Yesu Watuma Alandudi 70 ha Gulongesa

Tudi gu gisugishilo gia givo 32 gia tangua dietu, ivo thathu yabalega gale sendese Yesu gabatijiwe. Masugu azonda abalega, muene nu alandudi enji akhalele gu Yelusalema mukunda nu Wano wa Isasa. Yajiya gukhala egi akhalele mu membo akhalele hehi nu Yelusalema. (Luka 10:38; Yone 11:1) Yesu wasalele nu mbeji jisamano mu mudimo wenji wa gulongesa; uvi wabalegesele masugu avula a mbeji jiene mu Yudea nga ha sambua dia Muta wa Yoradani, mu distrike dia Perea. Athu akhalele mu membo ene, akhalele nji nu funu ya guvua lukuma luabonga.

Gungima dia wano wa Pake wa givo 30 gia tangua dietu, Yesu walongesele mbeji jiavula mu Yudea, gungima wayile gu Samaliya. Uvi mu wano wa Pake wa givo 31 gia tangua dietu, enya Yuda a gu Yelusalema akambele gumushiya. Mu givo gimoshi nu ndambo gialanduile, Yesu walongesele gu khanda ya nordi ya Galile. Mu tangua diene, athu avula abuile alandudi enji. Hakhalele muene gu Galile, wahanele apostolo enji formasio, gungima waatumine ha gulongesa. Waawambelele egi: “Ndjienu nu gulongesa egi: ‘Ufumu wa mu dilu udi gale hehi.’” (Matayo 10:5-7, NW) Mu tangua diene, walondele kampanye ga mudimo wa gulongesa lukuma luabonga mu Yudea.

Ha gusendesa kampanye gene, Yesu watombele alandudi 70, waatumine muyadi-muyadi. Ngenyi, watumine mahunji 35 a alongeshi a Ufumu mu terituare, fundo ‘ima ya gumuna yakhalele yavula, uvi amunyi akhalele azonda.’ (Luka 10:2) Akhalele naye gudiangela guya mu mafundo Yesu wakhalele mutshigina guya. Alandudi ene 70 akhalele naye gusaga enya misongo nu gumuanga lukuma luabonga luakhalele mulongesa Yesu.

Alandudi ene akhalelego naye gulongesa mu ba sinagoga. Yesu waawambelele ha guya mu jinzo jia athu. Wazuelele egi: “Ha muangina monzo, zuelenu thomo egi: ‘Guhuima gukhale mu inzo eyi.’ Gula muenya guhuima udi muene, lumene luenu lua guhuima mbalukhala nenji.” Ndaga itshi akhalele naye gulongesa? Yesu wazuelele egi: “Awambelenu egi: ‘Ufumu wa Nzambi waza hehi nu enue.’”—Luka 10:5-9, NW.

Malongo ahanele Yesu gudi alandudi 70 adi luholo lumoshi nu awa gahanele muene gudi apostolo 12 tangua gaatumine ha gulongesa, givo gimoshi gia balega gale. Waadijigile gutuama egi athu agasue mbaayambigo muabonga. Uvi gikhesa giawo mbagikuatesa athu a mitshima yatagana hagula tangua mbadiza Yesu gungima, athu avula mbaakhala nu nzala ya gumona Fumu nu gutegelela malongo enji.

Matangua azonda gungima, alongeshi agasue 70 a Ufumu avutugile gudi Yesu. Azuelele nu gusuanguluga guagasue egi: ‘Fumu, nu ene bademo akhala gututumagela tangua tuakalegela jina diaye.’ Lumene elu luabonga atele ene lua suanguluishile Yesu, handaga wazuelele egi: “Ngamonyi Satana mubua mu dilu gifua guhenya gua mvula. Tadienu! Ame ngamihuile uhinyinyi ha gudiata jinyoga nu tuminyiminyi.”—Luka 10:17-19.

Yesu wawambelele alandudi enji egi mbaakhala nu ngolo jia gubinga ndaga jiko jiabola, gifua luholo athu ana gushiya nioga nu tuminyiminyi. Luko, watshiginyishile alandudi enji egi mu masugu adi muza, Satana mbawubua hashi. Yesu wakuatesele nji alandudi 70 ha gumona ndaga idi nu ndando yavula mu lujingu luawo. Wazuelele egi: ‘Musuangulugago handaga nyuma jiabola jidi gumitumagela, uvi suangulugenu handaga majina enu asonegewe mu dilu.’—Luka 10:20.

Yesu wasuangulugile diago muavula, watumbuishile sh’enji ha meso a athu luholo gahanele akombeledi enji a gudibulumuisa nu ngolo jiavula. Wabalumugile gudi alandudi enji, waawambelele egi: ‘Gusuanguluga gukhale nu meso adi mumona ndaga eji mudi mumona. Ndaga ya ngudi gumiwambela egi ba profete avula nu mafumu avula adifelele gumona imudi mumona, uvi ayimuenenego. Adifelele guvua imudi muvua, uvi ayivuilego.’—Luka 10:23, 24.