LONGO DIA 48
Khala nu Matangi Abonga Gula Gutshigina Guaye Gualolewa
“Khala nu matangi abonga mu ndaga jiagasue.”—2 TIM. 4:5.
LUNGIMBO 123 Fidèlement soumis à l’ordre théocratique
NDAGA JIDI MU LONGO EDIa
1. Gukhala nu matangi abonga gudi mukotelesa itshi? (2 Timote 4:5)
YAJIYA gukhala lamba ha gusala ya gujinginyina gudi Yehowa nu mu organizasio wenji gula tuatagana nu malamba. Luholo lutshi tuajiya gubinga malamba ene? Tudi naye gukhala nu matangi abonga nu gumonesa gutema. Tudi naye nji gukhala nu gutshigina guakola. (Tanga 2 Timote 4:5.) Tuana khala nu matangi abonga tangua tuana tuna gudisagesa, tuana tangiza muabonga nu tuana tshita yagasue ha gutadila ndaga gifua Yehowa. Gula tuatshita ngenyi, mbatushigo mubemba egi ndaga tudi mutagana najio jisombegese matangi etu.
2. Itshi tuza muzuelela mu longo edi?
2 Mu longo diabalega, tuamonele malamba thathu ajiya gukatuga gudi athu ashigo Matemue a Yehowa. Mu longo edi, tuza mumona malamba thathu tuajiya gutagana nawo mu hungu anyi ajiya gutshita egi ikhale lamba ha gusala ya gujinginyina gudi Yehowa. Lamba dia (1) gula phangi mumoshi watukalegela gubola, dia (2) gula atuhana ndola nu dia (3) gula idi lamba ha gujidila nu usombegeshi umoshi mu ulondegi wa Yehowa. Luholo lutshi tuajiya gukhala nu matangi abonga nu gusala ya gujinginyina gudi Yehowa nu mu organizasio wenji gula tuatagana nu malamba a luholo elu?
GULA PHANGI MUMOSHI WATUKALEGELA GUBOLA
3. Luholo lutshi tuajiya gudivua gula phangi mumoshi watukalegela ndaga yabola?
3 Agukalegele gale gubola gudi phangi mumoshi wa yala nga wa mukhetu nga gudi phangi mumoshi udi nu inemo mu hungu ba? Yajiya gukhala egi phangi muene gakhalelego nu matangi a gutshita ndaga yajiya gugusagesa. (Roma 3:23; Yak. 3:2) Uvi yajiya gukhala egi ndaga jiatshitshile muene jia guhanyi khabu. Yajiya nji gukhala egi ndaga yene ya gubandesa gikole-kole. Wajiya gudihula egi: ‘Gula wuwu udi diago ulondegi wa Yehowa, mukunda natshi phangi yowu gangutshita ndaga ya luholo elu?’ Satana wana tshigina egi tutangize ngenyi. (2 Kol. 2:11) Matangi a luholo elu ajiya gututuma ha gutuna Yehowa nu organizasio wenji. Gula phangi mumoshi watukalegela ndaga yabola, luholo lutshi tuajiya gukhala nu matangi abonga nu gutuna gutangiza ndaga jiabola?
4. Luholo lutshi Yozefe wakhalele nu matangi abonga tangua aphangi’enji amukalegele ndaga jiabola? Ndaga yene idi gutulongesa itshi? (Gisendeselo 50:19-21)
4 Ukhadigo muvua khabu. Tangua Yozefe wakhalele muvuala, aphangi’enji amukalegele gubola. Akhalelego gumuzumba, ako mukatshi diawo akhalele mutshigina gumushiya. (Gis. 37:4, 18-22) Gungima amusumbishile mu uhiga. Ndaga yene, yatshitshile egi Yozefe atagane nu malamba akola ivo 13. Yozefe wakhalele naye gudihula gula Yehowa wana gumuzumba diago, nga gula Yehowa wa mutunyile mu tangua diene dia lamba. Uvi Yozefe gavilego khabu. Wakhalele nu matangi abonga luholo luabembele muene ndaga jiagasue ha mago a Yehowa. Tangua adimonele luko nu aphangi’enji, gaavutudilego gubola, uvi waamonesele guzumba nu waatotesele gubola guawo. (Gis. 45:4, 5) Watshitshile ngenyi handaga wakhalele nu matangi abonga. Ha fundo dia gutangiza phamba mulonga wenji, watangijile ndaga Yehowa wakhalele mutshigina. (Tanga Gisendeselo 50:19-21.) Ndaga eyi idi gutulongesa itshi? Gula muthu wagukalegela gubola, uvilago Yehowa khabu nga gutangiza egi wagutunyi. Uvi, tangiza luholo ludi gugukuatesa muene ha gukolesela mu malamba ene. Gula athu a gukalegela ndaga yabola, guzumba mbagugukuatesa ha gubuita ndaga yene mutshima.—1 Phet. 4:8.
5. Luholo lutshi phangi Miqueas wamonesele egi wakhalele nu matangi abonga tangua aphangi amukalegele gubola?
5 Tutadilenu gale gifezegeselo gia mukulu mumoshi gu Amérique du Sud mu jina dia Miqueas.b Udi mumonesa luholo luadivile muene tangua aphangi akhalele nu inemo mu ulondegi wa Yehowa amukalegele gubola. Udi muzuela egi: “Ngavile diago gikenene giavula. Ngakhalele muvua woma. Ngakhalelego mubanda mu phipha, ngakhalele mudila handaga ngakhalele mumona egi ngushigo luko nu ndaga ya gutshita.” Uvi phangi Miqueas wakhalele nu matangi abonga, gabembelego egi ndaga yene imulebese muila. Wakhalele mukombelela Yehowa mbala jiavula ha gumutoga nyuma yenji nu ngolo ha gukolesela. Wakhalele nji mutanga mikanda yetu ha guheta malongo ajiya gumukuatesa. Ndaga eyi idi gutulongesa itshi? Gula phangi mumoshi wa gukalegela gubola, udisagesago, tshita yagasue ha gutuna ndaga jiajiya gugulebesa muila. Yajiya gukhala egi ushigo mujiya ndaga yatumi muthu muene ha guzuela nga ha gukalagala ndaga yene. Hene tshita gisambu, toga Yehowa ha gugukuatesa ha gutadila ndaga gifua athu ako. Gutshita ngenyi mbagugutuma ha gutangiza egi phangi muene gakhalelego nu matangi agugutshita gubola nu mbayikhala yaleba ha gumutotesela. (Ish. 19:11) Ujimbilago egi Yehowa udi mujiya muabonga mulonga waye, mbawuguhana ngolo jia gukolesela.—2 Gudi. 16:9; Mulo. 5:8.
GULA ATUHANA NDOLA
6. Mukunda natshi idi nu ndando ha gujiya egi Yehowa wana gutuhana ndola handaga wana gutuzumba? (Hebelu 12:5, 6, 11)
6 Tuajiya guvua gikenene giavula gula Yehowa watuhana ndola. Uvi gula tudi mutangiza phamba ndaga yene, tuajiya gusendesa gutangiza egi Yehowa gakhalelego naye gutuhana ndola nga ndo, ndola yene idi diago yakola. Ngenyi tuajiya gujimbila egi Yehowa wana gutuhana ndola handaga wana gutuzumba. (Tanga Hebelu 12:5, 6, 11.) Gula tudi mutangiza lamba tudi muvua mukunda nu ndola yene, tuajiya guhana Satana njila ha gutuameza matangi etu. Handaga muene wana tshigina egi tutune ndola, tubembe gukombelela Yehowa nu tukatuge mu hungu. Luholo lutshi wajiya gulandula gutadila ndaga mu luholo luabonga gula aguhana ndola?
Yehowa wahanele Phetelo inemo yavula handaga watshiginyile malongo nu gudibulumuisa guagasue (Tala paragrafe 7)
7. (a) Gifua luholo gifuanesa gidi guyimonesa, itshi Yehowa watshitshile tangua Phetelo watshiginyile ndola? (b) Longo ditshi wazula mu gifezegeselo gia Phetelo?
7 Tshigina ndola, kalagala nji usombegeshi. Mbala jiavula Yesu wakhalele mubalela Phetelo ha meso a apostolo ako. (Mako 8:33; Luka 22:31-34) Ndaga yene yakhalele diago gumuhana musonyi! Uvi Phetelo wasalele ya gujinginyina gudi Yesu. Watshiginyile ndola nu wazudile malongo mu gubola guenji. Yehowa wakuatesele Phetelo handaga wakhalele ya gujinginyina nu wamuhanele inemo yavula mu hungu. (Yone 21:15-17; Makal. 10:24-33; 1 Phet. 1:1) Gifezegeselo gia Phetelo gidi gutulongesa itshi? Gula tuatuna gutangiza lamba tudi muvua mukunda nu ndola yatuhanewa, tuatshigina ndola yene nu tuasombegesa, mbatuheta gubonga. Mbayibatela nji athu ako gubonga. Gula tuatshita ngenyi, Yehowa nu aphangi’etu mbaatuzula nu ndando yavula.
8-9. Luholo lutshi phangi Bernardo wadivile tangua amuhanele ndola? Uvi itshi ya mukuatesele ha gusombegesa matangi enji?
8 Tutadilenu gifezegeselo gia phangi Bernardo, gu Mozambique. Luholo lutshi phangi muene wadivile tangua amuwambelele egi gashigo luko mukulu? Udi muzuela egi: “Ngakhalele muvua khabu handaga ngakhalelego mutshigina ndola anguhanele.” Wakhalele gudisagesa egi aphangi mu hungu mbaamutangijila ndaga jiabola. Udi muzuela luko egi: “Gungima dia mbeji jiazonda, ngasendesele gutadila mulonga wene mu luholo luabonga, nu gushila Yehowa nu ulondegi wenji mutshima.” Itshi yakuatesele phangi Bernardo ha gutadila ndaga mu luholo luabonga?
9 Phangi Bernardo wasombegesele matangi enji. Udi muzuela egi: “Tangua ngakhalele mukulu, ngakhalele mukalegela Hebelu 12:7 ha gukuatesa athu ako ha gutadila ndola ya Yehowa mu luholo luabonga. Ngadihudile egi: ‘Nanyi udi naye gukalegela verse eyi?’ Akombeledi agasue a Yehowa nu ame nji.” Gungima phangi Bernardo wasombegesele makalegelo enji ha gushila Yehowa nu organizasio wenji mutshima. Wasendesele gutanga Biblia muavula nu guzula tangua dia gutangigiza ndaga jiene. Ngatshima wakhalele gudisagesa egi aphangi ajiya gumutangijila ndaga jiabola, uvi wakhalele muya nawo mu mudimo wa gulongesa. Wakhalele nji muhana ba komantere mu gudibungisa gua mu hungu. Gungima phangi Bernardo wabuile luko mukulu. Gula aguhana ndola gifua phangi Bernardo, bemba gutangiza lamba udi muvua mukunda nu ndola yene, tshigina malongo nu kalagala usombegeshi.c (Ish. 8:33; 22:4) Gula watshita ngenyi, wajiya gusha mutshima egi Yehowa mbawugukuatesa handaga wasadi ya gujinginyina gudi muene nu mu organizasio wenji.
GULA IDI LAMBA HA GUJIDILA NU USOMBEGESHI WAKALEGEWA MU ULONDEGI WA YEHOWA
10. Usombegeshi utshi wakalegewe gu Isalele walolele gutshigina gua mala ako?
10 Usombegeshi wana kalegewa mu ulondegi wa Yehowa wajiya gulola gutshigina guetu. Gula tuamoneselego gutema, tuajiya gubemba gukombelela Yehowa. Ha gufezegesa, tutadilenu luholo ndaga jiasombegesele mukunda nu enya Isalele. Gutuama egi Yehowa ahane enya Isalele mikhuala, mafumu a fami akhalele mutshita midimo ya nganga-nzambi. Akhalele mutunga iwotshielo nu guhana milambu mukunda nu enya fami jiawo. (Gis. 8:20, 21; 12:7; 26:25; 35:1, 6, 7; Yobo 1:5) Uvi tangua Yehowa wahagele mikhuala, mafumu a fami akhalelego naye gukalagala luko ndaga jiene. Watombele nganga-nzambi mu fami ya Alona ha gumuhana milambu. Ndaga jiasombegesele diago, gula muthu gashigo mu giphuta gia Alona watshita midimo yakhalele naye gukalegewa gudi nganga-nzambi, wakhalele naye gushiyiwa.d (Levi 17:3-6, 8, 9) Yajiya gukhala egi ndaga eyi, yene yatumile Kora, Datana, Abilama, nu mafumu 250 ha gulumbugila Moize nu Alona. (Lutang. 16:1-3) Tushigo diago mujiya. Ikhale ngenyi nga ndo, Kora nu mafut’enji asalelego ya gujinginyina gudi Yehowa. Itshi udi naye gutshita gula usombegeshi umoshi wakalegewa mu ulondegi wa Yehowa udi mulola gutshigina guaye?
Tangua mudimo wa enya Kehate wasombegesele, atshiginyile mudimo waahanewe wa guyimba ngimbo, gubamba mifulo nu jinzo jiakhalele nu ima (Tala paragrafe 11)
11. Longo ditshi tuazula mu gifezegeselo gia enya Kehate akhalele mu giphuta gia Levi?
11 Tshigina usombegeshi udi mukalegewa mu ulondegi wa Yehowa. Tangua enya Isalele akhalele mu mavu a luselenga, enya Kehate akhalele nu ginemo gimoshi gia ndando yavula. Tangua enya Isalele akhalele mukatuga ha phundo, enya Kehate ako akhalele mubata mushete wa gikotelo gutuama dia athu agasue. (Lutang. 3:29, 31; 10:33; Yosh. 3:2-4) Yakhalele diago ginemo gia ndando! Uvi tangua enya Isalele anginyile mu Mavu a Gutendelela, ndaga jiasombegesele diago mukunda nu enya Kehate. Mushete wa gikotelo wakhalelego mubatewa muavula. Tangua Salomo wabuile Fumu, enya Kehate ako abuile ayimbi a ngimbo, ako akhalele mubamba mifulo, ako akhalele abambi a jinzo jiakhalele nu ima. (1 Gudi. 6:31-33; 26:1, 24) Gushigo nga ndaga idi mumonesa egi enya Kehate akhalele muboguta mukunda nu midimo yene, handaga akhalele thomo nu mudimo wa ndando yavula. Ndaga eyi idi gutulongesa itshi? Tshigina usombegeshi wagasue udi mukalegewa mu ulondegi wa Yehowa nu mutshima wagasue, ngatshima usombegeshi wene watshita egi utotese ginemo udi nagio. Suanguluga nu ginemo giagasue gia guhanewa. Ujimbilago egi ishigo inemo yaye yana tshita egi Yehowa aguzule nu ndando. Uvi wana guguzula nu ndando handaga wana gumutumagela.—1 Sam. 15:22.
12. Luholo lutshi phangi Zaina wadivile tangua amuzolele gu Betele?
12 Tutadilenu gifezegeselo gia phangi wa mukhetu Zaina gu Moyen-Orient. Watotesele ginemo giakhalele muzumba muene muavula. Wakalegele mudimo ivo 23 gu Betele, gungima amutumile mu terituare ha gukalagala gifua pionye spesiale. Udi muzuela egi: “Ndaga yene yangusagesele muavula diago. Ngakhalele mutangiza egi ngushigo luko nu ndando. Ngakhalele gudihula egi: ‘Gubola gutshi ngatshitshi?’” Ndaga iko ya gikenene idi egi, aphangi a mala nu a akhetu akhalele muzuela ndaga jiakhalele gumusagesa. Akhalele muzuela egi: “Nga udi nu ndando yavula, nga aguzolelego gu Betele.” Matangua ako phangi Zaina wakhalele muvua gikenene giavula, wakhalele mudila phipha yagasue. Udi muzuela luko egi: “Ngakhalele musha mutshima egi Yehowa nu organizasio wenji ana gunguzumba.” Itshi yakuatesele phangi Zaina ha gukhala nu matangi abonga?
13. Itshi phangi Zaina watshitshile hagula galebigo muila?
13 Phangi Zaina gabembelego egi ndaga jiene jimulebese muila. Luholo lutshi? Wakhalele mutanga malongo adi mu mikanda yetu ana zuelela ndaga ataganele najio. Longo didi muzuela egi, “Vous pouvez vaincre le découragement!” didi mu Inzo Yaleha ya Mutaledi 1 Fevrier 2001 dia mukuatesele muavula. Longo diene didi mumonesa luholo Mako wadivile tangua ginemo gienji giasombegesele. Phangi Zaina udi muzuela egi: “Gifezegeselo gia Mako giakhalele diago gifua gihemba mukunda nu ame, gia ngukuatesele ha guheta gikhesa.” Phangi Zaina gatunyilego mafut’enji. Ha fundo dia gudikhalela hakhenji, wakhalele mulongesa hamoshi nu aphangi a mala nu a akhetu. Wakotelesele egi nyuma ya Yehowa yana tuameza organizasio wenji. Aphangi akhalele nu inemo mu hungu a mukuatesele muavula diago. Wakotelesele nji egi organizasio wa Yehowa wana tshita yagasue ha gula mudimo wa Yehowa ulandule gukalegewa.
14. Phangi Vlado wakhalele gudisagesa mukunda nu usombegeshi utshi? Itshi ya mukuatesele?
14 Mukulu mumoshi gu Slovénie mu jina dia Vlado udi nu ivo 73. Wadisagesele muavula tangua abungishile hungu diawo nu hungu diko nu akangele inzo yawo ya Ufumu. Udi muzuela egi: “Ngakhalelego mukotelesa mukunda natshi akangele inzo yetu ya Ufumu. Ngavile lamba diavula handaga tuakatugile gulondega inzo yene. Ngudi menuisier, ngalondele ima iko ihe-ihe mukunda nu inzo yene ya Ufumu. Organizasio wasombegesele ndaga jiavula diago. Yakhalele lamba gudi alongeshi a gukola gifua esue ha gujidila nu usombegeshi wene.” Itshi yakuatesele phangi Vlado ha gutshigina usombegeshi wene? Udi muzuela egi: “Gutshigina usombegeshi wana kalegewa mu ulondegi wa Yehowa guana gutubatela gubonga guavula. Ndaga yene idi gutukuatesa ha gudilondega mukunda nu usombegeshi wakoma mbawukalegewa mu masugu adi muza.” Udi gudisagesa handaga abungisa hungu dienu nu hungu diko nga ndo ginemo giaye giasombegesa? Khala nu gutshigina egi Yehowa udi mukotelesa luholo udi gudivua. Gula udi mutshigina usombegeshi udi mukalegewa nu wasala ya gujinginyina gudi Yehowa nu mu ulondegi wenji mbawuheta gubonga guavula.—Ngi. 18:25.
KHALA NU MATANGI ABONGA MU NDAGA JIAGASUE
15. Luholo lutshi tuajiya gulandula gukhala nu matangi abonga gula tuatagana nu malamba mu hungu?
15 Luholo tuasuena hehi nu gisugishilo gia mavu awa, tudi naye gujiya egi tuajiya gutagana nu malamba mu hungu. Malamba ene ajiya gutshita egi tukhadigo luko ya gujinginyina gudi Yehowa. Hene, tudi naye gukhala nu matangi abonga. Gula phangi mumoshi watukalegela gubola, tushigo naye gumubambela khabu. Gula atuhana ndola, tushigo naye gulandula gutangiza lamba tudi muvua mukunda nu ndola yene, uvi tudi naye gutshigina malongo nu gukalagala usombegeshi. Gula ulondegi wa Yehowa wakalagala usombegeshi mukunda nu ginemo giaye, udi naye gutshigina usombegeshi wene nu mutshima umoshi nu gutumagela utuameji udi gutuhanewa.
16. Luholo lutshi wajiya gulandula gushila Yehowa nu organizasio wenji mutshima?
16 Wajiya gulandula gushila Yehowa nu ulondegi wenji mutshima gula gutshigina guaye gualolewa. Uvi ha gutshita genyi tudi naye gukhala nu matangi abonga. Yakotelesa egi, tushigo naye gudisagesa, tudi naye gutangigiza muabonga nu gutadila ndaga gifua Yehowa. Khala mulonguga mene jidi mu Biblia jia athu akolesele mu malamba a luholo lumoshi. Khala nji mutangigiza luholo wajiya gulandula ifezegeselo yawo. Khala mutshita gisambu ha gutoga Yehowa ukuateshi. Khala mubalegesa tangua nu aphangi a mu hungu. Ngenyi Satana mbagashigo mumona luholo lua gugukhaphumuna nu Yehowa nga nu organizasio wenji.—Yak. 4:7.
Lungimbo 126 Tubandigo Tulo, Tukhale nu Gutshigina Guakola
a Matangua ako, yajiya gukhala lamba ha gusala ya gujinginyina gudi Yehowa nu mu ulondegi wenji gula ndaga imoshi yakalegewa mu hungu yatusagesa. Mu longo edi, tuza mumona malamba thathu tuajiya gutagana nawo mu hungu nu ndaga tudi naye gutshita ha gusala ya gujinginyina gudi Yehowa nu mu organizasio wenji.
b Mu longo edi, majina ako asombegesewe.
c Wajiya guheta malongo ako abonga mu longo didi muzuela egi “Pouvez-vous de nouveau exercer des responsabilités?” mu Inzo Yaleha ya Mutaledi ya 15 Aout 2009, diyiji 30 ya Français.
d Mukhuala wakhalele muzuela egi gula fumu wa fami udi mutshigina gushiya shitu ha gudia, udi naye guya guyishiya ha fundo dia gijila. Uvi mafumu a fami anyi akhalele gualeha nu fundo dia gijila, akhalelego naye gutshita ngenyi.—Mikh. 12:21.