Khala Mukolesa Felela Diaye

1. Felela ditshi Yehowa watuhanele?

YEHOWA watuhanele felela diabonga dia gujinga ivo nu ivo. Athu ako adi nu felela dia gujinga mu dilu mayilago nu muila wa mu nyuma. Mbaashigo mufua. (1 Kol. 15:50, 53) Uvi athu avula adi nu felela dia gujinga mayilago ha mavu nu muila watagana nu mbaakhala nu gusuanguluga. (Gumo. 21:3, 4) Felela dietu didi nu ndando yavula, ikhale mbatujinga mayilago mu dilu nga ha mavu.

2. Mukunda natshi tudi muzuela egi felela dietu didi dia giamatshidia?

² Biblia yana kalegela mbimbi “felela,” ha guzuelela “ndaga jiabonga athu adi munenga egi jikalegewe.” Felela dietu mukunda nu masugu adi muza didi dia giamatshidia, handaga Yehowa wana gutuhana nadio. (Roma 15:13) Tuana jiya ndaga Yehowa watulayele. Tudi mujiya egi wana tagenesa ndaga jiagasue jiana zuela muene. (Lutang. 23:19) Tudi mujiya nji egi Yehowa wana tshigina gutaganesa ndaga jiagasue jiatulayele muene, udi nji nu ngolo jia guyikalagala. Felela dietu dishigo gifua nzoji nga ndaga tuana tshigina egi jikalegewe, uvi didi dia giamatshidia.

3. Itshi tuza muzuelela mu longo edi? (Ngimbo 27:14)

³ Tata wetu wa mu dilu wana gutuzumba, wana tshigina nji egi tumushile mutshima. (Tanga Ngimbo 27:14.) Gula tudi nu gutshigina guakola gudi Yehowa, mbayitukuatesa ha gukolesela mu malamba. Mbayitukuatesa nji ha gukhala nu gikhesa nu gusuanguluga ikhale tuatagana nu ndaga jia luholo lutshi. Henyaha tutadilenu luholo felela dietu diana gutubamba. Ha gusendesa tutadilenu mu luholo lutshi felela diene didi gifua longo dia masuwa nu gifulu. Gungima tuza muzuelela luholo tuajiya gukolesa felela diene.

FELELA DIETU DIDI GIFUA LONGO DIA MASUWA

4. Mu luholo lutshi felela didi gifua longo dia masuwa? (Hebelu 6:19)

⁴ Mu mukanda wasonegele mupostolo Phaula gudi Aklisto a gu Hebelu, wafuanesele felela nu longo dia masuwa. (Tanga Hebelu 6:19.) Phaula wakhalele mujiya egi longo diana kuatesa masuwa ha gumagana handaga wakalegele vuayaje jiavula mu muta. Lusugu lumoshi wakhalele mu masuwa tangua funji yakola yabundile. Mu tangua diene, ba matelo ambile ma longo mu kianga hagula masuwa adikumigo mu maseso. (Makal. 27:29, 39-41) Gifua luholo longo diana kuatesa masuwa ha gumagana, felela dietu diana gutukuatesa nji ha gusala yagujinginyina gudi Yehowa, tangua tudi mutagana nu malamba adi gifua funji yakola. Felela diene diana gutukuatesa ha gukolesela mu malamba handaga tudi mujiya egi ndaga mbajisombegesa. Tujimbilago, Yesu wazuelele egi mbatutagana nu malamba. (Yone 15:20) Gutangigiza ndaga jiatulayele Yehowa mukunda nu masugu adi muza, guana gutukuatesa ha gulandula gumukombelela.

5. Luholo lutshi felela diakuatesele Yesu hakhalele muene mutshigina gufua?

⁵ Tutadilenu luholo felela diakuatesele Yesu ha gusala yagujinginyina gudi Yehowa ikhale wakhalele mujiya egi mbawufua gufua gua lamba. Mu lusugu lua Pantekote ya givo 33 G.Y., mupostolo Phetelo wavutugile profesi idi mu mukanda wa Ngimbo idi mumonesa egi Yesu wahenele tedie nu washile mutshima gudi Nzambi. Wazuelele egi: “Mbangulandula gukhala nu felela; handaga aye mbawushigo gungubemba mu Malumba, mbawushigo mubemba egi muthu wana gugukombelela nu mutshima umoshi afukhe. . . . Mbawungusuanguluisa muavula gutuama diaye.” (Makal. 2:25-28; Ngi. 16:8-11) Yesu wakhalele mujiya egi udi naye gufua, uvi wakhalele diago nu felela egi Nzambi mbawumufuzumuna. Wakhalele mujiya nji egi mbawuheta luko luendu lua gujinga nu Sh’enji mu dilu.—Heb. 12:2, 3.

6. Ndaga itshi phangi Leonard wazuelele mukunda nu felela?

⁶ Felela dietu diakuatesele gale aphangi’etu avula ha gukolesela mu malamba. Tutadilenu gifezegeselo gia phangi Leonard Chinn wana jinga gu Angleterre. Mu tangua dia Ita ya Thomo ya ha Mavu Agasue, wambiwe mu bologo handaga watunyile mudimo wa gisuta. Mu bologo amumbile wakhalele muene hakhenji. Watshitshile muene mbeji mbadi, gungima asendesele gumuhana midimo yakola. Wasonegele egi: “Ndaga ngataganele najio jiangukuatesele ha gukotelesa egi felela diana gutukuatesa diago ha gukolesela. Gifezegeselo gia Yesu nu gia apostolo nu gia ba profete nu ndaga jiabonga jiana gutulaya Yehowa mu Biblia, jiana gutukuatesa ha gukhala nu felela mukunda nu masugu adi muza nu ha gukolesela.” Felela diakhalele gifua longo dia masuwa mukunda nu phangi Leonard, diajiya nji gukhala ngenyi mukunda nu esue.

7. Luholo lutshi malamba ana gutukuatesa ha gukolesa felela dietu? (Roma 5:3-5; Yakoba 1:12)

⁷ Tuana kolesa felela dietu tangua tuana kolesela mu malamba nu tangua tuana mona ukuateshi wa Yehowa. Tuana kotelesa egi muene wana suanguluga nu esue. (Tanga Roma 5:3-5; Yakoba 1:12.) Mangino tudi nu felela diakola gubalega tangua tuajiyile giamatshidia. Satana wana tshigina egi tulebe muile mukunda nu malamba tudi mutagana nawo. Uvi Yehowa wana gutukuatesa ha gukolesela mu malamba ene.

FELELA DIETU DIDI GIFUA GIFULU

8. Luholo lutshi felela dietu didi gifua gifulu? (1 Tesalonike 5:8)

⁸ Biblia yana fuanesa nji felela dietu nu gifulu. (Tanga 1 Tesalonike 5:8.) Suta wana sudiga gifulu gu muto ha gudibamba gu mifula ya mbalagaji. Esue nji tuana gulua ita nu Satana, hene tudi naye gubamba matangi etu ha gutuna gubua mu miheto yenji. Wana kalegela ba metode avula ha gubolesa matangi etu. Gifua luholo gifulu giana bamba muto wa suta, felela dietu diana bamba matangi etu hagula tusale yagujinginyina gudi Yehowa.

9. Itshi athu ana kalagala gula ashigo nu felela?

⁹ Felela dietu mukunda nu masugu adi muza, mbaditukuatesa ha gukalagala ndaga nu gutema. Uvi gula tushigo luko nu felela diakola tuajiya gusendesa gukamba phamba gubonga guetu hakhetu, tuajiya nji gujimbila felela dia monyo wa ivo nu ivo. Aklisto ako a gu Kolinto, akhalelego luko musha gutshigina mu felela dia gufuzumuga. (1 Kol. 15:12) Phaula wasonegele egi athu anyi anago gusha gutshigina mu felela dia gufuzumuga, ana jinga phamba ha gutagenesa nzala jiawo. (1 Kol. 15:32) Mangino athu avula ana khalago nu felela mukunda nu ndaga jiana gutulaya Nzambi, ana tshita ndaga jiagasue jiana guasuanguluisa. Uvi esue tuana sha mutshima mu ndaga jiana gutulaya Nzambi mukunda nu masugu adi muza. Felela dietu didi gifua gifulu giana bamba matangi etu, diana gutukuatesa nji ha gutuna gukamba phamba gubonga guetu hagula tubolesago ufuta wetu nu Yehowa.—1 Kol. 15:33, 34.

10. Luholo lutshi felela dietu diajiya gutukuatesa ha gutuna gukhala nu matangi abola?

¹⁰ Felela dietu diajiya nji gutukuatesa ha gutuna gutangiza egi mbatushigo musuanguluisa Yehowa. Ha gufezegesa, muthu muko wajiya gutangiza egi: ‘Mbangushigo mukhala mukatshi dia athu mbaajinga mayilago. Ngushigo diago muthu wabonga. Mbangushigo mukhala yatagana ha gukalagala ndaga jiana gungutoga Nzambi.’ Elifaze futa diabola dia Yobo wakhalele nji nu matangi a luholo lumoshi mukunda nu Yobo. Wazuelele egi: “Mukua muthu udi nanyi hagula wajiya gukhala nu mutshima waphelegeta?” Wazuelele nji egi: ‘Tegelela! Nzambi gashigo mushila athu enji agijila mutshima, dilu nji dishigo dia phelegeta gu meso enji.’ (Yobo 15:14, 15) Elifaze wambile diago mambo! Tudi mujiya egi Satana wana tuma athu ha gutangiza ngenyi. Wana jiya egi gula tudi mulandula gutangiza luholo elu, mbatutotesa felela dietu. Hene tudi naye gutuna matangi a luholo elu ha gulandula gusha matangi etu mu ndaga jiana gutulaya Yehowa. Muene wana tshigina egi tujinge ivo nu ivo nu mbawutukuatesa ha guheta monyo wene.—1 Tim. 2:3, 4.

LANDULA GUKOLESA FELELA DIAYE

11. Mukunda natshi tudi naye gukhala nu guhuiminyina ha tudi munengena gutagenesewa gua ndaga jialayele Nzambi?

¹¹ Tangua diagasue yana khalago yaleba ha gukolesa felela dietu. Tuajiya gutotesa khadilo dia guhuiminyina tangua tudi munengena gutagenesewa gua ndaga jialayele Nzambi. Uvi Yehowa wana jinga ivo nu ivo, luholo luenji lua gutadila ndaga ludi lua gudisha nu luetu. (2 Phet. 3:8, 9) Mbawutagenesa felela dienji mu luholo luatagana, uvi mbagashigo mukalagala ndaga mu tangua esue tudi mutshigina. Itshi yajiya gutukuatesa ha gukolesa felela dietu tangua tudi munengena gutagenesewa gua ndaga jiatulayele Nzambi?—Yak. 5:7, 8.

12. Ha gutadila Hebelu 11:1, 6, gudivua gutshi gudi mukatshi dia felela nu gutshigina?

¹² Mbatulandula gukolesa felela dietu gula tudi nu ufuta wakola nu Yehowa, handaga muene mbawutagenesa felela diene. Ha gukhala nu felela, tudi naye gusha gutshigina egi Yehowa udi guene nu “wana hana lufuto gudi athu ana gumukamba nu mutshima umoshi.” (Tanga Hebelu 11:1, 6.) Gula tudi mutshigina diago egi Yehowa udi guene, mbayitukuatesa ha gusha mutshima egi mbawutagenesa ndaga jiana laya muene. Tutadilenu ndaga jiajiya gutukuatesa ha gukolesa ufuta wetu nu Yehowa, nu ha gulandula gukolesa felela dietu.

13. Luholo lutshi tuajiya gusuena hehi nu Nzambi?

¹³ Khala mukombelela Yehowa, khala nji mutanga Mbimbi yenji. Ngatshima tuajiyilego gumona Yehowa, uvi tuajiya gusuene hehi n’enji. Tuajiya guta n’enji maga mu gisambu nu gusha mutshima egi mbawututegelela. (Yel. 29:11, 12) Tuana tegelela Nzambi tangua tuana tanga Biblia nu tuana tangigiza ndaga tudi mutanga. Tangua tuana tanga luholo Yehowa wakuatesele akombeledi enji a gujinginyina a mu tangua dikulu, tuana kolesa diago felela dietu. Ndaga yagasue idi mu Mbimbi ya Nzambi “yasonegewe mukunda nu gutulongesa. Tudi nu felela handaga mbimbi ya Nzambi yana gutuhana ngolo nu yana gutukuatesa ha gukolesela.”—Roma 15:4.

14. Mukunda natshi tudi naye gutangigiza ndaga Yehowa wakalegele mukunda nu athu ako?

¹⁴ Khala mutangigiza luholo Yehowa watagenesele ndaga jialayele muene. Tutadilenu ndaga Nzambi wakalegele mukunda nu Abalahama nu Sara. Akhelele athu a gukola, akhalelego luko nu luholo lua guvuala. Uvi Nzambi waalayele egi mbaavuala mona. (Gis. 18:10) Itshi Abalahama watshitshile? Biblia idi muzuela egi: ‘Wakhalele nu felela nu gutshigina egi mbawubua tata wa ifutshi yavula.’ (Roma 4:18) Abalahama gakhalelego mujiya luholo ndaga yene yakhalele naye gukalegewa, uvi washile mutshima egi Yehowa mbawutagenesa laji dienji. Abalahama wamonele diago gutagenesa gua ndaga yene. (Roma 4:19-21) Lumene elu ludi gutukuatesa ha gusha mutshima egi Yehowa mbawutagenesa ndaga jiana laya muene, ngatshima athu ajiya gumona gifua yajiyilego gukalegewa.

15. Mukunda natshi tudi naye gutangigiza ndaga Nzambi wakalegele gale mukunda nu esue?

¹⁵ Tutadilenu ndaga Yehowa wakalegele mukunda nu aye. Tangiza gubonga wahetele gale luholo malaji a Nzambi adi mu Biblia adi mutagesewa. Ha gufezegese, Yesu walayele egi Tata wenji mbawuguhana ima udi naye funu. (Mat. 6:32, 33) Yesu wazuelele nji egi Yehowa mbawuguhana nyuma yenji gula wamutoga nayo. (Luka 11:13) Yehowa wana tagenesa ndaga jiene. Wajiya nji gutangiza ndaga jiatagenesele muene mukunda nu gubonga guaye. Ha gufezegesa, walayele egi mbawugutotesela gubola, mbawuguhana gikhesa nu mbawugudisa mu nyuma. (Mat. 6:14; 24:45; 2 Kol. 1:3) Gula udi mutangigiza ndaga jiakalegele gale Nzambi mukunda nu aye, mbawukolesa felela diaye mukunda nu ndaga mbajikalagala muene mu masugu adi muza.

SUANGULUGENU HANDAGA MUDI NU FELELA

16. Mukunda natshi felela dietu didi nu ndando yavula?

¹⁶ Felela diatuhanele Nzambi dia monyo wa ivo nu ivo didi nu ndando yavula. Tudi munengena gutagenesewa gua felela diabonga diatadila masugu adi muza. Tudi musha mutshima egi mbaditagenesewa diago. Felela diene didi gifua longo dia masuwa, diana gutukuatesa ha gukolesela mu malamba, mu usageshi nga gula tudi gutuama dia gufua. Didi nji gifua gifulu, giana bamba matangi etu hagula tutshite ndaga jiabonga uvi jiabola ndo. Felela diana gutuhana Biblia diana gutukuatesa ha gujiya Nzambi muabonga nu ha gujiya egi wana gutuzumba. Tuana heta gubonga tangua tuana landula gukolesa felela dietu.

17. Mukunda natshi tudi naye gusuanguluga mukunda nu felela dietu?

¹⁷ Mu mukanda Phaula wasonegele enya gu Roma, waakolesele egi: “Suangulugenu handaga mudi nu felela.” (Roma 12:12) Phaula wakhalele nu gusuanguluga handaga wakhalele mujiya egi, gula wasala yagujinginyina mbawuheta monyo wa ivo nu ivo mu dilu. Esue nji tudi naye gusuanguluga mukunda nu felela dietu handaga tuana sha mutshima egi Yehowa mbawutagenesa ndaga jialayele muene. Muyimbi wa ngimbo wasonegele egi: ‘Gusuanguluga gudi nu muthu . . . udi musha mutshima gudi Yehowa Nzambi wenji, . . . muthu wana tagenesa ndaga jiana laya muene.’—Ngi. 146:5, 6.