yene? Phaula wawambelele luko Aklisto ndaga yakhalele naye guatshiginyisa egi: “Felela dianago gukuatesa musonyi, handaga Nzambi wazalesele guzumba guenji mu mitshima yetu mu njila ya nyuma yenji yatuhanele muene.” (Roma 5:5) Tudi nu ndaga jiavula jidi gututshiginyisa egi felela diatuhanele Yehowa didi dia giamatshidia.
19. Mukunda nu felela ndaga itshi tudi naye gushila mutshima?
19 Khala mutangiza ndaga Yehowa walayele Abalahama nu luholo Nzambi wakhalele gumutshigina nu wamutamegele egi futa dienji. Ndaga Abalahama wakhalele musha gutshigina jiataganesewe. Biblia yana zuela egi: “Abalahama wahetele ndaga amulayele handaga wakhalele nu guhuiminyina.” (Heb. 6:15; 11:9, 18; Roma 4:20-22) Galebelego muila. Esue nji tuajiya gusha mutshima egi gula tuasala yagujinginyina gudi Yehowa, muene mbawutagenesa felela dietu. Tudi nu ndaga jiavula jidi gututuma ha gusuanguluga, handaga tudi mujiya egi felela dietu mbaditagenesewa; mbadishigo gutukuatesa musonyi! (Roma 12:12) Mupostolo Phaula wasonegele egi: “Nzambi yago wana guhana athu felela, amihane gusuanguluga guavula nu guhuima guavula handaga muana gusha mutshima gudi muene. Ngenyi mbamukhala nu gudifelela guavula.”—Roma 15:13.
LUNGIMBO 139 Tangiza Ndaga Mbawumona mu Phaladiso
a Mu longo edi tuza mumona gula felela dietu mukunda nu masugu adi muza didi itshi nu mukunda natshi tudi naye gusha mutshima egi felela diene mbaditagenesewa. Mukanda wa Roma mukhapho 5 uza gutukuatesa ha gumona luholo felela tudi nadio mangino didi dia gudisha nu felela tuakhalele nadio tangua tualongugile giamatshidia mbala ya thomo.