Firstfala Toktok

HOLY SPIRIT nao leadim olketa man wea raetem Bible, and olketa raetem long Hebrew, Aramaic, and Greek languis. For pipol “long evri kantri” kasem gud samting from toktok bilong God, olketa man mas transleitim Bible long staka difren languis. (Matthew 24:14) Olketa kolem twenti-seven buk wea start long Matthew go kasem Revelation, “olketa Christian Greek Scripture” bikos olketa Christian long first century C.E. wea raetem olketa buk hia raetem long Greek languis.

Olketa wakem firstfala New World Translation of the Christian Greek Scriptures long 1950. Olketa iusim Bible long Greek languis wea Westcott and Hort raetem wea followim olketa barava old copy bilong olketa Christian Greek Scripture. Olketa wea transleitim New World Translation traem best for barava followim toktok bilong olketa man wea raetem olketa buk hia long firstaem. Mifala traem best for duim sem samting taem mifala transleitim disfala Bible long Solomon Islands Pidgin followim English edition.

Nem bilong God, Jehovah, hem stap 237 taem long disfala Niu World Bible, Matthew–Revelation. Appendix 1 long disfala Bible hem storyim reason for diswan and garem olketa piksa tu. From hem barava important for nem bilong God hem holy and for evriwan wea laek sev mas prea long Jehovah for helpem olketa, long disfala Bible mifala putim bak nem Jehovah long olketa scripture wea hem shud stap long hem.—Matthew 6:9; Rome 10:13.

Datfala nem, Niu World Bible, hem kam from promis bilong God for mekem wanfala niu world wea evri samting bae raeteous and evriwan bae kasem gud samting. (2 Peter 3:13) Olketa wea transleitim disfala Bible lovem God wea givim kam diswan, and laek for barava transleitim tingting and toktok bilong hem long stretfala wei. Prea bilong mifala hem for disfala Bible hem barava helpem olketa wea garem gudfala heart for kasem “stretfala savve abaotem olketa tru teaching.”—1 Timothy 2:4.