Yesu Walongesele Nikodemo mu Phipha

Hakhalele Yesu gu Yelusalema mukunda nu wano wa Pake wa givo 30 gia tangua dietu, wakalegele ndaga jiakoma jia gushimana. Hene, yatumine athu avula ha gusha gutshigina gudi muene. Nikodemo wakhalele Mufalese, luko wakhalele mukalagala gu tribinale yakoma ya enya Yuda, yakhalele mutamegewa egi Sanhédrin. Wadihudile muavula, enji wakhalele nu funu ya gujiya ndaga jiavula. Hene, wayile mutala Yesu mu phipha. Yajiya gukhala egi Nikodemo wayile mu phipha handaga wakhalele muvua woma wa mafumu a enya Yuda.

Nikodemo wazuelele egi: ‘Mulongeshi, tuajiya egi Nzambi wagutumine mukunda nu gulongesa, handaga muthu gajiyilego gukalagala ijiyishilo eyi udi mutshita gula Nzambi gashigo n’enji.’ Yesu walezele Nikodemo egi, hagula muthu angine mu Ufumu wa Nzambi, udi naye ‘guvalewa lua mbadi.’—Yone 3:2, 3.

Uvi, luholo lutshi muthu wajiya guvalewa lua mbadi? Nikodemo wahudile Yesu egi: ‘Muthu wajiya gungina luko mu vumo dia gin’enji ha guvalewa luko ba?’—Yone 3:4.

Ndo. Guvalewa gua mbadi gushigo mukotelesa ngenyi ndo. Yesu wazuelele egi: ‘Gula muthu gavualewego mu meya nu mu nyuma ya Nzambi, gajiyilego gungina mu Ufumu wa Nzambi.’ (Yone 3:5) Tangua Yesu gabatijiwe, enji nyuma ya Nzambi yabulumugile holu dienji, wavalewe ‘mu meya nu mu nyuma ya Nzambi.’ Mu tangua diene, mbimbi yakatugile gosa mu dilu, yazuelele egi: ‘Yowu udi mun’ami ngana guzumba muavula, ngamutshigina.’ (Matayo 3:16, 17) Ngenyi, Nzambi wamonesele egi, Yesu wabuile mun’enji wa mu nyuma, enji wakhalele nu felela dia gungina mu Ufumu wa mu dilu. Gungima, mu Pantekote ya givo 33 gia tangua dietu, Nzambi wahanele nyuma yenji gudi athu abatijiwe, hagula avalewe lua mbadi, ngenyi abuile an’enji a mu nyuma.—Makalegelo 2:1-4.

Yakhalele lamba hagula Nikodemo akotelese ndaga jiakhalele mulongesa Yesu mukunda nu Ufumu wa mu dilu. Hene, Yesu wamuwambelele ndaga jiko jiatadila ginemo giakhalele nagio muene gifua Mun’a Nzambi. Wazuelele egi: ‘Gifua luholo Moise wamagesele nyoga mu mavu a luselenga, Mun’a Muthu udi naye nji gumagenesewa ngenyi. Hagula, muthu wagasue washa gutshigina guenji gudi muene, ahete monyo wa ivo nu ivo.’—Yone 3:14, 15.

Mu ivo yabalega, enya Isalele anyi akhalele musumiwa jinyoga, akhalele naye gutala nyoga ya utadi hagula ahuluishiwe. (Lutango 21:9) Luholo lumoshi, athu agasue adi naye gusha gutshigina guawo gudi Mun’a Nzambi hagula ahuluishiwe nu ahete monyo wa mayilago. Ha gumonesa guzumba gua Yehowa mu ndaga eyi, Yesu wawambelele Nikodemo egi: ‘Ndaga ya Nzambi wabalegele guzumba a ha mavu, muene waahuile mun’enji mumoshi’a mumoshi, hagula muthu wagasue washa gutshigina guenji gudi muene, gafuigo uvi akhale nu monyo wa ivo nu ivo.’ (Yone 3:16) Yesu wakhalele watshitshi gale mbeji jisamano mu mudimo wa gulongesa. Wamonesele haphelo egi athu mbaahuluishiwa mu njila yenji.

Yesu walezele Nikodemo egi: ‘Nzambi gatuminego mun’enji ha mavu hagula asophese athu.’ Yakotelesa egi Nzambi gatuminego Yesu ha gufuisa athu milonga, nga gushiya athu agasue. Uvi, luholo Yesu wazuelele, Nzambi wamutumine ‘hagula athu a ha mavu ahuluishiwe gudi muene.’—Yone 3:17.

Nikodemo wakhalele nu woma, hene ayile mutala Yesu mu phipha. Luholo Yesu wasugishile maga ene ludi musuanguluisa diago. Wamudijigile egi: “Gishina gia gusophesa athu gien’egi: muanya [yakotelesa Yesu, mu njila ya lujingu nu malongo enji] wajile ha mavu uvi athu azumbile phipha gubalega muanya, mukunda midimo yawo yakhalele yabola. Handaga muthu wagasue wana gutshita ndaga jiabola ganago guzumba muanya, enji ganago gusuena nu muanya hagula midimo yenji imonegago haphelo. Uvi, muthu wana gutshigina ndaga jia giamatshidia wana gusuena nu muanya hagula midimo yenji imonege egi yakalegewa mu gudivua nu Nzambi.”—Yone 3:19-21, NW.

Nikodemo wakhalele Mufalese nu mulongeshi wa Isalele. Yakhalele mutoga egi atangigize ndaga jiavuile muene jiatadila ginemo gidi nagio Yesu mu felela dia Nzambi.