Luholo Lutshi Tuajiya Guhana Athu Ako Malongo?

1. Nanyi udi naye guhana malongo? Mukunda natshi?

WANA tshigina guhana athu ako malongo ba? Yakhala yaleba gudi athu ha guhana malongo. Uvi athu ako ana guvua woma ha guhana athu ako malongo. Ikhale ngenyi nga ndo, mukut’etu agasue tudi nu ginemo gia guhana athu ako malongo. Mukunda natshi? Handaga Yesu wazuelele egi alandudi enji mbaajiyiwa mukunda nu guzumba mbaakhala gudimonesela. (Yone 13:35) Hene, tangua tuana hana aphangi etu malongo mu tangua diabonga, tuana monesa diago egi tuana guazumba. Biblia yana zuela egi guhana malongo abonga guana kolesa ufuta.​—Ish. 27:9.

2. Itshi akulu adi naye gutshita? Mukunda natshi? (Tala nji galuanda “Malongo Mukunda nu Gudibungisa gua Mukatshi dia Phoso.”)

² Akulu adi naye gujiya luholo lua guhana malongo abonga gudi athu ako. Yehowa nu Yesu ahanyile akulu ginemo gia gubamba hungu. (1 Phet. 5:2, 3) Mukatshi dia maluholo akulu ana bamba hungu, luholo luko ludi guhana aphangi malongo a Biblia mu njila ya badiskur. Akulu adi naye nji guhana phangi wagasue malongo, nga munu walozelewe gale mu hungu. Luholo lutshi akulu nu athu agasue mukatshi dietu ajiya guhana malongo abonga?

3. a) Itshi yajiya gutukuatesa ha guhana malongo abonga? (Yeshaya 9:6; tala nji galuanda “Landula Gifezegeselo gia Yesu Tangua udi Muhana Malongo.”) b) Itshi tuza mumona mu longo edi?

³ Tuajiya gujiya luholo luabonga lua guhana malongo gula tudi mulonguga ifezegeselo idi mu Biblia ya athu ahanele malongo abonga, gifua gifezegeselo gia Yesu. Yesu wakhalele muhana malongo abonga tangua diagasue, gishina giene akhalele gumutamega egi ‘Muhanyi wa Malongo Wabonga.’ (Tanga Yeshaya 9:6.) Mu longo edi, tuza mumona ndaga tuajiya gukalagala gula muthu watutoga ha gumuhana malongo nu ndaga tuajiya gutshita gula tudi naye guhana muthu malongo ikhale muthu muene gatutogelego nawo. Tuza nji mumona mukunda natshi idi nu ndando ha guhana malongo mu tangua diabonga nu mu luholo luabonga.

GULA MUTHU WATUTOGA HA GUMUHANA MALONGO

4-5. Gula muthu watutoga ha gumuhana malongo, itshi tudi naye thomo gutshita? Hana gifezegeselo.

⁴ Gula muthu wagutoga ha gumuhana malongo, wajiya gusuanguluga nu ndaga yene handaga udi mujiya egi muthu muene wana gugushila mutshima; wajiya nji gutshigina gumuhana malongo ene mbala imoshi. Uvi udi naye thomo gudihula gula udi mujiya ndaga yene muabonga diago gutuama dia gumuhana malongo. Matangua ako, ndaga yabonga wajiya gutshita idi gutuma muthu muene gudi muthu udi mujiya ndaga yene muabonga hagula wajiya gumuhana malongo abonga.

⁵ Tutadilenu gifezegeselo egi. Tangiza gale egi futa diaye udi nu misongo yakola. Waguwambela egi wasendesa gale gukamba maluholo agusagewa, uvi udi mutshigina egi umuwambele luholo luabonga luajiya gusagewa muene. Wajiya guvua mutshima zagu-zagu egi nga wamuwambela gale luholo luajiya gusagewa muene, uvi udi naye gujiya egi ushigo munganga nu ushigo nji mujiya luholo lua gusaga misongo yene. Hene, ndaga yabonga wajiya gutshita idi gukuatesa futa diaye ha gukamba munganga wabonga wajiya gumusaga.

6. Mukunda natshi tudi naye guzula tangua gutuama dia guhana muthu malongo?

⁶ Tuajiya getu gutangiza egi tudi tuatagana ha guhana malongo; uvi gula muthu watutoga malongo, idi ndaga yabonga ha gubemba gale egi tangua diazonda dibalege gutuama dia gumuhana malongo. Mukunda natshi? Ishima 15:28 idi muzuela egi ‘muthu wabonga wana tangigiza gutuama dia guhana mvutu.’ Gishina giene, ikhale tudi mutangiza egi tudi mujiya malongo abonga a gumuhana, ndaga yabonga tuajiya gutshita idi gukamba thomo mu mikanda yetu, gutshita gisambu nu gujiya malongo abonga tuza muhana. Gula tuatshita ngenyi, mbatuhana malongo abonga adi gudivua nu gutshigina gua Yehowa. Tutadilenu gifezegeselo gia profete Natana.

7. Malongo atshi wazula mu gifezegeselo gia profete Natana?

⁷ Fumu Davidi wawambelele profete Natana egi wakhalele mutshigina gutungila Yehowa tempelo. Natana wamuwambelele mbala imoshi egi matangi enji akhalele abonga. Uvi Yehowa gakhalelego mutshigina egi Davidi atunge tempelo. Natana wakhalele naye guzula tangua dia guhula Yehowa mukunda nu ndaga yene. (1 Gudi. 17:1-4) Gifua luholo tuayimona mu gifezegeselo egi, gula muthu watutoga malongo, ndaga yabonga ya gukalagala idi gutuna “guzuela muphushi.”​—Yak. 1:19.

8. Ndaga itshi iko yajiya gututuma ha gutangigiza muabonga gutuama dia guhana muthu malongo?

⁸ Ndaga iko yajiya gututuma ha gutangigiza muabonga gutuama dia guhana muthu malongo idi egi: Gula tuahana muthu malongo abola gungima ndaga imoshi yabola yamubuila, mbayikhala nji gubola guetu. Gishina giene, tudi naye gutangigiza muabonga diago gutuama dia guhana muthu malongo.

GULA MUTHU GATUTOGELEGO MALONGO

9. Itshi akulu adi naye gukalagala gutuama dia guhana muthu malongo? (Galatiya 6:1)

⁹ Matangua ako, akulu adi naye guhana malongo gudi phangi mumoshi wakalagala “ndaga yabola.” (Tanga Galatiya 6:1.) Muthu wajiya gukhala udi mukalagala tundaga tuazonda-zonda tunu tuajiya gumutuma ha gutshita gubola guakoma. Akulu ana tshigina gukuatesa muthu wa luholo elu ha gulandula gukombelela Yehowa nu ha guheta monyo wa ivo nu ivo. (Yak. 5:19, 20) Gutuama egi amuhane malongo, akulu adi naye thomo gukamba gujiya gula muthu muene wakalagala diago ndaga yabola. Adi naye gujiya egi gula muthu wazula desizio dia gudisha nu matangi awo, ishigo mukotelesa egi udi mutshita ndaga yabola ishigo musuanguluisa Yehowa. (Roma 14:1-4) Uvi gula akulu akotelesa egi phangi muene wakalagala diago ndaga yabola yajiya gubolesa ufuta wenji nu Yehowa, adi naye gumuhana malongo. Luholo lutshi adi naye guyikalagala?

10-12. Ndaga itshi akulu adi naye gutshita hadi ene muhana malongo gudi muthu gaatogelego nawo? Hana gifezegeselo. (Tala ifuanesa.)

¹⁰ Yakhalago ndaga yaleba gudi akulu ha guhana malongo gudi muthu gaatogelego nawo. Mukunda natshi? Handaga mupostolo Phaula wazuelele egi muthu wajiya gukalagala ndaga yabola uvi muene nu gujiya ndo. Hene, gudi nu ndaga akulu adi naye gutshita gutuama dia guhana muthu malongo hagula ajiya gumukuatesa ha gutshigina malongo ene.

¹¹ Tutadilenu gifezegeselo egi: Muthu udi mutshigina gukuna mutshi ha mavu akola. Gutuama dia gukuna mutshi wene, udi naye thomo gulondega mavu. Gungima akunyi giwa mutshi wene. Gu suga udi naye guwumbila meya hagula ukule muabonga. Luholo lumoshi nji, gudi nu ndaga mukulu udi naye gutshita gutuama dia guhana muthu malongo ha gumukuatesa ha guatshigina. Ha gufezegesa, udi naye thomo gukamba tangua diabonga, gungima udi naye guwambela phangi muene egi wana gudisagesa mukunda nu muene nu udi mutshigina guta n’enji maga. Gula mukulu udi muhana malongo wajiyiwa gale egi wana zumba athu nu wana khala nu gisemo, mbayikhala yaleba gudi athu ako ha gutshigina malongo enji.

¹² Hadi ene muta maga, mukulu muene udi naye gumuwunguluisa egi matangua ako mukut’etu agasue tuana kalagala ndaga jiabola, gishina giene tuana khala nu funu ya malongo. Ngenyi mbawukuatesa muthu muene ha gutshigina malongo enji. (Roma 3:23) Udi naye nji gukalegela Biblia ha gumonesa phangi muene gubola guenji; udi naye guzuela mu dijui dia tuluga nu ginemua giagasue. Gula phangi muene wakotelesa gubola guakalagala muene, mukulu udi naye gumuwambela ndaga yajiya gutshita muene ha gusombegesa makalegelo enji. Gu suga ya maga awo, mukulu muene udi naye gumushimana mukunda nu makalegelo enji abonga, udi naye nji gukombelela n’enji. Ndaga jiene jiagasue jiajiya gukuatesa phangi muene ha gutshigina malongo amuhanewa.​—Yak. 5:15.

13. Itshi akulu adi naye gutshita ha gukuatesa muthu ha gukotelesa malongo muabonga?

¹³ Matangua ako, muthu wajiya gukotelesa malongo adi gumuhanewa mu luholo luabola. Itshi akulu adi naye gutshita hagula muthu muene akotelese muabonga? Adi naye gumuhula mihu nu ginemua giagasue. (Mulo. 12:11) Mvutu mbajiahana muthu muene mbajiakuatesa ha gujiya gula wakotelesa muabonga malongo ene nu udi mujiya luholo lua guakalegela.

GUHANA MALONGO MU TANGUA DIABONGA NU MU LUHOLO LUABONGA

14. Mukunda natshi tushigo naye guhana malongo tangua tudi nu khabu?

¹⁴ Mukut’etu agasue tushigo athu atagana, matangua ako tuana zuela nga ndo tuana kalegela athu ako ndaga jiana guasagesa. (Kol. 3:13) Biblia idi muzuela egi matangua ako muthu muko wajiya guzuela nga gutshita ndaga yajiya gutuhana khabu. (Ef. 4:26) Hene tushigo naye guhana malongo tangua tudi nu khabu. Mukunda natshi? Handaga “gula muthu wavua khabu, muene gana tshitago ndaga jiabonga gu meso a Nzambi.” (Yak. 1:20) Gula tuahana malongo tangua tudi nu khabu, tuajiya gubolesa luko ndaga muavula. Ishigo mukotelesa egi idi ndaga yabola gula tuawambela muthu watuhanyi khabu matangi etu nga luholo tudi gudivua. Uvi mbayikhala ndaga yabonga gula tuanengenena uu nu tangua khabu jietu mbajihua ha guta n’enji maga muabonga. Tuajiya guzula malongo mu gifezegeselo gia Elihu, wahanele Yobo malongo abonga.

15. Longo ditshi tuazula mu gifezegeselo gia Elihu? (Tala nji gifuanesa.)

¹⁵ Elihu wabalegesele masugu avula nu gutegelela luholo Yobo wakhalele gudibingisa mu ndaga jiakhalele gumuwambela mafuta enji abola. Elihu wavuidile Yobo khenda. Uvi wavuile nji khabu handaga Yobo wakhalele gudibingisa muavula nu wakhalele muzuela ndaga jia mambo mukunda nu Yehowa. Ikhale ngenyi, Elihu wanengenene gutuama dia guzuela; hahanele muene Yobo malongo, wazuelele nu gutuluga nu ginemua giagasue. (Yobo 32:2; 33:1-7) Gifezegeselo gia Elihu gidi gutulongesa longo dimoshi dia ndando: Tudi naye guhana malongo mu tangua diabonga nu mu luholo luabonga; tudi naye nji guyitshita nu ginemua nu guzumba guagasue.​—Mulo. 3:1, 7.

LANDULA GUHANA NU GUTSHIGINA MALONGO

16. Longo ditshi wazula mu Ngimbo 32:8?

¹⁶ Yehowa udi muzuela mu verse yakuata longo edi egi: ‘Mbanguguhana malongo, mbangugutala muabonga.’ (Tanga Ngimbo 32:8.) Ndaga yene idi mukotelesa egi mbawulandula gutukuatesa. Udi gutulaya egi mbawutuhana malongo nu mbawutukuatesa nji ha guakalegela. Yehowa udi gifezegeselo giabonga diago mukunda nu esue! Tangua tudi muhana athu ako malongo, tudi naye nji guahana gikhesa nu guakuatesa ha guzula badesizio abonga.

17. Tuana gudivua gikhuatshi tangua akulu ana gutuhana malongo a Biblia? (Yeshaya 32:1, 2)

¹⁷ Luholo gisugishilo gia ha mavu awa giasuena hehi, tudi diago nu funu ya guheta malongo abonga nu guahana gudi athu ako. (2 Tim. 3:1) Gifua luholo ‘meya a mita ya mu temu’ ajiya gukuatesa muthu ha gumanesela luhungu luenji, akulu ana hana malongo akatuga mu Biblia ana gutuhana gikhesa nu ana gutukuatesa ha gulandula gukombelela Yehowa. (Tanga Yeshaya 32:1, 2.) Tuana khala nu gusuanguluga tangua mafuta etu ana gutuhana malongo abonga ana gutukuatesa; mbimbi jiawo jiakhala gifua ‘mabundu a pome a wolo mu ima ya gusembegela ya utadi wa siliva.’ (Ish. 25:11) Mukut’etu etu agasue tutshitenu ngolo ha gulandula gulonguga luholo lua guhana nu gutshigina malongo abonga.