LONGO DIA 44
LUNGIMBO 33 « Jette ton fardeau sur Jéhovah »
Luholo Tuajiya Gukolesela Gula Atukalegela Ndaga mu Luholo Luabola
“Ubembigo egi ndaga jiabola jigubinge. Uvi landula gukalagala ndaga jiabonga ha gubinga ndaga jiabola.”—ROMA 12:21.
NDAGA JIDI MU LONGO EDI
Mu longo edi tuza mumona ndaga tuajiya gutshita gula atukalegela ndaga mu luholo luabola hagula tubolesago milonga muavula.
1-2. Mu luholo lutshi mukut’etu agasue tuana tagana nu malamba?
YESU wahanele gifegeselo gia mukhetu mumoshi wa gafunda wakhalele mulandula gutoga nzuji ha gumukuatesa handaga muthu mumoshi wamukalegele ndaga mu luholo luabola. Idi yadiago egi alandudi a Yesu akotelesele luholo mukhetu muene wakhalele gudivua handaga athu avula a mu tangua diene akhalele mukalegewa ndaga mu luholo luabola. (Luka 18:1-5) Esue nji mangino tuajiya gukotelesa luholo mukhetu muene wadivile handaga mukut’etu agasue atukalegele gale ndaga mu luholo luabola.
2 Mangino athu ana tangijila athu ako ndaga jiabola, ana khala ndo nu gisemo nu ana kamba gukhala nu ima yavula-vula. Hene tuanago gudihula gula atukalegela ndaga mu luholo luabola. (Mulo. 5:8) Uvi tuajiya guvua gikenene giavula gula phangi mumoshi wa Muklisto watukalegela ndaga mu luholo luabola. Idi yadiago egi aphangi’etu Aklisto anago gutshigina gutukalegela ndaga mu luholo luabola uvi ene nji ashigo athu atagana, matangua ako ajiya gutukalegela ndaga jia luholo elu. Uvi tuajiya guzula malongo mu ndaga Yesu wakalegele tangua mbalagaji jiakhalele gumukalegela ndaga mu luholo luabola. Gula tudi mumonesela mbalagaji jietu khadilo dia guhuiminyina, tudi naye nji gumonesa khadilo diene gudi aphangi’etu Aklisto! Yehowa wana gudivua luholo lutshi tangua diana mona muene aphangi’etu Aklisto nu athu ako gutukalegela ndaga mu luholo luabola? Wana gudisagesa mukunda nu ndaga jiene ba?
3. Luholo lutshi tudi mujiya egi Yehowa wana gudisagesa tangua athu ana gutukalegela ndaga mu luholo luabola? Mukunda natshi?
3 Yehowa wana gudisagesa muavula luholo athu ana gutukalegela ndaga mu luholo luabola, handaga muene ‘wana tshigina nduedi.’ (Ngi. 37:28) Yesu wazuelele egi mu tangua diatagana Yehowa ‘mbawusophesa muphushi mu luholo luatagana’ (Luka 18:7, 8) Gualeha ndo Yehowa mbawukatula malamba agasue nu mbagashigo mubemba egi athu atukalegele luko ndaga mu luholo luabola.—Ngi. 72:1, 2.
4. Mu luholo lutshi Yehowa wana gutukuatesa mangino?
4 Tudi naye gunengena uu nu tangua Yehowa mbawulondega ndaga jiagasue. Uvi mangino wana gutukuatesa tangua athu ako ana gutukalegela ndaga mu luholo luabola. (2 Phet. 3:13) Wana gutulongesa luholo tuajiya gutuna gutshita ndaga jiabola gula atukalegela ndaga mu luholo luabola. Yehowa watuhanele gifezegeselo giabonga mu njila ya mun’enji Yesu ha gutukuatesa ha gujiya ndaga tuajiya gutshita gula atukalegela ndaga mu luholo luabola. Wana gutuhana malongo abonga anyi tuajiya gukalegela gula athu atutshitshila ndaga mu luholo luabola.
TSHITA NDAGA NU GUTEMA GULA ATHU AGUKALEGELA NDAGA MU LUHOLO LUABOLA
5. Mukunda natshi tudi naye gumonesa gutema mu ndaga tudi mutshita gula atukalegela ndaga mu luholo luabola?
5 Tuajiya gudisagesa muavula nga ndo tuajiya guleba muila gula atutshitshila ndaga mu luholo luabola. (Mulo. 7:7) Akombeledi agujinginyina gudi Yehowa gifua Yobo nu Habakuka adivile nji ngenyi. (Yobo 6:2, 3; Hab. 1:1-3) Ishigo ndaga yabola gula tuadivua ngenyi, uvi tudi naye gumonesa gutema mu ndaga tudi mutshita hagula tukalagalago ndaga yabola.
6. Gifezegeselo gia Abasaloma gidi gutulongesa itshi? (Tala nji gifuanesa.)
6 Gula muthu watukalegela gubola nga ndo wakalegela muthu tuana zumba gubola, yajiya gututuma ha gumuvutudila gubola. Gutshita ngenyi guajiya gunana milonga yavula diago. Tutadilenu gifezegeselo gia Abasaloma mun’a Fumu Davidi. Wavile khabu jiavula tangua Amenona wabungishile muila gu ngolo nu phangi’enji Tamale. Ha gutadila Mikhuala ya Moize, Amenona wakhalele naye gushiyiwa mukunda nu ndaga yatshitshile muene. (Levi 20:17) Yakhalelego ndaga yabola luholo Abasaloma wavile khabu, uvi watshitshile gubola luholo luashiyile muene Amenona.—2 Sam. 13:20-23, 28, 29.
Tangua Amenona wabungishile muila gu ngolo nu Tamale, Abasaloma wavile khabu jiakola diago (Tala paragrafe 6)
7. Luholo lutshi muyimbi wa ngimbo wadivile thomo tangua diamonele muene athu mukalagala ndaga mu luholo luabola?
7 Gula athu adi mutshita ndaga jiabola ashigo muhanewa ndola, tuajiya gudihula gula idi nu ndando ha gulandula gutshita ndaga jiabonga. Tuzuelelenu gifezegeselo gia muyimbi wa ngimbo munu wakhalele mumona gifua athu akhalele gutshita ndaga jiabola akhalele nu lujingu luabonga gubalega athu akhalele mutshita ndaga jiabonga. Wazuelele egi: ‘Athu abola ana khala tangua diagasue nu lujingu luabonga.’ (Ngi. 73:12) Wavile khabu jiavula mukunda nu ndaga jiabola jiakhalele mukalagala athu, watangijile egi yakhalelego ndaga yabonga ha gukalegela Yehowa, ndaga yene yamutumine ha guzuela egi: ‘Tangua ngakhalele mutshigina gukotelesa ndaga yene, ngabuile tunga-tunga.’ (Ngi. 73:14, 16) Wazuelele luko egi: ‘Guasalele hazonda hagula malu ami ajimbile njila, guasalele hazonda hagula ngubue.’ (Ngi. 73:2) Ndaga ya luholo elu yabuidile nji phangi Alberto.
8. Luholo lutshi phangi Alberto wadivile tangua amukalegele ndaga mu luholo luabola?
8 Ambidile phangi Alberto mambo egi wakuyile mbongo jia hungu. Ndaga ya lamba idi egi watotesele inemo yenji mu hungu, aphangi avula ajiyile ndaga yene akhalelego luko gumunemesa. Wazuelele egi: “Ngakhalele muvua khabu jiavula, ngalebele nji muila.” Ndaga yene yamuhanele khabu jiavula, gakhalelego luko muya mu gudibungisa, watshitshile nji ivo thano gakhalelego muya mu mudimo wagulongesa. Lumene elu ludi mumonesa ndaga yajiya gutubuila gula tushigo gudikanda tangua athu atukalegela ndaga mu luholo luabola.
LANDULA GIFEZEGESELO GIA YESU GULA AGUKALEGELA NDAGA MU LUHOLO LUABOLA
9. Mu ndaga jitshi jia lamba Yesu wakolesele? (Tala nji gifuanesa.)
9 Yesu wabembele gifezegeselo giabonga gidi mumonesa ndaga tuajiya gutshita gula athu atukalegela ndaga mu luholo luabola. Tutadilenu luholo enya fami yenji nu athu ako amukalegele ndaga. Enya fami yenji amumbidile mambo egi wasaluga, mafumu a ikombelelo amufundjile egi wakhalele mukalagala ndaga jia gushimana mu ngolo jia bademo, masuta a enya Roma amuseguluile, amumonesele lamba gungima amushiyile. (Mako 3:21, 22; 14:55; 15:16-20, 35-37) Yesu wakolesele mu malamba awa agasue uvi gakalegelego nga ndaga imoshi yabola. Malongo atshi tuajiya guzula mu gifezegeselo gia Yesu?
Yesu wabembele gifezegeselo giatagana gidi mumonesa luholo lua gukalagala ndaga gula muthu watukalegela ndaga mu luholo luabola (Tala paragrafe 9-10)
10. Luholo lutshi Yesu wakolesele mu malamba? (1 Phetelo 2:21-23)
10 Tanga 1 Phetelo 2:21-23.a Yesu watubembele gifezegeselo giabonga gia gulandula tangua athu adi gutukalegela ndaga mu luholo luabola. Wakhalele mujiya tangua dia guhena tedie nu tangua dia guzuela. (Mat. 26:62-64) Gakhalelego muhana mvutu mu ndaga jiagasue jia mambo athu akhalele muzuela mukunda nu muene. (Mat. 11:19) Tangua diakhalele muene muzuela, gakhalelego mushingana mbalagaji njienji nga guamonesa lamba. Yesu wakhalele gudikanda handaga wakhalele musha “mutshima gudi muthu wana sophesa mu luholo luabonga.” Wajiyile egi Yehowa wakhalele mumona luholo athu akhalele gumukalegela ndaga mu luholo luabola. Yesu wakhalele nji musha mutshima egi Yehowa mbawumanesela malamba ene agasue mu tangua diatagana.
11. Mu maluholo atshi tuajiya gudikanda mu mbimbi jietu? (Tala nji ifuanesa.)
11 Tuajiya gulandula gifezegeselo gia Yesu gula tudi mumonesa khadilo dia gudikanda mu ndaga tudi muzuela tangua athu atukalegela ndaga mu luholo luabola. Ndaga jiko jiabola athu ajiya gutukalegela jiana khala jiazonda, hene tuajiya guatotesela. Nga ndo tuajiya guhena tedie ha gutuna guzuela ndaga imoshi yajiya gukomesa mulonga wene. (Mulo. 3:7; Yak. 1:19, 20) Uvi matangua ako yajiya gukhala nu ndando ha guzuela gula tudi mutshigina guzuelela muthu udi mumonesewa lamba nga guzuelela giamatshidia giatadila gutshigina guetu. (Makal. 6:1, 2) Gula tudi mutshigina guzuela, tudi naye gutshita ngolo ha guzuela nu guhuiminyina nu ginemua giagasue.—1 Phet. 3:15.b
Gula athu atukalegela ndaga mu luholo luabola, tuajiya gulandula gifezegeselo gia Yesu gia gumonesa gutema nu gutomba tangua nu luholo tudi naye guzuela (Tala paragrafe 11-12)
12. Luholo lutshi tuajiya gusha mutshima gudi muthu wana sophesa mu luholo luabonga?
12 Tuajiya nji gulandula gifezegeselo gia Yesu gula tudi musha “mutshima gudi muthu wana sophesa mu luholo luabonga.” Gula athu ako adi gutukalegela ndaga mu luholo luabola, tudi naye gusha mutshima egi Yehowa udi mujiya giamatshidia. Gujiya ndaga eyi guajiya gutukuatesa ha gukolesela mu lamba diene handaga tudi mujiya egi Yehowa mbawutukalegela ndaga mu luholo luabonga. Gula tuabemba ndaga jiene ha mago a Yehowa, mbatushigo mubamba khabu nga guhagela athu umbalagaji. Handaga gubamba khabu nga guhagela athu umbalagaji yana tuma ha guvutudila muthu gubola, yana katula gusuanguluga nu yana bolesa nji ufuta wa muthu nu Yehowa.—Ngi. 37:8.
13. Itshi yajiya gutukuatesa ha gulandula gukhala nu khadilo dia gukolesela gula atukalegela ndaga mu luholo luabola?
13 Idi yadiago egi mbatushigo mulandula gifezegeselo gia Yesu mu luholo lua tagana. Handaga matangua ako tuajiya gukalagala nga guzuela ndaga mbayitusagesa gungima. (Yak. 3:2) Ndaga jiko jiabola athu ajiya gutukalegela jiajiya gutuhana lamba nu gikenene mu monyo wetu wagasue ha mavu awa a Satana. Gula udi mutagana nu ndaga ya luholo elu, jiya egi Yehowa wana mona malamba aye. Yesu wana jiya luholo udi gudivua handaga muene nji wamonele malamba. (Heb. 4:15, 16) Yehowa watuhanele gifezegeselo giatagana gia Yesu, wana gutuhana nji malongo mu njila ya Mbimbi yenji ha gutukuatesa gula atukalegela ndaga mu luholo luabola. Tutadilenu verse mbadi jidi mu mukanda wa Roma jinyi jiajiya gutukuatesa.
‘BEMBA EGI NZAMBI HAKHENJI AMONESE KHABU JIENJI’
14. Gubemba egi “Nzambi hakhenji amonese khabu jienji” gudi mukotelesa itshi? (Roma 12:19)
14 Tanga Roma 12:19. Mupostolo Phaula wawambelele Aklisto ha gubemba egi “Nzambi hakhenji amonese khabu jienji.” Tuana hana Yehowa njila hagula egi amonese khabu jienji gula tudi mubemba egi muene hakhenji atombe tangua nu luholo lua gulondega ndaga. Tangua akalegele phangi John ndaga mu luholo luabola, wazuelele egi: “Ngakhalele nu funu ya gudikanda hagula ngutshitshigo nga ndaga imoshi yabola uvi yakhalelego yaleba. Mukanda wa Roma 12:19 wangukuatesele ha gunengenena Yehowa.”
15. Mukunda natshi idi nu ndando ha gunengenena Yehowa ha gulondega ndaga?
15 Tuana heta gubonga tangua tuana nengena egi Yehowa alondege ndaga. Gula tuatshita ngenyi, mbatushigo muvua gikenene giavula ginyi tuana vua gula tuakamba gumanesela milonga esue hakhetu. Yehowa udi gutulaya egi mbawutukuatesa. Udi gututoga ha gumunengenena nu udi gutulaye egi mbawulondega ndaga. Gula tuashila Yehowa mutshima, mbatushigo mulandula guvua khabu handaga mbatujiya egi muene mbawutshita ndaga mu tangua diatagana. Yene ndaga yakuatesele phangi John tuazuelela guthunda. Wazuelele egi: “Gula ngazula desizio dia gunengenena Yehowa, muene mbawukalagala ndaga muabonga gubalega luholo ngakhalele naye gutshita.”
“LANDULA GUKALAGALA NDAGA JIABONGA HA GUBINGA NDAGA JIABOLA”
16-17. Luholo lutshi gisambu giajiya gutukuatesa ha gulandula “gukalagala ndaga jiabonga ha gubinga ndaga jiabola”? (Roma 12:21)
16 Tanga Roma 12:21. Phaula nji wawambelele Aklisto ha gulandula “gukalagala ndaga jiabonga ha gubinga ndaga jiabola.” Yesu wazuelele mu diskur dienji holu dia mulundu egi: “Landulenu guzumba mbalagaji jienu nu gukombelela mukunda nu athu adi gumimonesa lamba.” (Mat. 5:44) Yene ndaga yakalegele muene. Yajiya gukhala egi tuatangijile gale luholo Yesu wadivile tangua masuta a enya Roma amukhokhele ha mutshi wa lamba. Yesu wamonesele khadilo dia gukolesela mu malamba avula diago. Tuajiyilego gukotelesa muabonga lamba dinyi dia tagananele nadio muene.
17 Yesu wamonele malamba avula, uvi walanduile guzumba Yehowa nu wasalele yagujinginyina gudi muene. Ha fundo dia guta masuta ene mikumbu, Yesu wakalegele gisambu gudi Yehowa egi: “Tata, atotesele, handaga ashigo mujiya ndaga adi mukalagala.” (Luka 23:34) Gula tudi mukombelela Yehowa mukunda nu athu ana gutumonesa lamba, yajiya gutukuatesa ha gumonesa khadilo dia guhuiminyina nu gutuna guvua khabu jiavula. Yajiya nji gutukuatesa ha gusombegesa luholo luetu lua guatadila.
18. Luholo lutshi gisambu giakuatesele phangi Alberto nu John tangua athu a akalegele ndaga mu luholo luabola?
18 Gisambu giakuatesele aphangi mbadi tuazuelela guthunda ha gukolesela tangua athu a akalegele ndaga mu luholo luabola. Phangi Alberto wazuelele egi: “Ngakombelele mukunda nu aphangi anyi angumbidile mambo. Ngakombelele Yehowa muavula ha gungukuatesa hagula ngutangizago luko ndaga yene.” Ndaga ya gusuanguluga idi egi mangino phangi Alberto wana kombelela Yehowa nu gujinginyi guagasue. Phangi John wazuelele egi: “Ngakhalele mukombelela mukunda nu phangi wangukalegele ndaga yabola mbala jiavula. Isambu yene yangukuatesele ha gutuna gumutadila mu luholo luabola nga gumusophesa, yangukuatesele nji ha guheta guhuima gua mu matangi.”
19. Itshi tudi naye gutshita tangua tudi munengena gisugishilo gia mavu awa abola? (1 Phetelo 3:8, 9)
19 Luholo tudi mujinga ha mavu awa, athu mbaalandula gutukalegela ndaga mu luholo luabola. Uvi ikhale ndaga ya luholo lutshi yatubuila, tuajiya gukolesela gula tudi mulandula gutoga Yehowa ha gutukuatesa. Tuajiya nji gulandula gifezegeselo gia Yesu gula atukalegela ndaga mu luholo luabola nu gulandula gukalegela malongo a Biblia. Gula tuatshita ngenyi, Yehowa mbawutushimbiga.—Tanga 1 Phetelo 3:8, 9.
LUNGIMBO 38 Yehowa Mbawuguhana Ngolo
a Mu mukanda wa 1 Phetelo mukhapho 2 nu 3 Phetelo wazuelele ndaga jiavula jinyi Aklisto a mu siekle ya thomo ataganele najio tangua athu akhalele guakalegela ndaga mu luholo luabola. Wazuelele luholo mafumu a midimo akhalele mumonesa aphangi lamba nu luholo mala anyi akhalelego mukombelela Yehowa akhalele mumonesa akaji’awo lamba.—1 Phet. 2:18-20; 3:1-6, 8, 9.
b Tala video idi muzuela egi: Luholo Guzumba Guana Gutubatela Guhuima gua Giamatshidia mu jw.org.