2 And olketa bigman blo olketa Philistine march witim olketa soldia blo olketa lo olketa grup blo wan handred soldia and wan thousand soldia, and David and olketa man blo hem march bihaen witim Achish.+ 3 Bat olketa prince blo olketa Philistine sei: “Olketa Hebrew hia kam for wat ia?” Achish sei lo olketa: “Diswan hem David, servant blo King Saul blo Israel. Hem stap witim mi for winim wan year finis.+ Start lo day wea hem ranawe kam lo mi kam kasem distaem, mi no lukim hem duim eni nogud samting.” 4 Bat olketa prince blo olketa Philistine kros lo Achish and sei lo hem: “Iu talem hem go bak.+ Talem hem go bak lo ples wea iu givim lo hem. No letem hem kam witim iumi lo faet nogud hem tane raon and faet againstim iumi.+ Sapos hem killim olketa man blo iumi and holem go hed blo olketa for showim lo lord blo hem, datwan bae mekem lord blo hem hapi moa lo hem.