LONGO DIA 28
LUNGIMBO 88 «Fais-moi connaître tes voies»
Mukunda Natshi Tudi Naye Gukamba Malongo?
‘Ndunge jidi gudi muthu udi mukamba malongo.’—ISH. 13:10.
MU GUHIHIA
Tuza mumona ndaga tudi naye gukalagala nu gubonga tuajiya guheta gula atuhana malongo.
1. Luholo lutshi tuajiya guzula badesizio abonga hagula ndaga tudi mutshita jiye gutuama? (Ishima 13:10; 15:22)
MUKUT’ETU agasue tuana tshigina guzula badesizio abonga. Tuana tshigina nji egi ndaga tudi mutshita jiye gutuama. Mbimbi ya Nzambi yana gutuwambela egi ha gutagenesa ndaga jiene, tudi naye gukamba malongo.—Tanga Ishima 13:10; 15:22.
2. Ndaga itshi Yehowa udi gutulaya?
2 Muthu wabonga tudi naye gutoga malongo udi Tata wetu Yehowa. Udi gutulaya egi mbawutukuatesa; udi muzuela egi: ‘Mbanguguhana malongo, mbangugutala nji muabonga.’ (Ngi. 32:8) Mbimbi eji jidi mumonesa egi Yehowa mbawutuhana malongo nu mbawutukuatesa ha guakalegela.
3. Itshi tuza mumona mu longo edi?
3 Mu longo edi, tuza mumona luholo Biblia iza gutukuatesa ha guhana mvutu gu mihu eyi nguana: 1) Makalegelo atshi ngudi naye gukhala nawo gula ngudi mukamba malongo? 2) Nanyi wajiya gunguhana malongo abonga? 3) Luholo lutshi ngajiya gumonesa egi ngudi diago nu funu ya malongo? 4) Mukunda natshi ngushigo naye gutoga athu ako ha gunguzudila badesizio?
MAKALEGELO ATSHI NGUDI NAYE GUKHALA NAWO?
4. Khadilo ditshi tudi naye gukhala nadio gula tudi mukamba malongo?
4 Tudi naye gukhala nu khadilo dia gudibulumuisa tangua tudi mukamba malongo. Tujimbilago egi tushigo nu eksperianse nga ujiyi watagana ha gudizudila desizio diabonga esue hakhetu. Gula tushigo nu gudibulumuisa, Yehowa mbagashigo gutukuatesa; ngenyi, mbayikhala nji lamba gudi esue ha gukalegela ndaga tudi mutanga mu Mbimbi yenji. (Mika 6:8; 1 Phet. 5:5) Uvi gula tudi nu khadilo dia gudibulumuisa, mbatukalegela muphushi malongo a Biblia nu mbatuheta nji gubonga guavula.
5. Ndaga jitshi jiakhalele naye gutuma Fumu Davidi ha gubua muenya lulendo?
5 Tutadilenu malongo tuajiya guzula mu gifezegeselo gia Fumu Davidi. Wakalegele ndaga jiavula jiakhalele naye gumutuma ha gubua muenya lulendo. Ivo yavula gutuama dia gubua fumu, wakhalele wajiyiwa gale handaga wakhalele ngimba wakoma. Amutogele ha guza muyimbila fumu. (1 Sam. 16:18, 19) Tangua ambile Davidi maji ha gubua fumu, Yehowa wamuhanele nji nyuma yenji. (1 Sam. 16:11-13) Athu akhalele nji gumutumbuisa handaga washiyile mbalagaji jiawo jiavula gifua Goliyate muenya gu Filistiya. (1 Sam. 17:37, 50; 18:7) Nga Davidi wakhalele muenya lulendo, nga watangijile egi gashigo luko nu funu ya malongo a athu ako. Uvi Davidi gatshitshilego ngenyi.
6. Luholo lutshi tudi mujiya egi Davidi wakhalele mutshigina malongo? (Tala nji gifuanesa holu dia gizula.)
6 Habuile Davidi fumu, walanduile gukuata ufuta nu athu amuhanyile malongo. (1 Gudi. 27:32-34) Ishigo ndaga ya gudihula handaga Davidi wakhalele mutegelela malongo a athu ako ikhale gutuama dia gubua fumu. Wakhalele mutegelela malongo akhalele gumuhana mala, uvi wategelele nji longo diamuhanele Abigayile. Mulumi’enji Nabale wakhalele muenya lulendo, gakhalelego muhana mersi nga gunemesa athu ako. Uvi Davidi watshiginyile longo dia mukhetu muene nu gudibulumuisa guagasue, ndaga yene yamukuatesele ha gutuna gukalagala gubola guakoma.—1 Sam. 25:2, 3, 21-25, 32-34.
Fumu Davidi udi mutegelela longo didi gumuhana Abigayile nu wadikalegela nu gudibulumuisa guagasue (Tala paragrafe 6)
7. Malongo atshi tuajiya guzula mu gifezegeselo gia Davidi? (Mulongeshi 4:13) (Tala nji ifuanesa.)
7 Tuajiya guzula malongo avula mu gifezegeselo gia Davidi. Ha gufezegesa, tuajiya gukhala nu ndunge jia gukalagala ndaga imoshi ngenyi nga ndo tudi nu inemo. Ikhale ngenyi, tushigo naye gutangiza egi tudi mujiya ndaga jiagasue nu tushigo nu funu ya malongo. Tudi naye gukhala hehi ha gutegelela malongo abonga adi gutuhana athu agasue (ikhale mala nga akhetu) gifua Davidi. (Tanga Mulongeshi 4:13.) Gula tuakalagala ngenyi, mbayitukuatesa ha gutuna gutshita ndaga jiajiya gutubatela malamba nu athu ako.
Tudi naye gukhala hehi ha gutshigina longo diabonga adi gutuhana ikhale nanyi watuhana nadio (Tala paragrafe 7)c
NANYI WAJIYA GUNGUHANA MALONGO ABONGA?
8. Mukunda natshi Yonatana wakhalele watagana ha guhana Davidi longo diabonga?
8 Tutadilenu longo diko tuajiya guzula mu gifezegeselo gia Davidi. Wategelele malongo amuhanele athu akhalele nu ufuta wabonga nu Yehowa nu a athu akhalele mukotelesa muabonga ndaga jiakhalele gumubuila. Ha gufezegesa, tangua Davidi wakhalele mukamba gujiya gula Fumu Saula udi mutshigina gukhala n’enji mu guhuima, wategelele longo diamuhanele Yonatana mun’a Saula. Mukunda natshi Yonatana wakhalele watagana ha gumuhana longo diabonga? Handaga wakhalele nu ufuta wawaha nu Yehowa, wakhalele nji mujiya Saula muabonga. (1 Sam. 20:9-13) Longo ditshi tuajiya guzula?
9. Nanyi wajiya gutuhana malongo abonga? Hana gifezegeselo. (Ishima 13:20)
9 Gula tudi nu funu ya malongo, tudi naye guatoga gudi muthu udi nu ufuta wabonga nu Yehowa nu udi mukotelesa muabonga mulonga wetu.a (Tanga Ishima 13:20.) Ha gufezegesa, tangiza gale egi phangi mumoshi wa muvuala udi mukamba mukhetu wabonga. Nanyi wajiya gumuhana malongo abonga? Futa dienji udi ndumbu wajiya gumuhana malongo abonga gula adi mukatuga mu Biblia. Uvi phangi muene wajiya guheta malongo abonga ajiya gumukuatesa gula waatoga gudi phangi wa gukula mu nyuma udi gumujiya muabonga nu wadizudile gale mu ulo sendese mualeha.
10. Itshi tuza mutadila henyaha?
10 Tuamona khadilo tudi naye gukhala nadio gula atuhana malongo, tuamona nji athu ajiya gutuhana malongo abonga. Henyaha tutadilenu luholo tuajiya gumonesa egi tudi diago nu funu ya malongo nu gujiya gula athu ako ajiya guzula desizio ha fundo dietu nga ndo.
LUHOLO LUTSHI NGAJIYA GUMONESA EGI NGUDI DIAGO NU FUNU YA MALONGO?
11-12. a) Matangua ako itshi athu ana tshita? b) Ndaga itshi yakalegele Fumu Roboama hatshiginyile muene guzula desizio?
11 Matangua ako, muthu wajiya gumonesa egi udi mukamba malongo gudi athu ako; uvi mu guzuela guabonga wazudi gale desizio dienji, udi mukamba phamba egi athu ako amutshiginyise egi desizio diene didi diabonga. Muthu wa luholo elu gashigo diago nu funu ya malongo. Udi naye guzula malongo mu ndaga yabuidile Fumu Roboama.
12 Roboama wabuile fumu wa Isalele gungima dia Fumu Salomo. Hasendesele muene gutuameza gifutshi, athu akhalele nu ima yavula yabonga, uvi akhalele mumona egi Salomo wakhalele guakalegesa midimo yakola. Athu ayile gudi Roboama, amutogele ha gulebesa midimo yakola akhalele mutshita. Roboama waawambelele ha gumubembela tangua ha gutangiza desizio didi naye guzula muene. Thomo, wakalegele ndaga yabonga, wayile mutoga malongo gudi athu a gukola akuatesele sh’enji Salomo. (1 Maf. 12:2-7) Uvi gungima watunyile genji longo diamuhanele athu a gukola. Mukunda natshi Roboama watshitshile ngenyi? Yajiya gukhala egi wakhalele wazudi gale desizio dienji, uvi wakhalele mukamba egi athu ene atshigine nji desizio diene. Gishina giene, hahudile muene mafuta enji akudile nawo, atshiginyile ndaga yakhalele mu matangi enji; ndaga yene yamusuanguluishile nji. (1 Maf. 12:8-14) Gungima, Roboama wavutugile muhana athu mvutu mu gudivua nu longo diamuhanele mafuta enji. Ndaga yene yatumine athu ha gumulumbugila, atombele fumu muko. Sendese mu tangua diene, Roboama watagenele nu malamba avula.—1 Maf. 12:16-19.
13. Luholo lutshi tuajiya gujiya gula tuana tegelela malongo adi gutuhana athu ako?
13 Malongo atshi tuajiya guzula mu gifezegeselo gia Roboama? Tangua tudi mutoga malongo, tushigo naye gukhala tuadizudila gale desizio; tudi naye gukhala hehi ha gutegelela malongo athu ako adi gutuhana. Tudi naye gudihula egi: ‘Gula anguhana malongo, ngana guatuna mbala imoshi handaga ishigo ene ngakhadi gudifelela ba?’ Tutadilenu gifezegeselo giko.
14. Itshi tushigo naye gujimbila gula atuhana longo? Hana gifezegeselo. (Tala nji gifuanesa.)
14 Tangiza gale egi phangi mumoshi waheta mudimo wabonga. Gutuama dia gutshigina mudimo wene, watoga malongo gudi mukulu mumoshi. Wawambela mukulu muene egi mudimo wene mbawutshita egi abalegese masugu avula gualeha nu fami yenji. Mukulu muene wamuwambela egi ginemo gienji gia thomo gidi gia gutagenesa nzala jia mu nyuma jia enya fami yenji. (Ef. 6:4; 1 Tim. 5:8) Uvi phangi muene watuna genji longo diamuhanyi mukulu, waya mukamba malongo gudi athu ako a mu hungu uu nu tangua diaheta muene muthu wamuwambela egi wajiya genji gutshigina mudimo wene. Phangi owu gashigo diago mukamba malongo, handaga wakhadi wazudi gale desizio dienji uvi udi mukamba muthu mbawumutshiginyisa egi matangi enji adi abonga. Tudi naye gujiya egi mutshima wetu wana guhuiga gubalega ima iko yagasue. (Yel. 17:9) Matangua ako, ajiya gutuhana longo tushigo diago musuanguluga nadio, uvi yajiya gukhala egi diene longo diabonga diajiya diago gutukuatesa.
Tudi diago mukamba malongo, nga ndo tudi mukamba muthu wajiya gututshiginyisa egi matangi etu adi abonga? (Tala paragrafe 14)
NGUDI NAYE GUTOGA ATHU AKO HA GUNGUZUDILA BADESIZIO BA?
15. Itshi tushigo naye gutshita? Mukunda natshi?
15 Yehowa wana tshigina egi muthu wagasue adizudile badesizio enji. (Gal. 6:4, 5) Gifua luholo tuayimonyi, muthu watema wana kamba malongo mu Mbimbi ya Nzambi nu gudi Aklisto a gukula mu nyuma gutuama dia guzula desizio. Uvi tushigo naye gutoga athu ako ha gutuzudila badesizio. Athu ako ana hana athu ako ana nemesa ene njila ya guazudila badesizio tangua ana guahula egi: “Nga wakhadi ha fundo diami, nga itshi wakhadi naye gutshita?” Uvi athu ako ajiya guzula badesizio handaga amonele athu ako mutshita ngenyi, uvi nu guzula ndo tangua dia gutangigiza gutuama.
16. Desizio ditshi Aklisto a gu Kolinto akhalele naye guzula mukunda nu mbiji jiakhalele muhanewa milambu gu isongo? Nanyi wakhalele nu ginemo gia guzudila athu ako desizio diene? (1 Kolinto 8:7; 10:25, 26)
16 Tutadilenu ndaga yabuidile Aklisto a gu Kolinto; akhalele naye guzula desizio diatadila gudia mbiji jiahanewa milambu gu isongo. Phaula wasonegele Aklisto ene egi: “Tudi mujiya egi gisongo gidi gima gia githuhu, uvi Nzambi udi phamba mumoshi.” (1 Kol. 8:4) Mbimbi jiene jia Phaula jiatumine aphangi ako a mu hungu diene ha guzula desizio dia gudia mbiji akhalele musumba ha zando, ikhale mbiji jiene jiahanewa milambu gu isongo. Athu ako azudile desizio dia gutuna gudia mbiji jia luholo elu hagula isagesago mutshima wawo. (Tanga 1 Kolinto 8:7; 10:25, 26.) Muthu nu muthu wakhalele naye gudizudila desizio. Phaula gatogelego enya gu Kolinto ha guzudila athu ako desizio nga gulandula ndaga jiakhalele mutshita athu ako. Muthu wagasue mukatshi diawo “mbawudisophela gutuama dia Nzambi.”—Roma 14:10-12.
17. Itshi yajiya gutubuila gula tuazula desizio dimoshi ngenyi handaga tuamonyi muthu muko muzula desizio diene? Hana gifezegeselo. (Tala nji ifuanesa.)
17 Ndaga ya luholo elu yajiya nji gubua mangino ba? Tuzuelelenu ndaga yatadila tuyitshinyi tuazonda-zonda tua mahatshi tuana tamegewa egi fractions de sang. Muklisto wagasue udi naye guzula desizio dia gutuna nga gutshigina gumbiwa tuyitshinyi tuene tua mahatshi.b Ndaga yene yajiya gukhala lamba ha gukotelesa, uvi guzula desizio dia luholo elu gudi mukatshi dia inemo Muklisto wagasue udi naye gudibatela. (Roma 14:4) Gula tuazula desizio dia luholo elu handaga tuamonyi muthu muko muzula desizio diene, mbatushigo mukhala athu atema. Uvi ha gukhala athu atema, tudi naye gudizudila badesizio mu gudivua nu malongo a Biblia. (Heb. 5:14) Na tangua ditshi tuajiya gutoga malongo gudi Muklisto wa gukula mu nyuma? Gula tuakamba malongo mu mikanda yetu nu tuamona egi tudi luko nu funu ya ukuateshi ha gukotelesa malongo a Biblia, diene tangua tuajiya gukamba malongo gudi Aklisto a gukula mu nyuma.
Tudi naye gukamba thomo malongo mu mikanda yetu gutuama dia guatoga gudi muthu muko (Tala paragrafe 17)
LANDULA GUKAMBA MALONGO
18. Itshi Yehowa wakalegele mukunda nu esue?
18 Yehowa wamonesele egi wana gutushila mutshima luholo luatuhanele muene luendu lua gudizudila badesizio. Watuhanele Mbimbi yenji, Biblia. Watuhanele nji mafuta abonga ana gutukuatesa ha guzula badesizio mu gudivua nu malongo a Biblia. Ndaga jiene jiagasue jiana monesa egi Yehowa wana gudisagesa mukunda nu esue gifua luholo tata wana zumba an’enji wana guyitshita. (Ish. 3:21-23) Luholo lutshi tuajiya guhana Yehowa mersi?
19. Luholo lutshi tuajiya gulandula gusuanguluisa Yehowa?
19 Mvuaji jiana khala nu gusuanguluga gula an’awo akula mu nyuma nu abua akombeledi atema a Yehowa ana kuatesa athu ako. Luholo lumoshi nji, Yehowa wana khala nu gusuanguluga gula tudi mukula mu nyuma, tudi mukamba malongo nu tudi muzula badesizio adi mumonesa egi tuana gumuzumba.
LUNGIMBO 127 Quel genre de personne je dois être !
a Matangua ako, Muklisto wajiya gutoga malongo gudi muthu ganago gukombelela Yehowa mu milonga iko gifua ndaga yatadila makuta, gusagewa nu ndaga jiko.
b Ha gujiya ndaga jiko jiavula jiatadila mahatshi, tala longo dia 39 gitshinyi gia 5 nu gitshinyi “Ndaga Jiko Jiavula jia Ndando” mu mukanda Heta Monyo wa Ivo nu Ivo!
c UKOTELESHI WA IFUANESA: Mukulu mumoshi udi muhana mukulu muko longo diatadila luholo luakhala muzuela muene mu gudibungisa gua akulu akatuga gutshita.