Enya Isalele Ikulu Akhalele Mulua Ita, Mukunda Natshi Esue Tuanago Gulua?
MU SUNGI ya Ita ya Mbadi ya ha Mavu Agasue, fumu mumoshi wa masuta a Nazi wawambelele Matemue a Yehowa mu dijui diakola egi: “Muthu wagasue watuna guluisa gifutshi gia France nga Angleterre udi naye gushiyiwa!” Ngatshima masuta a Nazi akhalele hehi nu aphangi’etu, uvi gushigo nga phangi mumoshi watshiginyile. Amonesele diago gikhesa! Gifezegeselo egi gidi mumonesa luholo Matemue a Yehowa ana tadila ita. Tuana tuna gulua ita ya ha mavu awa. Ikhale atuwambela egi gula tuatuna mbaatushiya, uvi esue tuana gudinginyisago mu ndaga jia ha mavu awa.
Uvi athu ako anyi ana zuela egi adi Aklisto, ana tshigina gawo guya mulua ita. Avula mukatshi diawo ana tshigina egi Muklisto udi naye gulua mukunda nu gifutshi giawo. Ajiya gutangiza egi: ‘Enya Isalele ikulu akhalele akombeledi a Nzambi uvi akhalele mulua ita, na mukunda natshi mangino Aklisto ashigo naye gulua ita?’ Mvutu itshi wajiya guhana? Wajiya guzuela egi ndaga jia enya Isalele a mu tangua dikulu, jishigo luholo lumoshi nu jia Akombeledi a Nzambi mangino. Tutadilenu ndaga thano jidi mumonesa gudisha guene.
1. AKOMBELEDI AGASUE A NZAMBI ADI ENYA GIFUTSHI GIMOSHI
Mu tangua dikulu, Yehowa watombele gifutshi gia Isalele ha gukhala athu enji. Wakhalele guatamega egi: ‘Athu ami diago mukatshi dia athu agasue ha mavu.’ (Guz. 19:5) Nzambi waahanele nji terituare yawo hakhawo. Tangua Nzambi wakhalele mutoga enya Isalele ha guya muluisa ifutshi iko, akhalelego muluisa nga gushiya athu anyi akhalele mukombelela nji Yehowa.a
Mangino, akombeledi a Yehowa adi “athu a ifutshi yagasue, a iphuta yagasue, . . . nu a mazuelelo agasue.” (Gumo. 7:9) Hene gula akombeledi a Nzambi aya mulua ita, ajiya guya muluisa nga gushiya aphangi’awo Aklisto.
2. YEHOWA WAHANELE ENYA ISALELE NJILA HA GULUA ITA
Mu tangua dikulu, guakhalele nu ndaga jiakhalele mutuma Yehowa ha guhana enya Isalele njila ha guya gu ita. Ha gufezegesa, Nzambi wawambelele enya Isalele ha guluisa enya Kanana handaga akhalele mukombelela ba demo, akhalele mukalagala ndaga jia musonyi nu akhalele nji muhana an’awo gifua milambu. Yehowa wawambelele enya Isalele ha gushiya athu agasue akhalele mutshita ndaga eji jiabola mu mavu aatendelele muene. (Levi 18:24, 25) Tangua enya Isalele anginyile mu Mavu a Gutendelela, matangua ako Nzambi wakhalele guahana njila ha guluisa mbalagaji jiawo. (2 Sam. 5:17-25) Uvi Yehowa gakhalelego guahana njila ha guzula desizio ene hakhawo ha guya mulua ita. Tangua akhalele muzula desizio ene hakhawo ha guya gu ita, matangua avula akhalelego mubinga.—Lutang. 14:41-45; 2 Gudi. 35:20-24.
Mangino, Yehowa ganago gutuhana njila ha guya mulua ita. Ifutshi yana gulua mukunda nu gubonga gua athu uvi gua Nzambi ndo. Ana gulua ita handaga ana tshigina gutambula ifutshi iko, guheta makuta avula nga ha gutagenesa matangi a enya politike. Uvi itshi tuajiya guzuela mukunda nu athu ana monesa egi ana gulua ha gubamba gikombelelo giawo nga gushiya mbalagaji jia Nzambi? Yehowa mbawubamba akombeledi enji a giamatshidia nu mbawushiya mbalagaji jienji mu ita ya Alemagedona mu masugu adi muza. (Gumo. 16:14, 16) Mu ita yene, Yehowa mbawukalegela masuta enji a mu dilu, uvi ndo akombeledi enji adi ha mavu.—Gumo. 19:11-15.
3. ENYA ISALELE ASHIYILEGO ATHU ANYI AKHALELE MUSHA GUTSHIGINA GUDI YEHOWA
Mangino Nzambi wana lua mukunda nu ifutshi gifua luholo luakalegele muene mukunda nu enya Isalele gu Yeliko ba?
Mu tangua dikulu, matangua avula masuta a Isalele akhalele mubemba athu akhalele mumonesa gutshigina gudi Nzambi. Uvi akhalele mushiya phamba athu anyi Yehowa wakhalele mumonesa egi adi naye gushiyiwa. Tutadilenu ifezegeselo mbadi. Yehowa wawambelele enya Isalele ha gushiya dimbo dia Yeliko, uvi ashiyilego Lahaba nu enya fami yenji handaga wamonesele gutshigina gudi Yehowa. (Yosh. 2:9-16; 6:16, 17) Gungima gifutshi gia Gibeona giashiyiwego handaga anemesele Nzambi nu mutshima umoshi.—Yosh. 9:3-9, 17-19.
Mangino, mu tangua dia ita, ana shiya nu athu ana monesa gutshigina gudi Nzambi nu athu ashigo masuta.
4. ENYA ISALELE AKHALELE MUTUMAGELA MIKHUALA YAAHANELE NZAMBI MUKUNDA NU ITA
Mu tangua dikulu, Yehowa wakhalele mutoga masuta a Isalele ha gutumagela mikhuala yenji mukunda nu ita. Ha gufezegesa, matangua ako Nzambi wakhalele guatoga ha ‘gukamba guhuima’ nu dimbo akhalele naye guluisa. (Mikh. 20:10) Yehowa wakhalele mutshigina egi masuta a Isalele akhadigo nu usala, phundo yawo nji ikhale yaphelegeta nu alandule gutumagela mikhuala yenji yatagana. (Mikh. 23:9-14) Masuta a ifutshi iko akhalele mubungisa muila gu ngolo nu akhetu gula atambula dimbo dimoshi ngenyi, uvi Yehowa watunyishile masuta a Isalele ha gutshita ngenyi. Ha guzula akhetu akhalele mutambula ene gu ita, akhalele naye gubalegesa mbeji imoshi.—Mikh. 21:10-13.
Mangino, ifutshi yavula yahagele gale mikhuala mukunda nu ita. Ana haga mikhuala yene ha gubamba athu anyi ashigo masuta, uvi matangua avula athu ana shiya mikhuala yene.
5. NZAMBI WANA LUILA ATHU ENJI
Mangino ana bemba athu adi ya gujinginyina gudi Yehowa gifua luholo Yehowa wambelele Lahaba nu fami yenji tangua ashiyile dimbo dia Yeliko ba?
Mu tangua dikulu, Yehowa wakhalele mulua mukunda nu enya Isalele, matangua avula wakhalele guakuatesa ha gubinga mu luholo lua gushimana. Ha gufezegesa, tuzuelelenu luholo Yehowa wakuatesele enya Isalele ha gubinga dimbo dia Yeliko. Gifua luholo Yehowa wazuelele, tangua enya Isalele ‘ambile milolo ya ita mu dijui diakola, ibayi ya dimbo yabuile,’ hene yaakuatesele ha gutambula dimbo. (Yosh. 6:20) Luholo lutshi enya Isalele abingile enya Amole? ‘Yehowa wanogesele may’a nzanza akoma mu dilu . . . Athu afile gu may’a nzanza akhalele avula gubalega athu anyi enya Isalele ashiyile gu phogo ya khusa.’—Yosh. 10:6-11.
Mangino, Yehowa gana lua ndo nga mukunda nu gifutshi gimoshi. Yesu udi Fumu ya Ufumu wa Nzambi, Ufumu wene “ushigo wa ha mavu awa.” (Yone 18:36) Uvi Satana wana tuameza ba guvernema agasue a ha mavu awa. Ita yana luiwa ha mavu awa yana monesa makalegelo enji.—Luka 4:5, 6; 1 Yone 5:19.
AKLISTO A GIAMATSHIDIA ANA KAMBA GUHUIMA
Gifua luholo tuayimonyi, ndaga jia mangino jishigo luholo lumoshi nu jia enya Isalele a mu tangua dikulu. Uvi gudi nu ndaga jiavula jiana gututuma ha gutuna gulua ita. Ha gufezegesa, Nzambi wadiangele guzuela egi mu masugu a gisugishilo, athu anyi mbaalongesa muene mbaashigo ‘mulonguga gulua ita,’ mbaashigo nji gudinginyisa mu ndaga jia ita. (Yesh. 2:2-4) Klisto wazuelele nji egi alandudi enji ‘ashigo athu a ha mavu awa’; mbaashigo nji gudinginyisa mu ndaga jia ha mavu.—Yone 15:19.
Klisto wawambelele alandudi enji ha gukalagala ndaga iko. Wawambelele ha gutuna makalegelo ajiya gutuma athu ha gukhala nu umbalagaji, guvua khabu nga gulua ita. (Mat. 5:21, 22) Waawambelele nji ha gukhala “athu ana kamba guhuima” nu ha guzumba mbalagaji jiawo.—Mat. 5:9, 44.
Esue itshi tudi naye gutshita? Idi yadiago egi tuana tshigina ndo gulua ita, uvi tuajiya gukhala nu umbalagaji mu mutshima wetu; ndaga yene yajiya gubata nguma nga ukhaphumunyi mu hungu. Tutshitenu yagasue ha gutuna gubambela athu ako umbalagaji mu mutshima.—Yak. 4:1, 11.
Tuana gudinginyisa ndo mu ita ya ha mavu awa, uvi tuana kamba guhuima nu tuana gudizumba. (Yone 13:34, 35) Tukhadigo gudinginyisa mu ndaga jia ha mavu awa, uvi tulandulenu gunengena lusugu Yehowa mbawukatula ita mayilago.—Ngi. 46:9.
a Matangua ako, enya Isalele akhalele gudiluisa uvi Yehowa gakhalelego musuanguluga nga hazonda. (1 Maf. 12:24) Uvi mu ba okazio ako, Yehowa watshiginyile egi enya Isalele adiluise handaga iphuta iko yalumbugile Yehowa nu yakalegele gubola guakoma.—Manz. 20:3-35; 2 Gudi. 13:3-18; 25:14-22; 28:1-8.