LONGO DIA 10
LUNGIMBO 31 Marche avec Dieu !
Landula Gifezegeselo gia Yehowa nu gia Yesu mu Luholo Luaye lua Gutangiza
“Luholo Klisto wamonele lamba mu muila, enue nji khalenu nu matangi a luholo lumoshi.”—1 PHET. 4:1.
MU GUHIHIA
Tuza mumona malongo a ndando mupostolo Phetelo wazudile mu luholo lua gutangiza lua Yesu nu malongo esue nji tuajiya guheta.
1-2. Biblia yana monesa egi luholo lutshi tudi naye guzumba Yehowa? Luholo lutshi Yesu wamonesele egi wakhalele muzumba Sh’enji nu matangi’enji agasue?
Biblia idi muzuela egi: “Zumba Yehowa Nzambi waye nu mutshima waye wagasue nu monyo waye wagasue nu ngolo jiaye jiagasue nu matangi’aye agasue.” (Luka 10:27) Yesu wamonesele egi mukhuala owu wakhalele nu ndando yavula mukatshi dia Mikhuala ya Moize. Tujimbilago egi guzumba guetu mukunda nu Yehowa guana tadila mutshima wetu, yakotelesa egi nzala jietu, matangi’etu nu luholo tuana gudivua. Guana tadila nji luholo tuana gudihana gudi muene nu mutshima wetu wagasue nu ngolo jietu jiagasue. Uvi guzumba Yehowa gudi mutadila nji matangi’etu, yakotelesa egi luholo tuana tangiza. Idi yadiago egi tuajiyilego gukotelesa luholo Yehowa wana tangiza mu ndaga jiagasue. Uvi tuajiya gukotelesa muabonga matangi’a Nzambi gula tudi mulonguga ha gujiya “matangi a Klisto” handaga Yesu wakhalele mutangiza gifua Sh’enji.—1 Kol. 2:16.
2 Yesu wakhalele muzumba Yehowa nu matangi’enji agasue. Wakhalele mujiya ndaga Yehowa wakhalele mutshigina egi atshite, wakalegele ndaga jiene ikhale jiakhalele naye gumubatela malamba. Luholo Yesu wakhalele musha matangi ha gukalagala gutshigina gua Sh’enji, gabembelego egi nga ndaga imoshi imukange njila ha gutagenesa felela dienji.
3. Ndaga jitshi mupostolo Phetelo walongugile gudi Yesu? Phetelo wahanele aphangi’enji Aklisto gikhesa ha gutshita itshi? (1 Phetelo 4:1)
3 Phetelo nu apostolo ako akhalele nu luendu lua gubalegesa tangua hamoshi nu Yesu, hene alongugile luholo luenji lua gutangiza. Tangua Phetelo wasonegele mukanda wenji wa thomo mu ukuateshi wa nyuma ya Nzambi, wahanele Aklisto gikhesa ha gukhala nu matangi a luholo lumoshi gifua Klisto.a (Tanga 1 Phetelo 4:1.) Tangua Phetelo wasonegele egi: “Enue nji khalenu,” wakalegele mbimbi ya Greke idi mumonesa masuta asudiga iluilo ha guya mulua ita. Gula Aklisto adi mutangiza gifua luholo Yesu wakhalele mutangiza, mbaaheta ngolo jia gubinga nzala yagasue yajiya guatuma ha gutshita ndaga yabola nu ha gubinga mavu awa ana tuamezewa gudi Satana.—2 Kol. 10:3-5; Ef. 6:12.
4. Luholo lutshi longo edi diza gutukuatesa ha gulandula malongo a Phetelo?
4 Mu longo edi tuza muzuelela luholo lua gutangiza lua Yesu nu ndaga tuajiya gutshita ha gulandula gifezegeselo gienji. Tuza mumona luholo gutangiza gifua luholo Yehowa wana tangiza guajiya gutukuatesa ha gukhala mu gudivua guabonga nu athu ako nu gukhala nu khadilo dia gudibulumuisa. Tuza mumona nji luholo gushila Yehowa mutshima mu gisambu guajiya gutukuatesa ha gutangiza muabonga.
LANDULA GIFEZEGESELO GIA YEHOWA MU LUHOLO LUAYE LUA GUTANGIZA
5. Mu luholo lutshi Phetelo wamonesele lusugu lumoshi egi gakhalelego mutangiza gifua Yehowa?
5 Lusugu lumoshi Phetelo wamonesele egi gakhalelego mutangiza gifua Yehowa. Mu luholo lutshi? Tutadilenu ndaga yene. Lusugu lumoshi Yesu wawambelele apostolo enji egi udi naye guya gu Yelusalema ha guhanewa ha mago a mafumu a ikombelelo nu gukolesela mu malamba akola, gungima mbawushiyiwa. (Mat. 16:21) Phetelo wakhalele mujiya egi Yesu wakhalele Masiya watendelewe ha guhuluisa akombeledi a Nzambi. Hene yajiya gukhala egi yakhalele lamba gudi muene ha gutshigina egi Yehowa mbawuhana njila egi Yesu ashiyiwe. (Mat. 16:16) Hene Phetelo wawambelele Yesu egi: “Fumu, uzuedigo ngenyi. Ndaga jia luholo elu mbajishigo gugubuila nga hazonda.” (Mat. 16:22) Yesu gatshiginyilego ndaga yamuwambelele Phetelo handaga Phetelo gakhalelego mutangiza gifua Yehowa.
6. Luholo lutshi Yesu wamonesele egi wakhalele mutangiza gifua Yehowa?
6 Yesu wakhalele mujiya luholo Sh’enji wana tangiza nu walanduile matangi ene mu luholo luatagana. Wawambelele Phetelo egi: “Balega gungima diami, Satana! Aye udi gikhakhuishilo mukunda nu ame, handaga matangi’aye ashigo a Nzambi, uvi a athu.” (Mat. 16:23) Yesu wakhalele mujiya egi ha gutshita gutshigina gua Yehowa, wakhalele naye gumona malamba nu gufua. Hene watunyile ndaga jiamuwambelele Phetelo ikhale Phetelo wakhalele mutangiza egi udi mutshigina gumukuatesa. Phetelo wakotelesele egi udi naye gutangiza gifua luholo Nzambi wana tangiza. Ndaga yene idi diago longo dia ndando mukunda nu esue.
7. Luholo lutshi Phetelo wamonesele egi wasombegesele matangi enji ha gutangiza gifua Yehowa? (Tala holu dia gizula.)
7 Gungima, Phetelo wakotelesele egi wakhalele naye gutangiza gifua luholo Yehowa wana tangiza. Tangua diatombele Yehowa diataganele hagula athu a ifutshi iko abue akombeledi enji. Nzambi watumine Phetelo ha gulongesa Koneliyo munu wakhalele muthu wa thomo mukatshi dia enya ifutshi iko anyi abuile Aklisto. Enya Yuda akhalele mutuna gudibungisa nu enya ifutshi iko, hene Phetelo wakhalele naye gulondega matangi’enji hagula wajiya gulongesa enya ifutshi iko. Tangua Phetelo wakotelesele matangi a Nzambi mu ndaga yene, wasombegesele matangi enji. Hene tangua Koneliyo wamutamegele gumbo dienji, ‘gatunyilego.’ (Makal. 10:28, 29) Walongesele Koneliyo nu enya fami yenji, hene abatijiwe.—Makal. 10:21-23, 34, 35, 44-48.
Phetelo udi mungina mu inzo ya Koneliyo (Tala paragrafe 7)
8. Luholo lutshi tuajiya gumonesa egi tudi mutangiza gifua Yehowa? (1 Phetelo 3:8 tala mbimbi goshi’a diyiji)
8 Gungima dia ivo yavula, Phetelo wahanele Aklisto gikhesa ha ‘gukhala mu gudivua.’ (Tanga 1 Phetelo 3:8 tala mbimbi goshi’a diyiji.) Tuajiya gukhala mu gudivua guabonga nu aphangi’etu a mala nu a akhetu gula tudi mulandula gifezegeselo gia Yehowa. Ha gufezegesa, Yesu wawambelele alandudi enji ha gusha Ufumu wa Nzambi ha fundo dia thomo mu monyo wawo. (Mat. 6:33) Hene gula phangi mumoshi mu hungu dienu wazula desizio dia gusendesa mudimo wa muvunji wa njila nga mudimo uko wa tangua diagasue, mudi naye guzuela ndaga jidi gumuhana gikhesa. Ha fundo dia gumuwambela egi gashigo naye gukamba ima yavula yagujingila, tudi naye gumuwambela mbimbi jidi muhana gikhesa nu gumukuatesa.
KHALA MUTHU WA GUDIBULUMUISA
9-10. Luholo lutshi Yesu wamonesele khadilo dia gudibulumuisa mu luholo lua gushimana?
9 Mu phipha gutuama egi Yesu ashiyiwe, walongesele Phetelo nu apostolo ako longo dia ndando diatadila khadilo dia gudibulumuisa. Yesu wadiangele gutuma Phetelo nu Yone ha gulondega ndaga mukunda nu gudia gua gisugishilo guakhalele naye muene gudia nu apostolo enji gutuama egi afue. Idi naye gukhala egi gulonda ima yene guakhalele mutoga gukamba longa nu milele ha gukungudila meya hagula ngenji jiajiya guwovua malu gutuama dia gudia. Uvi nanyi wakhalele naye gudibulumuisa ha guwovua athu ako malu mu tangua diene?
10 Yesu gakhalelego nu badute ha gutshita mudimo wene, wamonesele diago khadilo dia gudibulumuisa mu luholo lua gushimana. Apostolo enji adihudile muavula handaga amonele Yesu mutshita mudimo unu enya mudimo akhalele mutshita. Yesu wazugile mu molu. Wakatuile milele yenji ya holu, wazanguile sume, wadijitshigile nayo ha kete, gungima wambile meya ha longa, wasendesele guaweva ikanzo. (Yone 13:4, 5) Yesu wawevuele ikanzo ya apostolo enji 12, yajiya gukhala egi yazudile tangua diavula. Yudasa munu wamudigile gungima wakhalele nji mukatshi dia apostolo ene. Uvi Yesu wakalegele mudimo wene nu gudibulumuisa guagasue. Gungima Yesu wahudile nu guhuiminyina guagasue egi: “Muakotelesa ndaga ngamikalagala ba? Muana gungutamega egi, ‘Mulongeshi’ nu ‘Fumu,’ muana zuela muabonga handaga idi ngenyi. Hene, gula ame ngudi Fumu nu Mulongeshi, ngamiweva ikanzo, enue nji mudi naye gudiweva ikanzo.”—Yone 13:12-14.
Gudibulumuisa gua giamatshidia guana kotelesa luholo tuana guditadila nu luholo tuana tadila athu ako
11. Luholo lutshi Phetelo wamonesele egi wabuile muthu wa gudibulumuisa? (1 Phetelo 5:5) (Tala nji gifuanesa.)
11 Phetelo wazudile malongo mu khadilo dia gudibulumuisa dia Yesu. Tangua Yesu wavutugile mu dilu, Phetelo wakalegele ndaga ya gushimana, wasagele yala mumoshi wavualewe gikata. (Makal. 1:8, 9; 3:2, 6-8) Tangua athu avula amonele ndaga yene ya gushimana ajietele Phetelo. (Makal. 3:11) Ikhale Phetelo wakudile ha fundo dinyi athu akhalele mutshigina lutumbu luavula uvi gabembelego egi athu amutumbuise mukunda nu ndaga yene. Phetelo wakhalele muthu wa gudibulumuisa, wawambelele athu ene ha gutumbuisa Nzambi nu Yesu tangua diazuelele muene egi: “Muthu yowu mudi mumona nu mudi mujiya, wasagewa mu jina dia Yesu nu mu gutshigina guetu tudi nago mu jina dienji.” (Makal. 3:12-16) Mbimbi Phetelo wakalegele mu mukanda wasonegele muene Aklisto ha gumonesa egi idi nu ndando ha gukhala nu khadilo dia gudibulumuisa, jiajiya gutuwunguluisa luholo Yesu wadijitshigile sume ha kete ha guwevua ikanzo ya apostolo enji.—Tanga 1 Phetelo 5:5.
Tangua Phetelo wakalegele ndaga ya gushimana, wahanele lutumbu gudi Yehowa nu Yesu nu gudibulumuisa guagasue. Esue nji tuajiya gumonesa khadilo dia gudibulumuisa gula tudi mukalagala ndaga jiabonga uvi tushigo mukamba egi tujiyiwe nga gunengena egi atukalegela ndaga gifua luholo tuaakalegela (Tala paragrafe 11-12)
12. Luholo lutshi tuajiya gulandula gumonesa khadilo dia gudibulumuisa gifua Phetelo?
12 Tuajiya gulandula gifezegeselo gia Phetelo gula tudi mukudisa khadilo dia gudibulumuisa. Tujimbilago egi gukhala muthu wa gudibulumuisa gushigo mukotelesa phamba guzuela mbimbi jiabonga uvi gudi mukotelesa nji gutshita ndaga jiko jiavula. Mbimbi yakalegele Phetelo ha guzuelela gudibulumuisa idi mumonesa egi khadilo dia “gudibulumuisa” diana kotelesa luholo tuana guditadila nu luholo tuana tadila athu ako. Tuana kalegela athu ndaga jiabonga handaga tuana zumba Yehowa nu athu ene, uvi tuana tshitago ngenyi hagula athu atutumbuise. Ha gumonesa egi tudi nu khadilo dia gudibulumuisa tudi naye gukalegela Yehowa nu aphangi’etu mudimo nu gusuanguluga guagasue, ngatshima athu ako ashigo mumona ndaga tudi mutshita.—Mat. 6:1-4.
“KHALENU MUTANGIZA MU LUHOLO LUABONGA”
13. ‘Gutangiza mu luholo luabonga’ gudi mukotelesa itshi?
13 ‘Gutangiza mu luholo luabonga’ gudi mukotelesa itshi? (1 Phet. 4:7) Muklisto udi mutangiza mu luholo luabonga wana tshita yagasue ha guzula badesizio adi gudivua nu matangi a Yehowa. Wana jiya nji egi ndaga yabalega ndando mu monyo wenji idi ufuta wenji nu Yehowa. Wana tadila ndaga mu luholo luabonga nu wana jiya egi gashigo mujiya ndaga jiagasue. Wana monesa egi wana shila Yehowa mutshima tangua diana gumutoga muene utuameji mu isambu nu gudibulumuisa guagasue.
14. Tangua ditshi Phetelo wamonesele egi gashidilego Yehowa mutshima?
14 Mu phipha gutuama egi Yesu afue wawambelele landudi enji egi: “Mu phipha eyi mukut’enu agasue muza mulenga mukunda nu ndaga jiza gungubuila.” Uvi Phetelo wamuwambelele nu gikhesa giagasue egi: “Ikhale mukut’awo agasue agulenga mukunda nu ndaga iza gugubuila, ame mbangushigo gugulenga nga hazonda!” Mu phipha yene, Yesu watemesele alandudi enji egi: “Khalenu gikolekole, landulenu gukombelela tangua diagasue hagula mubuigo mu gubola.” (Mat. 26:31, 33, 41) Gula nga Phetelo walanduile longo edi dia Yesu sendese tangua Yesu wazuelele ndaga yene, nga wahetele gikhesa gia guwambela athu egi udi mulandudi wenji. Uvi Phetelo wazuelele egi gashigo mujiya Yesu, gungima wavile gikenene giavula mukunda nu ndaga yene.—Mat. 26:69-75.
15. Luholo lutshi Yesu walanduile gutangiza mu luholo luabonga uu nu mu phipha ya gisugishilo gienji ha mavu?
15 Yesu wakhalele musha mutshima wenji wagasue gudi Yehowa. Ngatshima wakhalele muthu watagana uvi wakhalele mukombelela tangua diagasue. Gutshita ngenyi guamukuatesele ha gutshita ndaga mu gudivua nu gutshigina gua Yehowa. (Mat. 26:39, 42, 44; Yone 18:4, 5) Idi yadiago egi Phetelo gajimbidilego egi Yesu wakhalele mutshita isambu yavula mu phipha yene ya gisugishilo.
16. Mu luholo lutshi Phetelo wamonesele egi wasendesele gutangiza mu luholo luabonga? (1 Phetelo 4:7)
16 Gungima Phetelo wakotelesele egi wakhalele naye gushila Yehowa mutshima mu njila ya gisambu. Tangua Yesu wafuzumugile, wawambelele Phetelo nu apostolo ako egi mbaaheta nyuma ya Nzambi ha guakuatesa ha gutagenesa mudimo wawo wa gulongesa lukuma luabonga. Uvi wawambelele ha gunengena gu Yelusalema uu nu tangua mbaaheta nyuma yene. (Luka 24:49; Makal. 1:4, 5) Itshi Phetelo wakalegele hakhalele muene munengena? Muene nu Aklisto ako “akolesele mu gisambu.” (Makal. 1:13, 14) Gungima tangua Phetelo wasonegele mukanda wenji wa thomo, wahanele Aklisto gikhesa ha gutangiza mu luholo luabonga nu gushila Yehowa mutshima mu njila ya gisambu. (Tanga 1 Phetelo 4:7.) Phetelo washile mutshima gudi Yehowa nu wabuile gifua kunji mu hungu.—Gal. 2:9.
17. Itshi tudi naye gutshita ngatshima tudi nu ndunge jia gutshita ndaga jiko? (Tala nji gifuanesa.)
17 Ha gutangiza mu luholo luabonga tudi naye gusuena hehi nu Yehowa mu njila ya gisambu. Idi mukotelesa egi tudi naye gukamba utuameji wa Yehowa mu njila ya gisambu ngatshima tuana khala nu ndunge jia gutshita ndaga jiko. Hene tangua tudi mutshigina guzula badesizio a ndando, tudi naye gutshita gisambu ha gutoga utuameji wa Yehowa nu gusha mutshima egi muene mbawutukalegela ndaga jiabonga.
Phetelo wakotelesele egi wakhalele naye gushila Yehowa mutshima mu njila ya gisambu. Esue nji tuajiya gumonesa egi tudi mutangiza muabonga gula tudi mukamba ukuateshi wa Yehowa mu gisambu tangua tudi mutshigina guzula badesio a ndando (Tala paragrafe 17)b
18. Itshi tudi naye gutshita ha gusendesa gutangiza gifua luholo Yehowa wana tangiza?
18 Tuana hana Yehowa mersi luholo luatufugile muene nu luendu lua gulandula makalegelo enji. (Gis. 1:26) Idi yadiago egi tuajiyilego gulandula gifezegeselo gia Yehowa mu luholo luatagana. (Yesh. 55:9) Uvi gifua Phetelo, mbatusendesa gutangiza gifua luholo Yehowa wana tangiza gula tudi mutshita yagasue ha gukhala athu a gudibulumuisa nu gukhala nu matangi abonga.
LUNGIMBO 30 Mon Ami, mon Dieu, mon Père
a Mbimbi “khalenu nu matangi a luholo lumoshi” idi muzuelewa mu mukanda wa 1 Phetelo 4:1, yajiya gubalumuiwa nji egi “luholo lua gutangiza nga makalegelo.”
b UKOTELESHI WA IFUANESA: Phangi wa mukhetu udi mutshita gisambu mu mutshima tangua didi munengena muene egi amuhule mihu mukunda nu mudimo.